¹ Ja̧'hua̧nö̧ ja̧'a̧ Davidmä Rama ötahuiyänä Naiot pä'ö micuomettö rä'opächinö ja̧'hua̧nö̧ rä'opä 'chä̧nö̧mä̧ Jonatánrö pä'inö: "¿Ttömä däje jȩchä̧jä̧ttö̧? ¿Däjejä̧ttö̧ ttö suroju jȩchä̧ji̧mä̧? ¿Däje suronä jȩchä̧ji̧yä̧cu̧ cha̧'cua̧rö̧ to'ädö icua pä'ö usa'attö cuä'omä?" ² Jonatánmä David ädätinö: Ja̧u̧mä̧ isopäi'önämä jo̧ca̧'a̧, to'e'ächocö cuä̧cua̧jä̧. Chä'omä rö̧ä̧ö̧'inä ppo̧ö̧'inä ttörö jiähuoca'amä yorö'iso jȩa̧ pä'ömä juiya'a. ¿Tta̧'a̧nö̧ chä'omä ttörö ji̧ä̧huo̧ca̧'a̧mä̧ jȩö̧'a̧nö̧ ja̧'a̧ttö̧? Ja̧u̧mä̧ yapare ja̧'a̧." ³ Ja̧'hua̧nö̧ pa'anä Davidmä Ö̧ä̧nä̧hua̧ i̧mi̧nä̧ huȩnȩtö̧ pä'inö: "Cuä'omä täcö huo̧jua̧, ucuru adihuomenä chö̧jä̧'i̧ja̧'a̧mä̧. Ja̧'hua̧nö̧ ja̧'a̧ttö̧ pä'äji: Pi̧yȩmä̧ u̧huo̧jua̧ pä'ömä jo̧ca̧'a̧ Jonatánmä, u̧huo̧jö̧ttö̧mä̧ a̧'cua̧ tta̧huȩcua̧ pä'ötä ja̧'a̧,' Ja̧'hua̧nö̧ ja̧'a̧nä̧ TÖ̧Ä̧NÄ̧HUA̧ 'cuäopönä kö̧ i̧mi̧nä̧'inä ja̧'hua̧ta̧'a̧nö̧ ucu cui̧mi̧nä̧'inä pädäcujä̧, suro ttömä hua'arera̧'a̧tä̧ kö̧sä̧ ⁴ Ja̧'hua̧nä̧ päcu Jonatánmä Davidrö pä'inö: "Ji̧yȩtȩ ttörö jäcuepömä, ppädädäcu̧jä̧." ⁵ Davidmä Jonatánrö pä'inö: " Yo̧ȩi̧ mo̧ro̧mä̧ kä̧hua̧ ö'ärohuächome pä'cäri jä̧cua̧'a̧, ja̧'hua̧nö̧ ja̧'a̧ttö̧ ru̧hua̧cu̧ ji̧nä̧ yo̧mȩtȩ pä̧mä̧dö̧ chu̧cuȩ chucua pä'ö ja̧'a̧. Ja̧'hua̧nö̧ ja̧'a̧nä̧ jitämä huäbodäcuä mo̧ro̧ päi'omettö̧mä̧ yodo jubö päi'önä meje'canä dajahuächö chö̧'a̧ chi̧'cha̧ hue'ittö. ⁶ Cuä'o ttörö jä̧ȩpä̧rö̧ttö̧mä̧, pa̧'a̧nö̧ jicuahuaröjä̧: Davidmä Belén ötahuiyära̧'a̧cu̧ i̧'cha̧ pä'ö huedö'anö ja̧ pä'ö jäepäjäcusä; a̧'ȩ jö̧'a̧cuä̧ ahuaruhuä o'catoi'önäcu̧ i̧sa̧rö̧ ku icu iyö pä'cäri jȩa̧ pä'ö." ⁷ Ja̧u̧ juiyo adihua'a pä'ö ädätöttömä, cumöhuä̧ya̧mä̧ huȩnȩ juiyönätä̧ ö̧jä̧cua̧. Ja̧'hua̧nö̧ ja̧'a̧nä̧ rö̧ä̧nä̧ ö̧ra̧huä̧ri̧'ö̧ttö̧mä̧, suronä