¹ Zif ttö̧ja̧mä̧ Saúl Guibeánä ö̧ja̧'a̧ ichi'ö pä'inä̧tö̧: "¿Davidmä Jesimón pobonänö ka̧cu̧ Haquila ötahuiyättö po̧ri̧yä̧'tä̧ päi'ome dajahuächäji'ca̧mä̧ ko̧cö̧? ² Ja̧'hua̧nö̧ jittähuäcu Saúlmä ä̧rä̧mi̧'ö̧ zifttö de'a jui̧yä̧ra̧'a̧cu̧ mȩyȩhui̧nö̧, Israel ttö̧ja̧ttö̧ 3000nö huotö u̧mä̧tö̧ pojopö tȩmä̧u̧cu̧, Davidrö zifttö de'a jui̧yä̧jä̧nä̧ ö̧ja̧'a̧ usu 'chä̧nö̧mä̧. ³ Saúlmä, Jesimónttö̧ pabonänö ka̧cu̧ Haquila ötahuiyättömä 'po̧ri̧yä̧'tä̧ päi'ome mänä jäyä kä̧mä̧di̧nö̧. Ja̧'hua̧nö̧ ja̧'a̧nä̧ Davidmä de'a jui̧yä̧jä̧nä̧ ki̧nö̧, ja̧'hua̧nö̧ ja̧'a̧ de'a jui̧yä̧jä̧ttö̧Saúl chutä o'ca'a icha'amä topinö. ⁴ Ja̧'hua̧nö̧ topö Davidmä usäcuähuä ttö̧ja̧rö̧ hue'inö ja̧'hua̧nö̧ jo̧mȩnä̧ isopäi'önä̧tä̧ Saúl ichäja'amä huo̧jui̧nö̧. ⁵ Davidmä ä̧rä̧mä̧chö̧ Saúl rȩbȩhuä̧ji̧'ca̧ ö̧jo̧mȩcu̧ 'chi̧nö̧; ja̧u̧mä̧ Saúl'inä, su̧ro̧da̧u̧ ttu̧ru̧hua̧ Ner i̧tti̧ Abner'inä ttä'ecuome topinö; Saúl ä'ähuaränä ä'inö ja̧'hua̧ta̧'a̧nö̧ ttö̧ja̧mä̧ ja̧u̧tä̧ ippeyänä sobucuächönä ttö̧ja̧cua̧'a̧nä̧, o'catoi'önätä̧ ä'ecuinä̧tö̧. ⁶ Ja̧'hua̧nö̧ ja̧'a̧ Davidmä hitit ttö̧ja̧sa̧ i̧tti̧ Ahimelecrö'inä ja̧'hua̧ta̧'a̧nö̧ Joab ö̧jä̧hua̧ Sarvia i̧tti̧ Abisairö'inä pä'inö: ¿Ditättö̧ ttöcu Saúl ä'ö ö̧'o̧mȩ i̧mȩyȩhuä̧cua̧mä̧? Abisaimä pä'inö: "¡Ttö! ucucu chi̧mȩyȩhuä̧cua̧sä̧." ⁷ Ja̧'hua̧nö̧ ja̧'a̧ttö̧ David'inä Abisai'inä su̧ro̧da̧u̧ ttö̧ja̧cua̧'a̧cu̧ yodo 'chi̧nä̧tö̧. Ja̧'hua̧nö̧ ja̧'a̧ Saúlmä juhuȩnȩtä̧ ä'ö kä̧cuä̧huo̧mȩ jacuä ä'ö pinö, udacuodätä u ja̧'a̧cu̧ rȩjȩ ta'ö ku̧nä̧hua̧'a̧nä̧. Abner'inä ja̧'hua̧ta̧'a̧nö̧ su̧ro̧da̧u̧'inä ja̧u̧tä̧ ippeyänä ä'ecu pȩji̧nä̧tö̧. ⁸ Ja̧'hua̧nö̧ ja̧'a̧ Abisaimä Davidrö pä'inö: "Jitä mo̧ro̧ cuaboi̧ya̧rö̧ cumönä iyähui'äcujä̧. Jitämä ttörötä hue'ittö dacuodänä ya'utecutä rȩjȩ jubö doächi'önä ta'ö chicuarö. Todärenämä tadococu jä̧cua̧." ⁹ Davidmä Abisairö pä'inö: "Cuä'ömä cuicuärö; isopäi'önä ¿ditättö̧ TÖ̧Ä̧NÄ̧HUA̧ pojopö ȩmi̧nä̧cu̧ cuä'ö icuipö'ca̧ huȩnȩ juiyönä ö̧jö̧'a̧nö̧ hua̧mä̧? ¹⁰ Davidmä pä'inö: "TÖ̧Ä̧NÄ̧HUA̧MÄ̧ kö̧ ja̧'a̧ttö̧, ja̧u̧ TÖ̧Ä̧NÄ̧HUA̧TÄ̧ cuä'ö