¹ Filisteosmä ca̧ca̧cui̧nä̧tö̧ Afec pä'ö micuome, ttumöhuäyotö o'catoi'önä̧rö̧ curä ttö̧ja̧rö̧: Israel ttö̧ja̧mä ä'ecuinä̧tö̧ aje pö̧o̧mȩ jäyänä Jezreel pä'ö micuome. ² Filisteos tturuhuotömä pperecuächinätö̧ recuätö pönä cienö jo̧mȩnä̧ ja̧'hua̧ta̧'a̧nä̧ miles jo̧mȩ pö̧nä̧; Davidmä umöhuäyotucu Aquis o'ca'a jo̧mȩnä̧ 'cuä'o'inätö̧. ³ Ja̧'hua̧nö̧ ja̧'a̧ filisteos tu̧ru̧hua̧mä̧ pä'inö: "Däje jȩtta̧'a̧ttö̧ jitöja hebreos ttö̧ja̧mä̧? Aquismä pä'ö pä'inö korotö ruhuotö filisteosrömä: ¿Pidemä Davidmäcö̧ ja̧'a̧, Saúl umöhuäya̧, Israel ttö̧ja̧ ttu̧ru̧hua̧, ja̧u̧mä̧ ttöcu kä̧ji̧mä̧ ji̧yȩnä̧ mo̧ro̧ ja̧'hua̧ta̧'a̧nö̧ pi̧yȩ du'onä ja̧'hua̧nö̧ ja̧'a̧nä̧ ttömä po̧cui̧pö̧ päjisä koromä ja̧u̧rö̧mä̧ ttöcu ichäji mo̧ro̧ jo̧mȩ jubö? ⁴ Ja̧hua̧nö̧ ja̧'a̧nä̧ ruhuottö tti̧tti̧mu̧mä̧ ja̧u̧ru̧ ttamisurunä topinätö̧; jähuättö pättinäcu̧: "Ja̧u̧ ttö̧ja̧sa̧ i̧u̧nä̧ jȩpä̧tu̧cui̧, ucu cuiyinomecu̧ ppa̧huä̧chö̧nä̧; ujutu rohuäu tti̧'chä̧'a̧mä̧ ichö juiyönä, törohuähuomettö̧ taboi̧ya̧ jä̧'i̧nö̧'a̧nö̧ ö̧ja̧'a̧cu̧. Jua'amä ¿tocu jö̧ttö̧tä̧ u̧ni̧chä̧rö̧ o̧jo̧'a̧nö̧ jä̧ttö̧ u̧ru̧hua̧cu̧mä̧? ¿Ja̧u̧mä̧ ujutu tu̧mu̧hu̧ayotö tu̧ru̧hua̧mä̧cö̧ ja̧'a̧? ⁵ ¿Ppidemäcö̧ ja̧'a̧ Davidmä, korotö korotucu ra̧'ö̧ tö'önö̧ pä'i'änömä: "Saulmä milesnö jo̧mȩnä̧ cuä'äu icuäji, ja̧hua̧ta̧'a̧no̧ David'inä diez milnö jo̧mȩnä̧'?" ⁶ Ja̧'hua̧nö̧ ja̧'a̧ Aquismä Davidrö huopäji'ca̧mä̧ pä'inö: "Ja̧'hua̧nö̧ TÖ̧Ä̧NÄ̧HUA̧MÄ̧ kö̧ ja̧'a̧ttö̧, ucumä adiutä jȩpä̧'i̧jö̧jä̧, ucumä ttöcu'inä ja̧'hua̧ta̧'a̧nö̧ chumöhuäyotö tochomenämä 'chi̧'i̧pö̧mä̧ adiutä ppa'ächä'ijöjä, isopäi'önätä ttö chö̧ja̧'a̧cu̧ cuichina'attö̧ jitä mo̧ro̧ jubö päi'önä ucu surojö jȩ'cu̧mä̧ topocö pä'ijösä. Ja̧'hua̧nö̧ ja̧'a̧nä̧ ruhuotömä ucucu esecumä ka̧cuo̧co̧tö̧. ⁷ Ja̧'hua̧nö̧ ja̧'a̧ttö̧ jitämä huȩnȩ juiyönätä̧ ppa̧'ä̧chi̧, ruhuotö filisteos ttö̧ra̧huä̧rö̧ juiyäcua'anö." ⁸ Davidmä, Aquisrö pä'inö: " Ja̧'hua̧nö̧ ja̧'a̧mä̧ däje jȩchä̧jä̧ttö̧? ¿Daje to'cuä'ijättö cumöhuä̧ya̧rö̧mä̧, ucu cu̧ja̧'a̧cu̧ chichinomettö̧ jitä mo̧ro̧ jubömä, ucu chu̧ru̧hua̧ ru̧hua̧ cuaboiyotörö rohuäu chi̧'chö̧ juiyönä ro̧cuȩpä̧rö̧nä̧mä̧?" ⁹ Aquismä ädätö Davidrömä pä'inö: "Ttö tochomenämä huȩnȩmä̧ jui̧'a̧jä̧, TÖ̧Ä̧NÄ̧HUA̧ huȩ'ä̧hua̧ 'cua̧rö̧nä̧; ja̧'hua̧nö̧ ja̧'a̧nä̧ filisteos tturuhuotömä pä'äjätö: "Rohuäu ti̧'cho̧mȩnä̧mä̧ ujutucumä ichocö jä̧cua̧. ¹⁰ Ja̧hua̧nö̧ ja̧'a̧ttö̧ jitämä cu̧ru̧hua̧ u̧mu̧hu̧äyotö ucucu ichäjätucu; mo̧ro̧ päia'a porächi'ö tȩa̧huä̧chi̧ö̧ ta̧'a̧nä̧, tä'i." ¹¹ Ja̧hua̧nö̧ ja̧'a̧ttö̧ Davidmä yo̧a̧'a̧nä̧ porächinö, u̧mu̧huäyotucu, mo̧ro̧ päi'a'a 'chi̧ntö̧, ppa̧tä̧cha̧ pä'ö Filiatea ttö̧ja̧ tti̧rȩjä̧cu̧. Ja̧hua̧nö̧ ja̧'a̧nä̧ Filistea ttö̧ja̧mä̧ 'chi̧nä̧tö̧ Jezreelra̧'a̧cu̧.