¹ Saúl i̧tti̧ Jonatánrö̧'inä ja̧'hua̧ta̧'a̧nö̧ umöhuäyotörö'inä o'catoi'önä̧rö̧ Davidrö cuä'ö tticua pä'inö. Ja̧'hua̧nö̧ pä'anä chutä Saúl i̧tti̧ Jonatánmä Davidrö repe'inö̧. ² Ja̧'hua̧nö̧ ja̧'a̧ttö̧ Jonatánmä Davidrö ji'ähuinö, "Chä'o Saúlmä cuä'ö icua pä'ö usäcujä̧ pä'ö. Ja̧'hua̧nö̧ ja̧'a̧ttö̧ ttö̧'ȩpä̧rö̧nö̧ ku̧ja̧jä̧ mo̧ro̧ päia'amä ja̧'hua̧ta̧'a̧nö̧ yȩnȩtȩ ttö̧huo̧juo̧co̧mȩ cudahuächaja. ³ Ttö umicu̧ ra̧do̧'a̧cua̧sä̧ ja̧'hua̧nö̧ rä'o'ö chä'o ippeyä jo̧mȩ chö̧jä̧mä̧dä̧cua̧sä̧ mȩjȩ'canä̧ ucu cu̧jo̧mȩttö̧mä̧, ja̧'hua̧ta̧'a̧nö̧ chä'ocu ucu cutu'cö chucuocuä̧cua̧sä̧. Ji̧yȩtȩ chu̧huo̧jui̧pä̧ji̧mä̧, ttötä jidähuä̧cua̧jä̧. ⁴ Jonatán David ötö'cö adiutä jä'o Saúlrö ji'äumä pä'inö, "Ru̧hua̧ cumöhuä̧ya̧ Davidrömä to'ija̧'a̧cu̧mä̧ jȩ'cuä̧. Ja̧u̧mä̧ ucuru surojö jȩtta̧jueimä, ucurumä adiutä jȩpä̧'i̧jö̧. ⁵ Ja̧'hua̧nö̧ ja̧'a̧ Ja̧u̧mä̧ filisteas ttö̧ja̧sa̧rö̧'inä cuä'ö icuinö. TÖ̧Ä̧NÄ̧HUA̧MÄ̧ ja̧u̧nä̧tä̧ Israel ttö̧ja̧ o'catoi'önä ttö̧ji̧pö̧nä̧ ppä'ädinö. Ucumä topinö̧jä̧ ja̧'hua̧nö̧ topömä esehuinö̧jä̧. ¿Tta̧'a̧nö̧ pä'ö David ji̧yȩtȩ'inä suronä jȩpo̧cö̧rö̧mä̧ suronä jȩpö̧ cuä'ö icua pä'attö̧? ⁶ Saúlmä Jonatán ucuocumä ä̧ju̧cui̧nö̧. Saúlmä TÖ̧Ä̧NÄ̧HUA̧MÄ̧ 'cuäopönätä̧ kö̧ i̧mi̧nä̧ pä'inö, Ja̧u̧mä̧ yorö'iso to'e'ächocö jä̧cua̧." ⁷ Ja̧'hua̧nö̧ ja̧'a̧ Jonatánmä Davidrö huopinö ja̧'hua̧nö̧ huopäji'ca̧ Jonatánmä o'cajuiyönä ji'ähuinö. Jonatánmä Saúl ä'ca jo̧mȩ o'ipö ku̧ni̧nö̧ Davidrö, o'ipö u̧ju̧nä̧cu̧mä̧ ja̧u̧ ä'ca jo̧mȩttö̧ ä'coji ö̧jä̧'i̧jö̧ta'anö ki̧nö̧. ⁸ Ja̧'hua̧nö̧ ja̧'a̧ pä'äjita'anö curä kä̧mä̧di̧na̧'a̧, ja̧'hua̧nö̧ ji̧yä̧cu̧ Davidmä rä'opächö filisteas ttä̧ja̧cu̧ rohuähuinö, ja̧'hua̧nö̧ rohuäumä recuätörö cuä'äö icuinö. Jahuätömä ja̧u̧ ä'ca jo̧mȩttö̧ tu'ipächinätö̧. ⁹ Isoppa i̧sa̧ su̧ro̧pa̧ TÖ̧Ä̧NÄ̧HUA̧ huȩ'ä̧hua̧ ichi'ö