jȩa̧ pä'ö amöcuädö ö̧jö̧na̧'a̧dä̧ pä'ö cu̧huo̧juä̧cua̧jä̧. ⁸ Ja̧'hua̧nö̧ 'cuäopa'anä cumöhuä̧ya̧rö̧mä̧ rȩrö̧jö̧nö̧ topi. Isopäi'önä cumöhuä̧ya̧mä̧ ucu TÖ̧Ä̧NÄ̧HUA̧cu̧ cuesecunä̧ jȩpi̧nö̧. Ja̧'hua̧nö̧ ja̧'a̧nä̧ ttönä suronä jȩä̧cuä̧huä̧ kö̧ttö̧mä̧, ucutätä cuä'ö icuittö; ¿Tta̧'a̧nö̧ pä'ö cuä'o ö̧ja̧'a̧cu̧mä̧ cuȩpa̧ttö̧ päcuäcusättö̧? ⁹ Jonatánmä pä'inö: "¡Ja̧u̧mä̧ yorö'iso 'cuäopococu cuä̧cua̧jä̧! Chä'o ucuru cuä'ö icua pä'ö amöcuädäja'a chu̧huo̧jö̧ttö̧mä̧ ¿Ttömä ucurumä jidäu juiyö'anö ja̧'a̧? ¹⁰ Ja̧'hua̧nö̧ ja̧'a̧ Davidmä Jonatánrö̧ pä'inö: ¿Di jä̧cua̧'a̧ttö̧ cuä'o ucuru suronä ädätöttö ji̧ä̧huä̧cua̧mä̧?" ¹¹ Jonatánmä Davidrö pä'inö: "Ichihuä, meje'cara̧'a̧ ti̧'cha̧." Ja̧'hua̧nö̧ ta̧ju̧cäyotö meje'cara̧'a̧cu̧ 'chi̧nä̧tö̧. ¹² Ja̧'hua̧nö̧ ja̧'a̧ Jonatánmä Davidrö̧ pä'inö: "TÖ̧Ä̧NÄ̧HUA̧ Israel ttö̧ja̧ TTÖ̧Ä̧NÄ̧HUA̧TÄ̧ jä̧cua̧'a̧ ji̧'ä̧huä̧cua̧mä̧. Yo̧ȩi̧ mo̧ro̧ pi̧yȩtä̧ horanä huäbodäcuä mo̧ro̧ päi'omenä chä'orö jädepomenä, to'cuaja, Davidrö pä̧huä̧rö̧jo̧mȩnä̧ ja̧ pä'ö, ¿ja̧'hua̧nö̧ jö̧ttö̧mä̧ huopo'ö cu̧huo̧jua̧ pä'ö jidäu juiyö'anö ja̧'a̧? ¹³ Chä'o ucuru suronä jȩa̧ pä'ö amöcuädäji jidäu juiyöttömä, TÖ̧Ä̧NÄ̧HUA̧TÄ̧ Jonatánrömä suronä jȩä̧cua̧ ja̧'hua̧ta̧'a̧nö̧ yabonänö'inä, Jidäu juiyöttömä huȩnȩ juiyönätä̧ oto cui̧jhuö̧nä̧ huȩdä̧cua̧jä̧. TÖ̧Ä̧NÄ̧HUA̧TÄ̧ ucunä kö̧mä̧, chä'onä ö̧ji̧nä̧ta'anö. ¹⁴ Ji̧nä̧ pi̧jä̧nä̧ chö̧jö̧ttö̧mä̧, ¿TÖ̧Ä̧NÄ̧HUA̧ ucucu esecuinömä̧ cui̧jȩpö̧ juiyö'anö hua̧sä̧, toe'ächö juiyäcua'anömä? ¹⁵ Chahuaruhuärö re kä̧nö̧ ucuodecuinönämä cuicuipiyotto, TTÖ̧Ä̧NÄ̧HUA̧ David aboiyotö o'catoi'önä pi̧jä̧ rȩjȩnä̧ ka̧cuä̧tö̧rö̧ si'epö icuttö'inä." ¹⁶ Ja̧'hua̧nö̧ ja̧'a̧ Jonatánmä David ahuaruhuäcu esecumä pä'inö: "TÖ̧Ä̧NÄ̧HUA̧TÄ̧ David aboiyotörömä si'epö icuajä̧." ¹⁷ Jonatánmä Davidrö pä'äjita'anö rö̧ä̧nä̧ repeä'ijönä huȩnȩtö̧ päönä jȩpi̧nö̧, juhua'amä chutä a̧'cua̧rö̧ repeäcuäöta'anö repea'attö. ¹⁸ Ja̧'hua̧nö̧ ja̧'a̧ Jonatánmä ja̧u̧rö̧ pä'inö: ¹⁹ Yo̧ȩi̧ mo̧ro̧mä̧ kä̧hua̧ ö'ärohuächome pä'cäri jä̧cua̧'a̧. Ucurumä ttamöcuädäcuotö cuideäcä to̧ä̧cä̧tä̧ ka̧'a̧ topömä. Huäbodäcuä mo̧ro̧ päi'önä tocuepäji o'ca'amä jurunä cui̧mȩyȩhui̧'a̧ja̧ ja̧'hua̧nö̧ ja̧'a̧mä̧ o'cajuiyönä 'cuäopö mo̧ro̧ cudahuächäjomecu̧ cuichajä̧, i̧chö̧'camä inähuä Ezel pä'ö micuähuänä̧ cu̧ja̧jä̧. ²⁰ Chu'popa̧ri̧mä̧ jueö dönä 'otta'a jä̧'i̧nö̧'a̧nö̧ ucu cu̧ja̧'a̧cu̧ huäbodäcuänä 'podä̧cua̧sä̧. ²¹ Ja̧'hua̧nö̧ ja̧'a̧ chumöhuä̧ya̧rö̧ huȩdä̧cua̧sä̧, hue'ö kä̧nö̧mä̧ pä̧dä̧cua̧: "Po̧'a̧ri̧ ȩmo̧'ä̧ji̧. Topittö 'po̧'a̧ri̧mä̧ ucu cu̧ja̧'a̧cu̧ pa̧'a̧; ȩmo̧po̧'ä̧ji̧ pädöttömä; ja̧'hua̧nö̧ jö̧ttö̧mä̧ räcuopajä̧, Isopäi'önä surojö 'cuäopömä juiyäcua'a ja̧'hua̧ta̧'a̧nö̧ surojuoepö'inä, TÖ̧Ä̧NÄ̧HUA̧MÄ̧ 'Cuäopänätä ö̧ja̧'a̧ttö̧. ²² Ja̧'hua̧nö̧ ja̧'a̧nä̧ mö̧ä̧ya̧rö̧ 'po̧'a̧ri̧mä̧ ucu cujo̧mȩttö̧mä̧ yabonänö pa̧'a̧ pädöttömä; oto tucuipächaja, Ja̧'hua̧nö̧ TÖ̧Ä̧NÄ̧HUA̧mä̧ oto hueäjäcujä̧. ²³ Ucucu ttöcu esecu tucuocuäjimä, topittö, Tö̧ä̧nä̧hua̧mä̧ ucucu ttöcu 'cä̧tȩ jo̧mȩ ö̧jä̧cua̧. ²⁴ Ja̧'hua̧nö̧ ja̧'a̧ Davidmä meje'canä̧ dajahuächinö. Kä̧hua̧ ja̧rȩpa̧ räo'omenä Ru̧hua̧mä̧ u̧cuȩ cuä̧nö̧ pä̧mä̧di̧nö̧. ²⁵ Ru̧hua̧mä̧ i̧dȩä̧cä̧nä̧ pä̧mä̧di̧nö̧, ko̧ro̧nö̧ jä̧'i̧jö̧ta'anö, deäcä isode räbä tö'cönänö kä̧cä̧nä̧. Jonatánmä ä̧rä̧mä̧cha̧'a̧nä̧ Abnermä Saúl ippeyä jome pä̧mä̧di̧nö̧. Ja̧'hua̧nö̧ ja̧'a̧nä̧ David i̧dȩä̧cä̧mä̧ to̧ä̧cä̧tä̧ ki̧na̧'a̧. ²⁶ Saúlmä ja̧u̧nu̧ mo̧ro̧mä̧ ji̧yȩtȩ'inä ucuocuocö pinö juhua'amä "Ja̧u̧rö̧mä̧ ji̧yȩtȩ 