Pasal 3
Petrus Kebafubale Keleko Lokeka
1
Bau lupopo raku tohehetupa, kei raku heto rale, Petrus tena Yohanes te-ete Tata Pake.
2
Kei kebaleu, make kepetaha-afuapa ke-fubale nya tekejue. Babafa kebai keketupate kefue tilotupu Tata Pake, bati-i Tilo Jutafa, u-tebakepatei jahelo kewai.
3
Pu kebai kekalete, Petrus tena Yohanes ketete Tata Pakete, jahelo kewa.
4
Tenakekare-ke pa Petrus lote: "Mekape ne."
5
Kaipa kebai kekale tenake hupala kekei jau tenakeweninite.
6
Pa Petrus lote: "Emas pa perak ni-moka, pa janinewei, pea niwelele me-pe: Yesus Kristus, keba Nazaret batikepa, lo-memama!"
7
Kaipa nokeluti no-nonalo keke keke pa ke-enako kekalo. Rakuifa tae pa laito keke nave.
8
Kejukalo-ho lokeka titolei pa kela tenakepa tekete Tata Pake, kekapa opalei pa Tata pikeloi.
9
Teba pai ke-tefi lokekapa Tata pikeloi,
10
pa kebai tefija keba mopa jahelo wai Tilotete Tata Pake Jutafa, ko jalewai nokoteja pa keitekepe.
Petrus Pilei Tata Patopuke
11
Keei kebai kelataku Petrus tena Yohanes, kaipa tebapa nokotejai tetelofata tilo-tete tiloi-teniete Salomo Patopuke.
12
Petrus tebapai kefeko kelo: "He eba Israel, jalewai jatuko nokoeha pa jatuko ekale ne-anara neateko kebai lokeka kei ma na neve nenewo.?
13
Abraham Tata-ke, Ishak tena Yakob, Tata jobepakama nene Bapuke Keke-eti, kei Oke keba ekele pa enahi Pilatus hoke, pui Pilatus hupala kekei, Kei kekefufule.
14
Pa Keba bamua pa Tui ehahi, pa epule keba teba kejipate tebiei kele ana janae-e.
15
Anaiara Ke, Keba nekelo neteaiate, ekako kewa, pa Tata leko kelefuto; pa jafai newe jalutopa nefu.
16
Pa Yesus batikepa keneni, pakei Bati-ia navewenu keba efue pa efulai; pa keneni-i nohae pewenu kebawe eho.
17
He johane, nilo jaielei elokanya ele, ahaali ana tebarube e-e.
18
Pa loma noiau Tata Pifekei kelemo bapuha-Kei, kei Mesias Ke-elehetoi jafefekelolo.
19
Peanya taha-aa pa epulolo, ura nole e-e kejuju,
20
ura Tata baheve kekelele, pa Oke kekeleheto, kei walopanafua te-e anara Kristus
21
Kristus kelei petako jalelepa tupipipa, ana Tata pileko wa bapuhake tu putefua.
22
Anaia Musa loko: Tata juhaeia bapukeu kekefufule, anara niwe: Jalelepa keloile keloelala.
23
Pa lewawatu, teba lelepa bapuhakei terika, ba'pa e-ei kefufule.
24
Pa bapuhake lelepa pitetei, wa Samuel, pa kekapa, bai pitete.
25
Ea piti-i pipafe pa Tata jakelokoi wa jobepakama nenei, pu pitikela Abraham: Pipave memefa tebapapa mete fitowe heve tewewete.
26
Pa te-eba lopanawo Bapukewe Kekefu pa Ke-keleheto, U-epa e-epa e-nokekefefe ewowo jafefe elojatetepa epulolo.