¹ Pilatus Yesus keke pa kelengko ung Yesus keja tete. ² Taba faing rine kongpa tejako teteko ana mahkota pa tekefa Yesus rubeke, pa jubah ungu teweni kewefa. ³ Tewe tejanato watupa Yesus pa tenite, ''Salam, he Bari teba Yahudi.''Pea, tewe keteja tangha-Keke. ⁴ Pilatus kera kengti peng kelengte tewe, ''Ekalengte! Niwe Yesus nikahana peng rerele ung ewelu ni kewe jaung feng nifika jaleung tewe-Ke ⁵ Pea, Yesus kekengte mahkota kongpa kekefa pa jubah ungu. Pilatus lengte tewe, ''Ke weka efu!" ⁶ Kaimpa imam-imam rube pa tebafa taba Yesus tefi, tewe tehiwae, ''Salibkan Kea salibkan Kea.'' Pea anara, Pilatus kelengte tewe, ''Kewe ekare pa salibkan ewole anara niwe jafeng ungka nifika jaha feng-Keleka.'' ⁷ Teba-teba Yahudi ing tenite Pilatus, ''Newe hoho nene, pa petehe hoho ing, Ke kewawa anara Ke aha kelete ne-Keke peana Allah Oke.'' ⁸ Kaimpa Pilatus kelelate piti ing, ke kefutafa ⁹ Pa kera puti kekengti gedung pengadilan, pa kekengte Yesus, ''Mema nepe pengri-Meme.'' Pea anara Yesus pikeleka. ¹⁰ Pilatus kelengte Ke, ''Mewe ni pimepepe ongme? Mewe pekana niwe lelepa niang wekotu ko Mewe nike fufule pa lelepawe niangra lengko-Mewe teke lelete?" ¹¹ Yesus lengte, Me jalelepa mepemoka wa ne-Nine, peanara jaing pewaho hete keweleng me wa ho. Peing petehe, teba Niwe tekenime neleng tete bapalewo.'' ¹² Wakotu teri ja ing, Pilatus ke enakoYesus kekefu-fule, peanya eba-teba Yahudi tehiwae, ''Pea mewe Kebawe mebefu, mewe Kaisar bato keka; meba ing mepeng me bari mewe Kaisar pi memami.'' ¹³ Peanya Pilatus lekelate piti-piti ing, ke Yesus kekekati peng, pa ketakung fujeng pengadilan, jeng teung pe bati Litostrotos, anara tehe pilang Ibrani tenieti Gabata. ¹⁴ Bang ing peing bang ja tetupie ko Paskah, po ing aha tete rangku napanghing. Pilatus lengte teba-teba Yahudi, ''Kewe Bari e e!" ¹⁵ Pea, tewe tehiwae, Kewe ekeliti lengtiti! Kewe ekeliti lengtiti! Salibkan Kewe!" Pilatus lengte tewe, ''Pungtuna niwe Bari e e Salib nilele?" Imam-imam rube tenite, ''Newe bari neneka Kaisar wofa ¹⁶ Peate, Pilatus Yesus kekelengti tewe ko salib tete te. (Yesus Salib tete) ¹⁷ Yesus kekengte salib-Kewo kewekuko tejana tete te jengti pebati ''Jeng Tengkorak'', ana i pepe pilang Ibrani teniete ''Golgota''. ¹⁸ Kefua, tewe Yesus salib tete wala teba hingtung hing,salib tete lupa keung nopalo pa keung nonalo Yesus keko hou. ¹⁹ Pilatus kera japo kele pa japo ing kewe nalang ri salib ho. Japo ing penawa, ''YESUS KEBA NAZARET, BARI TEBA YAHUDI.'' ²⁰ Teba nawo Yahudi japo ing tefo peapa jeng Yesus salib tete ing pewa tupa kota, pa japo ing japo tete pilang Ibrani, Latin, pa Yunani. ²¹ Pea, imam-imam rube teba Yahudi teni pate Pilatus, ''Japo mepe peka, Bari teba Yahudi,' anara japowe, Keba we keleng, 'Niwe Bari teba Yahudi.''' ²² Pilatus lengte, ''Ja pe po nile, pe potu.'' ²³ Teba