¹ Ji̧na̧'a̧ ja̧u̧nö̧ David ja̧'hua̧ta̧'a̧nö̧ umöhuäyotö rȩbȩhui̧nä̧tö̧ Siclagnä huäbodäcuä mo̧ro̧, ja̧'hua̧nö̧ ja̧'a̧ Amalec ttö̧ja̧ Neguev ttö̧ja̧cu̧ rohuähuinä̧tö̧ ja̧'hua̧ta̧'a̧nö̧ Siclag ttö̧ja̧'inä, jahuätömä rohuähuinätö Siclag ku icuinä̧tö̧. ² Ja̧'hua̧ta̧'a̧nö̧ nä̧tö̧rö̧'inä 'chu'ädinätö̧ ja̧'hua̧nö̧ ja̧'a̧ttö̧ o'catoi'önä juhuene ka̧cuä̧tö̧rö̧mä̧, o'catoi'önä ppo̧'ä̧tö̧rö̧'inä ja̧'hua̧ta̧'a̧nö̧ tä̧mö̧rö̧'inä ya̧tȩrö̧'i̧nä cuä'ö cuä'ö icuocotö pinä̧tö̧, ja̧'hua̧nö̧ ja̧'a̧nä̧ ttȩpi̧nä̧u̧ tta̧mö̧nä̧ tti̧'cha̧'a̧nä̧. ³ David umöhuäyotucu ö̧rä̧bȩhui̧'o̧mȩnä̧ ötahuiyära̧'a̧ ku tticuäjäja'atä ji̧na̧'a̧, ja̧'hua̧nö̧ ja̧'a̧ tti̧rȩcua̧mö̧'inä tti̧tti̧mö̧ u̧mä̧tö̧'inä ja̧'hua̧ta̧'a̧nö̧ tti̧tti̧mö̧ nä̧tö̧'inä cärenä ttȩpi̧nä̧u̧. ⁴ Ja̧'hua̧nö̧ ja̧'a̧ David'inä umöhuäyotö'inä ja̧u̧cu̧ kä̧tö̧mä̧ huopö ajahuinätö ttujuru'inä beipächome jubö päi'önä ttajahua pä'ö. ⁵ David irecuamö ta̧ju̧cuäyotörö 'chu'ädi'ö ttȩmi̧pi̧ni̧yä̧cu̧, Jezreel ttö̧ja̧saju Ahinoanrö'inä ja̧'hua̧ta̧'a̧nö̧ Carmel ttö̧ja̧sa̧ Nabal irecua pinäju̧ Abigailrä'inä. ⁶ Davidmä rö̧ä̧nä̧ usurä ȩmä̧hui̧nö̧, ttö̧ja̧mä̧ inädönä icuäu tticuarö pä'ö ttucuocuäcu, ttö̧ja̧mä̧ o'catoi'önä tteseu juiyönä ja̧'a̧ttö̧, ya̧cu̧nä̧ tti̧tti̧mö̧ u̧mö̧tö̧rö̧'inä nä̧tö̧rö̧'inä; ttȩmi̧pi̧yä̧u̧; ja̧'hua̧nö̧ ji̧yä̧cu̧ Davidmä U̧RU̧HUA̧ Ö̧Ä̧NÄ̧HUA̧ i̧mi̧nä̧ juruhuächi'inö. ⁷ Davidmä Ahimelec i̧tti̧ Abiasta sacerdoterö pä'inö: "Pocu cuiyattö sacerdote ö̧'ca̧tä̧huä̧ta̧ cui'cächiyattö pä'ö jädepäcujä̧." Abiastarmä sacerdote ö̧'ca̧tä̧huä̧ta̧ Davidrö i'cächö iyinö. ⁸ Davidmä jȩä̧cuȩ tö'cö TÖ̧Ä̧NÄ̧HUA̧RÖ̧ jä'epinö, pa̧'a̧nö̧ pä'önö: "Pitörö ruda'amä ¿Chi̧rȩbȩhuä̧cua̧'a̧? TÖ̧Ä̧NÄ̧HUA̧MÄ̧ ädätinäcu̧: "Tto'ca'a ru'itö, isopäi'önätä cui̧rȩbȩhuä̧cua̧jä̧, rȩbȩhui̧pö̧mä̧ 'chottipäjimä o'cajuiyönä ppa̧cuä̧dä̧cua̧jä̧." ⁹ Ja̧'hua̧nö̧ ja̧'a̧ttö̧ Davidmä 'chi̧nö̧. 