¹ TÖ̧Ä̧NÄ̧HUA̧ esecuinö ȩco̧ca̧mä̧ filisteas ttö̧ja̧ ttidepiyunämä̧ 7nö kä̧hua̧tö̧ jo̧mȩnä̧ ki̧na̧'a̧. ² Ja̧'hua̧nö̧ ji̧nö̧ o'ca'a filisteas ttö̧ja̧mä̧ ttö̧ä̧nä̧hua̧ttö̧'i̧nä̧ jitötättö'inä kä'co päte'ö adicuä ttö̧ja̧rö̧ ja̧'hua̧ta̧'a̧nö̧ mä̧ri̧mö̧rö̧'inä huopäjä'cotö pä'inätö̧: ¿TTÖ̧Ä̧NÄ̧HUA̧ esecuinö ȩco̧ca̧mä̧ tocu jȩtö̧'a̧nö̧ttö̧? Ji'ähuitö tocu jȩpö̧tä̧ ppa̧tä̧di̧ pa̧'a̧nö̧ ja̧ pä'ö ttidepiyura̧'a̧cu̧mä̧." ³ Ttö̧ä̧nä̧hua̧ttö̧'i̧nä̧ ttö̧ja̧ttö'inä kä'co päte'ö adicuä ttö̧ja̧mä̧ ja̧'hua̧ta̧'a̧nö̧ mä̧ri̧mö̧mä̧ pä'inätö̧: "Ucutu Israel ttö̧ja̧ TTÖ̧Ä̧NÄ̧HUA̧ esecuinö̧ ȩco̧ca̧ huecuätucuomenä̧mä̧, jȩ'cuä̧jä̧tu̧cu̧ micuä jö̧nä̧ ttöäre iyähuä juiyönämä huecuätucuä. Ja̧u̧nu̧ o'ca'amä, nacuä̧chä̧tu̧cu̧mä̧ cu̧'i̧pä̧cuo̧tö̧jä̧, ja̧'hua̧nö̧ jo̧mȩnä̧ jitä jubö päi'önä usurä tȩmä̧u̧mä̧ cädi'ica'attö̧ pä'ö cu̧huo̧jui̧pä̧cuo̧tö̧jä̧." ⁴ Ja̧u̧nu̧ o'ca'a jahuätömä pä'inä̧tö̧: ¿Jȩtä̧ji̧ micuämä̧ däje ttöäre iyähuä tȩpä̧cua̧'a̧ttö̧ TTÖ̧Ä̧NÄ̧HUA̧ esecuinö̧ ȩco̧ca̧ ppa̧tä̧do̧mȩnä̧mä̧? Jahuätömä ttädätinä̧u̧: 5nö̧ jo̧mȩnä̧ ji̧ä̧mö̧ a̧'cuä̧juä̧ jö̧'a̧cuä̧ orottö adicuä'inä ja̧'hua̧ta̧'a̧nö̧ 5nö̧ jo̧mȩnä̧ filisteas ttö̧ja̧ tturuhuotö jö̧'a̧cuä̧ i̧si̧ri̧'cu̧tö̧ orottö adicuotörö'inä. Ucutu'inä curuhuotö'inä usurä ttȩmä̧huä̧tö̧cu̧ jö̧'a̧cuä̧tä̧. ⁵ Ja̧hua̧nö̧ ja̧'a̧ttö̧, ucutumä̧ jȩcu̧'ä̧tucua̧ pä'ö ja̧'a̧ duduyu a̧'u̧cuä̧ ja̧hua̧ta̧'a̧nö̧ ötahuiyä surojuoepätö si̧ri̧'cu̧tu̧ tta̧'u̧cuä̧'inä̧, Ja̧hua̧nö̧ jȩpu̧ adihua'a pä'ätucui Israel ttö̧ja̧ TTÖ̧Ä̧NÄ̧HUA̧RÖ̧TÄ̧. Ja̧u̧tä̧ jä̧cua̧'a̧cö̧ ucuturu suronä̧ jö̧ jȩpö̧'i̧cuä̧cua̧mä̧, cu̧ä̧nä̧hua̧tu̧cu̧ttu̧ ja̧hua̧ta̧'a̧nö̧ cui̧rȩjä̧tu̧cu̧ttu̧'inä̧. ⁶ ¿Dä̧bu̧ ucutumä̧ cuamiso'quitucuttu'inä̧ 'quiyönä̧ cuamucuädätucua'attö̧, egipto ttö̧ja̧ ja̧hua̧ta̧'a̧nö̧ Faraón ji̧nö̧'a̧nö̧mä̧? Ji̧yȩnö̧ pä̧nä̧ Israel ttö̧ja̧ TTÖ̧Ä̧NÄ̧HUA̧ rö̧ä̧nä̧ ro̧ȩpi̧nö̧ ji̧nö̧mä̧; ¿Ja̧hua̧nö̧ jö̧ttö̧ Egipto ttö̧ja̧mä̧ rä'epö tticuoca'anä̧'i̧nä̧ rä'opächocotö pinä̧tö̧? ⁷ Jitämä̧, doähuäcä jo̧mȩnö̧ jȩpä̧tu̧cui pä̧cä̧yö̧ ta̧ju̧ i̧tti̧cuä̧tö̧ttö̧ ti̧'ä̧dö̧, ppi̧'ȩpö̧ nö̧'cähuäcä nö'cähuocotö pä'ijätöttö. Päcäyä i̧sa̧ju̧tu̧ru̧mä̧ ti̧'ä̧dä̧tu̧cui̧ mä̧nä̧ra̧'a̧cu̧ttu̧, ja̧hua̧nö̧ ja̧'a̧nä̧ tti̧tti̧mö̧rö̧mä̧ ȩpä̧tucui̧ isodera̧'a̧cu̧, ta̧ju̧tu̧ttu̧ otó jo̧mecu̧. ⁸ Ja̧u̧nu̧ o'ca'a ȩmä̧jä̧tu̧cui̧ TÖ̧Ä̧NÄ̧HUA̧ esecuinoca̧ ja̧hua̧nö̧ jȩpö̧ rötäjätucui mä̧nä̧ rö̧ä̧mä̧nä̧. Oro a̧'u̧cuä̧ iyätucui mippoönä̧ ttiäre iyähua a̧'cua̧rö̧nä̧ jȩttä̧ji̧ micuä i̧so̧ca̧ jacuä ppeyänä̧ jo̧mȩ ȩnö̧. Ja̧u̧nu o'ca'a ja̧'a̧tä̧ topätucui ttu̧mä̧nä̧nä̧ tti̧'cha̧'a̧nä̧. ⁹ Ja̧u̧nu o'ca'a topätucui; tti̧rȩjä̧ Bet Semes mä̧nä̧cu̧ tti̧'cha̧ pä'ö, ja̧hua̧nö̧ jö̧ttö̧mä̧ TTU̧RU̧HUA̧TÄ̧ jä̧cua̧'a̧ pi̧yȩ röä̧nä̧ surojönä̧ jö̧ jȩpji̧mä̧. Ja̧hua̧nö̧ jö̧ juiyöttömä̧, ja̧u̧nutä̧ cu̧huo̧juä̧cuo̧tö̧jä̧ ujuturu ro̧'ȩpu̧mä̧ ja̧u̧mä̧cö̧ ja̧'a̧ pä'ö; ro̧ȩpa̧ päoca'anä̧ 'cuäopa'a pä'ö." ¹⁰ Jahuätö ttö̧ja̧mä̧ jahuätö pättäjita'anö jȩpi̧nä̧tö̧; Pä̧cä̧yu̧ tti̧tti̧mö̧ ku̧nä̧rä̧tö̧rö̧ 'chu'ädö, carucätta nu'cö ttuninä̧u̧, ja̧'hua̧nö̧ jȩpö̧ tti̧tti̧mö̧rö̧mä̧ isode jacuä ppe'tädö icuinätö̧. ¹¹ TÖ̧Ä̧NÄ̧HUA̧ esecuinö̧ ȩco̧ca̧'i̧nä̧ ja̧'hua̧ta̧'a̧nö̧ i̧si̧ri̧'cu̧tö̧ orottö adicuotörö'inä ja̧'hua̧nö̧ jö̧ta'anö duduyu a̧'cua̧juä̧ ȩco̧ca̧'inä carucättanä rutinä̧tö̧. ¹² Pä̧cä̧yu̧mä̧ jäyäcu'inä 'cä̧tti̧'o̧ca̧'a̧ Bet Semes ötahuiyära̧'a̧cu̧tä̧ 'chi̧nä̧tö̧, oto mä̧nä̧nä̧ huopäyotä 'chi̧nä̧tö̧, ja̧'hua̧nö̧ 'chä̧nö̧mä̧ ttu̧huo̧jua̧'a̧cu̧'i̧nä̧ ttu'uhuecu'inä 'cä̧tti̧'o̧ca̧'a̧tä̧. Filisteas ttö̧ja̧ tturuhuotömä Bet Semes ttö̧ja̧ ttidepiyu beipome jubötä 'chi̧nä̧tö̧. ¹³ Bet Semes ttö̧ja̧mä̧ ttu̧cuä̧ cuähuä trigo pämä̧roppä päi'omettö ca̧ca̧tö̧ ka̧cui̧nä̧tö̧. Jahuätömä ttu cä'epö tottomenä, TÖ̧Ä̧NÄ̧HUA̧ esecuinö̧ ȩco̧ca̧ topömä, esehuinä̧tö̧. ¹⁴ Bet-semes ttö̧ja̧ ttötahuiyänä Josué u̧cuȩ cuähuä ka̧cuo̧mȩ doächi'ina̧'a̧ carucämä ja̧'hua̧nö̧ ja̧'a̧ttö̧ juȩnȩtä̧ inäyu rö̧ä̧yu po̧mȩ pä̧ma̧di̧na̧'a̧, carucä odiyämä nä̧chö̧ icu ttöäre iyähuä jö̧nä̧ pä̧cä̧yu̧rö̧ ku icu TÖ̧Ä̧NÄ̧HUA̧rö̧ iyinä̧tö̧. ¹⁵ Leví ahuaruhuä 'cotömä TÖ̧Ä̧NÄ̧HUA̧ esecuinö ȩco̧ca̧ mȩyȩdi̧nä̧tö̧ ja̧'hua̧ta̧'a̧nö̧ i̧so̧ca̧ juȩnȩtä̧ ppeyänä ko̧ca̧ ji̧yȩtȩ a̧'cua̧juä̧ orottö adicuä ȩco̧ca̧mä̧ inäyunä rutinä̧tö̧, Bet-semes ttö̧ja̧mä̧ ttöäre iyähuä ku icu iyinä̧tö̧ ja̧'hua̧ta̧'a̧nö̧ ja̧u̧tä̧ mo̧ro̧ TÖ̧Ä̧HUA̧RÖ̧ isotörö ku icu iyinä̧tö̧. ¹⁶ Cinconö huotö filisteos tturuhuotömä pi̧yȩ toi'ötä ja̧u̧nö̧tä̧ mo̧ro̧ ppa̧'ä̧chä̧chi̧nä̧tö̧ Ecróra̧'a̧. ¹⁷ Pi̧yȩ ji̧na̧'a̧ dudu oyu oro a̧'u̧cuä̧ adicua'a ttiyinö̧mä̧ Filisteos ttö̧ja̧ TTU̧RU̧HUA̧RÖ̧ kú icú iyähuä päi'önä̧ ttiyinö̧mä̧ jäyä jȩtti̧nö micuä päi'önä: Asdodtto'inä ya'ute, Gaza'inä ya'ute, Ascalónttö̧'inä ya'ute, Gat-ttö'inä̧ ya'ute ja̧'hua̧ta̧'a̧nö̧ Ecrónttö̧'inä̧ ya'ute. ¹⁸ I̧si̧ri̧'cu̧tu̧ orottö adicuotömä̧ jimutȩnö̧ ji̧na̧'a̧ Filisteo ttö̧ja̧ ruhuo huettome jö̧ ta̧'a̧nö̧, ötahuiyä rö̧o̧me'inä̧ ttidepiyu jo̧me'inä̧. Inä̧huä rö̧ähuänä̧, huä̧me rötinä̧tö̧ TTÖ̧Ä̧NÄ̧HUA̧ esecuinoca̧mä̧, pi̧yȩ mo̧ro̧ 'cuäopu topätö ka̧cuä̧tö̧ Bet Semita Josué ö̧ji̧nö̧'a̧nö̧. ¹⁹ TTÖ̧Ä̧NÄ̧HUA̧ ro̧'ȩpi̧nö̧ Bet Semes ttö̧ja̧rö̧, esecuinoca̧ jacuä tottina̧'a̧ttö̧. JA̧U̧MÄ cuä'ö icuinö cicuenta mil setenta jo̧mȩ u̧mätörö. ²⁰ Ttöja̧mä rö̧ä̧nä ajuähuinätö TTU̧RU̧HUA̧ recuätörö cuä'äu icua'a topu. Bet Semes ttöja̧ pä'inätö: "¿Díki̧jä̧ TTÖ̧Ä̧NÄ̧HUA̧ surojö jui'a̧ ä'ca jo̧mȩ ö̧jö'a̧nö hua̧mä? Porömä̧ dirö ki̧jä̧ huetäcua'a esecuinoca̧mä." ²¹ Jahuätömä̧ huȩnȩ ȩcuä̧ ttö̧ja̧rö̧ Quiriat Jearim ötahuiyänä kä̧cuä̧tö̧rö̧ pa̧'a̧nö̧ pä'ö jittäunä hue'inätö̧: Filisteas ttö̧ja̧mä̧ TÖ̧Ä̧NÄ̧HUA̧ esecuinö̧ ȩco̧ca̧mä̧ ppa̧'ä̧dä̧tö̧; mȩyȩdö̧ ucututä juo̧ca̧mä̧ ȩpä̧tu̧cui̧.