¹ Samuelmä o'catoi'önä Israel ttö̧ja̧rö̧ pä'inö: Ä̧ju̧cuä̧ji̧sä̧ o'cajuiyönä ucutu päcuätucumä, ja̧'hua̧nö̧ ja̧'a̧ttö̧ ku̧ni̧nö̧sä̧ ya̧tȩ ru̧hua̧ cu̧ru̧hua̧tu̧cu̧ ju̧nä̧. ² Jitä ja̧u̧ ru̧hua̧mä̧ pȩnȩtä̧ ucututäcu cuä'catucunä cue'ächö, ttömä täcö bö̧o̧sa̧sä̧ ja̧'hua̧ta̧'a̧nö̧ chuhuo'che'inä tȩ'a̧sä̧, ja̧'hua̧ta̧nö̧ chi̧tti̧mö̧'inä ucututäcu ka̧cuä̧tö̧. Mö̧ä̧ya̧ttö̧ kä̧mä̧dö̧ ucututäcu cue'ächö ki̧nö̧sä̧ jitä mo̧ro̧ jubö päi'önä. ³ Pȩnȩtä kö̧sä̧, ti̧yȩjä̧ttö̧ ttö suronä jȩchi̧nö̧mä̧ ji'ähuätucuittö, ttörö pojopinö TÖ̧Ä̧NÄ̧HUA̧ ä'ca jo̧mȩttö̧. ¿Pä̧cä̧yu̧ru̧mä̧ torö chȩmi̧nä̧ttö̧? Ja̧'hua̧nö̧ jo̧ca̧'a̧ ¿Borötö̧rö̧ chȩmi̧nö̧ttö̧'i̧nä̧? ¿Dirö 'chodipinättö? ¿Dirö suronä jȩchi̧nä̧ttö̧? ¿Ti̧mö̧nä̧ chȩmi̧nä̧ttö̧ ji̧yȩtȩ mippoönä iyähuämä ucuo juiyönämä, chi'äre chä̧to̧cä̧chö̧nä̧mä̧? Ji'ähuätucuittö ja̧u̧ chȩmi̧nö̧mä̧ ppa̧dä̧dä̧cua̧sä̧. ⁴ Jahuätö päi'nätö: "Täcö yapare pä'ö ro̧ttȩpi̧nä̧u̧jä̧ umätö̧ttö̧mä ya̧tȩ'inä nä̧u̧cuo̧co̧tö̧ pinätö ." Ja̧u̧mä jahuätörö päi'nö: ⁵ "Ujutu turohuäu ötö'cö huo̧jua̧mä̧ TU̧RU̧HUA̧TÄ̧, ja̧'hua̧nö̧ ja̧'a̧ttö̧ pojopu eminä̧cu̧'inä huo̧ja̧ jitä mo̧ro̧ ucuttumä ya̧tȩ'i̧nä po̧cui̧po̧cu̧ chu̧mu̧ttö̧mä̧." Ja̧'hua̧nö̧ ja̧'a̧ jahuätö ttädätinäcu: "TU̧RU̧HUA̧TÄ̧ huo̧jua̧mä̧" ⁶ Samuel ötahuiyä ttoa̧ja̧rö̧ pä'inö: TU̧RU̧HUA̧TÄ̧ Ji̧na̧'a̧ Moisésrö'inä Aarónrö'inä hue'inömä Egipto rȩjȩra̧'a̧ttö̧ ucutu cuä'otu̧cu̧cu̧ru̧ tti'cächa pä'ö. ⁷ Jitämä ja̧'hua̧nö̧ ja̧'a̧nä̧ ja̧'hua̧nö̧ ju̧nä̧tä i̧jȩpä̧tu̧cui̧ TU̧RU̧HUA̧ ä'ca jo̧mȩttö̧mä̧, ja̧'hua̧nö̧ ja̧'a̧nä ttötä ucuturu ucuotunu chucuocuäcua̧sä̧ ucuturu'inä cuä'o̧tö̧rö̧'inä o'cajuiyönä TU̧RU̧HUA̧ adihuä juäi jeinömä. ⁸ Jacob Egiptora̧'a̧ ichinö̧mä̧, jä̧'o̧tö̧mä̧ TTÖ̧Ä̧NÄ̧HUA̧RÖ̧ jä'epinä̧tö̧. Jättepomenä̧ TTÖ̧Ä̧NÄ̧HUA̧ hue'inö̧ Moisésrö ja̧'hua̧ta̧'a̧nö̧ Aarónrö̧'inä̧, jahuätömä̧ Egiptottö'inä̧ korome hue'ö ka̧cuinä̧tö̧ ja̧'hua̧nö̧ ja̧'a̧ttö̧ ttö̧ja̧'a̧cutä̧ o'ipu 