¹ Yesus kelengte, ''Niwe anggur tuho keing etafa pa Ai-Nine ke jano leile. ² Peanya nepepe motu-Niwe peing natuka, pe-Ejangtete pa neing penatu, E tupi huhufa, ung pena nawo tutu tu. ³ Ewe kelole fata wa hoho Keleng kotu newe. ⁴ Ememe Niwofa pa Niwe meme ewe. Peanara ne pena tutuka wane pewope, peanya peana nawang kotutuho pepe, anaing-angra ewe natuka, ana ewe emele Ni. ⁵ Niwe anggur tuho pa ewe ne-ne pepe. Meba tuho memepe Miwe, pa Niwe mele ke, ke na nawo lele kewe keheke ka-Niwe, ewe jale ungra elele kafata kafata. ⁶ Ana mebaung Niwe memeka, me tekeriti ana nenya pa eko upe; pa teba meteteko pa teropate rapa i, pa rae. ⁷ Ana ewe emele Niwofa, pa piti-Nine mptu ewe, jaha fafa ewe pungtu, pa peing niweleng-leng ewe. ⁸ Ai-Nine jawepa ke ekena hoeti, peanya ana ewe na nawo tutu pa petuna ing-ang, ewe ing eangku-eangku-Nine.'' Yesus Piti kewelihete Epane Noja netete ⁹ Anara Aike Niwe noja kele, peanara Ni ewe noja nile; eme tameme efeng-Nine. ¹⁰ Ana ewe piti-Nine ewe latepa ewe meme efeng-Nine, peing anara Niwe piti Aike nilatepa nimele-Ke. ¹¹ Ja-ja weing Ni lengte kotu ewe ung efeng-Nine hete momo ewe, peanara efeng e ewe pe ekopi. ¹² Piti-Nine kawe; Ewe ewowo noja ele, pea anara Niwe ewe noja nile. ¹³ Jaungra efeng bapalewo weraka peana kebaung efeng keke lengtung kekelengti bato-batokeke. ¹⁴ Ewe anara bato- bato-Nine ana ewe jano ele ja-Ni lengkotu ewe. ¹⁵ Ni ewera bapo nileng-lengkale bapo jaing keluka jaing keba rube keke janole. Pea anara, Niwe ewe nileng-leng bato jalelepa Nilu wa Ai, peing ewera Ni leng. ¹⁶ Ewe Ni wera ekeka eweing Niwe ewe nile pa ewe eme tameme ung ewe ere pa eleko tehehe to, pa to memeing mo tamomo peing anara jahafa ewa te Ai ifu bati Ninepa, Ke jaing keweleng-leng ewe. ¹⁷ Kewe piti-Nine; Ewe noja ele.'' (Yesus Kelengewfa Tebafa Teangku-Keke) ¹⁸ ''Ana fitong ewe penawi, ewe lulu peing fitong Niwe penawi pefaka Nira ewe ninahi. ¹⁹ Pea ewe ele eha fitongle, peanya fitong jano petu ja pepe; peanya anara eweha fitong weka, anaing-angra Ni ewe nile eha fitongle, jaing-ang petuko fitong ewe penawi. ²⁰ E eng takoko piti Nilengte kotu ewe; Kebapo ung keeti bapaleka keka wa keba rube keke'. Ana tewe Ni tekatupa jano lelepa tete e, tewera ewe tetupa jano lelepa tete e. Ana tewe hoho-Nine telatepa tewera piti e ewe telate papatu. ²¹ Pea anara, lelepa ing pera tewe tete ewe, petehe bati-Nine. Pea, tewe Ke tefijangka Niwe kea nikekelengte. ²² Ana Niwe leka pa piti nawo nilamotu ing te tewe, tewe nelengwe tewe tewewe kate. Pea anara ung-ang, tewe tewepuko neleng tewewe kate. ²³ Meba tuho me Ke menami, mera Ai-Keke menami. ²⁴ Peana Ni jaing nileka petehe tewe jano-jano ing teba hing jano ing terekana, tewe neleng ing tewe wekana. Pea anara ung-ang, tewe jaing tefo Niwe tenaji pa Ai- Ninera. ²⁵ Pea hoho ing pepotukotu ropo Taurat tewera tehete papa, 'Tewe Ni tenaji pi hope raka. ²⁶ Anara Keba ing kete, kea Ni kelengti ewe kete keka Ai, keing Pung Bamuang keka Ai kete, Kea janile motu kea wena lung-lungle. ²⁷ Pa ewera ehememe-Ni epa nelupa watofu.''