¹ Quiriat Jearim ötahuiyä ttö̧ja̧mä̧ ichionä̧tö̧ TU̧RU̧HUA̧ esecuinoca̧ topö, ja̧'hua̧ta̧'a̧nö̧ ȩmi̧pi̧nä̧tö̧ Abnaad ojusodera̧'a̧ muä'ca po̧ri̧yä̧'tä̧ jo̧mȩ. Jahuätömä cä'epö ku̧ni̧nä̧tö̧ i̧tti̧ Eleazarö TÖ̧RÖ̧HUA̧ esecuinoca̧ hua'adö u̧ju̧na̧ pä'ö. ² Ja̧u̧nö̧ mo̧ro̧tä̧ kä̧mä̧dö̧ esecuino̧ca̧mä̧ Quirat Jearim ötahuiyänä kina'ado recuo 20nö a̧'ȩ jo̧mȩnä̧. O'catoi'önä Israel ttö̧ja̧ ttoju odehuiyättömä ajacuähuinätö̧ ja̧'hua̧ta̧'a̧nö̧ eseäcuäunö ppättäda pä'ö TTU̧RU̧HUA̧RÖ̧. ³ Samuel pä'inö Israel ttö̧ja̧rö̧: "Ucutu isopäi'önä TU̧RU̧HUA̧RÖ̧ cuami iso'qui jacuättö amöcuädö ppa̧cuä̧chä̧tu̧cu̧ttö̧mä̧, ja̧'hua̧ta̧'a̧nö̧ yapare cu̧ä̧nä̧huo̧tö̧rö̧ do'opö icu ja̧'hua̧ta̧'a̧nö̧ Astort ucutu cu̧ju̧nä̧rä̧tu̧cuä̧'ca'inä, ucutu ppa̧cuä̧chä̧tu̧cu̧ttö̧mä̧ TU̧RU̧HUA̧RÖ̧ cuami'iso'quinä jahuätö ucuo te'ähuätucui chö̧'ä̧cua̧rö̧tä̧ ja̧u̧ru̧tä̧, ja̧u̧tä̧ ja̧'a̧ filisteos ttö̧ja̧ttö̧ ttö̧ji̧pö̧nä̧ ppä̧dä̧cua̧mä̧. ⁴ Ja̧'hua̧nö̧ ja̧'a̧ Israel ttö̧ja̧mä̧ tätähuä'ca Baales'inä ja̧'hua̧ta̧'a̧nö̧ tätähuä'ca Astarotrö'inä do'opö icuinätö̧ ja̧'hua̧nö̧ jȩpö̧ TTU̧RU̧HUA̧RÖ̧TÄ̧ chö̧'ä̧cua̧rö̧tä̧ ucuo te'ähuinätö̧. ⁵ Ja̧u̧nu̧ o'ca Samuelmä pä'inö: Israel ttö̧ja̧ o'catoi'önä̧rö̧ ca̧ca̧ti̧pi̧ Mizpa ötahiyänä ja̧'hua̧ta̧'a̧nö̧ ttömä ucuturu TÖ̧Ä̧NÄ̧HUA̧ i̧mi̧nä̧ jä̧dȩpä̧cua̧sä̧." ⁶ Jahuätömä Mizpa ötahuiyänä ca̧ca̧cui̧pö̧ ajiya huä'opäjä'cotö ti'inätö̧ TTÖ̧Ä̧NÄ̧HUA̧ to̧ä̧ro̧mȩttö̧. Ja̧u̧nu̧ mo̧ro̧ ttu̧cuä̧ a̧do̧chö̧mä̧ pä'inätö̧: "TÖ̧Ä̧NÄ̧HUA̧rö̧ Suronä̧ jȩpä̧jä̧tö̧jä̧." ja̧'hua̧nö̧ ja̧'a̧ Samuelmä juorötä adihuomenä topö hue'inö Israel ttö̧ja̧rö̧mä̧. ⁷ Filisteas ttö̧ja̧mä̧, Mizpa ötahuiyänä ca̧ca̧cuä̧'cotö ka̧cuä̧tö̧ Israel ttö̧ja̧mä̧ pätta'a ä̧ju̧cu , filisteas ttö̧ja̧ tturuhuotömä Israel ttö̧ja̧rö̧ ru̧huä̧hui̧nätö. Israel ttö̧ja̧mä̧ pi̧yȩ ä̧ju̧cu̧mä̧, rö̧ä̧nä̧ ye'ecuinä̧tö̧ Israel ttö̧ja̧rö̧mä̧. ⁸ Ja̧'hua̧nö̧ jä̧u̧ Israel ttö̧ja̧mä̧ Samuel pä'inä̧tö̧: TÖ̧Ä̧NÄ̧HUA̧rö̧ 'cuäopönä