¹ ''Pung e ewe ulepa eleleka; pung e emomo Allah, pung e era momo Ni. ² Paa Ai Nine jeng nawo motu; ana peing tuka, Ni ewe nilengtofa te ewe peanya ana nire jeng ung nitupiko ewera. ³ Pa, ana Niwe nire jeng e era nitu piko ewera, Nira pule pa ewera niamerere-Ni ung kene Niwe mele keing-ang era mele. ⁴ Pa, eweka lena lengma jeng Ni rere.'' ⁵ Pea, Tomas lengte-Ke,''Tata, newe ruka Me mana nenepe, tuna neung neweruru?" ⁶ Yesus lengte te tewe, ''Niwe lengma pa bamuang pa batoto. Mebaung raka memana Ai, Ana Niwe mepeke ung. ⁷ Ana ewe Ni efulang, ewera Ai-Nine ke efulang; ung-ang wea, ewe Ai pa Niwe efu.'' ⁸ Filipus kelengte- Ke, ''Tata, Ai ingka menapung newe, pa peing kaing pekoko nefa.'' ⁹ Yesus lengte ke, ''Filipus, wakpte jotafa Niwe epa nelupa-lupa ewe, pa ewe Ni efulangkafa. Baing ba Niwe mefu, me Ai kera mefu, tunaneung ewe leng, 'Ai Nikenalung-lung ewe.' ¹⁰ Ewe jatukotu pung e ewe moka Niwe mele Ai pa Ai mele Ni? Piti-piti ung-ang Ni lamotu ewe, Niwe niwo ne nine Nilengka, anara Ai kemule Niwe pea Nia janoing Nile ele. ¹¹ Pung momo Nifa, pea Niwe mule AI pa Ai mule Ni; peana pungwe pemomo jano-jano ing pewo. ¹² Pea bamuangnya, Ni leng-leng ewe, eba tuho pung e ewe motu- Ni, jano-jano ing Ni jano nile, pe meara jano mepe; pa jano-jano bapale tafa wa nawo wea anara Niwere Ai. ¹³ Ja paha ewa bati-Ninepa, peing Ni jano nilele ung Ai ekena hoeti keheti mule Oke. ¹⁴ Pea ewe jaha epa newa-Ni tehe bati-Nine, Niwe pejano nilele le Ku kelute hekotu Feng To/ Pung To ¹⁵ Ana Niwe no ele, ewe piti nawo Ni lamotu pewe elapa ¹⁶ Niwako ete Ai, pa Ke jaung keweleng- leng epane Keba hing-ung, ung Ke lakoko epane netena ing-ang nenete, ¹⁷ Peana Feng/Pung bamuang, keing anara fitongpe keongke, peanya fitong Ke pefoka pa Ke pefuwangka Ke panelupa pa ke mumu epanewe. ¹⁸ Niwe ewe nilufafa kale ana eba wawa; Ni lele ewe. ¹⁹ Jokaung, fitongwe Ni pefofo katu, anara ewe Niwe efufule; peanya Nimule, ewera mumule. ²⁰ Wabang ing, ewe lulule Niwe mule Ai-Nine, pa ew mule Ninwe, pa Ni mule ewe. ²¹ Mebaing piti-Keke mepeta pa jano mepe, me Ke nomepe; pa ba me Ke nomepe mera Ai menokele. pa Niwera me nonile pa ne-Nine niwe ete nalung-lung me.'' ²² Yudas, keing Iskariotka, kelengte-Ke, ''Tata, tunane Mewe ana ne-Meme menapung newe pa fitongwe peka.'' ²³ Yesus lengte pa pikele teke, ''Ana kebaung Niwe nokele, keana piti-Ninewe kewe; pa Ai-Nine ke nokele, pa newe po netete ke pa kepane lupa tenete. ²⁴ Pea anara, keba ke Ni kenokeleka, piti-Nine kelaka. Pa, piti ewelu ing pewa-Nika, peing pewa Ai kea Niwe kekelengte. ²⁵ Jawe lelepafu Ni leng ewe po epa nelupa. ²⁶ Pea anara, Bato ing, keing Feng/ Pung To kea Ai kelengte bati-Ninepa, Kea ana ja lelepa kenalung ne pa newe akele fata tewa jalelepa Ke lengmo epanewe. ²⁷ Pepe efengtafa Ni wei e ewe, pepe tafa-Nine Niweleng ewe, peanara fitong pewenuka ana Niwelengte ewe. Pung e ewe ulepa eleleka wa ne teteka. ²⁸ Ewe le elate pea Ni leng ewe, Niwe rerele, pa Nira lele le ewe.' Ana Niwe no ele, ewe ewena kakale Ni rere Ai, Ai keba bapale Ni kohele. ²⁹ Niwe ewe nileng elu ung-ang jaing pelewang kapa ung jaing telewang, ewe pungtu. ³⁰ Niwe pi nawo nilelekale ana-me anara teba fitong we teteete. Ke niwera jatale pung kole-Ni kekoka. ³¹ Pea anara, fitong peru Niwe nonile Ai, Ni janile ana Ai kelengkotu-Ni Ehaleng, ele newe nenafua.''