¹ Davidmä a̧miso'qui jacuänä̧ pä'inö: "Yaute mo̧ro̧ Saúlmä ttörö cuäö icua̧cua̧; ttörö adihua̧juäimä juiya'a Filisteos tti̧rȩjä̧ttö̧ tödipacha päömä; Saúlmä rohuäu iso ju'epö iya̧cua̧ Israel ttö̧ja̧ o'catoiönä tti̧rȩjä̧ beipome 'cä̧tȩttö̧ ȩmächa̧ttö̧ pä'ö; Ja̧hua̧nö jö̧nä̧tä̧ tödipächa̧cua̧sä̧ ja̧u̧ umuttö̧mä̧." ² Davidmä ä̧rä̧miu̧ i̧hui̧nö̧ ja̧ucutä̧ kä̧jä̧tö̧ seiscientonö huotö umä̧tucu̧, Gatnä huehuä ruhuä jina̧'a̧ Maoc i̧tti̧ Aquismä. ³ Ja̧hua̧nö ja̧'a̧ttö̧ Davidmä umu̧huäyotucutä ki̧nödo Aquiscutä Gat ötähuiyänä, ja̧hua̧nö̧ ja̧'a̧nä̧ tta̧mö̧nä̧ ttöju odehuiyänätä David inä̧ chutä irecua̧mö̧ ta̧ju Ahinoam Jezreelita inä̧ ja̧hua̧ta̧nö̧ Abigail Carmel inä, Nabal irecua inä jönä. ⁴ Saúlrö päinätö Davidmä Gat ötahuiyärä'atä töipächäji, täcö jua'a yabocumä ȩmö ti̧'choco̧cö̧. ⁵ Davidmä, Aquisrö pä'inö: Ucu cueseunä ttörö to'cuäjittömä, ötähuiyä jäyänä huȩjö̧ttö̧ yo̧mȩtȩ iyittö, juȩnȩtä̧ chö̧jä̧cua̧'a̧nö̧: ¿Tta̧'a̧nö̧ pä'ö ucuo ötahuiyänämä cumöhuä̧ya̧mä̧ ucucumä ö̧jö̧'a̧nö̧ttö̧?" ⁶ Ja̧'hua̧nö̧ päcu Aquismä Siglag pä'ö micuome iyinä̧cu̧ ja̧u̧nö̧ mo̧ro̧mä̧; ja̧'hua̧nö̧ ji̧no̧mȩttö̧ jitä mo̧ro̧ jubö päi'önä Juda ahuaruhuä 'cotöttö ruhuotömä juȩnȩtä̧ ka̧cuä̧tö̧. ⁷ Ja̧huä̧jä̧ Filisteos tti̧rȩjä̧nä̧ Davidmä ya'ute a̧'ȩcu̧ ja̧'a̧nä̧ kä̧hua̧tö̧tä̧ pa̧ja̧cuä̧nö̧ jo̧mȩnä̧ ki̧nö̧. ⁸ David umöhuäyotucumä korome pönä'inä rohuähuinä̧tö̧ ja̧'hua̧ta̧'a̧nö̧ 'cho'ipinä̧tö̧ Guesur ttö̧ja̧ tti̧rȩjä̧'inä, Guerzi ttö̧ja̧ tti̧rȩjä̧'i̧nä̧ ja̧'hua̧ta̧'a̧nö̧ Amalec tti̧rȩjä̧'i̧nä̧ isopäi'önä jahuätömä Shur rȩjȩnä̧ ka̧cui̧nä̧tö̧, Egipto rȩjȩttö̧mä̧ pocöra̧'a̧. Jahuätömä tabocutä päi'önä ja̧huä̧jä̧nä̧mä̧ ka̧cui̧nä̧tö̧. ⁹ David jahuäjänä urohuähuomenämä ya̧tȩ uborö ja̧ pä'ö'inä, isajuru ja̧ pä'ö'inä cuä'äutä icuinö; ovejastö̧rö̧tä̧, pä̧cä̧yu̧rö̧tä̧, bö̧rö̧tö̧rö̧tä̧, cameyu̧tö̧rö̧tä̧ ja̧'hua̧ta̧'a̧nö̧ pu̧jä̧ti̧yu̧tä̧ ȩmi̧pö̧; pä'äjita'anö ppa̧'ä̧chi̧'ä̧ji̧nö̧ Aquis idepiyucumä. ¹⁰ Aquuismä jä'epi'änö: ¿Jitä mo̧ro̧mä̧ di i̧rȩjä̧ 'chopipäjättö̧? Davidmä ädäti'änäcu̧, ttu̧huo̧jua̧'a̧dä̧cu̧ttö̧mä̧ Juda ttö̧ja̧ tti̧rȩjä̧tä̧, ttu̧huo̧jua̧'a̧dä̧cu̧ttö̧mä̧ Jarameel ttö̧ja̧ tti̧rȩjä̧tä̧, ttu̧huo̧jua̧'a̧dä̧cu̧ttö̧mä̧ Quenista pä̧ttä̧u̧ tti̧rȩjä̧tä̧." ¹¹ Davidmä uborö'inä isajuru'inä ttö̧ja̧cui̧'ö̧ juiyönätä cuä'äu icuinö, Gad ötahuiyära̧'a̧cu̧ jittäu juiya pä'ömä pa̧'a̧nö̧, "Ujuturumä tocu pä'ö ttucuocua pä'ö ja̧'a̧ttö̧, David päjimä päjita'anötä̧ jȩpi̧nö̧." Filisteos tti̧rȩjä̧nä̧ ö̧jö̧ pä̧nä̧mä̧ pa̧'a̧nö̧tä̧ jȩpi̧nö̧. ¹² Aquismä a̧'cua̧ huȩnä̧ri̧nö̧ Davidrö pa̧'a̧nö̧ amöcuädö, "Israel ttö̧ja̧rö̧ yoröiso öjö'cö juiyönä toa'attö; ja̧u̧mä̧ 'cuäopönätä chumöhuä̧ya̧ jö̧nä̧tä̧ ö̧jä̧cua̧."