¹ TÖ̧Ä̧NÄ̧HUA̧MÄ̧ pä'inö̧ Samuelrö: "¿Ti̧yȩnö̧ jubu cua̧'cua̧ tta̧cuȩcua̧'a̧jä̧tö̧ Saulnä̧mä̧, Israel ru̧hua̧ ö̧jo̧mettö̧ rä'epö chicuinome jubu? ja̧'hua̧nö̧ jö̧ttö̧mä̧ i̧sa̧ ä̧ja̧ i̧sä̧na̧nä̧ a̧dȩja 'caripö̧ tä'í. Belenttö Isairö huȩdä̧cua̧sä̧, juhua'amä̧ täcö TTÖ emä̧ji̧sä̧ ya̧tȩ ru̧hua̧ ö̧jä̧cua̧rö̧ ja̧u̧ i̧tti̧muttö̧." ² Saul pä'inö̧: "¿Tta̧'a̧nö̧ chi̧'cha̧ ttömä̧? Saul ä̧ju̧cu̧ttu̧mä̧ ttörö cuä'ö icu'anö̧ ja̧'a̧." TÖ̧Ä̧NÄ̧HUA̧ pä'inö̧: päcäyä isaju ki̧tti̧ jareönä uhuäpächäjirö ȩmö̧'ca̧ päcuajä̧, TÖ̧Ä̧NÄ̧HUA̧RÖ̧ i̧sa̧rö̧ ku icu iyö ichäjisä. ³ Isaírö huopi i̧sa̧rö̧ ku icu iyähuomecö̧ ja̧'hua̧ta̧'a̧nö̧ jȩ'cuä̧cuȩmä̧ ttötä chi̧jȩpä̧cua̧sä̧. Ttö pidetä pädäcurö ucumä a̧dȩja to'ö pojopö ku̧ju̧nä̧rö̧jä̧. ⁴ Samuelmä̧ jȩpi̧nö̧ TÖ̧Ä̧NÄ̧HUA̧ päinö̧ ta̧'a̧nö̧ ja̧'hua̧nö̧ ja̧'a̧ttö̧ 'chi̧nö̧ Belenra̧'a̧. Ötahuiyättö tä̧mö̧mä̧ rö̧ä̧nä̧ ttö̧'ä̧hui̧nä̧tö̧ ja̧u̧ru̧ totta pä'ö 'chä̧jä̧tö̧mä̧ ja̧'hua̧nö̧ ja̧'a̧ pä'inä̧tö̧: "¿Ji̧yȩtȩ huȩnȩ ji̧yä̧cu̧ ichäjijä?" ⁵ Ja̧'hua̧nö̧ pättäcu ädätinö̧: "Huȩnȩ juiya'anä̧ ichösä Tömä̧ ichäjisä isa̧rö̧ cuä'ö iyähuä CHÖ̧Ä̧NÄ̧HUA̧RÖ chiyapä'ö. Suronä̧ jö̧ töcäu chicuapä'ö CHÖ̧Ä̧NÄ̧HUA̧ ä'cattö̧ i̧sa̧rö kú icu iyähuä chiyapä'ö ja̧hua̧nö̧ ja̧'a̧ttö̧ ti̧cha̧ ichätucui." Ja̧hua̧nö̧ ja̧'a̧ttö̧ ja̧u̧mä kä̧'ȩpö̧ ku̧ninö̧ Isairö i̧tti̧mö̧rö̧mä̧ a̧tȩpi̧nö̧ i̧sa̧rö̧ cu'ö iyähua'acu." ⁶ Jahuätö ti'chi'omenä̧, ja̧u̧mä̧ Eliab'rö topö jacuänä̧tä̧ pä'inö̧ isopäi'önä̧ a̧dȩja TÖ̧Ä̧NÄ̧HUA̧TTÖ̧ da̧'ȩcua̧mä̧ ä'cajo̧me kó̧. ⁷ Ja̧'hua̧nö̧ ja̧'a̧nä̧ TÖ̧Ä̧NÄ̧HUA̧MÄ̧ pä'inö̧ Samuelrö: "Huä̧menä̧ jö̧mä̧ tocu'ärö, chutä otopö'inä̧; ja̧u̧mä̧ ttö yadocuinä̧cu̧. TÖ̧Ä̧NÄ̧HUA̧MÄ̧ ttö̧ja̧ totö'anö̧mä̧ topo'cö; ttö̧ja̧sa̧mä̧ topö huä̧menä̧ öadihuätä, Ja̧hua̧nö̧ ja̧'a̧nä̧ TÖ̧Ä̧NÄ̧HUA̧MÄ̧ topö ttamiso'qui. ⁸ Ja̧'hua̧nö̧ ja̧'a̧ Isaímä huopinö Aminadabrö, ja̧'hua̧ta̧'a̧nö̧ jȩpi̧nö̧ Samuel ö̧jo̧mȩ 'cuäopa pä'ö, ja̧'hua̧nö̧ ja̧'a̧ Samuel pä'inö: TU̧RU̧HUA̧'inä ja̧u̧tä̧ jä̧cua̧'a̧ pä'ocö päji." ⁹ Ja̧u̧nö̧ o'comenä Isaímä Samarö 'cuäo'önä jȩpi̧nö̧. Ja̧'hua̧nö̧ ja̧'a̧ Samuel pä'inö: TU̧RU̧HUA̧'inä ja̧u̧tä̧ jä̧cua̧'a̧ pä'ocö päji. ¹⁰ Isaí 7nö huotörö i̧tti̧mö̧rö̧ hue'inö Samuel ä'ca jo̧mȩ, ja̧'hua̧nö̧ ja̧'a̧ Samuel pä'inö Isaírö: "TU̧RU̧HUA̧ jahuätöttö ya̧tȩrö̧'inä pä'ocö päji." ¹¹ Ja̧'hua̧nö̧ ja̧'a̧ Samuel pä'inö: Isaírö ¿Pitötä ja̧'a̧di̧ o'catoi'önä ucu cui̧tti̧mö̧mä̧?" Ja̧u̧ ädätinö: "Ya̧tȩ mu̧ä̧ya̧ kö̧, ja̧'hua̧nö̧ ja̧'a̧nä̧ ja̧u̧mä̧ ovejastö̧rö̧ tta̧'a̧rö̧." Samuel pä'inö Isaírö: Hue'i ottäjarö; ujutumä ja̧u̧ ichi'ome jubö päi'önä pȩjä̧mo̧co̧tö̧ täcuotöjä̧. ¹² Isaí ja̧u̧rö̧ ä̧tȩpi̧nö̧ ja̧'hua̧nö̧ ja̧'a̧ tti'cächinä̧cu̧. jitämä, pide cui̧tti̧mä̧ adiunä kö̧ ja̧'hua̧nö̧ ja̧'a̧nä̧ ö'äriyämä a̧'cua̧cui̧nö̧ ja̧'hua̧nö̧ ja̧'a̧nä̧ ö̧jö̧mä̧ jo̧mȩnö̧ ki̧nö̧, TU̧RU̧HUA̧ pä'inö: "Ä̧rä̧mi̧'ö̧ a̧deja da'epirö; ja̧u̧tä̧ jä̧cua̧'a̧ pätetö ku̧nä̧hua̧mä̧. ¹³ Ja̧'hua̧nö̧ ja̧'a̧ttö̧ Samuelmä, u̧bu̧o̧tö̧ ttö̧'cä̧tȩ jo̧mȩttö̧ a̧dȩ'i̧nä̧ i̧sa̧ ä̧ja̧sa̧na̧'i̧nä ȩmo̧po̧'ö̧ da'epinö. TÖÄ̧NÄ̧HUA̧ A̧'CUA̧RU̧HUA̧MÄ̧ ji̧yȩnö̧ mo̧ro̧ttö̧ kä̧mä̧dö̧ yabocumä Davidnätä ki̧nö. Ja̧u̧nö̧ 'cuäpäji o'ca'a Samuel ä̧ra̧mi̧'ö̧ Ramara'a ppa̧'a̧chi̧nö̧. ¹⁴ TÖ̧A̧NÄ̧HUA̧ a̧'cua̧ru̧hua̧ttö̧ 'cä̧i̧'pä̧chö̧ Saulmä ja̧'hua̧nö̧ ja̧'a̧ttö̧ isohua̧ su̧ro̧pä̧ DIOSTTÖ ichäjimä a̧'cua̧ rounö jepinö. ¹⁵ Saúl umuhuäyotumä pättinäcu: "Topittö, isoppahua̧ suropa̧mä a̧'cua̧ rounä jeäcu." ¹⁶ Hue'i ujutu huecuarö, ucutu cumuhuäyotörö hue'a, cuä'ca jome ka̧cuä̧tö̧ttö̧mä̧ arpa 'porähuä huo̧jua̧rö̧ cuȩmu̧'a̧nö̧ ja̧'a̧. ja̧'hua̧nö̧ ja̧'a̧ttö̧, isoppa hua̧ su̧ro̧pa̧ DIOSttö ichäji ucuru öjomenä ja̧u̧ ucuru hueomenä cua'cua adihuächi'önä. ¹⁷ Saúlmä̧ umöhuäyotörö pä'inö: "Ya̧tȩ adiu u'pora'anö hua̧rö̧ po̧cui̧pä̧ji̧yä̧tu̧cui̧ttö̧ po̧cui̧pi̧'ö̧mä̧ chu̧ja̧'a̧cu̧ cui'cächätucuaröjä̧. ¹⁸ Ja̧'hua̧nö̧ ja̧'a̧ jahuätö möäyotöttö ya̧tȩmä̧ pä'inö: Ttö huo̧hua̧sä̧ ya̧tȩ Belén ttö̧ja̧sa̧ Isaí i̧tti̧rö̧ 'porähuä'inä huo̧hua̧rö̧, juiyo ju̧ru̧hua̧rö̧, curä rohuähuäcuähuä'inä jo̧mȩnö̧ hua̧rö̧, ucuocuäcuähuä'inä huo̧jua̧rö̧, juiyo a̧di̧hua̧rö̧ ja̧'hua̧ta̧'a̧nö̧ TÖ̧Ä̧NÄ̧HUA̧'inä ö̧jä̧cu̧rö̧. ¹⁹ Ja̧'hua̧nö̧ jiähuäcu Saúlmä huȩnȩ ȩcuä̧ ttö̧ja̧rö̧ Isaí ö̧ja̧'a̧cu̧ hue'ömä pä'inö: Cui̧tti̧ Davidrö hue'ittö, ovejastö̧cu̧ kö̧rö̧." ²⁰ Isaímä börörö ȩmo̧po̧'ö̧ pan ö̧ppä̧'inä, 'cänäri̧yu̧ vino isoya a̧cuä̧yö̧'inä ja̧'hua̧ta̧'a̧nö̧ cabra isaju ki̧tti̧rö̧'inä cä'epö huȩnö̧ ja̧u̧mä̧ i̧tti̧ Davidcu hue'ö icui Saúl ö̧ja̧'a̧cu̧. ²¹ Ja̧'hua̧nö̧ ja̧'a̧ Davidmä Saúl ö̧ja̧'a̧cu̧ ichinö, ichi'ömä kä̧mä̧dö̧ aditinö. Saúlmä ja̧u̧rö̧ rö̧ä̧nä̧ repe'inö ja̧'hua̧ta̧'a̧nö̧ curä ttoecuäcuähuäbi 'chu̧'ä̧rö̧ jö̧nä̧tä̧ jȩi̧nä̧cu̧. ²² Saúlmä Isaírö pa̧'a̧nö̧ pä'ö i̧huȩnȩ hue'inö: Davidrö ttötäcu ö̧ja̧ pä'irö ttö to̧chä̧ro̧mȩtä̧ ö̧ja̧, ja̧u̧rö̧ adiunä topäjisä. ²³ Ja̧'hua̧nö̧ ja̧'a̧ TÖ̧Ä̧NÄ̧HUA̧ i̧sa̧ isoppa i̧sa̧ su̧ro̧pa̧ Saúlrö ö̧jä̧mä̧do̧mȩnä̧, Davidmä arpa ȩmo̧po̧'ö̧ ö'poromenä. Ja̧'hua̧nö̧ ja̧'a̧ isoppa i̧sa̧ su̧ro̧pa̧mä̧ 'cä̧'i̧pä̧cho̧mȩnä̧tä̧ Saúlmä adiu a̧'cua̧ ȩmö̧nä̧ pä̧i̧pä̧ri̧nä̧cu̧.