Saúlrö kä̧mä̧di̧nö̧ ojusodenä dacuodä umönä 'chuä̧rä̧nö̧ ö̧'a̧'a̧, Davidtä arpa u'pora'anä. ¹⁰ Saúlmä uda'cuä'chunä Davidrö isode räbäcu ö̧rä̧mä̧dö̧nä̧ tahua pä'ö jȩpi̧nö̧, ja̧'hua̧nö̧ jȩä̧cu̧ Saúl ä'cattömä̧ rä'opächinö, Saúlmä isode räbänä̧ dacuodä icu ö̧na̧'a̧nä̧. Davidmä ja̧u̧tä̧ yodo tö'ipächö i̧hui̧'i̧nö̧. ¹¹ Saúlmä huȩnȩ ȩcuä̧ ttö̧ja̧rö̧ David ojusode to̧pä̧rö̧ tta̧ttä̧ra̧ pä'ö hue'inö mo̧ro̧ päia'a cuä'ö tticuiyarö pä'ö. Mical, David irecuamä, kirecuorö pä'inäju̧, "Jitä yodo tucuipächu juiyöttömä, yo̧ȩi̧ mo̧ro̧ cuä'ö tti̧cuä̧cua̧jä̧." ¹² Ja̧'hua̧nö̧ ja̧'a̧ Micalmä Davidrö pȩta̧na̧nä̧ jui'ädinäju̧. Ja̧u̧mä̧ rä'opächö tö'ipächö i̧hui̧nö̧. ¹³ Micalmä jitötä adicuä'ca ȩmo̧po̧'ö̧ ä̧'ä̧huä̧ppä̧nä̧ cuä'epö rötinä̧ju̧. Ja̧'hua̧nö̧ ja̧'a̧ cabra uhuo'chettö adicuä̧ppä̧ ttönä ppä̧ȩcuä̧ppä̧ rötinä̧ju̧ ja̧'hua̧nö̧ jȩpö̧ pö̧jä̧ta̧nä̧ mö̧'ȩpö̧ rutinä̧ju̧. ¹⁴ Saúl huȩnȩ ȩcuä̧ ttö̧ja̧rö̧ David 'chuttäda pä'ö hueäja'a jahuäjumä pä'inäju̧: Ja̧u̧mä̧ na̧'ä̧chö̧." ¹⁵ Ja̧'hua̧nö̧ ja̧'a̧ Saúlmä huȩnȩ ȩcuä̧ ttö̧ja̧ Davidrö tottäja pä'ö hue'ö kä̧nö̧mä̧ pä̧'i̧nö̧: Chä̧'ä̧ma̧ra̧'a̧cu̧ Cui'cächiyätucuattöjä̧, cuä'ö chicuarö. ¹⁶ Huȩnȩ ȩcuä̧ ttö̧ja̧ do'ächi'ö tottomenä, tätähuä'ca kojusodenä kä'ijä'catä ä̧'ä̧huä̧ppä̧nä̧ Unämä cabra uhuo'chettö adicuä̧ppä̧ ppä'epö rötähua'atä topinätö̧. ¹⁷ Saúlmä Micalrö pä'inö: "¿Tta̧'a̧nö̧ pä'ö cuyaparehuättöttö, chaboi̧ya̧ töipächa'anä ja̧'a̧tä̧ topömä?" Micalmä Saúlrö ädätinäju̧: Ja̧u̧mä̧ päcuasä Chi̧'cha̧'a̧nä̧ ja̧'a̧tä̧ topittö ja̧'a̧tä̧ to'cu juiyöttö cuä'ö chicuäcuajujä̧." ¹⁸ Davidmä oto jopö tu'ipächinö, ja̧'hua̧nö̧ tu'ipächömä Samuel ö̧jo̧mȩ Ramara̧'a̧ 'chi̧nö̧, ja̧'hua̧nö̧ ja̧'a̧mä̧ Saúl jȩä̧ji̧mä̧ o'cajuiyötä ja̧u̧rö̧ ji'ähuinö. Ja̧'hua̧nö̧ ja̧'a̧ ja̧u̧mä̧ Samuelcu 'chi̧nö̧, 'chä̧jä̧'cotömä Naioth