'chi̧nä̧tö̧. ⁹ Ja̧'hua̧nö̧ ja̧'a̧nä̧ jahuätömä̧ TTU̧RU̧HU̧HUA̧ TTÖ̧Ä̧NÄ̧HUA̧rö'inä̧ unichi'inä̧tö̧ ji̧na̧'a̧; ja̧'hua̧nö̧ jo̧menä̧ Sísara u̧mu̧nä̧tä̧ pä'i'inä̧tö̧, ja̧u̧mä̧ Hazor su̧ro̧do̧u̧ ttu̧ru̧hua̧ ji̧na̧'a̧, Filisteos ttu̧munä̧'inä̧ ja̧'hua̧ta̧'a̧nö̧ Moab ru̧hua̧ u̧munä̧'inä̧; jähuättö o'catoi'önä̧ ttö̧tä̧muminättö̧ rohuäu kacui̧nä̧tö̧. ¹⁰ Jahuätö TTÖ̧Ä̧NHUA̧RÖ̧ jä'epö pä'inä̧tö̧: "Ujutumä̧ surojönä̧ jȩpä̧jä̧tö̧jä̧, TÖ̧Ä̧NÄHUA̧rö̧ jaropiö ja̧'hua̧nö̧tä̧ jȩpö̧ korotö Baal huotörö ja̧'hua̧ta̧'a̧nö̧ Astarot'rö'inä. Ja̧'hua̧nö̧ ja̧'a̧nä̧ jitämä̧ ta̧bo'cha̧ttö̧ ppäcuädatö pä'ätöjä, ja̧'hua̧nö̧ jö̧ttö̧tä̧ ucu päcu jȩtä̧cuo̧tö̧jä̧." ¹¹ Ja̧'hua̧nö̧ ja̧'a̧ttö̧ TÖ̧Ä̧NÄ̧HUA̧MÄ̧ hue'inö̧ Jerobaalrö, Bedánrö̧, Jeftérö ja̧'hua̧ta̧'a̧nö̧ Samueirö'inä̧, ja̧'hua̧nö̧tä̧ ttabó iyottörö iso juottepönä̧ jȩpi̧nö̧ ppeyänä̧ kacuä̧tö̧rö̧, ja̧'hua̧nö̧ ja̧'a̧ttö̧ ro̧huä̧pi̧jö̧ juiyönä̧ ko̧cui̧nä̧tö̧. ¹² Ucutumä Amón ttö̧ja̧ ttu̧ru̧hua̧ Nahas ucuturu urohuähua pä'ö i̧chä̧u̧mä̧, ttörö pä'inätöjä̧: ¡Isocö̧, ya̧tȩ ru̧hua̧ hueatö pä'ätö̧jä̧, TÖ̧Ä̧NÄ̧HUA̧, Cu̧ä̧nä̧hua̧tu̧cu̧tä̧ ru̧hua̧ jö̧nä̧ huȩä̧u̧ cuätucucua'anä. ¹³ Ja̧'hua̧nö̧ ja̧'a̧ttö̧ pidesä ru̧hua̧ jö̧nä̧ pojopö cuȩmi̧nä̧tu̧cuä̧cu̧mä̧, ucututä jäcuepäjätucuäcu TÖ̧Ä̧NÄ̧HUA̧TÄ̧ cu̧ru̧hua̧tu̧cu̧ jö̧nä̧ ucuturu iyinä̧cu̧mä̧. ¹⁴ Ucutu TÖ̧Ä̧NÄ̧HUA̧RÖ̧ yecuecuätucuttömä, hueö jȩpö̧ päö'inä ucuocuätucuirö ja̧'hua̧ta̧'a̧nö̧ TÖ̧Ä̧NÄ̧HUA̧ hueinömä cucuotätucuoca'amä jȩ'cuä̧'chä̧tu̧cuä̧, ja̧'hua̧nö̧ ja̧'a̧ttö̧ ta̧ju̧cuäyotö ucutu'inä ja̧'hua̧ta̧'a̧nö̧ ru̧hua̧'inä TÖ̧Ä̧NÄ̧HUA̧, Cu̧ä̧nä̧hua̧tu̧cu̧ o'ca'anä chä̧tö̧ jö̧nä̧ cuäcuotöjä̧. ¹⁵ Ucutu TÖ̧Ä̧NÄ̧HUA̧ päö ucuotö jui'ö TÖ̧Ä̧NÄ̧HUA̧ hueinö to'ija'acu̧ suronä jȩ'cuä̧tu̧cu̧ttö̧mä̧, TÖ̧Ä̧NÄ̧HUA̧TÄ̧ jä̧cua̧'a̧ ucuturu ro̧ȩpä̧cua̧mä̧, cuä'otö̧ mi̧nä̧rö̧ ro̧ȩpi̧nö̧ta'anö. ¹⁶ Ja̧'hua̧nö̧ ja̧'a̧ttö̧ ucutu jitä, topätucui pi̧yȩ bäreu Cu̧ru̧hua̧tu̧cu̧ jȩa̧'a̧ ucutu cuä'catucuttö. ¹⁷ ¿Jitä jo̧ca̧'a̧ trigo ca̧ca̧cuä̧ pä̧nä̧mä̧? Chu̧ru̧hua̧rö̧ jä̧'ȩpä̧ru̧sä̧ ja̧'a̧tä̧ huea pä'ö cu'upä cöröächönä ja̧'hua̧ta̧'a̧nö̧ ajiya'inä. Ja̧'hua̧nö̧ ja̧'a̧ttö̧ ucutumä cu̧huo̧juä̧chi̧'ä̧cuo̧tö̧jä̧, ja̧'hua̧ta̧'a̧nö̧ to'cuäcuotöjä̧ ucutu suronä jȩ'cuä̧tu̧cu̧mä̧ rö̧ä̧nä̧ ja̧'a̧, tu̧ru̧hua̧ ä'ca jo̧mȩttö̧ ru̧hua̧ jä̧cuȩ päcuäjätucua'attö. ¹⁸ Ja̧'hua̧nö̧ ja̧'a̧ Samuel U̧ru̧hua̧rö̧ jä'epinö; ja̧'hua̧nö̧ ja̧'a̧ ja̧u̧nö̧tä̧ mo̧ro̧ Tu̧ru̧hua̧mä̧ hue'inö cu'upä'inä cuä'önä ja̧'hua̧ta̧'a̧nö̧ ajiya'inä ichönä, ja̧u̧nö̧ o'ca'a ötahuiyä ttö̧ja̧ o'catoi'önä ye'ecuinä̧tö̧ ja̧'hua̧ta̧'a̧nö̧ Samuelrö'inä. ¹⁹ Ja̧'hua̧nö̧ ja̧'a̧ttö̧ ttö̧ja̧mä̧ o'catoi'önä pä'inä̧tö̧ Samuelrö, "Jä'epi cumuhuäyotö tti̧mi̧nä̧ cu̧ru̧hua̧ Diosrö 'coru juotächö juiya pä'ö, isopäi'önä ujutumä ppä'ädipö o'cajuiyönä suronä jȩttä̧ji̧mä̧ ru̧hua̧rö̧ jä'epö ujutu tu̧huä̧mȩnä̧ jö̧nä̧. ²⁰ Samuel ädätinö: "Yecuecuätucuä, ucutu pi̧yȩ surojö o'cajuiyönä jȩpä̧jä̧tö̧mä̧, ja̧'hua̧nö̧ ja̧'a̧nä̧ cu̧ru̧hua̧rö̧mä̧ cucnichi'ätucuä, Tu̧ru̧hua̧ Diosrö, ucuotätucui TÖ̧Ä̧NÄ̧HUA̧RÖ̧ o'cajuiyönä cuamiso'quinä'inä. ²¹ Cuiresehuätucuä suroju o'ca'anämä yapare jähuänä̧ surojunä, ja̧'hua̧ta̧'a̧nö̧ yoriso ucuturu ppädocö, ja̧'hua̧nö̧ ja̧'a̧nä̧ ja̧u̧mä̧ micuähuocö. ²² Ja̧'hua̧ta̧'a̧nö i̧mi̧ röä̧ö̧nä̧ micuähua'attö, TTÖ̧Ä̧NÄ̧HUÄ̧MÄ ö'arodiya̧cua̧ umucuäyotörömä, ja̧'hua̧nö̧ ja̧'a̧nä̧'i̧nä̧ TTÖ̧Ä̧NÄ̧HUÄ̧MÄ̧ eseunu to̧ä̧u̧ chutä umuhuäyotö 'cua̧rö̧nä̧. ²³ Ttöttömä̧, ototä ja̧'a̧ suronä̧ jȩä̧cuä̧huä̧ttö̧mä̧ TTÖ̧Ä̧NÄ̧HUÄ̧RÖ, ucutunä̧ jä̧ȩpä̧rä̧cuä̧huä̧ jaropi'ö jahuätörömä̧ chu̧juo̧juȩtä̧cua̧sä̧ adiu jueönä̧ jahuätä. ²⁴ TTÖ̧Ä̧NÄ̧HUA̧ ya̧tȩrötä̧ ye'ecuätucui cuamiso'quitucu jacuä o'cajuiyönä jueönä̧tä̧ jȩpä̧tu̧cui̧. Topätucui ucuturu röä̧ö̧ jähuä jȩi̧na̧'a̧. ²⁵ ja̧'hua̧nö̧ ja̧'a̧nä̧ surojönä̧tä̧ jȩpä̧'chö cu̧jä̧tu̧cu̧tu̧mä̧ ucutu ucuo cu̧ru̧hua̧tu̧cu̧'i̧nä̧ to̧ȩ'ä̧cua̧.