¹ Kaimpa Tata kele teba-teba Farisi terari Ke wera teba nawo tafa pakeleng tehe Yohanis keja tale, ² Yesus kewo ing tepa keleng teheka, teangku-teangku-Kekenya, ³ Kewe Yudea kewe lite pa kemepuna Galilea. ⁴ Pea, Kewe melele jeng ing Samaria te. ⁵ Yesus keka kotiju Samaria, loung kota ing peti Sikhar peing watupa hangtu ing lopafu Yakub welengte ko keke Yusuf. ⁶ Pai Yakubke mele fua. Kaimpa, leng keka nepe, ketakung paitu ing. Poing ing, aha-aha kele rangku napanghing. ⁷ Pebaung peume pete peba Samaria pete pawewetu. Yesus lengte pe, ''Paka bepeng Ni hung.'' ⁸ Pea, teangku-teangku- Keke tete kota tete jajong jata tete te. ⁹ Peume Samaria ing penute Yesus, ''Tunanete kotu Mewe, meba Yahudi, pamewa memumu ni niwe niume Samaria?'' Ana eba Yahudi ew pinara eweleng-lengka newe neba Samaria. ¹⁰ Yesus lengte pa pi kelete te, ''Ana ewele Tata efengke keba pile ele ewe, Paka bepeng Ni hung', wakotepa newera janewawa-Ke te, pa Ke newe pabatoto kekeleng-lengle.'' ¹¹ Peume ing penute-Ke ''Meba rube, Mewe jeng pamebe bepeka pa paiwe kekakoti ifu, wanete Mewe pabatoto ing mebebepe? ¹² Jaungka kotu Mewe bapale tafa wa jobe nene, yakub, kea paiwe ke keleng newe pa paiwe ing newofa nunene wala neangku pa jako nene.'' ¹³ Yesus pina kewe pa kelengte pe, ''Epa newe baung pawe ing memu meketi upepele, ¹⁴ Anara baung me pani keleng memu me ketira upepe kale, anaing-angra paing Ni keleng kekona ing-ang i ile keka newe ana fefe leja wakote e batoto e ete.'' ¹⁵ Peume ing penute te Yesus, '' Meba rube, paingka bepeng niung niwe keti upepeka pa kewe nile pani kekeka.'' ¹⁶ Yesus lengte pe, ''Meme, pangme meme mepeng pa mera puna wea pepe.'' ¹⁷ Peume ing penute,''Niwe kebaung nikeka.'' Yesus lengte pe, ''Mewe bamuangwo po pi mepe, Niwe kebaung nikeka. ¹⁸ Peanya mewe tebaleng napang mepe mame, pa tebaleng mepa telepa keing kebaleng memeka. Tehe ifu piti mepakotu bamuang.'' ¹⁹ Peume ing pi pete te-Ke, Meba rube, ung-angwe niwe le Mewe ing meba Nabi. ²⁰ Jobe nene me tepa pe wea, peanya bapa meme teni Yerusalem jeng teba tepae e.'' ²¹ Yesus lengte pewe, ''Pung ing kole-Ni, he meume! Wakote bang pepe tete te pe weana Yerusalem teba Ai tepapate. ²² Ewe epaele jaing efulangka,peanya ja nepa netewe jaing nefutang efeng ing petete te wa bapa Yahudi. ²³ Pea, bang pepe tete te, peanya ung-angwe,neba epa neba nepanete-panete Ai ifu feng pa bamuangwo; peing Ai jalang kelalale ana nepa Kea. ²⁴ Tata keing Feng pa epa neba nepa Kea pea kepala ifu feng pa bamuangwo.'' ²⁵ Peume ing penute-Ke ''Niwe letafa Mesias weke tetele ( Ke teniete Kristus ) Anara Ke te, Ke jalele pafu keleng fatata newele.'' ²⁶ Yesus lengte tewe, ''Niwe, kaung-ang pile ele ewe niwe ing Kea.'' ²⁷ Poing, teangku-teangku keke tete-Ke pa tewe teeng tape Yesus ketena peume ung te pite e. Pea te baungra-Ke tejengka, ''Jaha Mewe jumepe.'' ''Jatuko Me ena pe pile ele.'' ²⁸ Kaimpa, peume ing pajeng pepe pewe ime pa pewana