¹ Peanya uawe eba le-ele Kristus Yesus ma-ewewekale. ² Letu, ne-kefaju Kristus keba ne-kelofe nole-ma pa tebabi-ma-te, ³ Pakei ja ma-Ropu tutukatu kei nopara nene nafeka, noro ana nopara nole pukole kei nole, ma-Ke-kefaheto nolei kotu-no, ⁴ u-ma-Ropupei kelete papa-ne, pa kei lewawa Letu. ⁵ Pakei teba te-e nopara, jatehie-etei wa nopara; teba lakete Letu, jamotu Letu tehieate. ⁶ Pakei jafefe nepumotu kei newuwute, pa Letu pukei netenene pa hupala heve. ⁷ Pakei netenete jafefei Tata ne-hufe, kei ke Tata-ma-ke kepaka, jawei kei ahaka. ⁸ Teba te-ete noparai, Tata telala ahaka. ⁹ Pa e-nopara neba ele-eka, pakei Letu, anara bamua Tata Letuke leile-e. Pa ba Kristus Letuke kuka, ke-Kristus jakeka. ¹⁰ Pa anara Kristus leile-e, noparawe pepa kei nole tuko, pa ltu kelenaiaele kei jabamua. ¹¹ Pa ana Letu-Ke, Yesus keleko kelefuto, kemole e-to, kei Ke, Kristus Yesus keleko kelefuto, no-meme rorotuira Letu-Kekepa  keleko mepememepe, keleile e-toi. ¹² Nya, johane, newe neba hapo nekotu, pa te jafefeka, u-t=netete noparanene. ¹³ Pakei, ana ele-ele noparae-e, kei ewuwule; pa Letu-ialeko napara e-ei-pa, ele-elele. ¹⁴ Teba lelepa, Tata Letuke lokakaile, kei Tata teakoke. ¹⁵ Pakei letu eba japukeleile keleko efufule, pa Letu e-kei keleko ei Tata hahake. Letuiapa nehiwa: "ya Abba, ya Bapa!" ¹⁶ Letui jarikenalula letu nene, kei newe Tata hahake. ¹⁷ Pakei anara newe hahake, kei nera pipafe, Kei newe Tata jaloko newewete, Kristus kopa nelupa wewete,kei anara kopanelupa jafefe rone, ura kopa nelupa ne-enemomo.

¹⁸ Kei kenihi, jefefe uapu neronete ahaka hevekeke kenalulu nea. ¹⁹ Kei jako lelepa tera pue tejoete baha Tata hahake kenalulule. ²⁰ Jakolelepa tepahete ja-afia, pu-tetewuka, Tata pule, kea te-kekepa, ²¹ pa pulekoi, kei jakoi tewora terefefe japutete-e tetakukutu pa tekete tefaju hupala heve Tata hahake. ²² Pakei neru, kei wakoto uawe jakolelepa tera olepa tete-ete pa telupa nojako kotetete. ²³ Pa tefaka, pakei nera Letu bahu janaheve neke, nera olepa netene hupala nene pa nenone netere-ete hahake, kei nonene faweka. ²⁴ Pakei pule ne-tefaju. Pa pule nefui, kei puleka; pakei tunane teba jate putumoi jatefui? ²⁵ Pa anara janenonei nefuka, hupala navepa nenonene. ²⁶ Anaiara Letu kela eku nene; paki neruka, lupopo janete nanene; Letu kewo pinakapa lupopoja lepate-e Tata jane putumo. ²⁷ Pa Tata hupala nene kelafuile, jako Letu hupalakei kelu, kei Ke, anako Tata hupalake, lopopojakeleko teba-tu ²⁸ Uawe neru, Tata lakulepa jano neronete ko janaheve natoto teba Ke-teputumo, kei teba teniko ana Tata loko. ²⁹ Pakei teba Tata tekeki tofaei ko telejaja ana Oke balekei, ura Ke, Okei, kemomo kebahu bapa lelepa. ³⁰ Pa teni lopanai, teara terajijite. Pa teba lopana tenikoi, teara teninite. Pa teba teni-i, teara bamua teni. Pa teba bamua-Keloi, teara tere-etete.

Hupala-Nave Kehini

³¹ Peanya janetoto jalelepaite? Anara Tata lakule-ne, ba ne-kejijile? ³² Ke, Oke-wo pipate keleka, pa Ke-keleheto nebapa, lomaraheka jalelepa keloleto Ke panelupa? ³³ Ba Tata teba keki-i ekakukule? Ta, kea-te bamua kelo? Ba-te ma-kelelele? ³⁴ Kristus Yesus, kei kewa? Pakei nawora: kelefuto kemole Tata nupaloke, kea ne-tutakele. ³⁵ Ba ne-kehekeke Kristus heve kekele? Neba-eheamo na jahave nanetejiji, na nemolahupa na nebafa, na jafefe, na ta? ³⁶ Ana putukotu: "Mea-peko batupa nemote newuwu lahoutu, ne anara jako kotejajate." ³⁷ Pa jalelepai newe neba nefaju, kei kea ne-pipate kele. ³⁸ Pakei kenihi, newuwutena, netenenetena, kei tebafapana, tebatafa, jauamotuna, na jatototu, ³⁹ na ma-lelepa, motu-hona, motu-kona, na-jakohi, ne-tehekekekate Tata hevekeke, keikotu Kristus Yesus, Tata nene.