'cuäopa'a 'cua̧ra̧'a̧ pä'ö amöcuäda'attö̧. Ja̧u̧mä̧ surojö jȩpä̧ji̧ 'cua̧ra̧'a̧, isopäi'önä surojö jȩpä̧ji̧di̧." ²⁷ Ja̧'hua̧nö̧ ja̧'a̧nä̧ todäre mo̧ro̧ päi'omenä, kä̧hua̧ ö'ärohuächomenä pä'cäri o'ca'a'inä, David i̧dȩä̧cä̧mä̧ to̧ä̧cä̧tä̧ ki̧na̧'a̧. Saúlmä i̧tti̧ Jonatánrö̧ pä'inö: ¿Tta̧'a̧nö̧ pä'ö Isaí i̧tti̧mä̧ ni̧po̧ mo̧ro̧'inä jitä mo̧ro̧'inä u̧cuȩ ucua pä'ömä ichoca'ajä̧ttö̧? ²⁸ Jonatánmä Saúlrö ädätinö: "Davidmä Jerusalén ötahuiyära̧'a̧ i̧'cha̧ pä'ö jäepäjäcusä. ²⁹ Ja̧u̧mä̧ päcusä: Chi̧'cha̧ hue'ittö. Chahuaruhuämä i̧sa̧rö̧ ku icu jȩttä̧cuȩmä̧ ötahuiyära̧'a̧ ku̧nä̧rä̧tö̧ ja̧'hua̧ta̧'a̧nö̧ chuböotömä jua'atä chö̧ja̧ pättäcusä. Jitämä, ucu ttörö cuesehuipönä to'cuäjttömä, ppä'ädipö, chuböo̧tö̧rö̧ tochäja hue'ittö. Ja̧'hua̧nö̧ jä̧jo̧mȩttö̧ ucu ru̧hua̧ cuȩ cucuomemä ichocö päji." ³⁰ Ja̧'hua̧nä̧ jiähuomenä Saúlmä Jonatánrö rö̧ä̧nä̧ ra̧huä̧ri̧pö̧mä̧ pä'inö: ¡Ucu, suropaju ki̧tti̧mä̧ ja̧'hua̧ta̧'a̧nö̧ pä'ö ku̧nä̧huä̧'inä jȩ'cua̧ pä'ocömä! ¿Isaí i̧tti̧rö̧ pojopö ȩmö̧ ucurutä'inä cua̧ju̧rö̧'inä dä'ärö̧jö̧ jȩ'cuä̧ja̧'a̧mä̧ jȩru̧pa̧cö̧ päcua'a tä̧ji̧? ³¹ Isaí i̧tti̧mä̧ ji̧nä̧ pi̧jä̧ rȩjȩnä̧ ö̧ja̧'a̧nä̧, ucumä ja̧'hua̧ta̧'a̧nö̧ ruhuo yoröiso hue'ocu cuä̧cua̧jä̧. Ja̧'hua̧nö̧ ja̧'a̧ttö̧ jitämä pocu tti'chächarö hue'i, isopäi'önä ja̧u̧mä̧ toe'ächa pä'ötä hua̧." ³² Jonatánmä jä'o Saúlrö ädätömä pä'inö: ¿Tta̧'a̧nö̧ jä̧jo̧mȩnä̧ ja̧u̧mä̧ toe'ächa pä'ö ja̧'a̧ttö̧? ¿Ja̧u̧mä̧ däje jȩä̧jä̧ttö̧? ³³ Ja̧'hua̧nö̧ päcu Saúlmä ja̧u̧rö̧ cuä'ö icua pä'ö ödacuodänä icuinö. Ja̧'hua̧nö̧ jȩa̧'a̧ topö Jonatámä jä'omä Davidrömä cuä'ö icua päja'adä̧ pä'ö huo̧jui̧'i̧nö̧. ³⁴ Jonatánmä ttu̧cuȩ ttucuomettö̧ ä̧rä̧mä̧chö̧ rö̧ä̧nä̧ ra̧huä̧ri̧pinö ja̧'hua̧nö̧ ra̧huä̧ri̧pö̧mä̧ yoröiso ucuamä