¹ Ya'ute mo̧ro̧ Saúl i̧tti̧ Jonatánmä pä'inö umöhuäya möäya̧rö̧ rohuähuäcuähuä obi ȩcuä̧ i̧sa̧rö̧, ichihuä ya̧nä̧ pä̧tȩcuä̧nö̧ ti̧'cha̧ filisteos ttä'äbariyänä ja̧'hua̧nö̧ ja̧'a̧nä̧ jä'orömä ji'ähuocö pinö. ² Saúlmä ki̧nö̧ Guibe'anä korotö tti̧rȩi̧jä̧cu̧ beipome dau u̧huä̧ju̧ ote huȩjä̧i̧mä̧ ki̧na̧'a̧ Migránnä juäi dȩa̧'a̧ pi̧nö̧ chutäcumä 600nö tö'cöhuächi'önä huotö ji̧na̧'a̧ u̧mä̧tö̧mä̧. ³ Jua'attömä ki̧nö̧ Ahito i̧tti̧ Abias'inä ji̧na̧'a̧, Elí i̧tti̧ Finees'inä Tö̧ä̧nä̧hua̧ aditähuä adicuä ttö̧ja̧ i̧sa̧ Silottö, ö̧'ca̧tä̧huä̧ta̧mä̧ 'ca̧tä̧hui̧nö̧ Diosttö'inä ttö̧ja̧ttö̧'i̧nä̧ kä'co päte'öadicuä ttö̧ja̧ ttö̧'ca̧tä̧huä̧ta̧ 'ca̧tä̧hui̧nö̧ ttö̧ja̧mä̧ jerupinä̧tö̧ Jonatán i̧huä̧ja̧'a̧mä̧. ⁴ Filisteos ä'ecu ttö̧ja̧cuo̧mȩnä̧ 'cuäopa pä'ö a̧mö̧cuädomemä pä̧tȩcu̧ idose jo̧mȩ ja̧'a̧nä̧ inäducu jo̧mȩ ji̧na̧'a̧. Ja̧u̧ idosemä Boses pä'ö micua'anä pä̧tȩcuä̧nö̧mä̧ Sene pä'ö micuinome. ⁵ ja̧u̧ idose juiächi'omemä Micmasttömä̧ pä̧tȩcuä̧nö̧ ja̧'a̧nä̧ ö'ohuecu ki̧na̧'a̧, ja̧'hua̧ta̧'a̧nö̧ ji̧jä̧cu̧mä̧ Geba ötahuiyättömä pä̧tȩcuä̧nö̧ ja̧'a̧nä̧ u̧huo̧jua̧'a̧cu̧ ki̧na̧'a̧. ⁶ Jonatánmä möäya̧ curä rohuäu ttoecuäcuähuäbi ku̧nä̧rö̧rö̧ pä'inö: Ichi, ti̧'cha̧, judio huocotö ä'ecu ttö̧ja̧cuo̧mȩnä̧ 'cuätopa. TÖ̧Ä̧NÄ̧HUA̧ ujuturu ppädipa'anö ja̧ pä'ö, täcö TÖ̧Ä̧NÄ̧HUA̧MÄ̧ recuätönä'inä a̧'u̧cu̧nä̧tä̧ huotönä'inä curättö ttö̧ji̧pö̧nä̧mä̧ ppädädö juiyö'anö ja̧'a̧ pä'ocö jä̧cua̧." ⁷ Curä rohuäu ttoecuäcuähuäbi ku̧nä̧rö̧rö̧mä̧ pä'inö: "Ucutä cuamö̧cuäda'acu jȩpi̧. Tähuä ti̧'cha̧ ttömä ucutäcu kö̧sä̧ huecumä o'cajuiyönä̧tä̧ jȩchä̧cua̧sä̧." ⁸ Jonatán pä'inö: "Ujutumä töjähuächäcuotöjä̧ jahuätö