Pasal 3
Teba Yahudi Tuta Tete Pa Tata Lanoke
1
Anara noi, teba Yahudi te-tutaha pa poteriko jatetetete.
2
Nawofata, pa jalelepa motu. Lopana: pa te-te pifekekewe teweni.
3
Nya tunane, anara tebafai bau latepaka, kei Tata latepai kekakikilena?
4
Nou lewawa katu! Kekeputo: Tata-i kebabamua, pa neba lelepa omofa, anara putukotu: "Ura mei bamua wa pife-Meme, pa noia, anara me-ma-tete.
5
Pa anara jabamuawoi neto-o kei Tata bamuake nokelu, noi ja-netotote?Tata-i bamuakana - piti nilai kei-niba - anara fe-Keke kewenalu?
6
Lalafa-ka! Anara noi, Tata fitowe ma-Kelenanene?
7
Pa-anara Tata bamuake kei o-nine nawotafa te Tata fefeke, tunaneko ni-ma-el-ele anaraniwe niba nole?
8
Bamuaraka jafefei teni, kei neto: "Elo jafefe netete, u-jahave tueia toto." Teba anai ma-terer fate.
Neba Lelepawe Neba Nole
9
Nya tunane-e? Ne-enemote ana teba kauna? Noira katafa. Pa hufu nehena kei keba Yahudi, na-yeba Yunani, kei temete ma-nole tukolo,
10
ana putukotu: "Heveraka, baura heveka.
11
Baura hupapu heveka, baura Tata kejuka.
12
Teba lelepa tepu, teba lelepai janaraka, baura jaheve keleka, bauraka.
13
Kotina tete anara fulu jekotu, po-tete teba teterie, pora tetei ana i-etikeke.
14
Lau tete teba ifatepue,
15
Tae-tete yteba tejite tebibitei kokofa.
16
Jatakuku pa jahafefe terejate mo loma tete.
17
Pa loma-hevei tefujaka;
18
Tata kefuraka."
19
Pakei neru, jalelepa putumotu ma-kekei terenite teba lakete ma-keke tukolo, u-lau tete tepopo pa fito tupai teihetete Tata ma-ke.
20
Paike baura bamua tenini Tata hoke kei mai janokelo, ma-keke-iatuko nole nefuta.
Teba Bamua Teni Kei Hupalanave
21
Pa uawe, ma-keke kara Tata bamuakei pitete, anara teniko Ropu Keke pa Ropu bapuhake,
22
kei Tata bamuake kei hupalanave kotu Yesus Kristus te teba lelepa keji. Pa baura wowoka.
23
Kei tebawe nole netefa, ko Tata fefeke leti,
24
pa kei pipate ko neafia kekeki jakefu Yesus Kristus toke
25
Tata Yesus Kristus keleheto loma kele kei hupalanave ketupi, hi-Keke. Jawe kelei bamua Keke, kei nole toto lewa kelofe pu pu-Kekapekamo.
26
Pu-Keke lei jabamua kenalulupu-we, u-uaa, kei Ke-bamua pa teba Yesus keteji-i terabamua.
27
Anara noi, navehapa nonenarurute? Katafa! Lumaha? Jano bamua? O, bamua kotu hupalanave!
28
Kei keneni, neba bamua teninite kei hupalanave nene, pa kei ma-Keke janokeloka.
29
Na Tata-i teba Yahudi wofa te-na? Pakei Ke-ra Tata tebapapa hirai? Ea, bamua. Tebapapahi tera Kei Tata tete!
30
Napepei, anara Tata aliu leile, teba poteja bamua tenini kei hupalanave, teba poteja kara kei hupalanave.
31
Ana noi, ma-keke nanini kei hupalanave? O-fata! Puto, ne-kenena.