¹ Filisteosmä Israel ttö̧ja̧mä̧ rohuähuinä̧tö̧, Israel ttö̧ja̧ttö̧ u̧mä̧tö̧mä̧ filisteos ttä'ca jo̧mȩttö̧ dö'ecuächinä̧tö̧ ja̧'hua̧ta̧'a̧nö̧ Gilboa möä'cattö to'e'inätö̧. ² Filisteas ttö̧ja̧mä̧ Saúl o'ca'anä ru'i'inä̧tö̧ ja̧'hua̧ta̧'a̧nö̧ i̧tti̧mö̧ ttutu'cönä. Filisteas ttö̧ja̧mä̧ ja̧u̧ i̧tti̧mö̧; Jonatánrö̧'i̧nä̧, Abinadabrö'inä ja̧'hua̧ta̧'a̧nö̧ Malquisúarö'inä cuaä'ö icuinätö̧. ³ Curämä rö̧ä̧nä̧ rohuähuinätö̧ Saúlcumä ja̧'hua̧nö̧ jo̧mȩnä̧ 'po'obönä po'ähuätörö'inä cuä'ö icuinätö̧. Ja̧u̧mä̧ jähuätö jȩttä̧ji̧nä̧ rö̧ä̧nä̧ barahuinäcu̧. ⁴ Ja̧u̧nu̧ o'comenä Saíl pä'inö curä rohuäu 'ca̧tä̧cuä̧huä̧ tta̧'ä̧rö̧rö̧, "Rä'epi cucurä'chu jähuätörö tä'ö icuittö jahuätucu. Ja̧'hua̧nö̧ jo̧ca̧'a̧ttö̧mä̧ suronä jȩtta̧ pähuätä rȩbȩhuä̧cua̧'a̧ ja̧'hua̧ta̧'a̧nö̧ suronätä jȩttä̧cuo̧tö̧ ttörömä. Ja̧'hua̧nö̧ ja̧'a̧nä̧ curä ruhuäu tto'ecuä̧rä̧cuä̧huä̧ tta̧'a̧rö̧mä̧ ja̧'hua̧nö̧ jȩa̧ pä'ocö pinö, juiyo rä̧ȩ'inä yecuächa'attö. Ja̧'hua̧nö̧ ja̧'a̧ Sa'ul chutä ucurä'chu ȩmo̧po̧'ö̧ ja̧'hua̧ta̧'a̧nö̧ ta'au icu ma'äminö isaju ku̧huä̧mȩ. ⁵ Ja̧'hua̧nö̧ ja̧'a̧ curä rohuäu ttoecuäcuähuä ttö̧ja̧sa̧mä̧ topinö Saúl 'corujuoächa'atä, ja̧u̧'inä ja̧'hua̧nö̧tä̧ curä'chu ta'äu icu ma'inö ja̧'hua̧ta̧'a̧nö̧ ja̧u̧tä̧cu̧ 'coru pä'i'inö. ⁶ Ja̧'hua̧nö̧ ja̧'a̧ttö̧ Saulmä 'corujuo'ächinö, i̧tti̧mö̧ huämetucuäcu, ja̧'hua̧ta̧'a̧nö̧ ppädäcuähuä i̧sa̧'inä; pitö u̧mä̧tö̧mä̧ o'catoi'önä 'coru juo'ächinätö̧ ja̧u̧nu̧ mo̧ro̧tä̧. ⁷ Israel ttö̧ja̧ ji̧jä̧cu̧ jo̧mȩ pämäroppä päi'ome ka̧cui̧nä̧tö̧ jahuätömä Jordán ajettömä yabonänö ji̧na̧'a̧, Israel ttöjamä tuttipächäja'atä topinätö̧, ja̧'hua̧nö̧ ja̧'a̧ Saúlmä i̧tti̧mu̧cu̧ 'corujuoächa'atä ji̧na̧'a̧, jahuätömä ttidepiyumä jaropi'ö tö'ipächinä̧tö̧ ja̧'hua̧nö̧ tuttipächäjome o'come ichi'ö ka̧cui̧nä̧tö̧. ⁸ Koro mo̧ro̧ 'cuäopina̧'a̧ filisteosmä ichinätö̧ hua'ö icuäjäptörö ȩmö̧, jahuätömä Saúl i̧tti̧mö̧ huämetucuäcu 'coru juo'ächäji'ca Gilboa möä'canä ö̧'a̧'a̧ po̧cui̧pinätö. ⁹ Jahuätömä ttupiyä 'cui'ö tticuinä̧u̧ ja̧'hua̧ta̧'a̧nö̧ tabo jähuä ttoecuäcuähuä'inä 'cho'ipö ja̧'hua̧nö̧ jö̧ta'anö huȩnȩ ȩcuä̧ ttö̧ja̧rö̧ filisteos ttö̧ja̧ tti̧rȩjä̧ jä̧tä̧yä̧jä̧ huȩnȩ ttö̧ä̧nä̧hua̧ ö̧jodenä ttȩpa̧ pä'ö ja̧'hua̧ta̧'a̧nö̧ ttö̧ja̧rö̧'inä. ¹⁰ Jahuätömä ttabo jähuä ttoecuäcuähuämä Astarotrö ucuo tettähuodenä ku̧ni̧nä̧tö̧ ja̧'hua̧ta̧'a̧nö̧ Bet San ötahuiyä ttoecuäbämä o'co jähuämä ti̧'ä̧dö̧ ru̧ni̧nä̧tö̧. ¹¹ Galaab rȩjȩnä̧ ka̧cuätö Jabes ötahuiyä ttöja̧ ttä̧ju̧cuo̧mȩnä̧ Filisteas ttöja̧ Saúlru ucuotäcuähuä juiyönä jȩtta̧ji̧ ttä̧ju̧cuo̧mȩnä̧, ¹² ja̧hua̧nö̧ ja̧'a̧ttö̧ o'catoi'önä u̧mätö juruhuätömä ä̧rä̧mi̧ö yodo 'cuäonätä 'chinätö Saúl ja̧hua̧nö̧tä̧ Saúl o'co jähuä ja̧hua̧ta̧'a̧nö̧ i̧tti̧mö̧ tto̧'co'inä Bet Sán ötahuiyä räbättö ȩmi̧nä̧tö̧. Jahuätömä 'chi̧nä̧tö̧ Jabes ötahuiyära̧'a̧ jua'attötä ku'icuinä̧tö̧. ¹³ Ja̧hua̧nö̧ ku'icu ttihue'quiyutä ȩmö̧ Tamarisco dau dȩa̧'a̧ rȩa̧dö̧ icuinätö Jabes ötahuiyänä, ja̧hua̧nö̧ jȩpö̧ ttu̧cuä̧ a̧do̧chi̧nä̧tö̧ ji̧mu̧tȩ ta'arenö mo̧ro̧.