¹ Samuelmä bö̧o̧sa̧ juo'ächömä, i̧tti̧mö̧rö̧ Israel ttö̧ja̧ tturuhuotö jö̧nä̧tä̧ ku̧ni̧nö̧. ² Ä̧cuo̧mȩnä̧ i̧sa̧mä̧ Joel pä'ö micuinö, ja̧u̧nu̧ o'ca'a i̧sa̧mä̧ Abías pä'ö micuinö. Jahuätömä Beerseba ötahuiyänä kä̧nö̧ röji pähuä isotö jö̧nä̧ ka̧cui̧nä̧tö̧. ³ I̧tti̧mö̧mä̧ ttä'o jȩi̧nö̧'a̧nö̧mä̧ jȩpo̧co̧tö̧ pinätö̧ ja̧'hua̧nö̧ huotö ja̧'a̧ttö̧ TÖ̧Ä̧NÄ̧HUA̧ päinömä jȩpo̧co̧tö̧ pinätö̧, päö jȩtta̧jueimä pärätä ttimita'anätä̧, mippounä iyähuämä suronätä̧ ja̧'hua̧nö̧ jö̧tta'anö adihuomenämä jȩpo̧co̧tö̧ pinä̧tö̧. ⁴ Ja̧'hua̧nö̧ ji̧yä̧u̧ Israel ttö̧ja̧ttö̧ ucuo ttö̧ja̧mä̧ Samuelcu Rama pä'ö micuome ca̧ca̧cu̧ pȩjä̧mi̧nä̧tö̧. ⁵ Ja̧'hua̧nö̧ ja̧'a̧ ja̧u̧rö̧ pä'inätö̧: "Topittö̧, ucumä täcö bö̧o̧sa̧jä̧ ja̧'hua̧ta̧'a̧nö̧ cui̧tti̧mä̧mö̧ ucu jȩ'cui̧nö̧'a̧nö̧mä̧ jȩpo̧co̧tö̧. Ya̧tȩ ru̧hua̧rö̧ iyitö tu̧ru̧hua̧ jö̧nä̧ hueatö, ko̧ro̧jä̧ ttö̧ja̧rö̧ hueä'ija'anö̧. ⁶ Samuelmä pi̧yȩ pa̧'a̧nö̧ pättäjimä kö'cocö pinö: Tu̧ru̧hua̧ ru̧hua̧ iyitö ja̧u̧tä̧ ruhuonä hueatö." Ja̧'hua̧nö̧ pattäcu Samuel TÖ̧Ä̧NÄ̧HUA̧rö̧ jä'epinö. ⁷ TÖ̧Ä̧NÄ̧HUA̧mä Samuelrö pä'inö: Jahuätö ttö̧ja̧ cuahuaruhuä jättepäjimä iyitö; isopäi'önä ucurutämä kö'cö jui'ömä jȩtto̧cö̧ jä̧ji̧, ja̧'hua̧nö̧ ja̧jueimä ttö ru̧hua̧ ttu̧ru̧hua̧rö̧'i̧nä̧ kö'cö jui'ö jȩpä̧jä̧tö̧. ⁸ Jitämä̧ jȩpö̧ ka̧cuä̧tö̧ Egipto ttö̧ja̧ tti̧rȩjä̧nä̧ ttö̧ja̧cua̧'a̧ rä'epö chicuinö mo̧ro̧ jȩpö̧ ttö̧ja̧cui̧nö̧ta'anö, ttörö kö'cö jui'ömä ko̧ro̧jä̧ ttö̧ja̧ ttö̧ä̧nä̧huo̧tö̧rö̧tä̧ ucuo te'ähuinä̧tö̧, ja̧'hua̧nö̧ jȩtti̧nö̧ta'anö ucuru'inä jȩpä̧tö̧. ⁹ Ja̧'hua̧nö̧ ja̧'a̧ttö̧ pättömä jȩpi̧; ja̧'hua̧nö̧ jȩpö̧ kä̧nö̧mä̧ 'cuä̧o̧pä̧cuȩmä̧ ji'ähuitö ja̧'hua̧ta̧'a̧nö̧ ja̧u̧ ru̧hua̧ jahuätörö ruhuonä huȩä̧cuȩ'inä ttu̧huo̧jua̧ ji'ähuitö. ¹⁰ Ja̧'hua̧nö̧ ja̧'a̧ttö̧ Samuelmä TÖ̧Ä̧NÄ̧HUA̧ ucuocuäjimä o'cajuiyötä ji'ähuinö ötahuiyä ttö̧ja̧ ttu̧ru̧hua̧rö̧ ttu̧ju̧nä̧ra̧ pä'ö jättepäja'amä. ¹¹ Pä'inö: "Pa̧'a̧nö̧ huȩä̧cua̧ ru̧hua̧mä̧ ucuturumä. Ja̧u̧mä̧ ucutu cui̧tti̧mö̧ttö̧ ȩmä̧cua̧ ja̧'hua̧ta̧'a̧nö̧ iäre ocä curä caruquiyä cuȩttȩpä̧rä̧cuo̧tö̧rö̧'inä ö'ojo'äcua̧, ca̧ba̧yu̧tu̧nä̧ huä̧nö̧ ja̧'hua̧nö̧ jo̧ca̧'a̧ttö̧'inä iäre ocä curä caruquiyä ä'canä jottäcua'anö. ¹² Miles huotö su̧ro̧da̧u̧ tturuhuotörö'inä ö'ojo'äcua̧, ja̧'hua̧ta̧'a̧nö̧ cincuentanö huotö su̧ro̧da̧u̧ tturuhuotörö'inä. Ja̧u̧mä̧ korotörömä i̧rȩjä̧ cuähuä ttu̧ju̧na̧ pä'ö sattönä huȩä̧cua̧, korotörömä u̧huä̧ju̧ ca̧ca̧tä̧tu̧rö̧'i̧nä̧, ja̧'hua̧ta̧'a̧nö̧ korotörömä kurä rohuähuäcuähuä aditätörö'inä ja̧'hua̧nö̧ jö̧ta'anö iäre caruquiyä jacuä jahuä aditätörö'inä. ¹³ Ȩmä̧tu̧cui̧ ucutu, cuittijutucu ttadita a̧mȩu̧'inä, da'ätö'inä ja̧'hua̧ta̧'a̧nö̧ pan adicuä ttö̧ja̧'inä. ¹⁴ Ȩmä̧tu̧cui̧jó rȩjȩ adihuome ucutä cui̧rȩjä̧, cu̧cuȩcuähuä ko̧mȩ, ja̧'hua̧ta̧'a̧nö̧ olivo pätta'inä, ja̧'hua̧ta̧'a̧nö̧ cuäyajä̧ ucutä cumöhuäyotörö. ¹⁵ Cuȩma̧tu̧ja̧ 10% cuähuä u̧huä̧ju̧ttö̧ ja̧'hua̧ta̧'a̧nö̧ cui'ättattö'inä ja̧'hua̧ta̧'a̧nö̧ cuiyajä̧ curuhuotucu su̧ro̧da̧u̧ tturuhuotörö'inä ja̧'hua̧ta̧'a̧nö̧ ucuru ppä̧'ä̧dä̧rä̧tö̧rö̧'inä. ¹⁶ Cuȩmä̧tu̧cua̧ja̧ ucuturu adiunä ppä̧'ä̧dä̧rä̧tö̧rö̧ ja̧'hua̧ta̧'a̧nö̧ nä̧tö̧rö̧'inä, ucurutä adiunä ppä̧ttä̧dä̧rä̧cuo̧tö̧rö̧ u̧mätö̧ muäyotö ja̧'hua̧ta̧'a̧nö̧ ttä̧ji̧mö̧ burotö̧rö̧'inä; o'cajuiyönä cuaditätucumä ja̧u̧tä̧ öäretä. ¹⁷ Ja̧u̧mä̧ chutä i'ättattö emäcua̧ 10% ja̧'hua̧ta̧'a̧nö̧ ucutumä pä̧i̧cu̧mä̧ hue'ähuotötä cu̧jä̧cuo̧tö̧jä̧. ¹⁸ Ja̧'hua̧nö̧ ja̧'a̧ttö̧, ja̧u̧nu̧ mo̧ro̧ suroja'a pä'ö cui̧'chȩrȩja huerächi'önä cuajahuäcuotöjä̧ ucuo ru̧hua̧ ja̧u̧ huȩä̧u̧ ucututä ȩmi̧nä̧tö̧jä̧ ja̧u̧ru̧ ucuturu ja̧'hua̧nö̧ 'cuäopa pä'ö; ja̧'hua̧nö̧ ja̧'a̧nä̧ TU̧RU̧HUA̧MÄ̧ ja̧u̧nö̧ mo̧ro̧ yoröisotä ädätiyä̧cua̧. ¹⁹ Samuel päö huȩnȩ tta̧ju̧cuomȩnä̧ ötahuiyä ttö̧ja̧mä̧ kö'cocotö pinä̧ttö; Pä'inä̧ttö̧: "¡kö'cocotöjä! Ya̧tȩrö̧ ru̧hua̧rö̧ pähuärö̧jä̧u̧jä̧ ujuturu huea pä'ömä̧. Kara'a rȩjȩtö̧ huȩtta̧u̧ ttö̧ja̧cua̧'a̧ jä̧'i̧jö'a̧nö tö̧ja̧ pä'ö, ²⁰ Ja̧'hua̧nö̧ ja̧'a̧nä̧'i̧nä̧ ucuo ru̧hua̧mä̧ ujuturu ro̧ȩpu̧nö o'ipatö pä'ö, ja̧'hua̧ta̧'a̧nötä̧ curä rohuäu ti'cho̧mȩnä̧'i̧nä̧ tä'canä̧ i̧cha̧ pä'ö. ²¹ Samuel jahuätö pättö o'cajuiyönä̧ ä̧ju̧cuo̧mȩnä̧,ÖÄNÄ̧HUA̧RÖ̧ ucuocu pättäji jä̧ji̧ ppa̧'a̧dö̧ ji'ähuinö. ²² TTÖ̧Ä̧NÄ̧HUA̧ pä'inö Samuelrö:"pättö jȩpi̧ ya̧tȩrö̧ ȩmu ucuo ttu̧ru̧hua̧ päi'önä̧ jahuätö". Ja̧'hua̧nö ja̧'a̧ttö̧ Samuel pä'inö̧ Israel ttö̧ja̧rö̧mä̧: "o'catoii'önä̧ ppa̧cuä̧chä̧tu̧cua'anö ja̧'a̧ cuidepiyutucura̧'a̧tä̧."