¹ Saúl 30nö a̧'ȩ ö̧jö̧nä̧ro̧mȩnä̧ ucuo ru̧hua̧ hue'ö ö̧ja̧ pä'ö kä̧mä̧di̧nö̧; ja̧'hua̧nö̧ ja̧'a̧ ruhuo hue'ö ki̧nö̧ 40nö̧ a̧'ȩ jo̧mȩnä̧ Israel ttö̧ja̧rö̧. ² Ja̧u̧mä̧ tres milnö̧ jo̧mȩnä̧ ca̧ca̧ti̧nö̧ Israel ttö̧ja̧ u̧mö̧tö̧rö̧. Dos milnö jo̧mȩnä̧ chutäcu ka̧cui̧nä̧tö̧ Micmasnä ja̧'hua̧ta̧'a̧nö̧ Betel de'iyunä, ja̧'hua̧nö̧ ja̧'a̧nä̧ milnö umätö̧ ka̧cui̧nä̧tö̧ Jonatáncu̧ Benjamín öäre bäreö ötahuiyä Gebanä. Korotö ppä'ächotö su̧ro̧da̧u̧ ka̧cui̧pä̧jä̧tö̧rö̧mä̧ ojusodera̧'a̧ hue'inö, ya̧cu̧ pö̧nä̧rö̧ isode i̧sa̧ i̧jȩta̧ttö̧ 'tu̧ä̧huodera̧'a̧. ³ Jonatán rohuäu juruhuinö̧ filisteos su̧ro̧da̧u̧rö̧ Gebanä ka̧cui̧nä̧tö̧rö̧ ja̧'hua̧ta̧'a̧nö̧ filisteos ttö̧ja̧'inä ä̧ju̧cui̧nä̧tö̧ 'cuäopäjimä. Ja̧'hua̧nö̧ ja̧'a̧ttö̧ Saúlmä trompeta ppu'inö korome'inä, koromettö̧'inä, pä'inö: Ä̧ju̧cuä̧tu̧cui̧ Hebreos ttö̧ja̧." ⁴ Israel ttö̧ja̧mä̧ ä̧ju̧cui̧nä̧tö̧ saúl, filisteos su̧ro̧da̧u̧rö̧ ruhuäu ujuruhuäjimä, ja̧'hua̧nö̧ Israel ttö̧ja̧mä̧ a̧'u̧ti̧nä̧tö̧ filisteos ttö̧ja̧rö̧mä̧. Ja̧'hua̧nö̧ ja̧'a̧ttö̧ su̧ro̧da̧u̧mä̧ huopö 'chi̧nä̧tö̧ Saúlrö Gilgal ötahuiyättö ji̧nä̧ yo̧mȩtȩ pätti'a pä'ö. ⁵ Filisteas ttö̧ja̧mä̧ Israel ttö̧ja̧rö̧ tturohuähua pä'ö ji̧nä̧ yo̧mȩtȩ ca̧ca̧cui̧pi̧nä̧tö̧: Curä caruquiyämä tres milnö jo̧mȩnä̧, Curä caruquiyä juȩ'ȩpä̧rä̧tö̧mä̧ seis milnö huotö jo̧mȩnä̧ ja̧'hua̧ta̧'a̧nö̧ su̧ro̧da̧u̧mä̧ rȩba̧ aje dä'ähuoto jäyä pä̧ba̧ rȩba̧ jä̧'i̧nö̧'anö recuinä̧tö̧. Jahuätömä 'cha'achinä̧tö̧ ja̧'hua̧nö̧ cha'achä'cotö Micmas pä'ö micuome ka̧cuä̧mi̧nä̧tö̧, Bet Avénttö̧mä̧ kä̧hua̧ räopa'acu. ⁶ Israel ttö̧ja̧mä̧ huȩnȩnä̧ ttö̧ja̧cua̧'a̧ huo̧jui̧'ö̧ jahuätö ttö̧ja̧mä̧ tta̧'cua̧ tta̧'ȩcu̧mä̧, idoriyänä'inä, isä'cua dȩa̧'a̧'inä, inähuiyänä'inä ja̧'hua̧ta̧'a̧nö̧ rejuhuiyänä'inä dajahuächinä̧tö̧. ⁷ Hebreosttö yotucunä̧mä̧ Jordán ajecura̧'a̧cu̧ 