¹ . Kaisareai kebau batikeke Kornelius, keba rube tete taba Italia. ² Ke-keba-tu, kepa paikeke Tata tefe-e pa jnopa nawo kelei tebapa Yahudi pa lupopo jatete-e Tata. ³ Raku heto ralepa, jau-kefui, janapakefo Tata bapohake keti-pakeke pa kelo-ke: "Kornelius.!" ⁴ Kekale Tatabapoke kefu pa kelo: "Jau, Tata.? Tatabapokei lote: "Lupopo meme lelepa pa janopa mepeme wako teju Tata-ho pa Tata me-Keo. ⁵ Pa uawe, mepoko teba nararau jatatete Yope kei kebau tekeketutoto kebai bati keke Simon pa Petrus-ra Tenie. ⁶ Kelakule keba jako-ro janoloile bati keke Simon, tete-ete bape." ⁷ Pu Tatabapokei pilei-i ke-kelufati, teba pohake hitu-u keloko teto pa tabateu keba-tu kei teba kopatelupa te-e. ⁸ Jalelepa keloko teri, keloko tete Yope. ⁹ Fepa teba heto jakote lo-hou Yope watue,kei raku hapa-ra, Petrus eti pa-ho lupopo jakelelele. ¹⁰ . Ke-huki pa jakekakale, pa jajo tetupie, letu kekei Tata ma-ke hetopu. ¹¹ . Kekalete peta-je pa jau anara ro-kateu weko lako nopo, tekeheto hato. ¹² Toi jako apata nopo nolelepa heke, jahuropa tejie pa ta. ¹³ Lokelate pinau nunawea: "Malo, he Petrus, jai mepapa mama.!" ¹⁴ Pa Petrus lote: "Nione, Tata, nione, kei jafefe pa nole nikaraka. ¹⁵ Lahitu pinai laurato nunawea: "Ja Tata-lo heve, ve-mepopoka." ¹⁶ jawe lewako laheto tafa pa jai lewalopa ke-eti peta. ¹⁷ Petrus hupala keke howe-e, japaha janifoei. kei teba Korneius lokoi tejakoto tilo-tu pa Simon pa-ke tejue. ¹⁸ Kebau teniko keto pa tehowe, kewe Simon tenie Petrus-i keleile pawea na. ¹⁹ Pu Petrus jakefoi kehuoi, Tata baleke kelo: "Tebahetou mea-tejuate. ²⁰ Malo, merapuhemeko mepapa tepa ehae, mefufukakei Nia-loko teto." ²¹ kaipa Petrus rapohitiko pa kehowe-te: "Nia ejuele; elo jalelele.?" ²² Teete-ke: "Kornelius, keba taba rube hupala heve pa Tata kefuile, pa teba Yahudi tupa ke-tefija keba heve, jau kewe Tata wa bapuhake tu, u-keloko mememe pakeke pa lomepame ja-mepopope." ²³ Keloko tekete rapa baali te-eia. Fepa kekalo pa kelapa kopatelupa-ja, pa teba nararau ja-Yope-to tera-la. ²⁴ Pa bauipa jakote Kaisarea. Kornelius te-kekoi pa johake pa teba holake kera keloko tetelu. ²⁵ Pu Petrus keti, Kornelius to-ke-keke, pa kepahiti labipa tabejakele taekeke-ho, Petrus tabejakele. ²⁶ Petrus ke-keke-eti, kelo: "Malo, niwera niba anara-me." ²⁷ Pa pi-tekete-e, ke-keti kekalete teba nawo lumeia. ²⁸ Kelote Te: "E-lona, pinavewo tete-ete neba Yahudi teba Yahudi-ka honelilika na nekenene pa-tete. Pa Tata ni-kenalu, ni-teba ninahihika na teba-fe niloloka. ²⁹ Peanya ni-oneka pu ni-elo, pa niara-lo. Uawe ni-lolole, jatuko ni-eloko nilo." ³⁰ Korneliuslote: "Ba-nopo-te pu raku anawea, kei rale raku heto, lupopoja nile-e-pa. Ni-lehoto bau keru ni-ho, ro-keke ana ra-ehae ³¹ pa kelote: Kornelius, lupopo jamepemei Tata-lu pa janopa mepemei Ke-okotu ho-Keke. ³² Ni-loko teba te-Yope Simon-i Perua-ra teniate ekekalolo; keleile Simoon pa-ke, keba jako-rojanoloile, kemole ba-pe. ³³ Peanya teba ni-loko tete-me, pa hupala hevepa mepo. Uawe nenafato motewea Tata-ho nerurute ja-Tata lokoto-me." ³⁴ Kaipa Petrus pi-kewekaka, kelote: "Bamuwo ni-lo, Tata teba kekika. ³⁵ Teba palelepa teba-panete Tata kefuile pa jaheve keleile, Tata kepule. ³⁶ Pife Kekeia keloke erelolo teba Israel, kei pifekeke hupalaheve nukoto Tata Oke, kei Tata tebapate. ³⁷ elo jalelepa lewae Yudea hatu tupa, wa Galilea, kei Yohanes pakele-tehe, ³⁸ kei Tataoke ka Nazaret: Nane Tata Ke-nokewefe Letukeke pa ma-navekeke, Ke, kepakopa jalelepa heve kelei pa teba nawo lake batefa kelepate te-nohae, kei Tata laku Ke. ³⁹ Pa newe jalutopa nevo jalelepa Ke-lei Yudea hatute pa Yerusalem; pa Ke-tejako kewa pa Ke-tekele rari. ⁴⁰ Oke-i ba-hetopa Tata leko kelefuto, pa Tata kepule, kei no-Ke-nalu, ⁴¹ teba-papa-ka, pakei te teba-bapo, Tata tebai kenalu-to, kei to-ne jajo pa pa-Ke-panelupa, kei pu kelefuto. ⁴² Pa ne-Ke-loko pefewe newenwnw tebapapa pa nenaruru, kei Kea Tata lokotu Pinarampapi kewelele teba tupa pa teba bi. ⁴³ Keara bapohake nikotu, ba Ke kekeki, kei nole tetapopo bati Ke-kepa. ⁴⁴ Pu Petrus pitai-kelei, Tataletuke hetopu teba pifei-rie. ⁴⁵ Pa teba keji ja-teba noletetapu lake Petrus, kei tekepe, kei ja-tefu, Letukeke kekelehito pu teba paparai, ⁴⁶ kei lotelate teba letukeke pilake tete-e pa Tata pi-tenie. Kaipa Petrus lo: ⁴⁷ "Epulempa tebawe pa-pa nete tehehe, kei Tata Baleke heto teke. ⁴⁸ Kaipa keloko te-pateni tehe Tata Batike. Pa tewate Petrus, banararau kopa tete-eia.