¹ ''Lelepawe pewe Ni leng efatawe ung ewe leteteka. ² Tewe ewe tetuju- jute wa sinagoge. Pea, bang pepe tetetu teba ewe teji-jite tewe hieng te Allah kekepa pini. ³ Pa, ja-ja ing tewe jape tete te tewe Ai na Ni tefejangka. ⁴ Pea anara, lelepa ing ewe Nilengfata ung bang pepe pete, ewe e eng-eng Ni pewe ewe nileng. Pa, ja-jawe ewera Ni leng-leng kale wa tofu peanara Niwe epanelupa. Jano Pung Tuke ⁵ Pea anara, ung-angwe Ni rere Kea niwe kekelengte, pa ewe ba aling ungra Niwe meme kapa, 'Mewe Me memepe?' ⁶ Pea, anara Niwe lelepa ewe pe nileng fata, hupalang e ewe pefutu. ⁷ Pea anara, Ni lengwefa bamuang te ewe; efengwo ewe Ni rere ana Niwere peing ana Niwe reka, Bato ing kewe ewe ketete kale; anara Niwere, Ni-Ke nilengko ketiti ewe. ⁸ Pa, anara Bato ing kete, Ke ana fitong neleng pepe pukewe, bamuang, pa pipe kelulle; ⁹ tehe neleng, peanya tewe Ni tepung tuka; ¹⁰ tehe bamuang, anara Niwere Ai pa ewe Niwe efuka, ¹¹ pa tehe pipe kelo kikile, anara keba fitong bawe kera pikelo kikile. ¹² Ana ja nawo pungle Ni ewe nileng-leng anara ewe pewe ung-angwe ewewe rakale. ¹³ Pea, anara Ke, Pung Bamuang ing kete, Ke ana newe kekakaile tehe lelepa bamuang pepe. Pea, Kewe nekekewo pi keleka, anara lelepafu Ke kelu pea Ke pikelele; pa Ke ana ewe keleng wefa ja-ja lewang. ¹⁴ Kewe ana Ni kekena hoeti peanya Kewe ja kelemotu pea Nira lemotu, pa nileng ewe lele. ¹⁵ Ja lelepafu Ai kelemotu peing ja-Nine. Pea ana ing, Ni leng-leng ana Pung Bamuang keing keleng wefa ewe janya-Ke lemotu wa-Ni.'' Pung futu Tehe Pung etafa ¹⁶ ''Eme joraka, pa ewe Ni wera efufu rakale, pa laungra, ele e joka pa Niwe efufule.'' ¹⁷ Teba faung Yesus teangkuke tejengte, ''Ja ungka-Kotu Kewe pikele newe, 'Netene jo kaung, pa ewe Ni efufu kale; pa fang-fangra, jo kaung, pa ewe Niwe efufule.' pa Niwe rere Ai.'' ¹⁸ Pea, tewe jengte, ''Ja Ke pung lekole ana,netene jo rakaung'. Newe ruka ja Ke leng ile.'' ¹⁹ Yesus kelu ana teangku-teangku-Keke tepungtu tejeng-jeng-Kewe pea Ke lengte tew, ja ewe eheng ele ewe ewowo jaing ja kotu Ni anara pewe Ni leng, Ele e jo raka pa ewe Niwe efufu kale; pa fang-fangra, ele e jo raka, pa Niwe efufule? ²⁰ Kewe bamuangwo, Ni lengtete ewe, ewe fu elele le pa lupongfa pai, anara fitong pewe pewena kae; ewe ana ba meko ewe kotu, peanya ana ba meko emele pera pekote ewe nakae. ²¹ Kaimpa pebaung peume ko petu, pewe pepupa fiko bang pepe teung ko petutu; peanya wakotu Ko pepe prtu, pewe ja pepupa fie ing pepeng peana pung ing etafa peanya newe tetangha a a fitong. ²² Wakotu epa nera newenapa fifite powe, anara Ni nile ewe nififi pa pung e ewe pewenaka, pa baungra ja ewe nakae baungra wewe kale peing meme. ²³ Wakotu bang ing, ewe jaungra Niwe eheng-heng kale. Peana bamuangwo, Ni lengtete ewe jahafa ewa ete Ai-Nine ewala bati-Nine, Ke jaingpe keweleng- leng ewe. ²⁴ Wakotu ung-angwe, ewe jaing jahafa ewa bati-Ninepa. Ja ewawa, pa pemepe ung ja ewe nakae ekopi.'' (Fitong Ke enako Pekewe) ²⁵ Niwe ja-jalelepa nilengte ewe wala janolopa; bang pepe petetetu anara Niwe ewe pi nilele kale wala jano lopa, peanya peing pi kelele ewe Ai kewo keleng-leng hole. ²⁶ Wakotu bang inng,ewe ja ewawale pebati-Ninepa pa Niwe noing ewe Ni lengka Ni lupompongpa niwa ete Ai kote ewe. ²⁷ Pea, Ai kewo jaing keweleng ewe anara ewe jaing ele Niwe pa pungmo Ni pew Aite. ²⁸ Niwe ha Ai nile pa niwele fitong; ung-ang, Niwe fitong niwelite e etu pa nira mepuna Ai rerele.'' ²⁹ Teangku-teangku-Keke tenite, ''E, ung-angwe Me pi mepe peng-pengfa pa ana piti jano ong lopa mepe mewe pemeka. ³⁰ Ung-angwe, neweru jalele pafu jaing Me pefata pa peana baungra Mewe tejeng-jengka. neweru Mewe mema Ai mepe.'' ³¹ Yesus lengte tew, ''Pung motu ung-ang elakole. ³² Ekalengfu! Bang petetetu, ana peing pewe pete ewe kehe- kekele, ewo-wo emuna jeng pengri ewo-woe pa niwe ekeliti Ni wofa. Pea anara, Niwe niwofaka Ai ana kelupa ³³ Lelepawe pewe Ni lengfata ewe ung kotu Niwe, ewe pepe efeng pepe ewe-wele. Ftong pewe, ewe jano lelepa tetupa te e, peanya pung epanene neteko nafeng-feng. Fitongwe penihala koka.''