¹ Petehe ing, Yesus kekapa kepakoi Galilea. Ke ana pungtuka kekana Yudea keing teba-teba Yahudi kefua tewa Ke tejako kewawale. ² Petehe ing, bang tete teba Yahudi bang ing Fate Riha, pete watu. ³ Peana ing, Yesus johangke-johangke tenite- Ke, ''Ne nana ewa nene ne Yudea ung teangku-teangku-Keke tera jaing tefofo jano-jano Ke janole. ⁴ Pea nebawe baungra ja mepe peng papaka me pungle me tefifite jeng bapa. Ana Me ano mepe ja-ja ing, ne-Meme, menapung-pung fitong.'' ⁵ Pea, Yesus johangke- johangke tewora te-Kera pungmoka. ⁶ Yesus kelengte tewe, ''Bang-Nine petejuka, anara bang meme pe etufa. ⁷ Fitongwe me penawika, peanya fitongwe pe-Ni penawi peana Ni jalelepa nile fitong, jalelepa- lelepa ing feng tafa. ⁸ Eha fatare bang tete ing. Ni keing nirere kale jeng jatete ete bang- Nine pe teka.'' ⁹ Peanya pe kelengte, Yesus kele fatai Galilea. ¹⁰ Pea, kaimpa johangke- johangke-Keke tete bang teteing, Yesus kera keti kefua,keka pengtika, keka pinaka- pimaka. ¹¹ Teba-teba Yahudi Ke teju jeng ja tete e ing, pa tenie Kewe Kene.'' ¹² Kawe nawo tepong e- tepong e teba nawo Ke tefijang. Tekaung tenie, ''Ke keba efeng.'' Kawe tekaungra tenie, ''Eleleka, Ke tebapa kelepe ile.'' ¹³ Ana ing-angra, kebaung pikekaki keleng peng-peng faka te Ke tewe tefe teba-teba Yahudi. (Yesus ja Kenalung Allah Paake) ¹⁴ Kaimpa bang tete ing peleng wae, Yesus kengti Allah Paake pa ja kenalung. ¹⁵ Teba-teba Yahudi te teeng tape pa teni, ''Tunane Kebawe ing jawe kelepa kele fata, jaing tenarungka pakewe.'' ¹⁶ Yesus kelengte tea pa pikele, ''Ja-Ni lemotu pewa ne-Nine woka, peana wa Kea Niwe kelengte. ¹⁷ Peana kebaung pungle Allah janoke mepe, me ja-Keke mepufata, jaing ana pewa Allah na wa ne-Nine wo. ¹⁸ Ba ing ke pikele wa ne kekewo ko keja keju ile pekeju ile ne kekewo, anara ba ing neti mejuko Kea keke lengtu, me bamuang pa ne meme bamuangra koka tehe kotu ne memewo, ¹⁹ Peanya Musa kewe Hukum Taurat keweleng ewe, anara ewe baungra hukum ing mepate paka?Jatuko ewe e enako Niwe eka ni wung-wung.'' ²⁰ Teba nawo ing tenipate, Me pungfeng he. Meba meing me e enako- Ni ekako niwung-wung.'' ²¹ Yesus kelengte tewe, ''Niwe jano aling ni lele le pa ewe e eng tapepele. ²² Musa ewe keweleng sunat, bamuang ing wa Musaka, anara wa jaja jobe, pa ewe menyunat teba Minggu bang. ²³ Ana teba baung sunat ele Minggu bang kaimpa Hukum Musa ujangre eleka, tunane ewe-Niwe pipo elaele peana Niwe nileko tebawe baung hae fata Minggu bang. ²⁴ Ewe jaing elulu jaing efo pa uang, anaing-angra jaing elulu pe teba jaing bamuangwo teriete.'' (Bamuangna Yesus keing Sang Mesias) ²⁵ Kaimpa, teba narang-rang ung tete e Yerusalem teni, ''Kea kawe Keba wea tejajate kewawale? ²⁶ Pea anara, ekaleng, Ke pikele ile pengtafa- pengtafa tewe-Ke pira teteka. Anaing-angra teba rubefa ing bamuang-bamuang tewe teri Kewe keing Kristus? ²⁷ Pea anara, epanere Kebawe keka pengrine. Petehe ing po Kristus tetele, wakote anara Kristus kete, baungra lelekale Keka pengrine