600nö̧ huotö chutäcu cue'ächätucu, jahuätömä Besor aje i̧sä̧rä̧nä̧ rȩbȩhui̧pi̧nä̧tö̧, yotucupönä̧ ttö̧ja̧cuo̧mȩcu̧. ¹⁰ Ja̧'hua̧nö̧ ja̧'a̧nä̧ David juhua'a yabonö tto'ca'anä ru'inö 400nö̧ huotöcu, korotö 200nö̧ huotömä tto'ca'a ka̧cui̧pi̧nä̧tö̧, jahuätömä juiyöpächäjätö jina'a Besor aje i̧sä̧r'i̧nä̧ ttöjähuö juiyönätä̧. ¹¹ Meje'canä ö̧ja̧'a̧ Egipto ttö̧ja̧sa̧rö̧ po̧cui̧pi̧nä̧tö̧ ja̧u̧rö̧mä̧ David ö̧jo̧mȩcu̧ i'cächinätö̧, u̧cuȩ ttiyäcu cuinö, ja̧'hua̧ta̧'a̧nö̧ ajiya'inä ttiyäcu ahuinö, ¹² Jahuätömä higo i̧sä̧si̧ a̧'u̧cu̧nä̧ 'te'ädö ttiyinä̧cu̧ ja̧'hua̧ta̧'a̧nö̧ uva isächa'inä. Ja̧u̧ u̧cuȩ ucuäji o'ca'a, ujuru ȩmä̧ji̧ o'ca'a , u̧cuȩ'i̧nä̧, huäbodäcuä mo̧ro̧ juhua'atäcu ajiya'inä huäbodäcuä yodo jo̧mȩnä̧ ahuoca'a jä̧ja̧'a̧ ji̧na̧'. ¹³ David pä̧i̧nä̧u̧: Ucumä titö i̧sa̧ cuättö? ¿torö cuichäjättö? ja̧u̧ pä'inö: "ttömä Egiptottö ttö̧ja̧ttö̧ mö̧ä̧ya̧sa̧, amalecita huejó adicuä i̧sa̧sä̧; chu̧ru̧hua̧mä̧ huäbodäcuä mo̧ro̧ jo̧mȩnä̧ na̧dä̧chi̧yä̧cu̧ hue'ö icuäjäcusä. ¹⁴ Rohuäu i̧huä̧jä̧tö̧jä̧ Neguev cereteos ttidepiyura̧'a̧ Juda rȩjȩ jacuä ka̧cuä̧tö̧rö̧, ja̧hua̧ta̧'a̧no̧tä̧ Neguev de Caled'ra̧'a̧'i̧nä̧, ujutumä ka̧cui̧pa̧ja̧tö̧jä̧ Siclagnä. ¹⁵ Davidmä pä'inö: ¿Näu̧cuä̧rä̧tö̧ ttö̧jo̧mȩcu̧ cuȩpä̧cu̧sä̧? Egto ttö̧ja̧sa̧mä̧ päinäcu̧: Dios i̧mi̧nä̧ huȩnȩtö̧ pä'ittö cuä'ö chicuococu cuä̧cua̧jä̧ jö̧nä̧, ja̧'hua̧nö̧ jo̧ca̧'a̧ttö̧'i̧nä̧ chu̧ru̧hua̧ u̧mö̧nä̧ cuiyö juiyattö pä'ö, ja̧'hua̧nö̧ jö̧ttö̧mä̧ pitö näu̧cuä̧rä̧cuä̧huä̧ ttö̧ja̧rö̧ o'ipö chiyäcua̧jä̧. ¹⁶ Egipcio ttö̧ja̧sa̧ Davidrö ȩpo̧mȩnä, nä̧u̧cuä̧ra̧ttö̧mä ttípperehuächa'atä ji̧nä̧'a̧ juä̧'jä̧ rȩjȩ o'cajuiyönäta̧, ja̧u̧ Filisteos tti̧rȩjä̧tö̧'i̧nä Judá tti̧rȩjä̧tö̧'i̧nä̧ ttönä̧u̧cuä̧ji̧nä̧mä cuänö'i̧nä au'inä tö'öínä jȩpi̧nätö. ¹⁷ David rohuähuinö yo̧ä̧i̧ kä̧hua̧ räopamȩttö käbä̧dö̧ koro mo̧ro̧ ni̧pä̧ro̧mȩjobu kä'ädö. Ya̧tȩi̧nä ti'ipächocö pinö jahua'an ja̧'anä cuatrocientonö huotö muäyottotä ki̧pi̧nättö cameyu̧tu̧nä̧ cuä̧bä̧dö̧ tti'ipächinättö. ¹⁸ Davidmäo'cajuiyönä ppa̧'a̧di̧nö̧ amalec ttö̧jä̧ ttȩmä̧ji̧mä̧; ja̧hua̧ta̧'a̧nö̧ i̧rȩcua̧mö̧ ta̧ju̧ru̧'i̧nä̧ ppa̧'a̧di̧nö̧. ¹⁹ Koromä juiyina̧'a̧, bäreu'inä ppo̧ö̧'i̧nä̧, i̧tti̧mö̧ u̧mä̧tö̧ nä̧tö̧'i̧nä̧, o'cajuiyönä ttö̧nä̧u̧cuä̧ji̧mä̧, ja̧hua̧ta̧'a̧nö̧ ya̧cu̧pö̧nä̧ ttiäre päi'önä ttö̧nä̧u̧cua̧ji̧'i̧nä̧. Davidmä o'cajuiyönä ppa̧'a̧di̧nö̧ i'chächinö. ²⁰ Davidmä ȩmi̧nö̧ o'cajuiyönä ttä̧ji̧mö̧ ttö̧jo̧cuo̧mȩmä̧, ja̧hua̧ta̧'a̧no̧ täji pä̧ca̧yö̧rö̧ ya'ätörömä. Pä'inatö: "Pitö ja̧'a̧ David ä̧ji̧mö̧tö̧ cu̧nä̧u̧cuä̧tu̧cuä̧u̧mä̧." ²¹ Davidmä 200nö umätö tti̧'chö̧ juiyönä ji̧yö̧pä̧chä̧jä̧tö̧ tto̧jo̧mȩcu̧ ichinö, Besor aje i̧sä̧rä̧nä̧ ka̧cui̧pä̧jä̧'cotö ttö̧ja̧cuo̧mȩcu̧. Pitömä Davidcu'i̧nä̧ ja̧u̧tä̧cu̧ ka̧cuä̧tu̧cu̧'i̧nä̧ ttö̧'ä̧tȩcuä̧cha̧ pä'ö yabonö 'chi̧nä̧tö̧, Davidmä jahuätö ttö̧jo̧mȩcu̧ ichi'ömä jahuätörö te'ähinö. ²² Ja̧'hua̧nö̧ ja̧'a̧ o'catoi'önä suropätömä ja̧'hua̧ta̧'a̧nö̧ jitö micuähuoca'a jö̧nä̧ topätö Davidcu cue'ächätömä pä'inä̧tö̧: Tta̧'a̧nö̧ pä'ö pitömä ujutumä ttichoca'ajä̧ttö̧, curä rohuäu tȩmȩji̧ttö̧mä̧ ti̧yo̧co̧u̧ ttäcuotö. Yotucunä u̧mä̧tö̧mä̧ ttirecuarötä. tti̧tti̧mö̧rö̧tä̧ ȩmi̧pö̧ tti̧'cha̧ pä'ö ja̧'a̧." ²³ Ja̧'hua̧nö̧ ja̧'a̧ David pä'inö" "Ucutumä ja̧'hua̧nö̧ jȩpu̧ cu̧ji̧yä̧tu̧cu̧'a̧nö̧ ja̧'a̧, ttö chi̧jä̧hua̧'inä TU̧RU̧HUA̧'i̧nä̧ iyinömä a̧ isopäi'önätä̧ iyinäcusä̧. Ja̧u̧mä̧ isopäi'önä̧tä̧ tta̧'a̧ri̧nö̧ ja̧'hua̧ta̧'a̧nö̧ i̧yi̧nä̧u̧jä̧ ujututä tumönä suropätö ujuturu huetta pä'inä̧tö̧rö̧. ²⁴ ¿Dijä̧ttö̧ ä̧ju̧cuä̧cua̧mä̧ pi̧yȩ huȩnȩmä̧? o'cajuiyönä yoräteunätä korotö'inä curära̧'a̧ dodepätörömä, ja̧'hua̧nö̧tä̧ jä̧cua̧'a̧ korojuäi'inä, korotö ttö̧ja̧'inä tta̧'a̧rä̧tö̧ korojuäi'nä; jahuätömä yoräteunä̧tä̧ ttiyä'chäcuähuäcuotö. ²⁵ Ja̧u̧nu̧tä̧ kä̧mä̧dö̧ ja̧u̧nu̧tä̧ mo̧ro̧ jitä mo̧ro̧ jubö, Davidmä jȩpi̧nö̧ hueähuä huȩnȩ ja̧'hua̧ta̧'a̧nö̧ hueähuä ttö̧jä̧cuȩ huȩnȩ'inä Israel ttö̧ja̧. ²⁶ Ja̧'hua̧nö̧ ja̧'a̧ Davidmä ichinö Siclagra̧'a̧, ja̧u̧mä̧ hue'inö a̧'u̧cu̧nä̧ rohuäu 'chottipäjittö bö̧o̧sa̧tö̧ JUdánä ka̧cuä̧tö̧ ahuaruhuärö pä'ö kä̧nö̧: Pi̧yȩ ja̧'a̧ mippounä iyähui'ö ucuturu rohuäu 'chottipäji Tu̧ru̧hua̧ Dios aboiyotöttö." ²⁷ Ja̧u̧mä̧ ja̧'hua̧ta̧'a̧nö̧ hue'inö a̧'u̧cu̧nä̧ buecuächätörö ju̧huȩnȩ ka̧cuä̧tö̧rö̧ Betelnä. Ja̧'hua̧ta̧'a̧nö̧ jahuätörö'inä hue'inö ju̧huȩnȩ ka̧cuä̧tö̧rö̧ Ramatnä kä̧hua̧ ieruhua'acu ja̧'hua̧ta̧'a̧nö̧ ttä̧'ca̧cu̧ kacuätö Ja̧ti̧r pä̧'ö̧ mi̧cuo̧mȩ. ²⁸ Ja̧'hua̧nö̧ ja̧'a̧ ttä'cacu ka̧cuä̧tö̧ ju̧huȩnȩ jahuätörö'inä Aroer, ja̧'hua̧ta̧'a̧nö̧ ä'canä ka̧cuä̧tö̧ ju̧huȩnȩ sifmot, ja̧'hua̧ta̧'a̧nö̧ ja̧'a̧nä̧ ttä'cacu ka̧cuä̧tö̧rö̧'i̧nä̧ ju̧huȩnȩ Estemoanä. ²⁹ Ja̧u̧'inä ji̧yȩtȩ hue'inö ucuo ttö̧ja̧ Racal pättome ka̧cuä̧tö̧tö̧, ja̧'hua̧ta̧'a̧nö̧ jitö Jerameelitas pättome ka̧cuä̧tö̧rö̧'inä ja̧'hua̧nö̧ jö̧ta'anö Quenitas pä̧ttä̧u̧ ttidepiyunä ka̧cuä̧tö̧rö̧'inä, ³⁰ ja̧'hua̧ta̧'a̧nö̧ Horma pättome ka̧cuä̧tö̧rö̧'i̧nä̧ ja̧'hua̧nö̧ jö̧ta'anö Corasán pä'ö micuome ka̧cuä̧tö̧rö̧'inä ja̧'hua̧ta̧'a̧nö̧ jitö atac pättome ka̧cuä̧tö̧rö̧'inä. ³¹ ja̧'hua̧nö̧ jö̧ta'anö Hebrón ötahuiyänä ka̧cuä̧tö̧rö̧'inä ja̧'hua̧ta̧'a̧nö̧ jä̧ttä̧yä̧jä̧tä̧ David'inä umöhuäyotucu cueächinome pönämä.