ttö̧ja̧ umätö̧ ttö̧ja̧cuo̧mȩ, ja̧'hua̧ta̧'a̧nö̧ ti̧jȩpä̧cuo̧tö̧jä̧ jahuätörö. ⁹ Jahuätö ujuturu pättöttömä: Tta̧'ä̧rä̧tu̧cui̧ ju̧huȩnȩtä̧ ujutu ucutu cu̧jä̧tu̧cuo̧mȩ ttö̧rä̧bȩhuo̧mȩ jubö, ja̧'hua̧nö̧ ja̧'a̧ttö̧ ujutumä tö̧jä̧'i̧jo̧mȩtä̧ tö̧ja̧cuä̧cuo̧tö̧jä̧ ja̧'hua̧ta̧'a̧nö̧ jahuätörömä kätocotöjä. ¹⁰ Jahuätö ttädätöttömä̧: I̧chä̧tu̧cui̧ ujutu tö̧ja̧cua̧'a̧cu̧, ja̧'hua̧nö̧ jö̧ttö̧mä̧ ujutumä jahuätörömä ttö̧ä̧u̧nä̧ jȩtä̧cuo̧tö̧jä̧; tocu pä'ö TU̧RU̧HUA̧MÄ̧ ujutu tumönä iyina'attö̧, ja̧'hua̧nö̧tä̧ i̧jȩcuä̧cua̧'a̧ ujuturu. ¹¹ Ja̧'hua̧nö̧ ja̧'a̧ttö̧ ta̧ju̧cuäyotö i̧jȩcui̧nä̧tö̧ filisteos su̧ro̧da̧u̧rö̧. Filisteos ttö̧ja̧mä̧ pä'inä̧tö̧: Topätucui Hebreos ttö̧ja̧mä̧ idoriyära̧'a̧ dajahuächinä̧tö̧mä̧ jitämä juhua'attö rä'ecuätö. ¹² Ja̧'hua̧nö̧ ja̧'a̧ umätö̧ su̧ro̧da̧u̧mä̧ huopinätö̧ Jonatánrö̧ ja̧'hua̧ta̧'a̧nö̧ ttoecuäräcuähuäbi ttopärätö̧rö̧'i̧nä̧ ja̧'hua̧ta̧'a̧nö̧ päinätö̧: "Ujutu ttja̧cua̧'a̧cu̧ ichi, ja̧hua̧ta̧'a̧nö̧ ji̧yȩtȩ ti̧jȩpä̧tu̧cua̧cu̧" Jonatán pä'inö 'kiyäbi tto̧'ȩpä̧rä̧tö̧rö̧: Cho'ca'anä ichätucui TU̧RU̧HUA̧MÄ̧ Israel ttö̧ja̧ ttu̧mö̧nä̧ iyäcuotöjä̧. ¹³ Jonatánmä umunä'inä i̧jä̧punä inä te'chaunu 'cha'achinö, ja̧'huanö ja̧'a̧nä̧ ttoecuäbi 'chuhuä̧rä̧cuä̧ i̧samä̧ ja̧u o'ca'anä̧ huä̧mipinö̧, Filisteos ttö̧ja̧mä̧ Jonatán ä'ca jomettö̧ 'corupä inä̧tö̧, Ja̧hua̧nö̧ ja̧'a̧ ttoecuä obi 'chuä̧rä̧tö̧mä̧ ja̧u o'ca'anä̧ ichätörö cuä'äu icuinä̧tö̧. ¹⁴ Ja̧hua̧ta̧nö̧ Jonatán umuhuäyotu ttoecuä obi 'chuä̧rä̧tucu a̧cuomenä̧ rohuäumä, quince metros jomȩ isaräjarä jacuättömä veintenö umätö tö'cöhuächiönä̧ cuäu icuinätö̧. ¹⁵ Ttiabarä jomemä rähuȩjina̧'a̧ otahuiyä ttö̧ja̧ ttö̧jomȩ 