kete.'' ²⁸ Petehe ing, wakote Yesus jakenalung i Allah Paake, Ke wapate, ''Ewe ea Niwe efulang pa ele pa Niha pengrine niwe. Pea, Ni lewe niha ne Ninewo weka, peanya Kea Niwe kelengte keing bamuang, ewe Ke efulangka, ²⁹ Niwe Ke nifulang Niha Kea pa Kea Ni kelengte.'' ³⁰ Pea tewe teena Ke te kekete, anara tebaungra Ke newete fika peana Ke bang keke peteka. ³¹ Poing teba-teba nawo tepungtu tafa Yesus. Tewe tenipate, ''Wakotu Kristus ing kete, jaungka Ke jaung jalopa nawo kelele Keba wea?'' (Keba Rube Yahudi Ke ena Yesus Ke keke) ³² Teba-teba Farisi le telate teri ja pitete e teba ing tetepate we e Yesus, pea imam-imam rube pa teba-teba Farisi tenute tebafa Allah Paake tewekotu ko Ke te keke. ³³ Petehe ing, Yesus lengte, ''Bang-Ni newe epane-epane lepa nete nene joraka pea pa petete teing, Ni hana Kea rerele Kea Niwe kekelengte. ³⁴ Ewe Ni ejujule, peanya Ni efifi kale. Pa, Niwe melene, ewe kefu e elelekale.'' ³⁵ Teba-teba Yahudi ing kebaung pi kelete tekaung, ''Ke kana nenele keba wea ketitile kaimpa Kewe nefifi kate? Anara Kewe kekana teba Yahudi tewe japa hemete teba-teba Yunani, pa ja kenalung teba-teba Yunani? ³⁶ Ja Ke punghe kole piti kelakotu pa Ke keleng, 'ewe Ni ejujule, peapa Ni efifikale. Pa, kewene Niwe mele, ewe jengfu erere kale.''' (Yesus Pikele petehe Pung Towo) ³⁷ Wakote bang pe, anara hope pepe bang ing, Yesus keru pa kewapate, Ke leng i, ''Ana ewebaung keti upe me manawe pepe-Ni pa pawe memu. ³⁸ Ba me pung meme kole-Ni, anara Ropo To nukotu, wa ne kekewo paleng pabatoto koile.'' ³⁹ Ja Yesus kepung keke lekole keing Pung, pe elele eba elakole-Ke. Ana, Pung ing kekelengka peing Kewe keke etika. (Tewe pipo telae Yesus) ⁴⁰ Anara tewe teri piti ing wa tewe tenipate, ''Kebawe bamuang-bamuang kebawe Nabi.'' ⁴¹ Teba hing tenie, ''Ke weing Kristus.'' Teba hingra tenie, ''Peapa Kristus keka Galilea tete le. ⁴² Peana Ropo To penukotu Kristus keweing keka pengri bale Daud pa Betlehem, bame jeng lopa Daud kelei.'' ⁴³ Poing, jalewang teba-teba tewowo tepate e Ke. ⁴⁴ Teba narang-rang ung tejateing tepungte Yesus tekeke, te baungra ne Keke tewete fika. Te ana pilang wowo Teba Rube Yahudi Narang-rang ⁴⁵ Anara ing, tebafa Allah Paake wekotu ing tewera temepuna imam-imam rube pa teba-teba Farisi, tejeng pate tea, ''Tunaneko ewe Yesus ekeka,'' ⁴⁶ Tebafa Allah Paake wekotu ing teni, ''Eleleka baungra mepepe kape piti-piti ana Kebawe laile.'' ⁴⁷ Teba-teba Farisi ing tewe tenie, ''Eweraka ewe kelepena? ⁴⁸ Peana ebawe baung meba rube na eba Farisi ewe pungtu motu-Kea. ⁴⁹ Anaing-angra, eba nawo Hukum Taurat epane ruka Keweing jang.'' (Pembelaan Nikodemus) ⁵⁰ Pea anara, Nikodemus, kewe kebaung keka tea kete, lopafu keti Yesus kefi, kelengte tea, ⁵¹ Jaha ungka Hukum Taurat nene meba epa nebatuho pi elu peterika peing keleng pa jaing jano kele? ⁵² Tewe tenipate, ''Anara ewera eba Galilea? Piri ejue pa efe e keba nabiung keka Galilea keteka.'' (Peume Uta T e w e) ⁵³ Kaimpa, tewe temefata te paa wowo.