icuäcua̧, ja̧'hua̧nö̧ jo̧ca̧'a̧ jö̧ttö̧mä̧ 'coru juoächö mo̧ro̧'inä ichäcua'a ja̧'hua̧nö̧ jö̧ juiyöttömä curä tturohuähuome 'chä̧nö̧ toe'ächä̧cua̧." ¹¹ TÖ̧Ä̧NÄ̧HUA̧TÄ̧ pojopö ȩmi̧nä̧cu̧rö̧mä̧ suronä jȩchö̧ juiyönä jȩä̧ttö̧; ja̧'hua̧nö̧ ja̧'a̧ttö̧ jitämä ttö huedäcujä̧, dacuodä u jo̧mȩ podätä ja̧'hua̧ta̧'a̧nö̧ 'cä̧nä̧ri̧yu̧ ajiya a̧cuä̧yu̧tä̧ ȩmi̧, täcö ti̧'cha̧." ¹² Ja̧'hua̧nö̧ ja̧'a̧ttö̧ Davidmä dacuodä'inä 'cä̧nä̧ri̧yu̧ ajiya a̧cuä̧yu̧ Saúl u jo̧mȩcu̧ ka̧cuä̧ji̧tä̧ ȩmi̧pö̧, dö'ecuächinä̧tö̧. Ya̧tȩ'inä topocö pinö ja̧'hua̧ta̧'a̧nö̧ huo̧juä̧chi̧'o̧cö̧ pinö pi̧yȩmä̧, yoriso ya̧tȩ'inä porächi'ocö pinö, juhua'amä ocatoi'önä̧tä̧ ttä'ecua'attö̧, TÖ̧Ä̧NÄ̧HUA̧TÄ̧ tacunä ttä'ecunä ä'epö icuinö̧ jahuätörömä. ¹³ Ja̧'hua̧nö̧ ja̧'a̧ Davidmä pä̧tȩcuä̧nö̧ jo̧mȩ 'chä̧hui̧'i̧nö̧, 'chä̧hui̧'ö̧mä̧ otonänö jo̧mȩ muä'ca huäme'ca kä̧mä̧di̧nö̧; jahuätö ttö̧ja̧cuo̧mȩttö̧mä̧ otonänö ji̧na̧'a̧. ¹⁴ Davidmä ttö̧ja̧rö̧'inä ja̧'hua̧ta̧'a̧nö̧ Ner i̧tti̧ Abnerö'inä pä̧i̧cu̧nä̧ huopönö pä'inö: "¿Abner, cuädätoca'a?" Ja̧'hua̧nö̧ päcu Abnermä ädätömä pä'inö: ¿Di cua'attö̧ ucumä ru̧hua̧rö̧ huopömä?" ¹⁵ Davidmä Abnerö pä'inö: "¿Ucumäcö̧ ja̧'a̧ ttö̧ja̧sa̧ ju̧ru̧hua̧mä̧? ¿Ucumä Israel ttö̧ja̧ su̧ro̧da̧u̧ttö̧mä abonänö̧mä huocöjä̧? ¿Tta̧'a̧nö̧ pä'ö cu̧ru̧hua̧ ru̧hua̧rö̧mä̧ yodo to̧pä̧rö̧ pä̧nö̧mä̧ tta̧cuä̧ro̧ca̧'a̧jä̧ttö̧? Ja̧'hua̧nö̧ ja̧'a̧ ya̧tȩ cu̧ru̧hua̧ ru̧hua̧rö̧ cuä'ö icua i̧huä̧chä̧ji̧. ¹⁶ Ucu ja̧'hua̧nö̧ jȩ'cuä̧ji̧mä̧ adihuocö. Kö̧ TÖ̧Ä̧NA̧HUA̧NÄ̧MÄ̧ ucumä 'coru päcui'a pä'ötä hua̧jä̧, cu̧ru̧hua̧ ru̧hua̧rö̧ yodo to̧pä̧rö̧ pä̧nö̧mä̧ tta̧cuä̧ro̧ca̧'a̧jä̧ji̧ta'anö, Ja̧'hua̧nö̧ ja̧'a̧ jitämä topittö̧, tȩnȩ ka̧ pä'ö ru̧hua̧ ödacuodä jodämä ja̧'hua̧ta̧'a̧nö̧ ja̧u̧tä̧ u jo̧mȩ ajiya 'cä̧nä̧ri̧yu̧nä̧ koyamä." ¹⁷ Saúlmä David huoa'a huo̧juä̧chi̧'ö̧mä̧ pä'inö: ¿Ucu chi̧tti̧ David ja̧'a̧ ucuocumä?" Davidmä pä'inö: "A̧ ucuocusä chu̧ru̧hua̧ ru̧hua̧." ¹⁸ Ja̧u̧mä̧ pä'inö: "Tta̧'a̧nö̧ pä'ö chu̧ru̧hua̧mä̧ cumöhuä̧ya̧ cho'ca'anä ru̧cuä̧rä̧cu̧sä̧ttö̧? ¿Ttömä däje jȩchä̧jä̧ttö̧? ¿Surojömä däje jȩchä̧jä̧ttö̧? ¹⁹ Ja̧'hua̧nö̧ ja̧'a̧ttö̧ jitämä jädepäcujä, chu̧ru̧hua̧ ru̧hua̧mä, cumöhuä̧ya̧ ucuocua'a cuä̧ju̧cua̧ pä'ö. TÖ̧Ä̧NÄ̧HUA̧TÄ̧ ttörö to'ija̧'a̧cu̧ jȩ'cu̧nä̧ hueäjittömä, öäre iyähuä chiyomenä ȩma̧ pä'ittö; ja̧'hua̧nö̧ ja̧'a̧nä̧ ttö̧ja̧sa̧ jähuätä jö̧ttö̧mä̧ TÖ̧Ä̧NÄ̧HUA̧ ä'ca jo̧mȩttö̧mä̧ surojuoächö pä'ö ku̧nä̧huä̧cua̧, isopäi'önä jitä mo̧ro̧ rä'epö tticuäcusä, TÖ̧Ä̧NÄ̧HUA̧ iya päinö ji̧nö̧ chemö juiya pä'ö; jahuätömä pättinä̧cu̧sä̧: Korotö ttö̧ä̧nä̧huo̧tö̧rö̧ ucuo tecuähua täi. ²⁰ Ja̧'hua̧nö̧ ja̧'a̧ttö̧ jitämä, TÖ̧Ä̧NÄ̧HUA̧ ö̧jo̧mȩttö̧ otottömä ucuoja rȩjȩ huerächi'aja pä'ömä päcuättö; juhua'amä Israel ttö̧ja̧ ttu̧ru̧hua̧ ru̧hua̧mä̧ rä'opäji ttacuorö usu 'chä̧nö̧, de'a i̧sa̧rö̧ möä'cara̧'a̧ ru̧ttö̧ra̧'a̧ jä̧'i̧nö̧'a̧nö̧." ²¹ Ja̧'hua̧nö̧ päiyäcu Saúlmä pä'inö: "Ttömä suronä jȩpä̧ji̧sä̧. Chi̧tti̧ David ppa̧'ä̧chi̧; porö yabocumä suronämä jȩcho̧co̧cu̧ cuä̧cua̧jä̧, isopäi'önä jitä mo̧ro̧ cha̧'cua̧rö̧mä̧ ucu rȩ kä̧cuä̧huä̧nä̧ to'cuomenämä rö̧ä̧nä̧ micuähua'a ja̧'a̧. Topittö, ttömä a̧mö̧cuädocotö jȩtta̧'a̧ jä̧'i̧nö̧'a̧nö̧ jȩpä̧ji̧sä̧ ucurumä, ttö suronä jȩchä̧ji̧mä̧ rö̧ä̧u̧ jähuä ja̧'a̧." ²² Davidmä ädätömä pä'inö: ¡Topi, ru̧hua̧ cudacuodämä pȩnȩ ka̧'a̧! Umä̧tö möäyotöttö ya̧tȩ hue'i pocu ichi'ö ȩmö̧'ca̧ ȩpi̧ya̧cu̧. ²³ TÖ̧Ä̧NÄ̧HUA̧TÄ̧ yotucu pönä adihuomenä ja̧'hua̧ta̧'a̧nö̧ jueö huȩnȩ jȩttä̧ji̧mä̧ i̧mi̧tatujä̧; isopäi'önä jitä mo̧ro̧ TÖ̧Ä̧NÄ̧HUA̧MÄ̧ chumönä iyäcujä̧, ja̧'hua̧nö̧ iyäja'anä pojopö ȩmi̧nä̧cu̧rö̧mä̧ cuä'ö icuocö päjisä. ²⁴ Ja̧'hua̧ta̧'a̧nö̧ topittö, jitä mo̧ro̧ cua̧'cua̧rö̧mä̧ tochomenä rö̧ä̧nä̧ micuähuaja'attö̧, ja̧'hua̧ta̧'a̧nö̧ ttö cha̧'cua̧rö̧mä̧ rö̧ä̧nä̧ micuähua'a TÖ̧Ä̧NÄ̧HUA̧ ä'ca jo̧mȩttö̧mä̧, ja̧'hua̧nö̧ ja̧'a̧ttö̧ ja̧u̧tä̧tä̧ o'cajuiyönä usurä chȩmä̧u̧ttö̧mä̧ rä'epö icuattöjä̧." ²⁵ Ja̧'hua̧nö̧ päcu Saúlmä Davidrö pä'inö: "TÖ̧Ä̧NÄ̧HUA̧TÄ̧ ppädäcu, chi̧tti̧ David, rö̧ä̧u̧ jähuä cuaditomenämä ja̧u̧mä̧ o'cajuiyönätö adihuomenätä̧ jä̧cua̧'a̧." Ja̧'hua̧nö̧tä̧ Davidmä i̧'cha̧ pä'acutä i̧'cha̧'a̧nä̧ Saúlmä ö̧jo̧mȩcu̧tä̧ ppa̧'ä̧chi̧nö̧.