¹ Kewe bang lopana minggu ing, Maria Magdalena pete te fulu Yesus fetanghapa-fetanghapa wo, anara lopangko bang ing, pa pekawengte wung be tewepoko pe tewena fulu ing. ² Pea, pe wata pa pete pefi Simon Petrus pa teangku hing Yesus keno leile,pa penute tewe, ''Tewe Tata teke fulu, pa newe ruka kewene-Ke teke ile.'' ³ Pea, Petrua pa teangku hing ing tete fulu ⁴ Teba hingtung temejata telupa-lupa, peanya teangku hing ing temejata kokofa Petrus peapa ke katoti tiju fulu. ⁵ Ke kefuti kaki pa kekalengte i, pa kefo ro linen ehang Yesus keterape pe e kefua, pea ke i kekengtika. ⁶ Kaimpa, Simon Petrus kete, kekeko ke, pa kekengti fulu pa ke kekalengte kefo ro linen keterape pe e kefua. ⁷ Pa, ro tewe tewepoko tangha pe tewepeko Yesus rube tewei lupaka ro linen ung-ang terape, anara terape jeng wowo. ⁸ Kaimpa, teangku hing ung-ang, tejatote teteju fulu, tera kengte. Ke kefo pa pungtu kela. ⁹ Pea, ja ing pelewang kapa, tewe terite paka Ropo To, pea Yesus kera kelefu tetele keka newung nete. (Yesus Ne Kenalung Maria Magdalena) ¹⁰ Pea, teba hingtung ing temete paa. ¹¹ Pea anara, Maria perofulu peng pa fu petu. Pea pe fu petu, pe pefute weko fulu i ing, ¹² pa pe peka wengteteba fangpa ro toto tena pehemo teme jeng ehang Yesus keteke fati keikapa. Pealing ung pemo rube pa pealing ung pemo tang e. ¹³ Teba fangpa hingtung ing tejengte Maria, ''Meume, jatuko ewe fule ele.'' Maria penute peba fangpa ing, ''Tewe ehang Tatanine pa ni luka kene tewe Ke tekei.'' ¹⁴ Pewe tenitepa kaimpa, Maria pepuna fangte pa pekawengte Yesus keru keing-ang, tewra terika ke ing ana Yesus. ¹⁵ Yesus kengte pe, ''Meume, jatuko ewe fu ele- ele?''Tehiengra keing keba lehe wekotu, Maria penute- Ke, ''Meba rube,ana Meba rube Ke mebe mame jeng ung mepeng-peng ni kene Meba rube Ke mebe ilene, pa ni-Ke nikekele.'' ¹⁶ Yesus lengte pewe, ''Maria.'' Maria pepute pa penute-Ke penula pilang Ibrani, ''Rabuni'', pena pepe ''Koru''. ¹⁷ Yesus lengte pe, ewe NI eke-keka anara Ni Ai ra Ni reka. Pea anara, ererele ehana joke-joke-Nine pa eleng-eleng tewe, 'Ni hana Ai-Nine rerele pa Ai meme.''' ¹⁸ Maria Magdalena pete pa pewe penu teangku-teangku, ''Ni Tata nifu, ''pa Yesus kewo keleng ja-jawe tepe. Yesus Nekenalung te Teangku-teangku-Keke ¹⁹ Wakote bang ing rapang, bang lopana minggu ing, pa tilong-tilong jeng teangku fa teluete pewate peanya tewe tefe te teba-teba Yahudi, Yesus kete pa keru hou- hou tewe pea keleng, ''Pepe efengwo te ewe.'' ²⁰ Pi kele kapa, Yesus no kekenalung pa lambung-Keke te tewe. Teangku fa tepung tu tewe Tata tefi-fite. ²¹ Kaimpa, Yesus lengte tewe laungra, ''Pepe efengwo te ewe. Aha aling ana Ai ke Ni kekelengtu anaing-angra Ni ewe nileleng ere ²² Pa Ke pe kelengte Yesus feng kepe tewe pa keleng, Pung To eke! ²³ Ana ewe neleng kebaung ejo peana neleng ing pe ejo. Pea ana keba neleng-nelengkeke ewe ejoka, pea neleng tetewe pe ejoka.'' Yesus Ne kenalung te Tomas ²⁴ Tomas, kera kebaung keka teangku hampa, ketenie Didimus, tewe telupa kelakoka kaimpa Yesus kete. ²⁵ Pea, teangku-teangku hing teni ke, ''Newe Tata nefu.'' Pea, Tomas lengte tewe, ''Anara niwe paku jeng nifo no-Keke pa no kang-kang nine nihahu paku jeng ing, wala no kang-kang ni hahu lambung-Keke, ni percaya nilele kale.'' ²⁶ Bang nahingpang waetu, teangku-teangku tepute telu paa ing, pa Tomas keratelupa tewe teme. Poing tilong-tilong pe tejate, Yesus kete pa keru hou-hou tewe, pea kelengte, ''Pepe efeng te ewe'' ²⁷ Kaimpa, Ke lengte Tomas, ''no kang-kang meme kewea pa mekafo no-Nine; pa no meme kewea pa mepefe lambung-Nine. Percaya mepepeka ka peanya percaya mepepe.'' ²⁸ Tomas lengte Yesus ''Ya, Tatanine pa Allahnine!" ²⁹ Yesus lengte ke, mewe ung-ang percaya mepe Ni mefu. tewe ma kele tew ni tefika peapa percaya tete.'' (Yohanes Pungleko Ropo We Japo kele) ³⁰ Peana nawo jano lopa hing pe Yesus jano kele teangku- teangku-Keke to pe kewe pepo tumoka. ³¹ Pea anara, peing lelepawe pepo tumo ung ewe percaya Yesus kewe Kristus, Allah Oke, pa waketu percaya nene ing, newe neme batoto ifu bati-Keke.