¹ Keing piti- piti Yesus leng motu, peanara Ke kalengna petang pa kelengte ''Ai, bang pewa kotehe, mebe eti Ko Meme ung Ko-Meme kewera Me kekena hoeti ² Peanara Me ana ja mebepeng Ke pung nafeng te neba nawo, ungte ja lelepa nawo Mebepeng- Ni, Ke jake weleng memu batoto. ³ Kewe memu batoto ing, peanara tewe Me tefijang, me aling- aling Allah kefa bamuang, pa Kristus Yesus kewe tefijang ke Meang mebepengtu. ⁴ Niwe Me nikena hoeti tehe fitong pepa jano Me pepeng pejano Nile. ⁵ Pa ung-angwe, ya Ai, Ni mebena hoeti Me ama nelupa wala Ni wekotu Mepa fitongwe lewang kapa. ⁶ Ni bati-Meme niwe ete teba-teba Mepepeng te-Niwe wa fitong wea. Tewe ing Meme pa Metew mepepeng Niwe, pa tewera telatepa hoho Meme. ⁷ Ung-angwe, tewe teri jalelepa Meang pepeng Ni pewa-Mea. ⁸ Pea, Niwe tewera hoho pewera Meang pepengte-Ni, pa tewera terepa bamuang-bamuang teri Niweha Meang, pa tewe pungtu pea Niwe Meang bepengtu. ⁹ Lupompong Niwa ko tewe, fitong lupompong Niwaka, pete ing anara tewe Meang pepeng te-Niwe; ana, tewe Memewo. ¹⁰ Lelepafu Ni lemo pewe Memefa, pa lelepafu Mepemo peing Nine; pa Niwe tekena hoeti peete motu jaing. ¹¹ Ni fitong nile ekale, anara tewe tete efitong wea, pa Ni rere-Me To, tewe mepe mameme tememe bati-Meme, bati Meang pepeng te-Ni, tewe teteti aling anara Newe. ¹² Poing Niwe tewepa tepa nelupa, Ni tewete totang nile bati-Memepa ana peing Mea pepengte-Ni. Ni tewe totang nile pa tebaung kelengti raka peing ana ko fengtafa, ung Ropo To pehetepa. ¹³ Pea ung-angwe, Ni lele ewe; pa lelepawe Ni lengfata fitong wea ung tewe efeng-Ninepe ewe-we petehe kopi tehe ne tete. ¹⁴ Niwe hoho-Meme ni welengte tewe, pa fitong tewe penawi anara tewe teba fitong peka, peanara Niha fitong nileka. ¹⁵ Ni Me niwaka ko tewe mepepe wa fitong, anara pea tewe totang mepepe kaba feng. ¹⁶ Tewe fitong tebapeka, pera ana Niha fitng leka. ¹⁷ Tewe mepeko to ifu bamuang, hoho-Meme peing bamuang. ¹⁸ Peanya Mewe Ni mebe pengtu fitong, peanara Ni tewe nileleng tehete fitong. ¹⁹ Niengte tewe, Niwo ne-Nine nilole ung tewera nilole ifu bamuang. ²⁰ Niwe lupompong nileko tewefaka, anara kote teba-teba te-Ke pung motu pewa pifeng tete, ²¹ Ung tewe teluti aling, anara Me, ya Ai, ifu Niwe pa Niwe ifu Mewo; ung tewera neluti aling ifu Newe kaimpa fitong pung pepe peru Meang Niwe mebe pengte. ²² Jeng Me nekena honete pemepeng Ni, pea Nira welengte tewera ung tewe teteti aling, pewe anara Me pa Niwe ne aling. ²³ Niwe mule tewe neteti aling pene anete. Petu naing fitong pew peru ana Meang Ni mebepengte pa ana Me nomepe tewe, anara Mewo nomepe Ni. ²⁴ Ya Ai, Niwe pungle tewera, te Me pepeng te-Niwe,tera lakete-Ni tepa nelupa kewene Nile ele, ung tewera jeng Me nekenaho tewera fofo, pe ana Mewo mepepeng Ni, anara Mewo nomepe Ni fitongwe lewang kapa. ²⁵ Ya Ai meing etawo, peing anara fitongwe Me pefowangka, peanya Ni Me nifulang; pa tewe teri Meang Ni mebepengte. ²⁶ Niwe nileng wefa bati-Meme te tewe pa tenina ing-ang wape leng wae no efeng Me pepeng-Ni pe etu tewe pa Ni mule nei tewe.''