tabafa, anara tewe Yesus salib tete ro-Keke tewe pa tekote kang nopong, kang aling tewowo-tewowo taba, jubah-Keke; jubah ing pe kelimka, pe teli waho wakote kong pe telipaka. ²⁴ Tabafa ing tenite kebaung te tekang ung, ''Pe epanewe nejing-jingka, anawe undi nejang-jang ko epane neru-ru ba we-wele.''Ja we pe lewang ung pete hete papa anara pepotu kotu Ropo To: ''Tewe ro-Nine pete kote-tekote tewofa pa jubah- Nine, tewe undi tejang Maz. 22;18Wakotu tabafa jalelepa ing tete. ²⁵ Pewanate ing, Yesus make, jangke peume Yesus make, Maria Kaliopas eke, pa Maria Mag dalena, tere watupa salib-Keke. ²⁶ Peanya Yesus kalengte make-Keke kefo pa teangku Ke teno kele tere kefua Ke lengte make-Keke, ''Meume mekapengtu, kewe ko meme.'' ²⁷ Pea, Yesus lengte keangku-Ke nole ing, ''Kewe anni meme.'' Po ing, keangku Yesus make kewe tete e paa. (Yesus Kewa) ²⁸ Petehe ing, Yesus, kelu lelepafu pewa kotu ja tete, ko Ropo To pehete papa, Ke lengkotu, ''Ni keti upe!" ²⁹ Keing bejana anggur tilang teliko pi. Petehe ing, tewe hepang karang tefiko tepohe anggur tilang hisop tuho pa teke narungti Yesus lang u keke. ³⁰ Peanya anggur tilang ing peng kepe, Yesus lengte, ''Wakotu pe.'' Kaimpa, Rube-Keke kepa pa lengtung-Keke kekeleng. ³¹ Peana bang ing bang ja tetupie,pa ung ehang-ehang ing pemo-moka ri salib Minggu bang, pea Minggu peing bang tete, teba-teba Yahudi tewa Pilatus ung yang e teba- teba tere salib ing tebangte pa ehang-ehang mo salib terehetu. ³² Pea, teba tabafa tetu pa tang e tebangte keba kealing pa keba kehing ung, telupa Yesus terele salib. ³³ Pea peanya, anara tewe tejakote Yesus pa tekarengte pea Kewa, tewe tang e-Keke tebangteka. ³⁴ Pea, kebaung taba ing tombak kekaku te lambung Yesus, pa peana ing pera, hi pa paa taju kengtu. ³⁵ Teba jaing petefo jalewang teing tea hoho tete, pa ja tefope bamuang pa ke lu anara ke leng peing bamuang, ung tewera pungtu tu. ³⁶ Pea, ana lelepawe lewang pehetepa jape potukotu Ropo To; ''E-Keke aling ungra ketebang tete rakate.'' ³⁷ Pa pea, tehe i kang ung Ropo To penu, ''Tewe ana Ke tefifi tewe teenako teji.'' (Yesus I tete) ³⁸ Lelepa ing kafa, Yusufkeka Arimatea, kera kelako Yesus teangkuke pea anara kelengpai-kelengpai peanya kefu teba-teba Yahudi, te tewa Pilatus ke kapungle Yesus ehangke kewe-we; pa Pilatus pi kewe. Pea, Yusuf keka Arimatea kete pa Yesus ehangke kewe. ³⁹ Nikodemus, keba lopafu Yesus ketifi po rapang bang, kerate minyak kelampe mur pa gaharu kekate reng-reng aha tete lima puluh kati. ⁴⁰ Pea, tewe Yesus ehangke tewe pa tera pela ro linen rempah- rempah tehe, teteana adat teba Yahudi fulu tete. ⁴¹ Watupa jeng Yesus salib tete, anara lehe pa lehe i lehe ing pe fulu nati ung etu ehang alingra tewe i ka kefua. ⁴² Peanya bang ing bang ja tetupie teba Yahudi, pa fulu ing hambang raka, tewe Yesus ehangke tewe i e kefua.