'chäte inä su̧roda̧u inä yittecunä̧ jinäu. Rȩjȩmä̧ inä tti̧epa̧'anä juiyo riä̧nä̧ rahuejö kina̧'a̧. ¹⁶ Ja̧'hua̧nö̧ ja̧'a̧ Saúlrö tta̧'ä̧rä̧tö̧ Benjamín idepiyu Guibeá ttö̧ja̧mä̧, filisteosttö su̧ro̧da̧u̧ recuätö pperecuächäjä'cotö ttö̧ja̧cua̧'a̧ topömä ja̧'hua̧ta̧'a̧nö̧ jahuätömä ja̧'a̧tä̧ pä̧huä̧rö̧ja̧'a̧ dö'ecuächinä̧tö̧. ¹⁷ Ja̧'hua̧nö̧ ja̧'a̧ chutäcu ka̧cuä̧tö̧rö̧ Saúlmä pä'inö̧: "Pa̧ja̧tä̧tu̧cui̧, ujututtömä ditä toa pä'ö." Jahuätö ttö̧'a̧to̧mȩnä̧ Jonatántä ja̧'hua̧ta̧'a̧nö̧ Curä rohuäu ttoecuäcuähuäbi ku̧nä̧rö̧rö̧tä̧ toina'a. ¹⁸ Saúlmä Ahíasrö pä'inö: "TÖ̧Ä̧NÄ̧HUA̧ esecuinö ȩco̧ca̧ pȩnȩcu̧ i'cächi. (Ja̧u̧nö̧ pä̧nä̧mä̧, juo̧ca̧mä̧ Israel ttö̧ja̧cu̧ ki̧no̧ca̧). ¹⁹ Saúlmä ji̧nä̧ TÖ̧Ä̧NÄ̧HUA̧TTÖ̧'i̧nä̧, ttö̧ja̧ttö̧'i̧nä̧ kä'co päte'ö adicuä ttö̧ja̧sa̧cu̧ ucuocua'anä, filisteas ä'ecu ttö̧ja̧cuo̧mȩttö̧mä̧ yabonötä rö̧ä̧nä̧ huotta'a rä̧mi̧pi̧na̧'a̧. Ja̧'hua̧nö̧ ji̧yä̧cu̧ Saúlmä TÖ̧Ä̧NÄ̧HUA̧TTÖ̧'i̧nä̧, ttö̧ja̧ttö̧'i̧nä̧ kä'co päte'ö adicuä ttö̧ja̧sa̧rö pä̧'i̧nö̧, "Cu̧mö̧ ȩmö̧ icui." ²⁰ Saúlcu ka̧cuä̧tö o'catoi'önä̧ ji̧nä̧ yo̧mȩtȩ pä'i'ö 'chinä̧tö̧ curä rohuäu. Filisteos ya̧cu̧nä̧ ttucurä'chumä̧ jitötä tta̧hua̧ru̧hua̧rö̧tä rohuähuinä̧tö̧ yori'iso ttierujunä̧tä̧ cuäópinä̧u̧. ²¹ Jitö hebreos ä'ähuarära̧'a̧ 'chänö Filisteoscu ka̧cui̧nä̧tö pinä̧tömä Israel ttö̧ja̧cu̧tä̧ huihuacuächinä̧tö̧ Saúl'inä ja̧'hua̧ta̧'a̧nö Jonatáncu̧ huettomȩta̧. ²² Israel ttö̧ja̧ ye'ecu da̧ja̧huä̧rö̧ ka̧cui̧nä̧tö̧ Efraín muä'ca po̧ri̧yä̧'tä̧ jo̧mȩ, ä̧ju̧cui̧nä̧tö̧ Filisteosmä dö'ecuächätö pä'ö, ja̧hua̧nö ji̧yä̧u̧ jahuätö tto'ca'anä̧ rui'inä̧tö̧ törohuahua päö. ²³ Ja̧'hua̧nö̧ ja̧'a̧ttö̧ TTÖÄNÄ̧HUA̧ ppä'ädinö ja̧u̧nu mo̧ro̧ Israel ttö̧ja̧rö̧ juhua'a yabocu rohuäu tti̧'chä̧i̧o̧mȩ Bet Avénra̧'a̧cu̧. ²⁴ Ja̧u̧nö̧ mo̧ro̧ Israel ttö̧ja̧mä̧ tta̧'cua̧ tta̧'ȩcui̧nä̧tö̧, ötahuiyä ttö̧ja̧rö̧ Saúl ji̧yȩtȩ pähuä pa̧'a̧nö̧ jä̧cua̧'a̧ pä'ö ö̧jö̧no̧mȩnä̧: "Ni̧pä̧chä̧cua̧'a̧ ä'canä ya̧tȩ u̧cuȩ curumä surujunätä̧ ö̧ji̧pä̧cua̧, ja̧'hua̧ta̧'a̧nö̧ ttötä chaboiyotörö micuä chimita'anä." Ja̧'hua̧nö̧ ja̧'a̧ttö̧ umöhuäyotö su̧ro̧da̧u̧ttö̧mä̧ ya̧tȩ'inä u̧cuȩmä̧ cuoku pinö. ²⁵ Ja̧'hua̧nö̧ ja̧'a̧ ttö̧ja̧mä̧ de'a jo̧mȩ do'ächi'inä̧tö̧ ja̧'hua̧nö̧ dottächi'omenä̧ juȩnȩ maya ka̧cui̧na̧'a̧ ja̧huä̧jä̧nä̧mä̧. ²⁶ ttö̧ja̧mä̧ de'a jo̧mȩ dottächi'omenä mayamä räopina'a, ja̧'hua̧nö̧ räopa'anä ya̧tȩ'inä ucuamä pä'ocö pinö, ttö̧ja̧mä̧ surojuo'ächä̧cua̧ pä'ö ku̧nä̧huö̧ yettecua'attö̧. ²⁷ Ja̧'hua̧nö̧ ja̧'a̧nä̧ Jonatánmä jä'o ji̧yȩtȩ ttö̧ja̧rö̧ pä'ö ö̧jö̧nä̧ji̧mä̧ ä̧ju̧cuo̧ca̧'a̧ ja̧'a̧ ji̧na̧'a̧. Ja̧u̧mä̧ udacuodä 'chuä̧rodänä ja̧'hua̧ta̧'a̧nö̧ juodänätä̧ jacuäcu rä'ädinö. Ja̧u̧mä̧ ja̧u̧ maya cuinö, ja̧'hua̧nö̧ ucuomenä ujuru ichi'inä̧cu̧. ²⁸ Ja̧'hua̧nö̧ ja̧'a̧ juȩnȩ ka̧cuä̧tö̧ttö̧ ya̧tȩ pä'inö: Cuä'omä ttö̧ja̧ jȩtta̧ pä'ö jö ji̧yȩtȩ pähuä pä'ö ku̧nä̧ji̧ pa̧'a̧nö̧: Ja̧u̧nö̧ mo̧ro̧ curumä surojunä̧tä̧ jä̧cua̧, ttucua ppäittö ttö̧ja̧ ttijiyuhuächa'anä ucua'attö̧." ²⁹ Jonatán päi'nö: Chä'omä i'cächinäujä ttieruhuäjä rȩjȩra̧'a̧. Topi cujuru ichia'a a̧'u̧cu̧nä̧tä̧ ka̧cuä̧mö̧ topäjisä ³⁰ ¿Ötahuiyä ttö̧ja̧ ttö̧mä̧ tta̧'a̧nö̧ recuätö jä̧ttö̧ jitä mo̧ro̧ ttaboiyotö ttu̧mö̧ jahuä ttemomettö huȩnȩ juiyönä cuäjätömä? Ja̧'hua̧ta̧nö̧ Filisteos su̧ro̧da̧u̧rö ttö̧'cä̧tȩttö̧mä adiunä cuä'ö icuocotö pinätö. ³¹ Jahuätömä