Pasal 9
Saulus Meputo
1
Paloi Saulus hupapu kekei raemo teba kejijile pa Tata hahakei kejiko tebibite. Keti tebarube,
2
pa rupu-ma kewakeko kati kelele teba Yahudi janore-ete Tatapake te-ete Damsyik, ura, ana kebaleu na peumeu kefi telakete Tata Lomake, tekelolopa kekatiti Yerusalem-le.
3
Loi ketiti Damsyik-le, kekakoti nove watupa, wotuto fefe kapetaheto pakuke.
4
Kekoheti hatu pa lokelate pinau loteke: "Saulus, Saulus, jatuko Ni-mebabape?
5
Saulus ote: "Meiba, Tata? Ke-lote: "Niwe Yesus ka mebabapei.
6
Pa memalo pa mekememe nove, kefu Ni-lolo mele, jamepepepe."
7
Tebafa lakepa tejae loi teotape, bamua pinai teri, pa baura tefika.
8
Saulus kalo pa keru, pa jaurakefuka; kei keteke noketuketete Damsyik.
9
Baheto jara kefuka, pa bahetora jajo kekaka.
10
Damsyik-i Tata okeu leile batikeke Ananias. Tata Pinake toke ana jakefoi: "Ananias!" Keo: Kewe nia, Tata!"
11
Tata Pinake: "Mepo, mememe lumai bati Luma Tololo, pa mejuju yudas pakei kebau batikeke Saulus. Uawe lupopo jakeleile,
12
pa epa kelei jakefui, kei kebau Ananias keketo pa nokewefe-ke, u-kekalele."
13
Ananias lote: "Tata, tebapa laute kebai nilo, jafefe nawo kelemo teba-tu Meme te-ete Yerusalem.
14
Pa ketowei ma-tete kewe tebarube ko keto teba bati-Meme tenietei kelolole."
15
Pa Tata pinake te-ke: "Meme, Kei kebawei ja-Nia-noluko bati-Nine kewekaka tebapapa pa teba tafa pa teba Israel.
16
Niwo nalulukele, jafefe nawo kelolole kei bati-Nine."
17
Kaipa Ananias ti-i pa keketi pa-i. Nokewefe Saulus, pa kelo: "Saulus, jone, Tata Oke, kea nokenalu lo-mepoi, keloko nilo-me, u-jalau mefufu pa Tata Letuke heto pupu-me.
18
Pa rakuifa japuko lutoi lepa, kaipa jakefu. Kekalo pa pa-tenikehe.
Saulus Lei Johake Ho
19
Pa jakekelopa, nave-keketo. Saulus ba-nararau kelei hahake Damsyik fua.
20
Rakuifa Yesus batike kenalui lupopo-pa, pa keloi Yesus-i Tata Oke.
21
Tabapa jai teriko nokoteja pa teni: "Kebaia Yerusalem fu teba Yesus batiketeni-i kejijile? Pa ketowei hupala kekei teba kelolo pa kekatiti teba huhu hote-te?"
22
Kaioa Saulus teba nawo pu-keloi pa teba Yahudi te-e Damsyik-i keleko telofapa teme, kei bamua kenalu, Yesus-i Mesias.
23
Ba-nararaupa teba Yahudi pitewako Saulus tejati kewawale.
24
Pitehe-ei Saulus-lo. Fepapapa teba Yahudi tilo tafa mo-novei tewerapefata, u-ketejati kewawa.
25
Bamuai noia rapa bau teba hola keke teke pa tekefa-napa tekerapu nove la-heti.
26
Kekakotiju Yerusalem pa nokekati lala hahake, pa tebafai ke-teve, kei ke-ketejika, keira hahakefaia.
27
Pa Barabas ke-keke pa kekati hahake pa huhu kele-te, none Saulus Tata kefu lo-hou pakei Tata tenake pite-e pa none navepa Yesus batike kenalui Damsyik.
28
Pa Saulus kopate te-e Yerusalem, pa nevepa Tatabatike jakenalui.
29
Kera pilei pa teba Yahudi pila Yunani kopatepe-e, pa te-ena ketejati kewawale.
30
Kaipa johake bapake fai jai teripa, keteketute Kaisarea pa keipa tefu keti Tarsus.
31
Banararaupa bapake te-e Yudea, Galilea pa Samaria hupala hevepa tete-e. Bapakei teweju pa Tata tefe-epa tete-e. Tebanawo topalae nave pa hupala heve wa Tata Letuke.
Petrus Eneas Eleko Nohae Pa Dorkas Keleko Pelefuto
32
Pui Petrus kepakoi, kepako-palei jetai. Lo-kekai-i keku teba-tu te-e Lidia.
33
Kei kebau batikeke Erneas kefi, tae-vepa kei jekeluwei felaro hapa.
34
Petrus lotek-ke: "Erneas, Yesus Kristus me-keleko nohae; malo pa jemeluwemei metupi!" Rakuifa kekalo.
35
Teba te-e Lida pa Saron ke-tefi, kaipa temepute Tata.
36
Bau, Yope-i, hahake peumeu batipepe Tabita, lau teniate Dorkas. Jano hevefa petue pa nojapenue.
37
Pa pui penoeko pepa. Pa patenipa, eha pepei tewefe-e jato-ho.
38
Lidia pa Yopei watupa. Pu hahake teri, kei Petrus leile Lidia, teniko teba hitu-u te-ke pa teni: "Mekokofa popo je-netenetewea."
39
.kaipa Petrus jaketupipa telupa-ja. Tejakote kefu, ke-teketute jato-ho pa teba roro jaloto ke-tu pa no terue ropuho pa ro, pu petupapa pewie.
40
Pa Petrus loko temefatakete, labi kewapa lupopo jakele. Kaipa keputi ehakoi pa kelote: "Tabita, me-malo.!" Kaipa Tabita luto peje pa pu Petrus pefu, pewalo moho.
41
Petrus nokelute no-pepe kewepa pa keenako pewalo. Kaipa kelote teb-tu pa teba roro, pe kenalu-te, kei peumei pelefuto.
42
Jalewai wapawu Yope tupa pa teba nawo Tata keteji.
43
kaipa Petrus banararau kelei Yope, kelei kebau batikeke Simon pake, keba jako-ro janokeloi.