¹ Samuel pä'inö Saúlrö: "TU̧RU̧HUA̧ hueinäcu̧sä̧ ucuo ru̧hua̧rö̧ hue'ö chu̧ju̧na̧ pä'ö Israel ttö̧ja̧ ttu̧huä̧mȩnä̧ ö̧ja̧ pä'ö. Jitämä ä̧ju̧cui̧ TU̧RU̧HUA̧ i̧huȩnȩtä̧. ² Pi̧yȩ ja̧'a̧ su̧ro̧da̧u̧ TÖ̧Ä̧NÄ̧HUA̧ pä'ömä: Täcö huo̧juä̧chi̧'ö̧sä̧ Amalec jȩi̧nö̧mä̧ Israel ttö̧ja̧rö̧ koro huehuepu ttö chahuaruhuä ötahuiyä ttö̧ja̧ mä̧nä̧nä̧ Egipto rȩjȩra̧'a̧cu̧ ttichomenä. ³ Jitämä topätucui Amalecrö rohuäu ticuarö ja̧'hua̧ta̧'a̧nö̧ o'cajuiyönä surojuotepiyarö ja̧u̧ u̧ju̧nä̧rö̧mä̧ . Äyó reȩrö̧jö̧nä̧mä̧ totarö päcuä, ja̧'hua̧nö̧ ja̧'a̧ttö̧ o'catoi'önä̧rö̧ u̧mä̧tö̧'inä, nätö̧rö̧'inä, ppo̧'ä̧tö̧rö̧'inä, atate ahuätörö'inä pä̧cä̧yu̧ru̧'inä, ovejastö̧rö̧'inä, camellotörö'i̧nä̧ ja̧'hua̧ta̧'a̧nö̧ burötö̧rö̧'inä. ⁴ Saúl ji̧nä̧ yo̧mȩtȩ ca̧ca̧cui̧pu̧ ucuocuinätö̧ ötahuiyä ttö̧ja̧ ja̧'hua̧ta̧'a̧nö̧ ji'ähuinö bareu ötahuiyä Telaim: 200.000nö su̧ro̧da̧u̧ ja̧'hua̧ta̧'a̧nö̧ 10.000nö̧ su̧ro̧da̧u̧ Judá ttö̧ja̧. ⁵ Ja̧'hua̧nö̧ ja̧'a̧ Saúl rȩbȩhui̧nö̧ Amalec ttö̧ja̧ ttötahuiyära̧'a̧ ja̧'hua̧ta̧'a̧nö̧ tta̧'ä̧ri̧nö̧ muä'quiyuttö pämäroppä jo̧mȩ. ⁶ Ja̧'hua̧nö̧ ja̧'a̧ Saúl päi'inö Quenitarö: " Rä'opu ti'ipächätucuí Amalec ttöja̧ttö̧, jahuätucu tocue'ätucua'acu. Ucutu o'catoi'önä̧mä̧ adiunä̧tä̧ jȩpu̧ kä̧tö̧jä̧ Israel ttö̧ja̧rö̧mä, jahuätö Egiptottö ttichinomȩ jobu kä̧mä̧dö̧ ." ⁷ Ja̧'hua̧nö̧ ja̧'a̧ttö̧ Quenitamä otó tö'ipächinä̧tö̧ Amalec ttö̧ja̧ttö̧mä. Ja̧'hua̧nö̧ jä̧ji̧ o'ca'a Saúlmä̧ rohuähuinö Amalec ttö̧ja̧rö̧ Avilattö kä̧mä̧dö̧ Shur beipome jubu, juhua'amä̧ ki̧'i̧pa̧'a̧ Egjpto kä̧hua̧ räopa'acu. ⁸ Saúl 'chu'ädinö Agarö a̧'cua̧ra̧'a̧nä̧, Amalecttö ucuo ru̧hua̧rö̧; ja̧u̧mä o'catoi'önä̧rö̧tä̧ si'epu icuinö ucurä'chu so̧ä̧'chunä. ⁹ Saúl umuhuäyotucumä̧ ji̧nä̧ kunä̧ri̧nä̧tö̧ Agagrö, ja̧hua̧ta̧'a̧nötä̧ ku̧nä̧ri̧nä̧tö adihuätörömä ovejattörö, päcäyö̧ bärepättö̧rö̧, ovejattö̧ muäyotö, päcäyö̧ muäyotörö. O'cajuiyönä̧ adiumä̧ jȩpu̧ icuocotö pinättö̧. koro ttöjö'co micuäu juiyömä o'cajuiyönätä̧ suro juo'epinä̧tö̧. ¹⁰ Ja̧'hua̧nö̧ ja̧'a̧ Tu̧ru̧hua̧ Dios i̧huȩnȩ rȩbȩhui̧na̧'a̧ Samuelrö pä'ö: ¹¹ Cha̧'cua̧tta̧ jä̧cu̧sä̧ Saúlrö ru̧hua̧ päi'önä jȩcha̧ja̧'a̧mä̧ ja̧'hua̧nö̧ ja̧'a̧ttö̧ ttöcumä oto hua̧ ja̧'hua̧ta̧'a̧nö̧ esetoca'a ja̧'a̧ttö̧ huähuä huȩnȩ. "Samuel rö̧ä̧nä̧ a̧'cua̧tta̧'ȩcui̧nö̧, u̧ru̧hua̧ Diosrö ajacuähuinö yodo 'cuäo'önä. ¹² Samuel pä'ö mo̧ro̧ juoa'a porachi'ö Saúlcu i'ätecuächa pä'ö mo̧ro̧ juoa'a. Samuelrö ji'ähuinä̧tö̧: "Saúlmä i̧huä̧chä̧ji̧ carmel ja̧'hua̧ta̧'a̧nö̧ cä'epinö a̧'cua̧juä̧ isä'ca ja̧u̧nö̧ o'ca'a ppa̧'a̧chö̧ mȩyȩhui̧nö̧ Gigalra̧'a̧cu̧. ¹³ Ja̧'hua̧nö̧ ja̧'a̧ Samuel ichi'inö Saúl ö̧jo̧mȩ, ja̧'hua̧ta̧'a̧nö̧ Saúlmä päinä̧cu̧ ttömä jȩpä̧ji̧sä̧ tu̧ru̧hua̧ hueäjimä. ¹⁴ Samuel pä'inö̧: "¿Ja̧hua̧nö̧ jö̧ttö̧mä̧ däjéjä̧ttö̧ o̧veja̧ttö̧ tti̧huȩnȩ ja̧'hua̧ta̧'a̧nö̧ päcäyä̧tö̧ tti̧huȩnȩ'inä̧ chä̧ju̧cu̧mä̧?" ¹⁵ Saul ädätinö̧: "Jahuätömä̧ Amalec ttö̧ja̧ ttä̧jimuttö̧ tti̧'cä̧chä̧jä̧u̧. Jua'attö oveja̧tö̧ ja̧'hua̧ta̧'a̧nö̧ pä̧cä̧yö̧rö̧mä̧ ttö̧ja̧tä̧ pojopö̧ ttu̧ju̧nina'a̧ ucutä CU̧RU̧HUA̧ CU̧Ä̧NÄ̧HUA̧RÖ̧ ku'icu ttiyayä̧u̧. Korotörömä̧ ya̧tȩ'i̧nä̧ ö̧ji̧pu̧juiyönä̧ cuä'äö icuäjätöjä." ¹⁶ Ja̧hua̧nö̧ ä̧ju̧cu̧ Samuel pä'inö̧ Saúlru: "Mä̧cuä̧tó, jidähua'a ä̧ju̧cui̧ TÖ̧Ä̧NÄ̧HUA̧ mo̧ro̧ji̧ yodomä̧ päcusä." Saúl pä'inö̧: "Ucuocui". ¹⁷ Samuel pä'inö̧: "¿Ucu cuamonä̧ to'cuomenä̧ a̧'u̧cua̧'a̧nä̧, ucurumä̧ hueähui'oca'a ji̧na̧'a̧ Israel ttö̧ja̧rö huecua pä'ömä̧? ¹⁸ TÖ̧Ä̧NÄ̧HUA̧MÄ̧ hue'inö̧ ucuru pa̧'a̧nö̧ pä'ö: Täí suronä̧ jȩpä̧tö̧rö̧mä̧ ya̧tȩ'inä̧ ö̧ji̧pu̧juiyönä̧ cuä'ö cuicuajá, Amalecitarömä̧, jahuätörömä̧ o'catoi'önä̧rö̧ rohuäu cuä'ö cuicuajá". ¹⁹ Juhua'amä̧ TU̧RU̧HUA̧ päinö̧ ttoarodöta'anö̧, ja̧'hua̧nö̧ jȩ'cu̧'a̧nö̧ jä̧jo̧memä̧, ucumä̧ ȩmä̧ji̧jä̧ jahuättö ttä̧ji̧mu̧ttö̧ ja̧'hua̧nö̧ jȩcu̧'ä̧ji̧mä̧ TÖ̧Ä̧NÄ̧HUA̧ ä'cattömä̧ öjö'cocö ja̧'a̧." ²⁰ Ja̧'hua̧nö̧ ja̧'a̧ Saúlmä Samuelrö pä'inö: Ttömä̧ TÖ̧Ä̧NÄ̧HUA̧ ucuocumä esetä'ijösä, ja̧'hua̧nö̧ ja̧'a̧ttö̧ TÖ̧Ä̧NÄ̧HUA̧ umänä huȩi̧nä̧mä̧nä̧tä̧ 'chä̧'i̧jö̧sä̧. Amalec ttö̧ja̧ ttu̧ru̧hua̧ Agag'inä 'chu'ädäjisä ja̧'hua̧ta̧'a̧nö̧ Amalec ttö̧ja̧rö̧mä̧ o'catoi'önä̧rö̧ si'epö icuäjisä. ²¹ Ja̧'hua̧nö̧ ja̧'a̧nä̧ ttö̧ja̧mä̧ ovejastö̧rö̧'inä pä̧cä̧yu̧rö̧'inä ȩmi̧nä̧tö̧, si'epö tticua pä'ö ku̧nä̧huo̧tö̧rö̧mä̧, Gilgal pä'ö micuomȩttö̧ TÖ̧Ä̧NÄ̧HUA̧RÖ̧ ku icu ttiya pä'ötä jȩpä̧jä̧tö̧." ²² Samuelmä ädätinö: "¿Ja̧ö̧ttö̧mä̧ TÖ̧Ä̧NÄ̧HUA̧MÄ̧ ttiäre ku icu iyähuätä rö̧ä̧nä̧ eseu ja̧'hua̧ta̧'a̧nö̧ ku icu iyähuättö yabonänö päö ttucuotajueimä? Ji̧yȩtä̧mä̧ ucuotäcuähuä ja̧'a̧, i̧sa̧rö̧ ku icu iyähuämäcö̧, jinäsomä ä̧ju̧cuä̧cuä̧huä̧ ja̧'a̧ oveja ubo ö̧a̧dȩmä̧cö̧. ²³ Jarodäcuähuämä mä̧ripä jȩpä̧'chö̧ kä̧cuä̧huä̧jö̧ta'anö surojö ja̧'a̧ ja̧'hua̧ta̧'a̧nö̧ ucuotäcuähuocömä tätähuä o'ca ucuo tettähuä'ija'anö ja̧'a̧. Juhua'amä TÖ̧Ä̧NÄ̧HUA̧ hueäji jȩ'cua̧ päcuoca'a jä̧ja̧'a̧ttö̧, chutä'inä ru̧hua̧ päi'önä ku̧jä̧ji̧mä̧ jȩpö̧ icuäjäcujä̧." ²⁴ Ja̧'hua̧nö̧ ja̧'a̧ Saúlmä pä'inö: Samuelrö suronä jȩpä̧ji̧sä̧ juhua'amä TÖ̧Ä̧NÄ̧HUA̧ hueinö chucuotocomenä ja̧'hua̧ta̧'a̧nö̧ ucu cui̧huȩnȩ'inä, juhua'amä ttö̧ja̧rö̧tä̧ ye'ecu pättötä ucuotäjisä. ²⁵ Ja̧'hua̧nö̧ ja̧'a̧ttö̧ suronä jȩchä̧ji̧mä̧ suronä jȩpo̧cö̧ päji 'cua̧rö̧nä̧ topittö ja̧'hua̧ta̧'a̧nö̧ ppa̧'ä̧chi̧ ttöcu TÖ̧Ä̧NÄ̧HUA̧RÖ̧ ucuotö tucuocuaja." ²⁶ Samuelmä, Saúlrö pä'inö: "Ucucumä ppa̧'ä̧cho̧cö̧sä̧; isopäi'önä ucumä TÖ̧Ä̧NÄ̧HUa̧mä̧ yahuocuäcujä̧ ja̧'hua̧ta̧'a̧nö̧ TÖ̧Ä̧NÄ̧HUA̧MÄ̧ yahuocuäcujä̧ yabonö Israel ttö̧ja̧ ttu̧ru̧hua̧ jö̧nä̧ ku̧ja̧ pä'ömä. ²⁷ Samuel i̧'cha̧ pä'ö ijärächi'öta'anö yotäcu, Saúlmä ö̧'ca̧tä̧huä̧ta̧ huä̧mȩ i̧sä̧ta̧nä̧ 'chuädio'menä sȩrä̧hui̧'i̧na̧'a̧. ²⁸ Mamuel ja̧u̧ru̧ pä'inö̧: TU̧RU̧HUA̧MÄ̧, Israelnä ruhuo cujä̧'i̧jo̧mȩttö̧ 'choipäcujä jirä mo̧ro̧ ja̧'hua̧nö̧ ja̧'a̧nä̧ ka̧ra̧rö̧ i̧ya̧cua̧jä̧ ya̧tȩ ucuttu'inä abonänö hua̧rö̧. ²⁹ Israel ttöja̧ ttujurumä yapare pä'ö'inä pärotötticuiyäcuotö ja̧u̧mä̧ ttö̧ja̧ i̧sä̧ i'ärotö'anömä pärotocu ja'attö̧. ³⁰ Ja̧'hua̧ta̧'a̧nö̧ Saúl pä'inö: "Ja̧hua̧nö ja̧'a̧ttö Israel ttä'cattö'inä ötahuiyä ucuo ttö̧ja̧ ttä'cattö'inä chucuoönä ppä'ädipittö Suronä jȩcha̧'a̧nä̧. TU̧RU̧HUA̧ DIOSRÖ tucuocua ttöcu räopi." ³¹ Samuelmä Saúl o'ca'anä 'chinö ja̧'hua̧nö̧ ja̧'a̧ttö̧ Saulmä TÖ̧Ä̧NÄHUARÖ̧ ucuocuinö. ³² Samuelmä pä'inö: "I'cächätucui Agag Amalecitas ttu̧ru̧hua̧rö̧ 'chä'ca jo̧mȩ. "Agag ichinö ö̧jo̧mȩ nö̧'cä̧hua̧ cuoräusanä ja̧'hua̧ta̧'a̧nö̧ "Isopäi'önä hua'are ajahuäcuähuämä 'cuäopäja'a." ³³ Samuelmä ädätinö: "Ucu cucurä'chumä nä̧tö̧ tti̧tti̧mö̧ toönä jä̧ja̧'a̧, ja̧'hua̧nö̧ ja̧'a̧ttö̧ ucu'inä 'coru juocuächa'anö ja̧'a̧ ki̧ni̧pö̧ cua̧ju̧ ki̧tti̧mö̧ to'aju kö̧jö̧nä̧." Ja̧'hua̧nö̧ ja̧'a̧ Samuel 'cuä'opinö Agagrö ppo̧u̧cu̧nä̧ TU̧RU̧HUA̧ ä'ca jo̧mȩ Gilgattö. ³⁴ Ramara̧'a̧ 'chi̧nö̧ Samuel ja̧'hua̧ta̧'a̧nö̧ Saúlmä 'chi̧nö̧ ojusodera̧'a̧ Guibéattö chutä Saúl i̧rȩjä̧ra̧'a̧. ³⁵ Samuelmä täcö pinö Saúl 'coru juoächö mo̧ro̧ jo̧mȩ jubö ja̧'hua̧nö̧ ja̧'a̧ huopinä̧tö̧ Saúlrö. Ja̧'hua̧nö̧ ja̧'a̧ tu̧ru̧hua̧mä̧ a̧'cua̧tta̧nö̧ amöcuädinö ru̧hua̧ päi'önä rutinö'ca̧ saúlrö Israel ttö̧ja̧ ttu̧ru̧hua̧ jö̧nä̧.