ja̧u̧nu̧ mo̧ro̧mä̧ Micmas ötahuiyättö kä̧mä̧dö̧ Ajalon jubu rohuähuinätö Filisteos su̧ro̧da̧u̧ru̧mä̧. Ötahuiyä tto̧ja̧mä̧ juiyo riänä 'cuä'ächipäjätö pinätö. ³² Ja̧hua̧nö̧ ja̧'a̧ 'chottipäjijä̧ji̧mä̧ jurunänö jȩpo̧u̧ o̧vȩja̧tö̧rö̧'i̧nä̧ pä̧cä̧yö̧rö̧'i̧nä̧ o̧vȩja̧tö̧ tti̧tti̧mö̧rö̧'i̧nä̧ ȩmo̧po̧u̧ rȩjȩ cuä'ö rutinätö. Ja̧'hua̧nö̧ ja̧'a̧ ötahuiyä ttö̧ja̧mä̧ ucuoja jacuänätä cuinätö. ³³ Ja̧u̧nö̧ o'ca'a Saúlrö pä'inä̧tö̧: "Topittö, ttö̧ja̧mä̧ TÖ̧Ä̧NÄ̧HUA̧ hueocö ji̧nö̧ jȩpä̧tö̧, i̧sa̧rö̧ ucuojacu cuätö." ³⁴ Saúlmä ädätinö: Pähui'ocö jinö jȩpä̧jä̧tö̧. Ja̧'hua̧nö̧ ja̧'a̧ttö̧, jiyuja inäyu rö̧ä̧yu chö̧ja̧'a̧cu̧ pporädiyittö." Saulmä pä'inö: Ttö̧ja̧ ttö̧'cä̧tȩ 'chä̧hui̧'ö̧ pä'itö, "O'ca toi'önä cuäji päcäyärö'inä, ovejrö'inä i'cächipö porö cuä'ätucui, cucuätucua. Pä'äjita'anö TÖ̧Ä̧NÄ̧HUA̧ päocö jinömä jȩ'cuä̧tu̧cuä̧ ucuojacu yo̧mȩtȩnä̧ cuä̧nö̧mä̧." Ja̧'hua̧nö̧ pä̧u̧ ja̧u̧ yodomä yotucu pönä päcäyärö i'cächö juhuorötä cuä'inätö̧. ³⁵ Saulmä̧ i̧sa̧rö̧ ku TTÖ̧Ä̧NÄ̧HUA̧RÖ̧ iyähuome aditinö̧, ju̧huȩnȩ ji̧na̧'a̧ ä̧cuo̧menä̧ isa̧rö̧ ku TTÖ̧Ä̧NÄ̧HUA̧RÖ̧ iyähuome aditina'a̧mä̧. ³⁶ Ja̧u̧nö̧ o'ca'a Saúlmä pä'inö jitä pi̧yȩ yodotä ttösaja ttö filisteosrö yo̧ȩi̧ mo̧ro̧, mo̧ro̧ juoome jubö, ya̧tȩrö̧'inä ö̧ji̧pö̧ juiyönä a̧'cua̧ra̧mä̧. Jahuätömä ädätinä̧tö̧: Ucurutä adihuomenätä̧ jȩpä̧tu̧cui̧, ja̧'hua̧nö̧ ja̧'a̧nä̧ TÖ̧Ä̧NÄ̧HUA̧ aditähuä adicuä i̧sa̧mä̧ pä'inö: Tötö'cöhuächi'ätucua pȩnȩtä̧. ³⁷ Saúlmä TÖ̧Ä̧NÄ̧HUA̧rö̧ yabonötä̧ jä'epö ä̧ju̧cua̧ pä'inö, "¿Filisteosrömä yabonö̧tä̧ röda pä'ö ja̧'a̧? ¿Israel ttö̧ja̧ ttu̧mö̧nä̧tä̧ chi̧yä̧cuä̧u̧? Ja̧'hua̧nö̧ TÖ̧Ä̧NÄ̧HUA̧mä̧ ädätocö pinö mo̧ro̧mä̧. ³⁸ ja̧'hua̧nö̧ ja̧'a̧ Davidmä pä'inö: Ötahuiyä ttö̧ja̧ tturuhuotö o'catoi'önärö̧ jitä mo̧ro̧ suroju 'cuäopäji topö huo̧juä̧chi̧'ä̧tu̧cui̧. ³⁹ Isopäi'önä TÖ̧Ä̧NÄ̧HUA̧MÄ̧ Israel ttö̧ja̧ surojuttö ttö̧ji̧pö̧nä̧ jȩpi̧nö̧mä̧ 'cuäopönä ö̧ja̧'a̧ttö̧, suronä jȩä̧cuä̧huä̧ chi̧tti̧nä̧ ka̧ pä'ö'inä ja̧u̧mä̧ yorö'iso 'corujuo'ächocö jä̧cua̧. Ja̧'hua̧nö̧ pä'anä ötahuiyä ttö̧ja̧ttö̧mä̧ ya̧tȩ ädätocö pinö. ⁴⁰ Ja̧u̧nö̧ o'ca'a ja̧u̧mä̧ pä'inö Israel ttö̧ja̧ o'catoi'önä ucutu'inä, ucurutä pä̧huä̧rö̧ja̧'a̧cu̧ kä̧tö̧jä̧, ja̧'hua̧ta̧'a̧nö̧ ttö'inä ja̧'hua̧ta̧'a̧nö̧ chi̧tti̧ Jonatán'inä korome ttö̧jä̧cuo̧tö̧jä̧" ötahuiyä ttö̧ja̧mä̧ pä'inä̧tö̧ Saúlrö: " Ja̧'hua̧nö̧ jö̧ttö̧mä̧ ucurutä adiunä ja̧'a̧cu̧ jȩpi̧." ⁴¹ Ja̧'hua̧nö̧ ji̧yä̧cu̧ Saúl pä'inö U̧ru̧hua̧rö̧, Israel ttö̧ja̧ TTÖ̧Ä̧NÄ̧HUA̧: "I̧jȩpi̧ ido'qui ttu̧huo̧jua̧ pä'ö icuähuo'qui." Jonatán ja̧'hua̧ta̧'a̧nö̧ Saúlrö'inä jahuätörötä pätecuächaja'a, ja̧'hua̧ta̧'a̧nö̧ ötahuiyä ttö̧ja̧mä̧ ja̧'a̧tä̧ topätö jahuätörötä ttȩma̧'a̧nä̧. ⁴² Ja̧'hua̧nö̧ ja̧'a̧ Saúl pä'inö: "Chi̧tti̧ Jonatán'inä ja̧'hua̧ta̧'a̧nö̧ ttötä'inä tö'ätecuächahue." Ja̧'hua̧nö̧ ja̧'a̧ttö̧ Jonatánmä pätetö ku̧nö̧ ja̧u̧rö̧ pätecuächina'a. ⁴³ Ja̧'hua̧nö̧ ji̧yä̧cu̧ Saúlmä pä'inö Jonatánrö: "Jȩ'cuä̧ji̧ ji'ähuitö" Jonatán päinäcu̧: "A̧'u̧cu̧nä̧ mayaja ka̧cuä̧mö̧ topö ii̧so̧'quȩ chu̧mö̧nä̧ 'chu̧dä̧ro̧'quȩ päjurenä; hua'ö chi̧cuä̧cua̧sä̧. ⁴⁴ Saúl pä'inö TÖ̧Ä̧NÄ̧HUA̧ pä'anö jȩpi̧ ja̧'hua̧ta̧'a̧nö̧ juhua'a yabonö̧tä̧ ttörö'inä, ucu hua'ö cuicuoca'a jö̧ttö̧mä̧ Jonatán." ⁴⁵ Ja̧'hua̧nö̧ ja̧'a̧ ttö̧ja̧ pä'inätö̧ Saúlrö: Jonatán 'coru juoächa pä'ö ja̧'a̧, rohuäu isojuoepäjimä Israel ttö̧ja̧rö̧ ppä'ädäjitö? Ja̧hua̧nö̧mä̧ jo̧ca̧'a̧ pä̧huä̧rö̧jo̧mȩnä̧ ucu TÖ̧Ä̧NÄ̧HUA isopäi'önä uhuo'che'inä a̧'u̧cu̧nä̧tä̧'inä ma̧o̧ca̧'a̧ rȩjȩmä̧ ja̧'hua̧nö̧ ja̧'a̧ ja̧u̧mä̧ aditäji Dioscu jitämä." Ja̧'hua̧nö̧ ja̧'a̧ ötahuiyä ttö̧ja̧mä̧ ȩmo̧po̧'ö̧ icuinä̧tö̧ Jonatánrö̧ ja̧'hua̧nö̧ ja̧'a̧ 'corujuoächö juiya pä'ö. ⁴⁶ Ja̧'hua̧nö̧ ja̧'a̧ Saúl jaropi'inö filisteosrö ruhuocö pinö, ja̧'hua̧nö̧ ja̧'a̧ttö̧ filisteosmä ppa̧'ä̧hi̧nä̧tö̧ jitötä tti̧rȩjä̧ra̧'a̧. ⁴⁷ Ja̧u̧nö̧ Saúl ruhuo kä̧mä̧dö̧ hue'inö Israel ttö̧ja̧rö̧, rohuähuinö o'catoinäcu̧ aboiyotörö i̧'cho̧mȩ pönämä. Rohuähuinö ja̧u̧mä̧ Moab, Amón ttö̧ja̧cu̧'inä, Edóm, ja̧'hua̧nö̧ ja̧'a̧nä̧'inä Saba ruhuotucu'inä, ja̧'hua̧ta̧'a̧nö̧ filisteoscu'inä, koromecu̧ ja̧u̧ ijärächi'omecu̧'inä ja̧u̧mä̧ suronä jȩpi̧nö̧ jahuätörömä. ⁴⁸ Rohuäu juruhuinö ja̧u̧mä̧ ja̧'hua̧ta̧'a̧nö̧ rohuähuäcuähuä juruhuinätö̧ Amalecita'inä cuä'äu icuinätö̧, ja̧'hua̧nö̧ jȩpö̧ ppä'ädinö Israelrö jahuätö ttumöttö̧ ja̧'hua̧nö̧ ja̧'a̧ jahuätömä ttu̧mö̧ jähuä 'cho'ipä'chinä̧tö̧. ⁴⁹ Saúl i̧tti̧mö̧mä̧ pitö ji̧na̧'a̧; Jonatán'inä, Isui'inä ja̧'hua̧ta̧'a̧nö̧ Malquisúa'i̧nä̧. I̧tti̧mö̧ nä̧tö̧ tti̧mi̧mä̧ yajute 'cuomenä i̧sa̧ju̧mä̧ Mefab pä'ö micuinä̧ju̧ juajutä kijähuajumä Mical pä'ö micuinäju. ⁵⁰ Saúl irecuamä Ahinoam; pä'ö micuinä̧ju̧ jahuäjumä Ahimaas ittiju ji̧na̧'a̧. Su̧ro̧da̧u̧ ttu̧ru̧hua̧mä̧ Ner i̧tti̧ Abner ji̧na̧'a̧ Saúl i̧mi̧ya̧. ⁵¹ Saúl jä'omä Cis pä'ö micuinö; Nermä Abner jä'o ji̧na̧'a̧ ja̧u̧mä̧ Abiel i̧tti̧ ji̧na̧'a̧. ⁵² Saúl ö̧ji̧nö̧ pä̧nä̧mä̧ curämä filisteas ttö̧ja̧cu̧ tturohuähua'atä ji̧na̧'a̧, Saúl ya̧tȩ ju̧ru̧hua̧rä̧ toomenänä ja̧u̧cu̧ ppä'ädäcuähuinö.