kotate pewapa pi petu teba-teba mefua, ²⁹ ''Elewe, eka kaleng kebaung kewe pikelei ni jalelepa jano kelei. Anara Kewe Mesias kawe.'' ³⁰ Tewera tejana kota pengte pa tete Yesus ketefi. ³¹ Peteheke ing, teangku teangku-Keke tefaja Yesus ana tenite, ''Rabi, jaka mema.'' ³² Pea, Yesus lengte tewe, Niwe jajong nine ewe folangka.'' ³³ Pea, teangku- teangku tejengte kealing te kaung, ''Jaungka baung memape kana kote-Kewe ko kekangkang.'' ³⁴ Yesus lengte, ''Jajong-Ninewe kawe jano Keke pea Niwe Ke kelengte pa jano-Keke we nileko kafatata. ³⁵ Pewe eweka lengka, 'Ke nopong tete tu bang jana ewewele? Ekalengfu, Ni lengte te ewe, luto e efu ea pa ekaleng lehe-lehe pe tanglefa ko e wewele. ³⁶ Ung-angwe, ke jakewe jana kelele le pa to pepe me keleko pe batoto peana meja mewe mepe pa meja mewa mepe elepa wenakae e. ³⁷ Ipewe ing pitiwe pe bamuang, 'Kebaung ke jakewa ile pa tekaung tewe ete.' ³⁸ Niwe ewe nilengko ere janafa ewe jaing e jano leka; tebahing janoing tere pa ewe kengrela jano tete.'' ³⁹ Teba Samaria nawo wa kota ing tepungtu Yesus piti peume petu ing, ja pewofo, ''Ke leng fata niwe ja lelepa jano nile.'' ⁴⁰ Pea teba-teba Samaria ing tejakote Yesus, tewe tewa-Ke ko kepa telepa te e pa Yesus kelei kefua jo bang hingtung. ⁴¹ Pa, teba nawo raing tepung tete tu piti Yesus kewo lai. ⁴² Tewe pi tete te peume ing, ''Peing raka piti mepamepe newe ne pungtu, anaing-angra newera wo nere, pa newere Kewe ing bamuang-bamuang fitong Efengpe.'' (Keangku Keba jano leile Istana Ke leko hae) ⁴³ Bang hitung tewe, Yesus jeng ing kewelite pa kekana Galilea. ⁴⁴ (Perakapa, Yesus kewo leleng i kelei keleng i kebaung nabi ketabengjara tete kate bame ke kewo.) ⁴⁵ Poing Yesus ketiju Galilea,Teba-teba Galilea te-Ke teke tewe ketefi jalelepa kelei jano kelei petehe Paskah bang tete Yerusalem tewera tete bang jaing tete. ⁴⁶ Peweko ing, Yesus kerati Kana, Galilea jeng Ke pakele koti lelang paanggur. Kapernaum kebaung jano keleile istana ing ko kekeing kene e. ⁴⁷ Poing keba jano lei istana kele Yesus kete keka Yudea kete Galilea, keti kefi pa kewako Yesus keti pa ko keke kele hae e koing atalera ke wawale. ⁴⁸ Pea, Yesus lengte tewe, ''Anara ewe janile- nile pa jaing jalopa-lopa, ewe jaing ewe pung tutu katu.'' ⁴⁹ Keba jano lei istana ing kelengte,''Meba rube, mekape joka ko nikewawale.'' ⁵⁰ Yesus lengte ke, ''Mme, ko meme ke lua.'' Keba ing pungle piti Yesus late ke pa keba ing keka. ⁵¹ Poing keba janolei istana kekai leng, teangku- teangu jano reete pai keke ketefi pa tenite ko baleng meme kelua. ⁵² Keba jano leile istana kekengte tea rangku narang-rang ne ko nine wapatute efeng. Pa, tenite, '' Bang aha-aha nete rangku napang hengtong toto keke lengte.'' ⁵³ Ai ko kekeing kele, poing Yesus lengte kewe, ''Ko memeing kelua.'' Pea, keba jano lei istana ing pa teba paitupa keke tepungtu Yesus . ⁵⁴ Keing jaana lopa la hingtung Yesus kele poing Yesus keme keka Yudea keti Galilea.