¹ Ya̧tȩ ki̧nö̧ Benjamin ahuaruhuä o'cotö i̧sa̧, ja̧u̧ ubomä̧ juiyó uruhuinö̧. I̧mi̧mä̧ micuinö̧ Cis, Abiel i̧tti̧ ji̧na̧'a̧, ja̧u̧mä̧ Zeror i̧tti̧ ji̧na̧'a̧, ja̧u̧mä̧ Becorat i̧tti̧ ji̧na̧'a̧, ja̧u̧mä̧ Afía i̧tti̧ ji̧na̧'a̧, ja̧u̧mä̧ Benjamin isotö i̧sa̧ ji̧na̧'a̧. ² Ja̧u̧mä̧ i̧tti̧ ya̧tȩrö̧ ku̧nä̧ri̧nö̧ Saúl pä'ö micua̧rö̧, ja̧u̧mä̧ juiyó a̧'cua̧cua̧ ji̧na̧'a̧, Israel ttö̧ja̧ttö̧mä̧ ya̧tȩ'i̧nä̧ toina̧'a̧ ja̧u̧'a̧nö̧ a̧'cua̧cua̧mä̧. Ja̧u̧ i̧mi̧ttö̧ huä̧mecu̧mä̧ ja̧u̧tä̧ ji̧na̧'a̧ korotöttö'inä̧ abonä̧nö̧ otopinömä̧. ³ Cis ä̧ji̧mö̧ burötö̧, Saúl jä'ó ä̧ji̧mö̧, rettehuächinä̧tö̧. Ja̧hua̧nö̧ ji̧yä̧cu̧, Cismä̧ pä'inö̧ i̧tti̧ Saúlru: "Chu̧mu̧huä̧ya̧ttö̧ ya̧tȩrö̧ o'ipö tä'i; jo̧menö̧ jȩpi̧pö̧ usäjätucui chäji burö̧tö̧tö̧. ⁴ Ja̧hua̧nö̧ ja̧'a̧ttö̧ Saúlmä̧ 'cuä'opö 'chi̧nö̧ de'a muä'chiju jö̧me Efrain ötahuiyänä̧ ja̧hua̧ta̧'a̧no 'cuä'opinö̧ Salisa ttö̧ja̧ tti̧rȩjä̧nä̧'inä̧, ja̧hua̧nö̧ 'cuä'pö tti'cha̧'a̧nä̧'inä̧ po̧cui̧po̧co̧tö̧pinä̧tö̧. Ja̧u̧nu o'ca'a 'cuä'opinä̧tö̧ Saalim ttö̧ja̧ tti̧rȩjä̧nä̧, ju'huȩnȩ'inä̧ toina̧'a̧. Ja̧u̧nu o'ca'a 'cuä'opinö̧ Benjamin ahuaruhuä o'cotö tti̧rejä̧nä̧. Ja̧hua̧nö̧ ja̧'a̧nä̧ juorö'inä̧ po̧cui̧po̧co̧tö̧pinä̧tö̧. ⁵ Jahuätö Zuf rȩjȩra̧'a̧ tti̧rȩbȩhui̧'o̧mȩnä̧ Saulmä umöhuäyotö chutäcu ka̧cä̧tö̧rö̧ pä'inö: Ichätucui, ppa̧tä̧chä̧tu̧cua̧, chä'omä burrostö̧rö̧ tta̧'cua̧ rottecuajueimä ujuturutä a̧'cua̧ ro'ecu 'cua̧ra̧'a̧. ⁶ Ja̧'hua̧nö̧ päiyäcu umöhuä̧ya̧mä̧ päinö̧cu̧: Ä̧ju̧cui̧ttö̧, TÖ̧Ä̧NÄ̧HUA̧ jiäu ä̧ju̧cui̧'ö̧'ca̧ jiäcuähuä i̧sa̧ ya̧tȩ pi̧yȩ ötahuiyänä kö̧, ja̧u̧mä̧ ttucuotäcu ja̧'a̧; ja̧u̧ päömä o'cajuiyötä isojö̧nä̧ pä'ö. Ja̧u̧ ö̧jo̧mȩcu̧ chi̧'cha̧ hue'ittö, ti̧mä̧ mä̧nä̧nä̧ ppa̧tä̧cha̧'a̧nö̧ ja̧ pä'ö jiähuatö." ⁷ Ja̧'hua̧nö̧ päcu Saúlmä umöhuä̧ya̧rö̧ pä'inö: Ti̧'chö̧ttö̧mä̧, ¿Ja̧u̧ru̧mä̧ däje tiyäcua'attö̧? Ttu̧cuȩ panmä täcö be'ecuächätujä̧, jui'ätöjä̧ ji̧yȩtȩ'inä ja̧u̧ TÖ̧Ä̧NÄ̧HUA̧ jiäu ä̧ju̧cui̧'ö̧'ca̧ jiäcuähuä i̧sa̧rö̧ tiyö'anö jö̧mä̧. ¿Däjetä ttu̧ju̧nä̧rä̧ttö̧? ⁸ U̧mö̧huä̧ya̧mä̧ Saúlrö ädätömä pä'inö: Pȩnȩ ku̧nä̧rö̧sä̧ pärätä 3nö gramos jo̧mȩtä̧ TÖ̧Ä̧NÄ̧HUA̧ jiäu ä̧ju̧cui̧'ö̧'ca̧ jiäcuähuä i̧sa̧rö̧ chi̧yä̧cuȩmä̧, ti̧mä̧ mä̧nä̧nä̧ ppa̧tä̧chö̧'a̧nö̧ ja̧ pä'ö jiähuäcua'anö." ⁹ (Mo̧ täbocu Israel ttö̧ja̧ttö̧mä̧ TTÖ̧Ä̧NÄ̧HUA̧RÖ̧ ji̧yȩtȩ jä'epö 'chä̧nö̧mä̧ pä'i'änätö̧: Ichi, ti̧'cha̧ videnterö totäja."Vidente pä'ö ottinäcu̧mä̧ jitä mo̧ro̧mä̧ TÖ̧Ä̧NÄ̧HUA̧ttö̧'i̧nä̧ ttö̧ja̧ttö̧'inä kä'co päte'ö adicuä ttö̧ja̧sa̧ ja̧'a̧) ¹⁰ Ja̧u̧nu̧ o'ca'a Saúlmä u̧mö̧huä̧ya̧rö̧ pä'inö: "Adiu pä'öjä̧. Ja̧u̧ttu̧mä̧ ti̧'cha̧ ichi." Ja̧'hua̧nö̧ ja̧'a̧ jahuätömä 'cha'achinätö TÖ̧Ä̧NÄ̧HUA̧ jiäu ä̧ju̧cui̧'ö̧'ca̧ jiäcuähuä i̧sa̧ ötahuiyänä̧ ö̧jo̧mȩcu̧ 'chä̧nö̧. ¹¹ Jahuätö möä'cattö pori̧yä̧'tä̧ päi'ome 'chattächi'omenä, nätö̧ möäyotö ajiya huätta pä'ö ppa̧'ä̧chä̧tö̧rö̧ po̧cui̧pi̧nä̧tö̧; Saúlmä umöhuä̧ya̧cu̧ jahuätörö pä'inä̧tö̧, "¿Vidente pä'ö micuamä tȩnȩ ö̧ja̧'a̧ttö̧?" ¹² Jahuätö nätö̧mä̧ ädätinä̧tö̧: "Topätucui, yȩnȩja̧ kö̧, ucutu cuä'catucu jo̧mȩ päte'ö. Jurunänö tätucui, ja̧u̧mä̧ ötahuiyära̧'a̧ 'chä̧nö̧ rä'opächö, juhua'amä ötahuiyä ttö̧ja̧ ju'toju jo̧mȩttö̧ i̧sa̧ ku icu ttiyiyäcu. ¹³ Ötahuiyänä docuächi'ätucuta'anö̧ cu̧'o̧cui̧'ä̧tu̧cuä̧cua̧ ju'toju jo̧mȩttö̧ u̧cuä̧ cuä̧nö̧ i̧'chä̧cua̧'a̧ ä'canä. Ötahuiyä ttö̧ja̧mä̧ ja̧u̧ i̧rȩbȩhui̧'o̧mȩnä̧tä̧ ttu̧cuȩmä̧ ttucuäcuotö, juhua'amä ja̧u̧tä̧ jä̧cua̧'a̧ ku icu iyähuä