¹ Ba-heto ketiju nofei Festus keraka Kaisarea ti Yerusalem. ² Kei tebarube pa teba Yahudi rube tafa tete rukeho pa Paulus tehejae-ke. ³ Hupala heveu tewa-ke, ko Paulus-we tetakikite, kei teniko Paulus toto Yerusalem. Pa te-pitewako ke-tejati kewawa lohoule. ⁴ Pa Festus pinakele, kei Paulus kemomo apa Kaisarea-i pa kewoi kepule keputiti iale. ⁵ Kelo: "Hefe pepei eba ruletoi ela nipa nenefua pa piehehaelewe newe-etete-ke, anara feukotu." ⁶ Festus kelei ba-nahipa na nahipapahitu Yerusalem fua. Keipa kemoti Kaisarea. Fe-pepempa pikelele tebapahote, pa keloko Paulus teketutoto ke-ho. ⁷ Paulus tojuiapa, teba Yahudi faja Yerusalem-toi Paulus we tekowa pa pilelepa rere nawo tehejae-ke pakei janauraka. ⁸ Puto Paulus no-keke kekaki, kelo: "Jataleura janilete feraka, kei te Tata make na teba Yahudi na Tata Pake na te kebarube tete." ⁹ Pa Festus teba Yahudi pute kelolole, pina kele Paulus, kelo: "Me-pule mememe Yerusalem pena, ura me-tehejaetewe pi-netete fua.?" ¹⁰ Pa Paulus lote: "Ni-uawe nirulewea keba teteho pa kewe ni-telafufute. Anara mewo pu-bamua, jatalera teba Jahudi jau nileteferaka. ¹¹ Pa, anara bamua jauniletefe pa jafeu nileko ni-ekati ni-wuwule, ni-wuwule nonitupi, pa, anara jaehehahae ni-i-bamuaka, baura ni-kekele anarapina heve te-te. Ni-erere tebapaho kebatete.!" ¹² Teba pijae kopate pitewapa, Festus pinale: "Me-ema tebapaho kebatete, peanya me-meme kebatete-ho." ¹³ Ba-nararau wepa kebatete Agripa tena Bernike teto Kaisarea lo-tenaketo tabeja tete Festus te. ¹⁴ Kaipa te-banararau tete-eia, Festus Paulus pike kelei keba rubetete, kelo: "Kewe keba-apateu Feliks lufati pu-keka. ¹⁵ Pu nile-e Yerusalem, teba rube pa teba huhu Yahudikebaia tehejae pa tewa ke atepepe. ¹⁶ Te-pinanile, kei teba Roma tenaiaete batehejaei tekeni anara piwahoheto ke-teketutete tebapaho teba ke-tehejae pa loteweni no-keke tuta kelele. ¹⁷ Peanya tela-nipa nelupa-to. Fepa kebai nikare tebapaho pa kebai niloko teketuto. ¹⁸ Pa pu teba ke-tehejaei tepajure, tehejaei baura pileka pa jafefe kelei anara nihuoe. ¹⁹ Pa tewowo hupala hoho te-ke lupopo jatete, pa-te bau batikeke Yesus, kewa, kei Paulus kelo bamua, kewaka. ²⁰ Pa ni-anara rowo pitai nilafunanene, ni-howe mememe Yerusalem pena, u-pi-memewe teteteia. ²³ Fe-pa Agripa tena Bernike noja tetepa to pa tekete je-pitetetetei taba rubepa teba huhu ja-nofeia, Festus pikewelete, Paulus ekalolo-ne-ho. ²⁴ Festus lote: "Ea meba tete pa ebafa lupa lalo kopa nemote. Kebawe e-fu, teba Yahudi tupa ke-tehejae, kei teba mete Yerusalem, patekau metewe. Te-to-ni pa hipa napa tehe-e pa teni, jo fitowe kemomoka. ²⁵ Pa ni-lo, kebawe jau keletefeko ke-ekati kewawale koka pa kei ke-eti keba tete ho, ni-loko ke-teketutete keba tete ho. ²⁶ Pa jaura no-keke japu ni-letete keba tete koka. Peanya ke-ni-kalo ebapa ho kewea, lopana me, meba tete Agripa, u, ke-melafulo, janapepeu niweko japu nilele. ²⁷ Pa ni-huoi lumaraheka keba apawe neketela pihupa tehejae ke-raka."