1 Poteung Yesus kewe leng kekai, Ke kalengte keba keing lufo po kepe tangha a. 2 Teangku-teangku Yesus tejengte-Ke, ''Koru, kebaing ba keneleng, keba wea na teba huhu keke kaimpa kewe petangha a lufo?'' 3 Yesus lengte, ''Ke wepa tebahuhu tera nelengka, anaing-ang ungAllah jano-jano keke pete uang-ang kea. 4 Newe jano nerere jano-jano Kea Ni keke lengte jo bang fea kotu; rapang petete tu poing baungra jano mepepe kape. 5 Jo Niwe nile ele fitong, Niwe ing fitong fefe.'' 6 Peanya keleng kote kotu, Yesus ifangfong kele hangto pa ifangfong Ke lampela hangto pa kejo luto kebaing, 7 Pa kelengte kewe ''Mema, meme pai Siloam nememe melope.'' Siloam napepe ''kekelengti''. Pea, kebaing keka, nekeke kelole pa kera mepute ja kefo. 8 Tebafa lengtuke pa tewe keja kefokapa anara keba lufo pilei, ''Keba wea keme pa jawai keana? 9 Teba fakaung tenie, ''Ea jawai kea.'' Tekaung tenie ''Keka, kera tangha ana keba jawai.'' Pea, keba ung-angwe lufo ing keleng pate, ''Niang jawae.'' 10 Pea, teba-teba ing tejeng pateke, ''Tunane luto meme keleko luto mea?'' 11 Keba ing keleng, ''Keba ing kebati Yesus ke hangto kelampe pa kejo luto nine. Kaimpa, Ke lengte ni, mema meme Siloam pa nememe melope', pea niha pa ne nilole, pa niwe ja nifo.'' 12 Tewe tenipate ke, kebaing kene.'' Ke leng i, ''Nira leka.'' 13 Kaimpa, tewe keba lutofo ing keteke tuja teba-teba Farisi. 14 Peate bang poing Yesus hangto kelampe pa keba luto ing keje bang ing Minggu. 15 Pea, teba-teba Farisi fang-fangra tejeng te keba ing tunaneko ke ja kefo. Ke lengte tewe, ''Ke hangto kelampe kejo luto nine, pa ni ne nilole pa ni ja nifo.'' 16 Wakote ing teba Farisi narang-rang ung tenipate, ''Keba ing keka Allahka Kewe bang Minggu kelate paka.'' Tekaung tenie, ''Pea anara, tunane kebaing kewe ke neleng kew janoing kelele le ja lopa ung kelele le?'' Poing, tewe tewowo teheke e. 17 Pea, tewe tepute tejeng e keba lufo ing, ''Pina memewe ja tewe Kea pa Kea luto meme keje?'' Keba ing lengte, ''Ke keba nabi.'' 18 Teba-teba Yahudi ing tewe pungtuka teke, keba kaung-ang ing ke lutofopa ung-angwe ke ja kefo, kaimpa tewe teba huhu wa keba kaung-angwe ja kefo. 19 pake kengte tewe, ''Kewe ing ko meme, kewe eleng kwe lutofo ke petangha a? Peana noing mpa, tunaneko kewe ja kefo?'' 20 Teba huhu keke tenite pa pi tete, ''Newe nere kewe ko nene pa ke lutofo wa ke nitang ha a, 21 Peapa tunane ung-angwe ke ja kefo, newera nereka; ba lito keke, newera nereka. Ewe eheng-heng kewo, keba tete; kerawo pilelepekotu ne keke,'' 22 Tebahuhu keke tenina ing-angte anara tera femotu teba-teba Yahudi. Pea, teba-teba Yahudi ing tepi tewa, ana teba-tuho tepung tumotu Yesus keana Kristus, ana leng tepepete wa sinagoge. 23 Peana teba huhu keke tenite,''Keba tete, e heng-heng kewonya.'' 24 Pea, la hingtungra teba-teba Yahudi keba lutofo ingketi, pa tejengke, ''Allah ke enaho eti, newere kebawe keneleng.'' 25 Ke leng, keba ing ke nelengna ke nelengka,ni leka; ja aling ung ni le, poing niwe lutofo, peapa ung-angwe ja nifo.'' 26 Tewe nite ke, janya Kele me? Tunaneko luto meme Ke leko be keje? 27 Ke lengte tewe, ''Ni ewe nileng, anara ewe elele ong e; tunane ewe pungtu era lele le? Ewera pungtu ewe ana teangku- Keke na? 28 Keba ing, peapa newe neangku-neangku Musa. 29 Newe nere Allah pikele kote Musa, anara tehe Keba ing, newera reka Kewe kanete.'' 30 Keba ing pikele pa kelengte tewe, Bamuang tunaneko ewe eleka Kewe keka pengri nete, Kea luto nine keje. 31 Newe nere Allah keleka teba neleng, peanya ba me ing Allah mefumepe pa jano-Keke mepemepe, Allah meing kelele le. 32 Wa totofa wakotu ung-angwe, neweka nereka keba lutofo poing wa ke petangha a. 33 Ana Keba ing kewe keka Allah kangke, Ke jale ungra kelele kale-kale.'' 34 Teba-teba Yahudi ing tenite pa pi teteke, ''Me petangha a neleng nawo, pa me pungle newe ja menapung-pungpe.''pea ke teketuju. 35 Yesus kele pea teba-teba Yahudi keba lutofo ing teketuju; peanya Yesus ketifi ke, Yesus lengte, ''Meweka pungle tafa kole Keba Ko? 36 Keba ing kelengte, ''Ke Ba ke ing Ba, Tata, ung Ni lala-Kea? 37 Yesus lengte kewe, ''Mewe Ke mefu. Kea ka enake pi leele.'' 38 Keba ing kelengte ''Tata, ni pungle.'' Kaimpa kewe kepe-Ke. 39 Yesus lengte, ko bangpe Ni lele fitong wea ung teweka tefika, ja tefofo pa tewe ja tefo, tewe lutofofotu.'' 40 Teba Farisi faung tere watupa-Ke jaing teri, pa tenipate-Ke, ''Ne wera luto fofotu.'' 41 Yesus lengpatei tewe, ''Ana ewe lutofo ewe neleng ewewe kale; anara ewe eleng, 'Newe janefo', neleng meme pekotu.''