¹ "He johane pa ebahuhu, loelae, janilololewe nonine nokonilelele." ² Pu tebapa lotelate pikelei Ibrani pilate, teme roropame. Ke-lo, ³ "Niwe niba Yahudi, ani-nipetaha-a Tarsus - Kilikia hatute, pa nihue nofewea; Gamaliel ni-jakenalui jobepakama ma-nene, ko-ni janobamua niloe Tata anara e-uabawe. ⁴ Pa niwe teba lake Tata lomake nijiko tebi; tebale pa teume nilopa nilokete apa. ⁵ Jai lewa kei kebarube teba janoreete Tata fateke na tebahuhu janore-ete Tatapake pitetetete. Tea ropu weni Damsyik niwarere jopalala pa nire kei teba lakete Tata lomake nilolole, tete-ete kei pa niarere Yerusalem u-te-ma-tete. ⁶ Pa pu lo-nirereiale, nihakore Damsyik watu, ratetelei, kaipa fefe ka-petaheto kepaku niko lutale. ⁷ Kaipa nikohere hatu pa pa-lonilate pinau kelote-ni: Saulus, Saulus, jauko Ni-menami.? ⁸ Nio: Meiba, Tata.? Ke-lote: Niwe Tata Oke, niha Nazaret, kamenamimei. ⁹ Pa tebafalake-ni-i, fefei tefi, pa pina Keke, nikeloi-i, terika. ¹⁰ Pa nilote: Tata, ja-ni-lelele.? Tata lote-ni: Memalo pa meme Damsyik. Kefu jalelepa janomepopope pia nilolole. ¹¹ Pa fefe hetopu tahako janufukai, kaipa tebafa nelupa nanei no-nine teke pa ni-teketute Damsyik. ¹² Kei kebau batikeke Ananias, Tata ma-kei keba-tu pa teba Yahudi-fa te-etei kei tefija keba hefe. ¹³ Ketoru ni-tu pa kelo: Saulus, jone, loto meje pa jamefufu.! Pa rakuiara janifu pa ji-kale-ke. ¹⁴ Pa kelo: Tata jobepakama nene me-tekeko Tata hupalake me-pupu, ko Ja Bamua mefufu pa pina Keke wa lau keke mepupu. ¹⁵ Pa ja-Tata lei lotopamefu pa lomepame pea huhu mepepe tebapa. ¹⁶ Pa uawe, tunaneko mefumepe.? Me-malo, no-meme mepepe pakehehe pa nole meme kejuju pa Tata batikefa mepomeme. ¹⁷ Pu ni-puna Yerusalem-re pa pu lopopojanile-e Tata Pake, letu nine Tata ma-ke hetopo. ¹⁸ Ke-ni-fu, pa-kelote ni: Mekokofa, Yerusalem pepitete, kei Ni-huhumepemepe teriri kate. ¹⁹ Pinanile: Tata, te-ri, kei nihapa ke-e lupopo-pau nirekeke lupopo-pau pa teba Me-piteniei ni-lokete apa pa te-ni-jie. ²⁰ Pa pu-Stefanus hi-ke, koheto, ni-le-eia pa kenihi jatete-ei pa ro-tete teba ketejai nia-lomo. ²¹ Kipa Tata lote-ni: Me-meme, kei me-Ni-loko mememe habape mememe teba papahi." ²² Tebapa Paulus pilei-i terikotei; pa-pi-ikapa, tehiwae, teninawea: "Kebai fitowe kelei-ika.! Fitowe kelei noka.!" TABA PATE ²³ Tebapai tehiwa polojae pa tu-terue-ho. ²⁴ Peanya Taba rube loko Paulus teketute taba-pa pa keloko pihupe teju pa ke-aripa teje, u-pinakelele jatuko tebapa ke-tehiwae. ²⁵ Ppa pu Paulus ateteko tejajate, kelote tabau ruia: "Niba Rum-ra e-kakale, tebapahora ni-ekareka.? ²⁶ Piti-i keloko tabarui ketilo taba rube, kelo: "Ja-mepepepe.? Kebai keba Rum-te." ²⁷ Kaipa taba rubei-to Paulus pa kelo: "Mepopoho, mewe meba rum-tena.?" Paulus lo: "Bamua." ²⁸ Taba rubei lote: "Ni-kelowe taimbe tete janifu." Paulus pinale: "Pa niwe nibamehote." ²⁹ Kaipa teba ke-tejajatei, tejanafate; pa taba rubei kerafu, kei kelu, paulus-i, kakeloko atetei , keba Rum-te. ³⁰ Keba tabarubei keluta teba Yahudi ja-tehejaete Paulus. Peanya fe-pa keloko Paulus teke apa ketuketo pa kelo, u-tebapijaetepa rube pa tebarubetafa telulu. Pa Paulus kekaka taba pate-ti tebapa faia-ho.