1 Kaimpa Yesus ja-jawe pekeleng kotu, Kepa teangku-teangku- Keke kepa telena paKidron, jeng peing ana lehe Yesus kengti i kepa telepa teangku-teangku-Keke. 2 Yudas, ke keba teangku keke Yesus kenaki, ana pera jeng kelu lehe ing Yesus kepa telepa teangku-teangku tele ete kefua. 3 Yudas, ke teba taba faung kele pa bapo-bapo wa imam-imam rube pa teba-teba Farisi, tete lehe ing tete lentera ra teremo obor pa tetang tate. 4 Yesus, lelepa ing pe Keluleng jaing lewang-wangtu, ehana tofure pa ehengte- tewe, ''Ba ke eju ele.'' 5 Tewe tenite, ''Yesus keka Nazaret.'' Yesus kelengte tewe, ''Niwe Yesus .'' Pa Yudas kea Ke kenaki, telepa tewe tere. 6 Kaimpa Yesus lengte, ''Niwe Yesus,'' teba-teba ing tejana fangte pa teihete e hangto. 7 Peing ana, Yesus fang-fangra kekengte tewe, ''Ba ewe juele.'' Tewe tenite, ''Yesus keka Nazaret.'' 8 Yesus lengte, ''Pewe Ni lengte ewe, Niwe Yesus. Ana, pea ewe Niang ejuele, mepekote teangku-teangku-Ninewe tejaung.'' 9 Jaweing lewang ung pete hetepa piti Yesus lengkotu; ''Wa lelepaing Me mepe pengte-Ni, Niwe aling ungra lengtika.'' 10 Simon Petrus, keing anabe kang ung, anabe ing ketoleko tota pea keweko keba jano leile Imam Bapale, kaimpa le kebapo nonalo kelu; bati bapo jano leile Imam Bapale keing Malkhus. 11 Pea, Yesus lengte Petrus, Anabe ing mebe faheti pokeke. Cawan ing Ai kelengte-Ni, peibg ana kana Niwe nihung-hungle.'' (Yesus Teketute Ho Hanas) 12 Kaimpa, taba Romawifaing pa taba rube taba rube tete wala tebapo faung teba Yahudi Yesus teke pa Ke atete, 13 pa topato Yesus teketute Hanas, Kayafas take, keing Imam Bapale felangro ing. 14 Pa, Kayafas kea pi kelei teba-teba Yahudi jaing pe efeng pea ana ba aling ung kewa ketihe bapa tupa. (Petrus Kengke Kekika Yesus) 15 Simon Petrus pa kebaung teangu hing telake Yesus. Teangku kaung ing Imam Bapale tekefelang pa ke kengti kepa telupa Yesus tekengte istana Imam Bapale. ]v 16Pea anara, Petrus kerupeng, tilong watupa. Kaimpa, teangku hing ing, Imam Bapale tefijang, terapuna pengte pa tete pite peume tilong wekotu, pea Petrus keti kengti. 17 Pea, peume tilong wekotu ing pewengte Petrus, ''Mewe kana meba ung mema keba ing?'' Petrus lengte, ''Nika!'' 18 Tewe temepa ratete, tebapo faing pa taba rube tejaleng tere fua anara bang ing fengkoko te nelelang, pa tewe netae, Petrus kera tewe telupa, tere pa nete. (Imam Bapale Kengte te Yesus) 19 Peing ana, Imam Bapale kekeng i Yesus teangku-teangku-Keke pa ja Ke nalung i. 20 Yesus lengte ke, ''Niwe pinile peng-pengfa tehe fitong wea. Ni anara ja ninalung e sinagoge-sinagoge pa Allah Paike jeng teba Yahudi nawo luete. Niwe pinile ana nile lengpaka-lengpaka. 21 Tuna neung ewe heng ele Ni. Eheng-heng tewe teri janya Ni leng e tewe pea tewe teri, janya Ni leng e.'' 22 Kaimpa Yesus lengte tunawe, kebaung jeng kewekaru keing-ang tangha-Keke kenalu pa kelen, ''Anaing-angna noing-Me peng Imam Bapale keleng?" 23 Yesus lengte kea, ''Pea Ni leng jaleung feng, eka nalung feng kotune; anara pea Ni leng pe bamuang, tunane Niwe eka-ka.'' 24 Pea, Hanas Yesus kekelengti keatete teketute Imam Bapale Kayafas. Petrus Kerapute Yesus Keng kekika 25 Petehe ing, Simon Petrus kewe kerufaru pa pinaka. Pea, tewe tejengteke, ''Mewe raka merapa keba aling teangku Keba ing?" Petruske kealolu pa keleng, ''Nika.'' 26 Kebaung kebapo Imam Bapale, ke anara batonya wa keba le keke Petrus kelu, keleng, ''Anara ni menifu mepa elupa Ke ele e lehe ing.'' 27 Fang-fangra, Petrus ke kealolu, pa poing-angra, ojing nakele. (Yesus Teke tujana Pilatus) 28 Kaimpa, tewe Yesus teke tute wa jeng Kayafas tera ketute gedung pengadilan, po ing fe e, pa tewe tewowo gedung pengadilan tekengteka ung tewe feng tewe-weka ne tete, wakotu Paskah bang ja tetang-tang. 29 Pea, Pilatus kengte ketifi tewe pa kekengte, ''Jaha ewe pile ele tewekotu Keba we.'' 30 Tewe tenite pa piteteke, ''Anara Keba we keba feng, newe-Ke neke natete kateyeme.'' 31 Pilatus lengte tewe, ''Kewe ekare pa pi elulu anara ma e ewe penukotu.'' teba-teba Yahudi ing tenite, ''Kewe ana penuka ma nene ko keba nekako kewawa.'' 32 Kewe pelewang piti Yesus lamotu hetepa penorungte kewawa ana ja Ke wawale. 33 Pea, Pilatus fang-fangra kekengti i gedung pengadilan pa kelengko Yesus, pa kekengte-Ke, ''Mewe Bari teba Yahudi?" 34 Yesus lengte, ''Anara piti meme mepe pewa neme mewo, ana pewa teba hingko mepeng mepe Ni?'' 35 Pilatus kelengte, niwe niba Yahudi. Bapa meme pa imam-imam ruba-Meme tewo Me teke niteni. Ja Me pepe pe.'' 36 Yesus lengte, Jeng Tete-Nine pewa fitong weka. Ana jeng Tete-Nine kotu fitongwe, bapo-bapo-Nine tepa epepele ung Niwe teke nini teba-teba Yahudi kate. Pea anara, jeng Tete-Nine pe fitongwe koka.'' 37 Pilatus kengte, ''Pea, Mewe meba Bari?" Yesusra lengte, ''Mewo mepeng Niwe Bari. Peko wea Niwe petangha a, pa peko wea Niwe le fitong, peanya ko tehemete jaing bamuang. Epa neba tuho nena pengri bamuang pina-Nine elulule.'' 38 Pilatus piti kelate- Ke, ''Bamuang ing peja?" Pa, piti ing kelate, Pilatus fang-fang kekengti peng ketifi teba-teba yahudi pa kelengte tewe, ''Niwe jale feng ung kele nika penifika ja-Kele. 39 Peanya, ewe ja aling ewe koko ja ele ele ni kebaung mule apaa nikefufule bang Paskah. Pea eweka pungtu niwe 'Bari Keba Yahudi weana.'' 40 Tewe nipate tehiwapae, Keba ing mebefu-fuka Barabas mebefu-fu.'' Barabas keing keba jata leile.