pä'ocö pinö kä̧hua̧ttö̧ todäre mo̧ro̧ päi'önä kö̧ pä'cärittömä, juhua'amä Davidrö 'cuäopö a̧'cua̧ tta̧huȩcua̧'a̧ttö̧, jä'o ja̧u̧rö̧ öjo'cö juiyönä toiyäcu. ³⁵ Mo̧ro̧ päia'acu, Jonatánmä Davidcu ö'ätecuächa pä'ö meje'cara̧'a̧cu̧ rä'opinö ja̧'hua̧ta̧'a̧nö̧ ja̧u̧cu̧mä̧ ya̧tȩ mö̧ä̧ya̧ 'chi̧nö̧. ³⁶ Umöhuä̧ya̧rö̧ pä'inö: 'Po̧'a̧ri̧ 'po'ö chi̧cua̧ri̧ cu̧'ä̧cui̧'a̧ jopi." Ja̧'hua̧nö̧ ja̧'a̧ ja̧u̧ mö̧ä̧ya̧ joa'anä, joomettömä yabonänö maö̧nä̧ 'po'inö. ³⁷ Ja̧u̧ mö̧ä̧ya̧mä̧ Jonatán 'po̧'ä̧ja̧ri̧ ma̧ä̧jo̧mȩ i̧rȩbȩhui̧a̧'a̧, Jonatánmä ja̧u̧ mö̧ä̧ya̧rö̧ huopönö̧ pä'inö: "Ucu cu̧jo̧mȩttö̧ yabonänömä ma̧o̧ca̧'a̧ jä̧ja̧'a̧ 'po̧'a̧ri̧mä̧?" ³⁸ Ja̧'hua̧nö̧ ja̧'a̧ Jonatánmä möäya̧rö̧ huopinö: "¡Cu̧jä̧mä̧do̧ca̧'a̧ pä̧i̧cu̧nä̧ jopi! Jonatáncu ichäji möäya̧mä̧ 'po̧'a̧ri̧ ȩmo̧po̧'ö̧ u̧ru̧hua̧ ö̧ja̧'a̧cu̧ ppa̧'ä̧chä̧chö̧ jopinö. ³⁹ Ja̧'hua̧nö̧ 'cuäopömä ja̧u̧ mö̧ä̧ya̧mä̧ yoröiso jerupinö. Suro Jonatántä ja̧'hua̧ta̧'a̧nö̧ Davidcutä huo̧jui̧nä̧tö̧ ja̧u̧ 'cuäopömä. ⁴⁰ Jonatánmä 'poähuä jä̧ji̧ ja̧u̧ mö̧ä̧ya̧rö̧ iyö kä̧nö̧ pä'inö: Täi, ppi̧yȩmä̧ ötahuiyära̧'a̧ ȩpi̧." ⁴¹ Ja̧u̧ mö̧ä̧ya̧mä̧ yotäcu i̧hui̧'i̧nö̧, Davidmä inäyu aboja̧'a̧ttö̧ rä'o'ö, ämä rȩjȩcu̧ päi'önä ma'ä̧mö̧ huäbodäcuänö jo̧mȩnä̧ ja̧rȩyö̧ pä'i'inö. Micuä̧ri̧yä̧cuä̧u̧ 'chu̧'o̧cu̧ ta̧ju̧ cuäyoto ajahuinätö̧, Ja̧'hua̧nö̧ ja̧'a̧nä̧ Davidmä rö̧ä̧nä̧ ajahuinö. Jonatánmä David pä'inö: "Huȩnȩ juiyönätä täi, isopäi'önä ta̧ju̧cuäyotö TÖ̧Ä̧NÄ̧HUA̧ i̧mi̧nä̧ huȩnȩtö̧ pä'ätöjä̧: TÖ̧Ä̧NÄ̧HUA̧MÄ̧ ttönä'inä ucunä'inä ö̧jä̧cua̧ ja̧'hua̧ta̧'a̧nö̧ ttö chi̧tti̧mö̧nä̧'inä ucu cui̧tti̧mö̧nä̧'inä 'cuäopönätä ö̧jä̧cua̧." ⁴² Ja̧'hua̧nö̧ ja̧'a̧ Davidmä ä̧rä̧mä̧chö̧ i̧hui̧nö̧ ja̧'hua̧nö̧ i̧hua̧'a̧nä̧ Jonatánmä ötahuiyära̧'a̧cu̧ ppa̧'ä̧chi̧nö̧.