¹ Bang napanghing Bang Paskah tete kapa, Yesus keti Betania, jeng Kazarus lei, Ke keleko kele fute keka neba wung nete. ² Kefu, tejajong tetupiko rapang ung Yesus kang-kangle; pa Marta pejapetue, peapa Lazarus kera keba aling kerala Yesus telupa tetajungme meja. ³ Kaimpa, Mariaminyak kati jong pewe minyak narwastu atafa aha taimbepa etehowo, pea peweko pejo tang e Yesuske pa ta pepepa pejoko upe. Pea paa ing nupa minyak wangi kewe tupa. ⁴ Pea, Yudas Iskariot, kera kebaung teangku-Keke, kea Ke kenaki, kelengte, ⁵ ''Jatuko minyak ing mame jata mepeka aha taimbe tiga ratus dinar pa memame mepepeng teba-teba japaka?'' ⁶ Ke lengna ing-angte pe ana pungko teba japaka, peana ke ing keba jataleile, pa ke taimbe ruto kekaka ile, ke taimbe keleko kelehei ruto i. ⁷ Pea, Yesus lengte, ''Peume ing jaung eleleka pe japetuko ana bang fulu-Nine. ⁸ Ana, teba japaka teing mepa elupa, peanya Niwe epa nelupaka.'' (Tebafa Imam Rube Pungtu Lazarus Tejajate) ⁹ Anara teba Yahudi tebafa bapale teri Yesus keleile Betania, tewe tete te kefua, Yesus kefaka, anaing-angra tepungtu Lazarus tefifite Ke keleko kelefute keka neba wung nete. ¹⁰ Pea, imam-imam rube pitewa ko Lazarus tejajate. ¹¹ Peanya Lazarus, teba Yahudi nawote terejangte pa tepungtu tela Yesus. (Yesus Kengti Kota Yerusalem Anara Bari) ¹² Febang pepenya, teba nawo tetepa lue jeng pesta ing, peanya tewe letelate Yesus keratiti Yerusalem, ¹³ tewe riha-riha palem tere pa tetepeng ko Ke tekekete pa tewapate-wapate, ''Hosana. Kewe mamepe ketewe Tata batike, Bari Israel.'' Mazmur 118;25.26 ¹⁴ Anara tewe jakoung keledai tong, Yesus keetime honya, anara po tukotu: ¹⁵ ''Mefufuka, he ang u Sion. Mekapeng Bari meme ketetele, keeti mele jako keledai tong.'' Zakharia 9;9 ¹⁶ Lopananya, teangku-teangku-Keke tewe hu tewete paka ja ing, peana Yesus keke etiho, keimpa tewe hu tewetepa lele paing pepotumo tewe Kea, pa tewe lelepaing jano terekote Kea. (Teba Nawo Pitete e te e Yesus) ¹⁷ Pea, teba-teba kepa telupa poing Ke kelengko Lazarus kekengte keka fulu pa kelefute keka neba wung nete teheme jatefo. ¹⁸ Petehe ing, teba nawo Yesus teke peapa tewe teri Kewe jano lopa kelepa tefoe. ¹⁹ Poing, teba-teba Farisi pi tete e keung lete tekaung, ''Ewe ja efo, jaung epane pinewa nete tehete kengwawa katu. Ekalengte, fitong tupa tela Ke.'' (Yesus Pikele tehe Ke memele pa Kewawale) ²⁰ Wakote po ing, teba-teba Yunani terate teba faung tetela lupompong bang ing. ²¹ Tewe tetefi Filipus, keweka Betsaida Galilea, pa tewe niteke, ''Meba rube, newe pungtu Yesus nefifite.'' ²² Filipus keti pa keleng wefa Andreas; pea Andreas pa Filipus tete pa teni Yesus ²³ Yesus lengte tewe, ''Bang pepe wakotu Keba Ko tekena hoeti. ²⁴ Kewe bamuangwo, Ni lengtete ewe, peana gandum to koheti hangto pa kewawale, to ing ke alingfa; anara to ing kewa, ke na nawo lele le. ²⁵ Keba lengtung keke kekawale, pea lengtung keke lengtitile, anara keba lengtung keke kekawaleka fitong wea, pea me kekawale ko memu batoto memepe. ²⁶ Ana mebaung jano Keke mepe, me mepakoko Ke; kene Kewe mule, keing-ang teba janore ete-Ni tera mete; ana kebaung jano leile Ni, Ai mera keng kepapale.'' (Yesus Pikele petehe Kewawale) ²⁷ ''Ung-angwe, lengtung Nine ulepa kele. Jara Ni lenglengle? 