adiunä̧tä̧ ji̧ya̧rö̧ pä'ö pä̧cua̧mä̧; ja̧u̧nu̧ o'ca'atä ttä̧tȩpä̧u̧mä̧ ttucuäcuotö. Täcö täcui, räo'ome cu̧'o̧cui̧'ä̧tu̧cua̧rö̧." ¹⁴ Ja̧hua̧nö̧ ja̧'a̧ttö̧ jahuätö 'cha'chepinä̧tö̧ ötahuiyära̧'a̧cu̧. Jahuätö ötahuiyära̧'a̧ dodettomenä̧mä̧, topinä̧tö̧ Samuelrö ttö̧jo̧cua̧'a̧cu̧ icha'a, ju'toju jo̧mecu̧ 'chahuächa pä'ö. ¹⁵ tämä̧, Sau̧l ichäcua'a ä'canä̧ mo̧ro̧, TTÖ̧Ä̧NÄ̧HUA̧MÄ̧ i̧jȩpä̧jä̧'a̧ ji̧na̧'a̧ Samuelrö: ¹⁶ "Yo̧ä̧i̧ jitä mo̧ro̧ jo̧ta̧'a̧nö̧ TÖ huȩdä̧cua̧jä̧ ya̧tȩrö̧ Benjamin ttö̧ja̧ ttirȩjä̧ ra̧'a̧cu̧, ucumä̧ ja̧u̧ru pojopu a̧dȩja dacuepä̧cua̧jä ja̧u̧tä̧ jä̧cua̧'a̧ TTÖ chidepiyu Isral ttö̧ja̧ tturuhua̧ jä̧cua̧mä̧. Ja̧u̧tä̧ ja̧'a̧ TTÖ chu̧mu̧huäyotörö ppä̧dä̧cua̧mä̧ Filisteos ttu̧mu̧ttö̧. TÖ chumuhuäyotörö rȩrö̧jö̧nä̧ topö̧sä, jahuätö jä'epu huottö TTÖ chä'cajo̧me rä̧behuä̧jä̧'a̧." ¹⁷ Samuel, Saúlrö toomenä, TÖ̧Ä̧NÄ̧HUA̧mä̧ päinäcu̧: "¡Ja̧u̧sä̧, ucuru ja̧u̧ jä̧cua̧'a̧ pä'ö jidähuäjäcumä! Ja̧u̧ jä̧cua̧'a̧ chumöhuäyotörö ruhuo huȩä̧cua̧mä̧." ¹⁸ Ja̧'hua̧nö̧ ja̧'a̧ Saúlmä̧ äpate ä'ca tö'cö ichi'ö Samuelrö pä'inö: "Ji'ähuitö: ¿Vidente ojusodemä tȩnȩ hua̧'a̧ttö̧? ¹⁹ Samuelmä Saúlrö ädätömä pä'inö: "Ttötäsä videntemä. Ju'toju jo̧mȩcu̧ ttö chä'canä 'cha'achi, jitä mo̧ro̧mä̧ ttöcu cu̧cuȩmä̧ cu̧cuä̧cua̧jä̧. Yo̧i̧ mo̧ro̧tä̧ cui̧hua̧ pä'ömä hue'ö chicuacujä̧, ja̧'hua̧nö̧ ja̧'a̧ttö̧ cuamiso'quinä ka̧cu̧mä̧ o'cajuiyönä jidähuä̧cua̧jä̧. ²⁰ Bu̧rö̧tö̧ huäbodä mo̧ro̧ jo̧mȩnä̧ re'tehuächa'attörömä cua̧'cua̧ rocuecuä, jahuätömä täcö ttö̧'o̧cui̧'ä̧jä̧u̧. ¿Dinä ku̧nä̧hui̧'i̧na̧'a̧ ka̧'a̧ttö̧ o'cajuiyönä Israel ttö̧ja̧ tteseunä jö̧mä̧? ¿Ucunä'inä ja̧'hua̧ta̧'a̧nö̧ o'catoi'önä cuä'o ahuaruhuänä'inä ko̧ca̧'a̧? ²¹ Saúlmä ädätömä pä'inö: "¿Ttömä Benjamín ahuaruhuä 'cotö i̧sa̧mä̧cö̧sä̧, Israel ttö̧ja̧ ttahuaruhuä 'cotöttö'inä a̧'u̧cuo̧tö̧tä huinätö i̧sa̧mä̧cö̧sä̧? ¿Tta̧'a̧nö̧ pä'ö ja̧'hua̧nö̧mä̧ cucuocuäsättö̧? ²² Ja̧'hua̧nö̧ ja̧'a̧ Samuel ȩmi̧nö̧ Saúlrö ja̧'hua̧ta̧'a̧nö̧ huettö jȩä̧cuä̧huä̧ i̧sa̧rö̧, o'ipinö doächäcuähuoca̧ra̧'a̧, ja̧'hua̧ta̧'a̧nö̧ pȩjä̧mi̧nä̧tö̧ juhuorö jahuätöttö ä̧tȩcuo̧tö̧tä̧ ya̧tȩ ru̧hua̧ päi'önä hueinö, jahuätö ttö̧ja̧mä̧ treinta jo̧mȩnä̧ ji̧na̧'a̧. ²³ Samuel pä'inö dahuähuä ttö̧ja̧rö̧: "I'kächi ppo̧u̧cu̧nä̧ chiyäjittö, ja̧'hua̧nö̧ pädäji'anö; "ppo̧u̧cu̧ iyä'chi." ²⁴ Ja̧'hua̧nö̧ ja̧'a̧ dahuähuä ttö̧ja̧ po̧ya̧ öja ȩmo̧po̧'i̧nä̧tö̧ ä̧tȩcuä̧nä̧ cuä'ö icuähua̧ jö̧nä̧ ja̧'hua̧ta̧'a̧nö̧ ja̧u̧cu̧ 'chä̧tö̧'inä, ja̧'hua̧ta̧'a̧nö̧ ttucua pä'ö iyä'chinä̧tö̧ Saúl to̧ä̧ra̧'a̧nä̧. Ja̧u̧nu̧ o'ca'a Samuel pä'inö: "Topihuä pomä ucu cu̧cuä̧ hua'adö ku̧nä̧hua̧'a̧, cuiti, pomä hua'adö ku̧nä̧hua̧'a̧ ucurutä amöcuädö pi̧yȩ pä̧nä̧, ji̧yȩnö̧ pä̧nä̧ pädinö: "Ttö̧ja̧rö̧mä̧ jo̧mȩnö̧ hue'inösä̧ ja̧'hua̧nö̧ ja̧'a̧ttö̧ Saúlmä u̧cuä̧ cuinö Samuelcu ja̧u̧nö̧ mo̧ro̧. ²⁵ Ja̧u̧nu̧ o'ca'a ju'toju jo̧mȩttö mȩjä̧hui̧nä̧to̧ ötahuiyä röo̧mȩcu̧, Samuel ju'toju isäbättö ucuocuinö Saúlrö. ²⁶ Ja̧'hua̧nö ja̧'a̧ttö̧ mo̧ro̧ juo'omȩnä̧ Samuel huopinö Saúlrö ju'toju isäbära'attö pä'inö: "Ä̧ra̧mi̧'i̧, tehuäcuipa". Ja̧'hua̧nö päcu Saúl ä̧rä̧mi̧'i̧nö, jau̧nu̧ o'ca'a Samelcu ta̧ju̧nä̧ rä'opinä̧tö̧ u̧mi̧ mä̧nä̧ra̧'a̧cu. ²⁷ Ja̧'hua̧ta̧'a̧nö̧ ötahuiyä rö̧o̧mȩ u̧mi̧nä̧ tti̧cha̧'a̧nä̧ , Samuel Saúlrö pä'inö: "Ji'ähui Cu̧mu̧huä̧ya̧rö̧ ttä'canä̧ i̧'cha̧ (ja̧'hua̧nö̧ ja̧'a̧ttö̧ ä'canä̧ 'chi̧nö̧), ja̧'hua̧nö̧ ja̧'a̧nä̧ ucumä ki̧'i̧pi̧jó, huȩnȩ jidähuacu TÖ̧Ä̧NÄ̧HUA̧ ucuru päji."