ucuocui ujutu ttiminä, ja̧u̧tä̧ filisteas ttumöhuäyotö su̧ro̧da̧u̧ttö̧ ttö̧ji̧pö̧nä̧ ppädatö. ⁹ Samuelmä̧ oveja i̧ttí̧ atate auttu 'chu'ädö kú icu iyinö̧ U̧RU̧HUA̧RÖ̧. Ja̧hua̧nö̧ jä̧ji o'ca'a Samuel Israel ttö̧ja̧ TTU̧RU̧HUA̧RÖ̧ jä'epinö̧. Jahuätö TTU̧RU̧HUA̧ ädätinä̧cu̧. ¹⁰ Samuel oveja i̧tti̧rö̧ kú icu iya'anä̧mä̧, Filisteo ttö̧ja̧ tö'cöpächinä̧tö̧ Israel ttö̧ja̧rö̧ ttörohuähua pä'ö; Ja̧hua̧nö̧ mo̧ro̧ TÖ̧Ä̧NÄ̧HUA̧ i̧huȩnȩ pä̧'i̧cu̧nä̧ rä̧mipi̧na̧'a̧ Filisteo ttö̧ja̧rö̧ ja̧hua̧nö̧ rä̧mipä̧u̧ ye'ecui'inä̧tö̧, ja̧hua̧nö̧tä̧ mo̧'ä̧chi̧nä̧tö̧ Israel ttö̧ja̧ ttä'cattömä̧. ¹¹ Israel ttö̧ja̧mä̧ ujurunä̧ rä'opchinä̧tö̧ Mizpattömä̧, Filisteo tto'ca'anä̧ ruhui'ö cuä'ö icuinä̧tö̧ Bet Car yabonä̧ttö̧. ¹² Ja̧u̧nu̧ o'ca'a Samuel idó'qui chu'ädö rötinö Mizpattö'inä̧ ja̧'hua̧ta̧'a̧nö Sen'i̧nä̧ kä'co jo̧mȩ. Juhuäne ji̧nomȩmä o'inö Ebezer, päömä̧: "Penȩ jubu ppädäu̧jä̧ TTÖÄNÄ̧HUA̧MÄ̧". ¹³ Ja̧'hua̧nö ja̧'a̧ttö̧ Filisteosmä huetta'anä̧tä̧ ka̧cuinä̧to̧ Israel ttö̧ja̧ tti̧rȩjä̧ beipomȩ'i̧nä̧ cuä'o'ocottö pinä̧tö̧. TTÖ̧Ä̧NÄ̧HUA̧ kö'cocö pinö Filisteos ttö̧ja̧rö̧ Samuel ö̧ji̧nö pänä̧mä̧. Filisteos ttö̧ja̧ ötahuiyä bäreu 'chottipinö ji̧nömä̧ Israel ttö̧ja̧rö̧mä̧ ppa̧'a̧di̧nä̧tö̧, Ecrónttö̧ kämä̧dö̧ Gat beipomȩ jubu; ¹⁴ Israel ttö̧ja̧mä̧ ttírȩjä̧ ji̧nä̧jä̧mä̧ ppa̧'a̧di̧nä̧tö Filisteos 'chu̧tta̧ro̧mȩttö. Ja̧'hua̧nö̧ ja̧'a̧ttö̧ huȩnȩ juiyö ka̧cuinä̧tö Israel ttö̧ja̧ Amorreos ttö̧ja̧cu̧mä̧. ¹⁵ Samuelmä adihuome topö hue'inö Israel ttö̧ja̧rö̧, ja̧u̧ ö̧ji̧nä̧ pä̧nä̧mä̧. ¹⁶ A̧'ȩ jö̧'a̧cuä̧ do'ächö 'chi̧'ä̧nä̧tö̧ Betelttö kä̧mä̧dö̧ Gilgara̧'a̧mä̧ ja̧'hua̧ta̧'a̧nö̧ Mizpa jubö cä'ädö, Ja̧u̧mä̧ adihuomenä topö hue'inö Israel ttö̧ja̧ ttö̧ja̧cuo̧mȩmä̧ o'cajuiyötä. ¹⁷ Ja̧'hua̧nö̧ ja̧'a̧ ja̧u̧mä̧ Ramára̧'a̧ ppa̧'ä̧chi̧nö̧ juhua'amä ojusodemä juȩnȩtä̧ hua̧'a̧ttö̧; ja̧'hua̧ta̧'a̧nö̧ juorötä Israel ttö̧ja̧rö̧mä̧ adihuomenä topö hue'inö. Koromä juȩnȩ aditinö ku icu TÖ̧Ä̧NÄ̧HUA̧RÖ̧ iyähuome'inä.