¹ Peanya, neba hupalanave ko bamua teni, hupala hevepa Tata kopa netene  kei Tata nene, Yesus Kristus. ² Kealeko nekene hupalanavei te pipata wea. Pipatewea neru pa ne-hupalahevepa janenone ko Tata fefeke newewe. ³ Pa pefaka. Nera raunana jafefe nenete, kei neru, jafefeia tuetoko nelatakote,  ⁴ nelatakute petuko lananinite, pa lananinite petukote janenone. ⁵ Pa janenonei petuko neotapepekale, kei Tata pipate kekepu hupala nenewa Letu Keke kekeleheto-ne. ⁶ Kei pu nenaveka, Kristus kewa-ko-tone neba fefe pu baTata loko. ⁷ Pakei lomaka kebau wako neba bamua - pa anara te-teba heve ba-pikakiko kewawale -. ⁸ Pakei Tata pipate-Keke kenalu-ne, kei Kristus wako to-ne, pu netene nolelahou. ⁹ Nawopepei, neuawe hi-Keke leko nebab bamua, nekelofewofale wa Tata huvekeke. ¹⁰ Pakei anara ne, pu nehuvemo, Oke-waia Tata nekeleko hupalaheve, bamuawo nea, uawe ne-ketupi, kei Ke-leileia ne-kelofefele! ¹¹ Pa keifaka! Ne-huheve ko Tata kei Yesus Kristus, Tata nene, pakei keako hupala hevei newe. ¹² Peanya,aha ana ba-ali leko nole keto fitowe, pa noleira tebabiete, noiara tebabietei kekapukuti teba lelepa, kei teba lelepai nole tete. ¹³ Pakei Ma-keke toka, fitowe nole keto. Pa ma-keke tokai nolei tejajika. ¹⁴ Bamuapepe noia tebabiete pepawu pu Adam wakoto pu Musa pa to-te, nole teteka no-ana Adam lei, kei bale anara Kea totolei. ¹⁵ Pa Tata hupala hevekei ahaalika ana Adam jafefelei. Kei, keba ali jalete feko neba lelepa neihene ma tebabiete, Tata heve Keke bapalewo pa janaheve Keke, kei Ke-kelaheto fe-teba lelepa keba ali leko, kei Yesus Kristus. ¹⁶ Pa heve keke pa ba-ali noleke ahaka. Kei ma heto ja-ali-fekei tute ma-hetototu, pa janaheve kewefefele kei jafefenawo tukote bamuatu. ¹⁷ Kai, nole ba-alike, tebabi kepupu keba-ali-i, pakei bamuawo teba, kei jana heve heto tewe pa jana bamua, kelei pa ba-ali-ia leko ke-etimomole, kei Yesus Kristus. ¹⁸ Pakei, aha ana ba-ali janofefeleko tebalelepa ma-tewe, anaiara janobamua teba lelepa jabamua teweko tete-etete. ¹⁹ Aha-ali ana ba-ali jakelatepaka neba lelepa nole newe, anaiara ba-ali latakule tebalalapa teleja teba bamua. ²⁰ Pakei ma-Keke tewela, u-jafefe nawo wae; pakene nole nawoetu, kei heve keke nawowotu, ²¹ Ura, nole ma-pewewe tebabiete, noia heve keke nave wa jabamua ko netenaia nenete, kei Yesus Kristus,Tata nene.