¹ Kekalefaku teba janore-e Tatapake, Paulus lote: "He johane, wakoto uabawe hupala nine tu pa nile-ele Tata hoke." ² Pa keba tete Ananias loko teba-re Paulus tui Paulus lauke teja. ³ Pikaki-i Paulus lote-ke: "Tata me-tabe kebalelele, he laho u-tututeja.! Memowe ni-ma-mepe Tata ma-kepa kei-pumeme ko-ni tabebampe." ⁴ Teba rei teni: "Keba rube janoloi Tata Pake me-nami.?" ⁵ Paulus pinale: "He johane, ni-loka, kei keba tete. Bamua putukotu: Piti fefe teba rube meme pujajaka.!" ⁶ Pa kei ke-lu, tebafai tekau kete tebapa Saduki pa tekau ketela tebapa Farisi, ke-hiwate Tebahuhu Lupopojate-ete, kelo: "He epanaba letu, niwe niba Farisi; ni ketetute Tebahuhu howei, kei nilu teba-bi-i telefupatoete." ⁷ Pu piti-i kela, teba Farisi tewowo teheke pa teba Saduki pa teba palelepa nawoi. ⁸ Kei teba Saduki teni, tebabi lefupatoetei-o pa teba-fapa na neba-letu raka, pa teba Farisi hituloloi keteji. ⁹ Kaipa tewefi. Teba huhufau ja-teba Farisiteketo pa pinave tete, teni: "Kebawe ja-feura nefika.! Naku letu na Tatabapoke-u pile-ke-na." ¹⁰ Kaipa tewefi tete, ko taba rube kefu, teteko Paulus-we teketupajajate. peanya keloka taba-fau hete-ko pa Paulus teke tebapa hou pa ketuto taba pa-te. ¹¹ Rapa bau Tata toru-tu pa kelote-ke: "Pu-mapepe, pa anane pife Nine menapume Yerusalem, anaira meme napupu Roma."

¹² Fe-pa teba Yahudi telu pa ja-tefa no-tekikite, kei jatetatakate para tejujukate, ko kebai tejati kewawa. ¹³ Tebafa luei teba nawo pepei nopopau pa-ra wamotu. ¹⁴ Tete tebarube pa teba huhu Yahudi pa teni: "No-nene janefa ma-nete, jajo nenanakate pa pa-ra nenunukate, ko Paulus-i nekako kewawale. ¹⁵ Peanya tebatafapa elupare taba rube elolo, u-Paulus-i laura ke-katiti e-ho, anara pihupei ehule tupipapa, pa no-netupiko kei-kekako titkapa ke-nekati kewawale." ¹⁶ Keipa Paulus beke, jake upe, pitete-ei kelu. Keto taba-pate pa loma teweni ke-keti, ketilo Paulus. ¹⁷ Kaipa Paulus tabeteu keloko keto pa kelo: "Kebawe mameme taba rube, jau kelolole." ¹⁸ Tabai ke-kekati taba rube pa kelo: "Paulus keba apai, ni-keloko nire pa kewa, u-kealewe nikarere-me, kei jau kelolo me-le." ¹⁹ Kaipa taba rube keale nokei keke, pa kekekana baralotipa kehowe: "Piha me-pepe nipe.?" ²⁰ Pinakele: "Teba Yahudi pitewako tewa me, ko-fe Paulus mameme tebapa-ho, anara tebapai pina teriri huhufafate-ke. ²¹ Keipa pitete-ete mepupuka, kei tebafai nopopau tejoete lohou ko ke-tejapepete. No-tete ma-tete, kei jatetataka na pa-ra tejujuka, ko ke-tejati kewa; uawe notetupi pa p[ina memefa tejoete." ²² Kaipa taba rubei loko kealei kemo pa pina kele-ke: "Baura huhu mepepeka, pimepeni-i te-huhu mepepeka."

Paulus Tekenite Kaisarea

²³ Keipa taba rube teaku keke hitu keloko teto pa kelo: "Taba teba hitupaheto ko erere Kaisarea teba napahetopau jakopa pa teba hitupaheto pambepa, raku nahipapaali rapa bawea. ²⁴ Jako nararaura etupiko Paulus pa ke-ekaha heveko rere Feliks keba rube." ²⁵ Pa ropu japu kele, napepei nowea: ²⁶ "Wa Kladius Lisias te Feliks keba rube tete. ²⁷ Kebawe teba Yahudi ke-teke pa ke-tejati kewawaleko, tabafapa nilo enihu pa ke-noniafa, kei nilo, keira keba Roma mohote. ²⁸ Jatuko keteke, nikare tebaho. ²⁹ Kei niwe, ke-eteju kei ma-Tata tete, pa jaura kelete-fe, ko ketejati kewawa na ke-ketiti apa. ³⁰ Ni teni, Kei tebafau piteheko ke-tejajate. Peanya niloko tekukufa ketutete-me, pa teba ke-tehejaei nilo, pihupehako ke-ekakalei tewetutete-me." ³¹ Kaipa tabafai Paulus teke anara kebarube tete lok pa rapapa teketute Antipatris. ³² Fepa teba taba me-jakorai pa Paulus tejapoloja, pa tewo temepute Taba pate. ³³ Teteju Kaisarea teba taba me-jakorai rupui tekeni keba rube tete pa Paulus-ra tekeni-ke. ³⁴ Pa rupui kefu, keba rube kehowete Paulus meba manepo. Pa pukelo, Paulus-i ka Kilikia, ³⁵ ke-lo: "Pihupe meme nilafufule, kei teba me-tehejaei jakotoju kewea." Kaipa keloko Paulus tekeketi Herodes pa-ke.