1 Poing Bang Tete Paskah tetekapa, Yesus kelu bang-Keke pete watu Ke fitongwe kewelina Ai tete, anara ja-Kekewo nokele fitongwe, Ke janokele tewe wakote bangpe. 2 Rapang temepa jajong tetang e, kebate ketihe pung Yudas Iskariot, Simon oke, ko Yesus kenakikile. 3 Yesus, anara kelu ana Ai kelelepafu kelelengte motu no-Keke, pa Ke tewe keka Ai te pa kera mepuna Ai keke titile, 4 Ke kekalung keru rapang jajong tetang e pa jubah-Keku, kera ro linen kewe pa akele ongpu-Keke. 5 Kaimpa, Ke pakeli apolo / baskom pa tang e teangku-teangku-Keke ketapo kera tang e tete kejoko upela ro akeleko ko ongpu-Keke. 6 Pea, Ke kakoti Simon Petrus pa ke lengte te Yesus, ''Tata, Me tang e nine metapo?" 7 Yesus lengte pa pikeleke, ''Ja Ni janole, ewe hu ewete paka ung-angwe, anara tetetu ewe hu ewete papatu.'' 8 Petrus lengte, ''Mewe ana tang e ninewe metapopo kape!" Yesus lengte, ''Ana Niwe me nitapoka, me jariungra Niwe mepepe kape.'' 9 Simon Petrus lengte te-Kewe, ''Petu nawe Tata, tang e nine fafaka, pewala no pa rube nine.'' 10 Yesus lengteke, ''Meba ing pamehe peing tang e memefa melope, anara melope kotu netupa. Me ing to, anara ewe nawo ewe toka.'' 11 Yesus kelu meing bame Ke menamimipe, peanya tehe ing Ke leng, ''Ewe nawo ewe toka.'' 12 Poing, peanya Yesus teangku-teangku-Keke ketapoleng, jubah-Keke kewefa pa kera mena jeng-Ke keti, Ke lengte tewe, Jaweja ewe hu e engte pana ja Nile ewe? 13 Ewe eleng Ni Koru pa nira Tata. Keing hetepa peanya Ni ea Koru pa Tata. 14 Ana Niwe, Tata pa Koru e e, ewera ewowo tang e e etapopo 15 Ana, Niwe jaung jari nati niweleng ewe ung era jaelele anara Ni janile ewe. 16 Ana bamuangnya, Ni lengte ewe, kebaung bapo ke bapale raka keka keba rube keke, anaing-angra keba kekelengti kera bapale raka keka kebake kekelengti. 17 Ana ewe lelepafu eluleng, ewe no kewefe ana pewe ewe jano ele. 18 Niwe piti-piti ewe bapatupa. Ni welu eba-bafa ew nilele le, anara pitiwe penukotu pehete papa, 'Ba hang ong Nine mema lang ito meme mebe eti Ni.' 19 Ni ung-angwe nilengtete ewe jaing ung-angfa lewang kapa, ewe pung e e momo Niwe Kea. 20 Peana bamuang pepe, Niwe lengtete ewe, mebatuho meing keba Ni kelengti mebe Niwera mebe; pa meba Niwe mebe, Ke wera mebe Kea Ni kekelengte.'' (Yesus Lengte Ba Kewe kenakikile) 21 Peanya Yesus lengte tunawea, Ke Pung ifu ulepa kele pa pikelei, Bamuangwo-bamuangwo Nileng-leng ewe, kebaung keka ewe Niwe kenaki.'' 22 Teangku-teangku tewowo tekareng keung te keung pa tealo tewe ba Ke pileile. 23 Teangku-Keke tetajungme kebaung kepengti tangrue Yesus. Kea teangku Yesus pungle wo. 24 Kaimpa, Simon Petrus noha kelete ko kekengte Yesus tehe ba Me huengkotu. 25 Pea, keangku lepengti nalangko tangrue Yesus ing ke kengte-Ke, ''Tata, keba keba ing.'' 26 Yesus lengte, ''Keba ing kea hang ongri Ni po Ni welengke.'' Pea hang-ongri ing Nipo, Yesus welengte Yudas, Simon Iskarot oke. 27 Pa, peanya Yudas hangri ing kewe, Batefa kekengti nei. Petehe ing, Yesus lengte kewe,''Ja me pepe pe, mepena tofate.'' 28 Kebaung keka tewe ja tetang e ing tehu tewete paka jatuko Yesus lengna ina-angte Yudas. 29 Teba narang-rang ung Tehieng Yudas kea taimbe ruto kekeko peanya Yesus lengteke, Jata elele le ja-ja epane ja netete bang wea,'' pea ung ke leleng-leng teba japaka. 30 Pea, anara hang-ongri pekewe, Yudas kekana pengti po ing-angra pa po ing pite lopang. (Yesus Pikele tehe Kewawale) 31 Peanya Yudas keka, Yesus lengte, ''Ung-ang tehe Keba Ko kekena hoeti pa Allah ekena hoeti pewa Kea. 32 Ana Allah nekena hoeti ifu petehe Kea, Allah kera kewe kekena hoeti wanei-Keke pa kewera nekena hoeti nekokofa. 33 Eangku-eangku-Nine Niwe epanelupa netene ne jokaung. Ewe Ni ejujule, pa peing anara poing Ni lengkote teba-teba Yahudi, ung-angwe Ni lengtete ewera, Ni hanane rere ewe elele ra kawo.' 34 Piti nati aling Ni weleng-leng ewe, peana ung ewowo janole, anara Niwe ewe no nile, anaing-angra ewe ewowo jano ele. 35 Peana wea, teba nawo teri ewe ing eangku-eangku-Nine, peanya ewowo no ele.'' (Yesus Piti kelate kotu Petrus) 36 Simon Petrus kekengte Yesus, ''Tata, Mewe memana nenepe?'' Yesus lengte kea, ''Niwe hana nenele, ewe baungra ung-ang mepapa kape, wakotu ewe elala Ni.'' 37 Petrus kengte te-Ke, ''Tata, tunane ung niwe Me nilalaka ung-angwe? Niwera lengtung nine nikelengti kelala Me!'' 38 Yesus lengte, ''Mewe lengtung meme mebepengte-Ni. Ana bamuangwo Ni lengtete me, ojing na kelele kapa memwe Ni mealopopo la hengtong.''