pä'ö micuome ka̧cui̧nä̧tö̧. ¹⁹ Ja̧u̧ ji̧na̧'a̧ Saúlrö jittähuinömä pa̧'a̧nö̧ pä'ö: "Topittö, Davidmä Ramattö Naiothnä kö̧ ²⁰ Ja̧'hua̧nö̧ pätta'a ä̧ju̧cu̧ huȩnȩ ȩcuä̧ ttö̧ja̧rö̧ hue'ö icuinö Davidrö 'chuttädiyarö pä'ö. Jahuätö tottomenä TÖ̧Ä̧NÄ̧HUA̧TTÖ̧'inä ttö̧ja̧ttö̧'inä kä'co päte'ö adicuä ttö̧ja̧mä̧ TTÖ̧Ä̧NÄ̧HUA̧ i̧huȩnȩ jittähua'atä topinä̧tö̧, ja̧'hua̧nö̧ ja̧'a̧ jahuätö ttu̧ru̧hua̧mä̧ Samuel ji̧na̧'a̧, TÖ̧Ä̧NÄ̧HUA̧ a̧'cua̧ru̧hua̧mä Saúl huȩä̧jä̧u̧rö̧ ichi'ö kä̧mä̧di̧nö̧ ja̧'hua̧nö̧ ja̧' jahuätö'inä TTÖ̧Ä̧NÄ̧HUA̧ i̧huȩnȩ ji'ähuinä̧tö̧. ²¹ Ja̧u̧ 'cuäopäji jittähuäcu Saúlmä, korotö huȩnȩ ȩcuä̧ ttö̧ja̧rö̧ hue'inö, jahuätö ja̧'hua̧nö̧ huȩä̧jä̧u̧'inä TÖ̧Ä̧NÄ̧HUA̧ i̧huȩnȩ ji'ähuinä̧tö̧. Ja̧'hua̧nö̧ ji̧yä̧cu̧ pä'äjita'anö huäbodäcuä päi'önä huȩnȩ ȩcuä̧ ttö̧ja̧rö̧ hue'inö, ja̧'hua̧nö̧ huȩä̧jä̧u̧'inä TTÖ̧Ä̧NÄ̧HUA̧ i̧huȩnȩ ji'ähuinä̧tö̧. ²² Ja̧'hua̧nö̧ ja̧'a̧ chutä'inä Ramara̧'a̧ 'chi̧nö̧ ja̧'hua̧nö̧ ja̧'a̧ reju täcuäju ko̧mȩ Secú pä'ä micuomecu ichinö̧. Ja̧u̧mä̧ jä'epö ä̧ju̧cui̧nö̧ "¿Tȩnȩ ö̧jättö̧ Samuelmä ja̧'hua̧ta̧'a̧nö̧ Davidmä?" Ya̧tȩ jiähuinäcu̧, "Ichi, jahuätömä Ramattö Naiot pä'ö micuome ka̧cuä̧tö̧." ²³ Saúlmä Ramattö Naiot pä'ö micuomecu̧ ichinö̧. Ja̧'hua̧nö̧ ja̧'a̧ TÖ̧Ä̧NÄ̧HUA̧ a̧'cua̧ru̧hua̧mä̧ Ja̧u̧rö̧'i̧nä̧ ichi'ö kä̧mä̧di̧nö̧ ja̧'hua̧nö̧ ö̧jä̧mä̧dä̧jä̧cu̧ 'chä̧nö̧ kä̧nö̧ TÖ̧Ä̧NÄ̧HUA̧ i̧huȩnȩ ji'ähuinö̧ Ramattö Naiot pä'ö micuomecu̧ i̧rȩbȩhuome jubö päi'önä. ²⁴ Ja̧'hua̧ta̧'a̧nö̧ ja̧u̧'inä ö̧'ca̧tä̧huä̧ta̧ ko̧'ä̧dä̧cuä̧ö̧ icuinö, ja̧'hua̧ta̧'a̧nö̧ Samuel ä'ca jomettö ö̧'ca̧tä̧huä̧ta̧ ko̧sä̧u̧ icuäji'ca̧ juiyönä ja̧u̧nö̧mä mo̧ro̧'inä yodo'inä 'cuäo'önä TÖ̧Ä̧NÄ̧HUA̧ i̧huȩnȩ ji'ähuinö. Pa̧'a̧nö̧ jiähuiniyä̧u̧ pättäcu, "Saúl'inä TÖ̧Ä̧NÄ̧HUA̧TTÖ̧'inä ttö̧ja̧ttö̧'inä kä'co päte'ö adicuä ttö̧ja̧sa̧ ji̧na̧'a̧ tä̧ji̧?