¹ Ja̧'hua̧nö̧ ja̧'a̧ Amón ttö̧ja̧sa̧ Nahas 'chä̧ji̧'ca̧ Jabes de Galaad pä'ö micuome sobutö kä̧mä̧di̧nö̧ ja̧'hua̧nö̧ jȩi̧yä̧u̧ Jabes ttö̧ja̧ o'catoi'önä Nahasrö pä'inä̧tö̧: "Ujutucu esecui huecumä jȩtä̧cuo̧tö̧jä̧." ² Amón ttö̧ja̧sa̧ Nahasmä ädätinö: Ucutu o'catoi'önä cui'äretucu cu̧hua̧'a̧cu̧nä̧ isäre chubaro'a'anä cuiyähuätucuttötä ucutucumä chesecuä̧cua̧sä̧, ja̧'hua̧nö̧ jȩcho̧mȩnä̧ Israel ttö̧ja̧ o'catoi'önä̧rö̧ eseäcuähuocö ichäcua'a. ³ Ja̧'hua̧nö̧ ja̧'a̧ Jabes ttö̧ja̧ttö̧ ucuo isotömä ttädätinäcu̧: "Sietenö̧ mo̧ro̧ jo̧mȩtä̧ iyitö huȩnȩ ȩcuä̧ ttö̧ja̧rö̧ Israel ttö̧ja̧ tti̧rȩjä̧ o'cajuiyönä hue'ö ticua'anä. Ja̧'hua̧nö̧ ja̧'a̧ ya̧tȩ'inä ujuturu ppä'ädö toöttömä ucu 'cuä'ca jo̧mȩ ichi'ö päcutä jȩtä̧cuo̧tö̧jä̧." ⁴ Huȩnȩ ȩcuä̧ ttö̧ja̧mä̧ Saúl ö̧jo̧mȩ Guibeá pä'ö micuome rȩbȩhui̧pi̧nä̧tö̧, ja̧'hua̧nö̧ ja̧'a̧ ttö̧ja̧rö̧ ji'ähuinä̧tö̧ huȩnȩ cuäopäjimä. Ttö̧ja̧mä̧ o'catoi'önä ajau huopinä̧tö̧. ⁵ Saúlmä pä̧cä̧yu̧ tto'ca'anä pättara̧'a̧ttö̧ ichinö. Saúlmä pä'inö: "¿Däje päiä̧u̧ ttajahuä ttö̧ja̧mä̧? Jahuätömä Saúlrö ji'ähuinä̧tö̧ Jabes pä'ö micuome ka̧cuä̧tö̧ pättäjimä. ⁶ Saúl jahuätö pättäji ä̧ju̧cuo̧mȩnä̧, TÖ̧Ä̧NÄ̧HUA̧ a̧'cua̧ru̧hua̧ jurunä ja̧u̧rö̧ mȩyȩhui̧'i̧nö̧ ja̧'hua̧nö̧ i̧mȩyȩhui̧'o̧mȩnä̧ rö̧ä̧nä̧ amisurächi'inäcu̧. ⁷ Pä̧cä̧yu̧ ta̧ju̧ru̧ 'chuä'do'ö ppo̧u̧cu̧ 'cui'ö icuinö, 'cui'ö icuäji'ca̧ huȩnȩ ȩcua̧ ttö̧ja̧rö̧ hue'ö icuinö Israel ttö̧ja̧ tti̧rȩjä̧mä̧ o'cajuiyönätä. Ja̧u̧mä̧ pä'inö: "Saúl'inä ja̧'hua̧ta̧'a̧nö̧ Samuel'inä ä'ca jo̧mȩ ya̧tȩ rä'o'ö urohuähua pä'ocörömä pa̧'a̧nö̧ jȩä̧cuä̧hui̧yä̧cua̧ ä̧ji̧mö̧ pä̧cä̧yu̧ru̧mä̧." Ja̧'hua̧nö̧ ja̧'a̧ttö̧ TÖ̧Ä̧NÄ̧HUA̧ yepä'chömä ttö̧ja̧rö̧ ma̧ä̧mi̧na̧'a̧ ja̧'hua̧nö̧ jo̧mȩnä̧ ttö̧ja̧sa̧ ya̧tȩ jä̧'i̧nö̧'a̧nö̧ jö̧nä̧ ca̧ca̧cui̧pi̧nä̧tö̧. ⁸ Saúl Bezec ötahuiyättö Israel ttö̧ja̧rö̧ pa̧ja̧tö̧ toomenä 300 milnö jo̧mȩnä̧ ji̧na̧'a̧ ja̧'hua̧ta̧'a̧nö̧ Judá ttö̧ja̧tä̧ 30 milnö jo̧mȩnä̧. ⁹ Jahuätömä huȩnȩ ȩcua̧ ttö̧ja̧ ichäjätörö pä'inätö̧: Jabes de Galaad ttö̧ja̧rö̧mä̧ pa̧'a̧nö̧ päcuätucuaja: Yo̧ȩi̧ mo̧ro̧ kä̧hua̧ rä'o'ö du'i'omenä rä'epu icu ti̧chä̧cuä̧u̧jä̧." Ja̧'hua̧nö̧ ja̧'a̧ttö̧ huȩnȩ ȩcuä̧ ttö̧ja̧mä̧ 'chä̧jä̧'cotö Jabes ttö̧ja̧rö̧ ji'ähuinä̧tö̧ ja̧'hua̧nö̧ jittähuä̧u̧ jahuätömä esehuinätö̧. ¹⁰ Ja̧'hua̧nö̧ ja̧'a̧ Jabes ttö̧ja̧mä̧ ru̧hua̧ Nahasrö pä'inätö̧: "Yo̧ȩi̧ mo̧ro̧tä̧ ucuturutä tiyäcuähuäcuptöjä̧ ja̧'hua̧nö̧ tiyähuäcuähupmenä ucuturutä pä̧huä̧rö̧jo̧mȩnä̧ jȩ'cuä̧tu̧cua̧ja̧ ujuturumä." ¹¹ Koro mo̧ro̧, mo̧ro̧ juoomenä, Saúlmä ttö̧ja̧rö̧mä̧ huäbosacuä 'kä̧'ȩpi̧nö̧. Ja̧'hua̧nö̧ ja̧'a̧ mo̧ro̧'cacu ä'ecu ttö̧ja̧cuo̧mȩ do'ächi'ö rohuähuinä̧tö̧ ja̧'hua̧nö̧ rohuäumä amón ttö̧ja̧rö̧ rohuäu icuinä̧tö̧ kä̧hua̧ du'iome jubö cä'ädö. Jitö tturuhuähuomettö̧ ka̧cui̧pä̧jä̧tö̧mä̧ pperecuächinä̧tö̧, ja̧'hua̧nö̧ jo̧mȩnä̧ ta̧ju̧ pö̧nä̧mä̧ ka̧cuo̧co̧tö̧ pinätö̧. ¹² Ja̧'hua̧nö̧ päi'omenä ttö̧ja̧mä̧ Samuel pä'inä̧tö̧: "¿Dijä̧ttö̧ pä'äjimä? ¿Saúlmä ujuturu ruhuonä hueäcua'a? Ja̧'hua̧nö̧ pä'ätörömä cuä'ö ticuatö i'cächätucuitö." ¹³ Ja̧'hua̧nö̧ pättiyäcu Saúlmä pä'inö: "Jitä mo̧ro̧mä̧ ya̧tȩrö̧'inä cuä'ö icuähuoca'a jä̧cua̧'a̧, jitä mo̧ro̧ TÖ̧Ä̧NÄ̧HUA̧mä̧ Israel ttö̧ja̧rö̧ curättö ttö̧ji̧pö̧nä̧ ppäda'attö. ¹⁴ Ja̧'hua̧nö̧ ja̧'a̧ Samuelmä ttö̧ja̧rö̧ pä'inö: "Ichätucui, Gilgalra̧'a̧ ti̧'chä̧tu̧cua̧, juorötä ruhuomä töaretätucua. ¹⁵ Ja̧'hua̧nö̧ ja̧'a̧ttö̧ ttö̧ja̧mä̧ Gilgalra̧'a̧ 'chä̧jä̧'cotö TÖ̧Ä̧NÄ̧HUA̧ to̧ä̧ro̧mȩttö̧ Saúlrömä ru̧hua̧ jö̧nä̧ ku̧ni̧nä̧tö̧. Juhuorötä ttiäre huȩnȩ huiyönä kä̧cuä̧huä̧ ku icu iyähuä TÖ̧Ä̧NÄ̧HUA̧ to̧ä̧ro̧mȩttö̧ iyinätö̧ ja̧'hua̧nö̧ iyömä Saúl'inä ja̧'hua̧ta̧'a̧nö̧ ttö̧ja̧'i̧nä o'catoi'önä rö̧ä̧nä̧ esehuinä̧tö̧.