'Ai, Niwe totang mepe wa ung-angwe?' Pea anara, ko mepengkonya kawe Ni wele ung-angwe. ²⁸ Ai, bati-Meme mepena hoete!" pea, le ela pina wa surga, ''Niwe bati-Nine niwena hoete pa Niwe fangfangra niwena hoete.'' ²⁹ Teba nawo tere keing-ang pa tewe teri tenie keing petang puile, peanya tekaung tenie, ''Peba fangpa pea pi petue-Ke.'' ³⁰ Yesus lengte pa pikele, ''Pina ing elu petu-Ni faka, petu epa nera newe tupa. ³¹ Ung-angwe ari kelokiki fitong wea, ung-angwe kebafeng mule fitong keka jujule. ³² Pa, fitongwe Ni ekena hoeti, Ni ewe nihalo fata eba nalungpa elele-Ni.'' ³³ Yesus lengte jawe kenalung ana kewawale anara ja Ke wawale. ³⁴ Teba nawo ing tenipate Ke, ''Neweru wa hukum Taurat pea Kristus kelena ing-ang lele le; tunane ana Me pengkotu, Keba Ko ing tekena hoeti titile? Keba Keba Ko ing?'' ³⁵ Yesus lengte tewe, ''Ele e jokaung fefe ing te kepa elupa. Leng ehae fefe ing lakole ung lopang ke ewe kewe tupapaka; pea meba ana leng memape ifu lopang memana nenepe mepuka. ³⁶ Po fefe ing eke, pung e e koko fefe ing ung ewe eangku-eangku Fefe.'' Peanya kelengna ing- angte, Yesus keti pa ne keweleng tea. (Teba Yahudi Narang-rang ung Yesuste Pungtuka) ³⁷ Peapa Yesus kewe jano lopanawo kelei ho tete, teke pung tuka, ³⁸ Ung wakote petehe piti Nabi Yesaya leng i, ''Tata, baing ba keka pungtupiti newena nanete. Pa, mepekote ba no Tatake kewe nalung-lungle.'' Yesaya 53;1 ³⁹ Kaing peanya, tewe tera pungtete Yesaya kera teweka pi kelei, ⁴⁰ ''Ke luto tete kelekofo pa pung keleko nafeng tafa, ung tew ja lutopa tefofoka pa tewe rimotu hemotu pungtete pea tera pute Niwe nileko tewe hae.'' Yesaya 6;10 ⁴¹ Yesaya keleng i lelepawe ke kalengte kefo Yesus tekena hoe pa pi kelei tewe e Kea. ⁴² Pete anaing-ang,tewe nawo tefaung teba rube tera pung temo Yesus, pea anara tefemo teba-teba Farisi tew piho teteka terafe terepe na sinagoge. ⁴³ Pea, tewe pungtu tewewe jaefeng wa teba ana wa Allah tepung eka. (Ja Yesus Kenalung Peing Neba Pikelulule) ⁴⁴ Kaimpa,Yesus kewapate, pi-Kele, ''Epa neba tuho nepung nene motu-Ke, nepung-Ke moka, peana ing-angra Kewe Ni kelengtu. ⁴⁵ Pa, epa neba tuho Kewe nefu, Ke wera nefu Kea Niwe kekelengte. ⁴⁶ Niwe nile anara Fefete fitong we, ung eba tuho pung motu Ni ewe lopangfu emeka ⁴⁷ Pea ana mebaung piti-Nine mepu, anara mepaka, Ni mera piri meme nilulukale; ana Ni lewe ko fitong pipe nilulukale, anaing-angra fitong efengpe nile. ⁴⁸ Meba ing Niwe mebepiti pa piti-Nine mepeka, pea hoho Nile e pea pute pipe peruru bangpe. ⁴⁹ Peanya Niwe pi Nile nenineka, peing ana Ai kea Niwe kekelengte pi keweleng Ni janya Ni pi lele le. ⁵⁰ Pa, Ni welu pi-Keke peing neme batoto. Ana ing, ja Ni lengkotu, Nira lengkotu ana Ai kelengkotu-Ni.''