'chi̧nä̧tö̧ Gad'inä ja̧'hua̧ta̧'a̧nö̧ Galaad'inä rȩjȩra̧'a̧cu̧. Ja̧'hua̧nö̧ tti̧'cha̧'a̧nä̧ Saúlmä Gilgal ötahuiyänä̧tä̧ ki̧nö̧ ja̧'hua̧ta̧'a̧nö̧ ttö̧ja̧ o'catoi'önä ye'ecuäyotö o'ca'anä 'chi̧nä̧tö̧. ⁸ Ja̧u̧mä̧ sietenö mo̧ro̧ jo̧mȩnä̧ tta̧'ä̧ri̧nö̧, Samuel chi̧chä̧cua̧sä̧ pä'ö ö̧jö̧nä̧ji̧ mo̧ro̧ttö̧mä̧. Ja̧'hua̧nö̧ päja'anä Samuelmä Gilgalra̧'a̧mä̧ rebehuipo̧co̧cö̧ pinö̧ ja̧'hua̧ta̧'a̧nö̧ ttö̧ja̧mä̧ Saúttömä 'kä̧'i̧pä̧chi̧nä̧tö̧. ⁹ Saúlmä pä'inö: "Ttiäre ku icu iyähuä i'cächätucui ja̧'hua̧ta̧'a̧nö̧ huȩnȩ juiyönä kä̧cuä̧huä̧ ttiäre iyähuä'inä." Ja̧'hua̧nö̧ ja̧'a̧ttö̧ ja̧u̧mä̧ ttiäre ku icu iyähuä iyinö. ¹⁰ Ttiäre ku icu iyähuä iyö cädöta'anö Samuelmä rȩbȩhui̧pi̧nö̧. Samuelmä̧ ja̧u̧ ö̧jo̧mȩcu̧ 'chä̧hui̧'ö̧ ja̧u̧rö̧ te'ähuinö. ¹¹ Ja̧'hua̧nö̧ ja̧'a̧ Samuelmä pä'inö: ¿Däje jȩ'cuä̧jä̧ttö̧? Saúlmä ädätnö: Ttö̧ja̧ ttöttö döttecuächa'a topömä ja̧'hua̧ta̧'a̧nö̧ chi̧'chä̧cua̧sä̧ päcuäji mo̧ro̧ cuichiyococu ja̧'hua̧ta̧'a̧nö̧ filisteas ttö̧ja̧mä̧ Micmas pä'ö micuome ä'ecu ttö̧ja̧cui̧yä̧cu̧, ¹² ttömä pä'äjisä: Jitämä, filisteos ttö̧ja̧mä̧ ujuturu rohuäu ichätö 'cua̧ra̧'a̧, ja̧'hua̧nö̧ ja̧'a̧mä̧ TÖ̧Ä̧NÄ̧HUA̧mä̧ ppädattö pä'ömä jädepoca'a ja̧'a̧nä̧. Ja̧'hua̧nö̧ ji̧yä̧cu̧ ttiäre ku icu iyähuämä̧ iyäjisä. ¹³ Ja̧'hua̧nö̧ jo̧menä Samuelmä̧ pä'inö̧ Saúlrö: "Ttuhuȩpä̧ro̧cö̧ a̧'cua̧rö̧nä̧ jȩpä̧ji̧jä̧. Ucumä̧ juiyó jarodöjä TU̧RU̧HUA̧ TTÖ̧Ä̧NÄ̧HUA̧ iyinö̧'inä̧. ¹⁴ Ja̧u̧ TTÖ̧NÄ̧HUA̧TÄ̧ jina̧'a̧ 'cuäopönä̧tä̧ Israel ttö̧ja̧tö̧ hue'ö cu̧ja̧ pä'ö hue'inö̧mä̧. Ja̧'hua̧nö̧ ja̧'a̧nä̧ jitä ruhuo huecumä̧ 'chä̧hui̧'i̧yä̧cua̧'a̧. TTÖ̧NÄ̧HUA̧MÄ̧ usu ja̧'a̧ amiso'qui diyaunä̧ hua̧rö̧, Ja̧'hua̧nö̧ ja̧'a̧ttö̧ TÖ̧Ä̧NÄ̧HUA̧MÄ̧ pojopö̧ ȩminö̧ chutä pä'öta'anö̧ ttö̧ja̧rö̧ huȩä̧cuarö̧mä̧, jua'amä̧ ucuru hueinö̧ CHUTÄ huȩinö̧ jȩ'cuo̧ca̧'a̧ttö̧."

¹⁵ Ja̧u̧nu o'ca'a Samuelmä̧ ä̧rä̧mi'ö̧ huä̧mipi̧nö̧ Gigalttö Guibeacu Benjamin ahuarubuä o'cotö ti̧rȩjä̧cu̧. Ja̧u̧nu o'ca'a Saul pa̧ja̧tö̧ topinö̧ u̧mu̧huäyotö chutäcu kä̧cuä̧törö, ja̧'hua̧nö̧ to'omenä̧ 600nö̧ u̧mä̧tö̧ jo̧mȩ. ¹⁶ Saul, ja̧'hua̧ta̧'a̧nö̧ i̧tti̧ Jonatán o'catoi'önä̧ chutäcu ka̧cuä̧tö̧mä̧, ka̧cui̧pi̧nä̧tö̧ Gibanä̧ Benjamin ahuaruhuä o'cotö ti̧rȩjä̧nä̧. Ja̧'hua̧nö̧ ja̧'a̧nä̧ Filistea ttö̧ja̧mä̧ Micmasnä̧ ka̧cuinä̧tö̧. ¹⁷ Su̧ro̧da̧u̧mä̧ ichinä̧tö̧ filisteos ttä'äcuarättö huäbosacuä ttö̧ja̧ jo̧mȩnä̧ ca̧ca̧cui̧nä̧tö̧, korotömä 'chi̧nä̧tö̧ ofra rȩjȩra̧'a̧ sual. ¹⁸ Korotömä 'chi̧nä̧tö̧ Bet Horón ja̧'hua̧ta̧'a̧nö̧ korotö 'chi̧nä̧tö̧ meje'ca pämeroppä jo̧mȩ jäyänä to̧pä̧rö̧ Zeboimra̧'a̧cu̧ rȩjȩ de'a'inä juiyome. ¹⁹ Yoriso toina̧'a̧ ya̧tȩ'inä cuoräu 'tahuähuä i̧sa̧ tö'cönänömä Israelnämä, ja̧'hua̧nö̧ ja̧'a̧ttö̧ filisteos pä'inä̧tö̧; koro ja̧'a̧nä̧ hebreos jȩpi̧nä̧tö̧ curodiyä o'chu ja̧'hua̧ta̧'a̧nö̧ jitötä ttiäre." ²⁰ O'catoi'önä Israel ttö̧ja̧mä̧ filisteostä ppä̧ttä̧dä̧ri̧nä̧u̧ sa̧ttȩpa̧ pä'ö rȩjȩ äcuähuäya, pici'chu, i̧da̧pä̧'ki̧yä̧ ja̧'hua̧ta̧'a̧nö̧ isä'cua äcu 'cuiähuäcä. ²¹ Ja̧u̧ micuämä ji̧na̧'a̧ tercios cilos jo̧mȩnä̧ cuähuä odu rȩjȩ äcuähuäya ja̧'hua̧ta̧'a̧nö̧ pico'chu ja̧'hua̧nö̧ ja̧'a̧nä̧ ya'ute tercios cuhuä odu jina̧'a̧ pärätänä sa̧ttȩpa̧ pä'ö i̧da̧pä̧'quȩ ja̧hua̧ta̧'a̧nö̧ isä'cua äcu cuähuä ttadita pä'ö. ²² Ja̧hua̧nö̧ ja̧'a̧ ji̧yȩnö̧ su̧ru̧da̧u̧ ttörohuäu mo̧ro̧mä, po̧cui̧po̧co̧tö̧ pinätö curä'chu'inä̧ dacuodä'inä̧ jui'inä̧tö ya̧tȩ ttö'i̧nä̧ tumunä̧mä̧ Saúlcu ja̧'hua̧ta̧nö̧ Jonatáncu̧ ka̧cuä̧ttömä̧; Ta̧ju̧tä̧ ku̧nä̧ri̧nä̧tö̧ curä'chumä̧ Saúl'inä i̧tti̧ Jonatán jönä̧tä. ²³ Su̧ro̧da̧u̧ Filisteos ttöja̧mä̧ rä'opinä̧tö̧ Micmas tta'canä 'cuätto'a pä'ö.