¹ Nemepu rampapi-iapa ne-na pa nenanejuju Kos. Fepa nenakoneju Rodos pa keipa nene Patara. ² Ne Patara tu-u nefi, ketiti Fenesia-le. ne-etuipa, nena. ³ Siprus nefune nupalo, pa nerufa pa nene Siria. Pa nenakoneju Tirus, kei jahemotu-tui netapepe nofeiate. ⁴ Kei nene teakokeke nefe pa netenei ba-napaheto. Tataletuke lopi kele teakokekeko Paulus pitete, u-Yerusalem ketitika. ⁵ Pa pu bapeperufa, lonenai lauponela. Teakokeke pa teumepaako tete neteretujakote nofepefua; pa bapepa labi-nepa pa lupopoja nete. ⁶ Tabeja nete pa ne-e-tu, pa temete pa-tete. ⁷ Nena Tirus pa neneju Ptolemais pa kei lu-nene peai. Tabeja nete jupalala pa ba-ali keponetenei. ⁸ Fepa jei neweritepa nerana pa neneju Kaisarea. Nekene Filipus pa-ke, keba Tata pifeke lei, kei keba teba napaheto nonero Yerusalem, pa netene pa-keke. ⁹ Filipus teumeako keke nopo Tata pinake tete-e. ¹⁰ Banararau netenei, Tatabapuke ka Yudea to batikeke Agabus. ¹¹ Keto-ne, pa Paulus apeko-opu keke. Kaipa nopatae keke akele pa kelo: "Nowea Tata Letuke-lo: Nowea keba opuapeko-ke teba Yahudi te-e Yeruasalem ke-atetete pa tekenitete tebapapa no-ote." ¹² Piti-i neluparu teakokeke te-ewe tewa, u-Paulus Yerusalem ketitika. ¹³ Pa Paulus kelo: "Jatuko fu-ele pa elenaiu hupala nine etakukule.? Niwe no-niwele a-tetetera nifuka, pa niwuwu Yerusalem kei Tata Oke batike." ¹⁴ Kei ke pina nene keluluoke, nenoafa pa neto: "Tata hupalake lewawa.!" ¹⁵ Ba-nararau tete-e Kaisarea, ja-netupi, pa nene Yerusalem. ¹⁶ Teakokeke nararau ja-Kaisrea tela nelupa. Ne-teretute kebau pake kebai batikeke Mason. Keba Siprus-te pa jawa keketi teakokeke. Netenene pake-te. ¹⁷ Pu neju Yerusalem, letune neterela hupala hevepa. ¹⁸ Fepa Paulus kopa nene Yakobus nefu; teba huhura lufata keia. ¹⁹ Paulus tabeja kele-te, pa huhuafa kele Tata jalelepa kelei tebapapa janokoli keke. ²⁰ Pi-i teriko Tata piteni. Pa tenite Paulus: "Jone, mekape, teba Yahudi nawofate keteji pa Tata ma-ke bamuawo tewekotu ²¹ Pa me-teri, teba Yahudi te-ete tebapapa jamenapu ko Musa ma-ke noeafafa, kei mepo, teakotete ero-tejajaka pa leja nene nawo telalaka. ²² Pa uawe tunane.? Teririte, kei mepopemepe wea. ²³ Peanya, janetonetewe pea mepepe: Nebafawe teba nopo-u ja-tefakotu ²⁴ Kopa elupa haha, elupa nole etapopo pa jahelo tetera mejafufu, keiu ta-tete terere; u-tepa riri, pi tehejae mei ofata, kei bamua me-Tata Ma-ke mepekotu. ²⁵ Pa tebapa hihi, keteji-i, ja netamoi japonetefata, kei jajo terenite teba-tei tetataka, kei hi, jako keto tekeko kewa pa jafefe kau. ²⁶ Baupa Paulus tebafai kelopa kati, no-kekepa tepa telupa nole tetapu, pa tekete Tata Pake kei tenini, rane nole tetapui kakatu pa ja-terenitete teba tuho. ²⁷ Pu ba-napahetoi kakatu, teba Yahudi ja Asia toi, Paulus tefi Tata Paike, kaipa tebapa tefajako ke- teke, ²⁸ pa tehiwae: "He eba Israel, newa.! Kewe keba kapa janaluko ne-telalaka pa Tata Make-ra telalaka pa jewe.! Pa uawe teba Yunani kekaketi Tata Pake pa je-tuwe tanaji.!" ²⁹ Kei Trofimus ka Efeus tefi nofe paulus kopa telupa, pa tenira, Paulus ke-kekaketi Tata Pake. ³⁰ Kaipa nofei tupai tewenaka, tebapa telu, Paulus teke pa tejaru Tata Pake teketute-pe pa rakuiara tilo mo Tata Pakei tepu fata. ³¹ Pitewako tejati kewaale, pikakoti taba rube, Yerusalem tupai tewenakaete. ³² Taba rubepa teako keke pa teba tafa-teteteteju teba-ho.Pu taba rubepa teako keke tefe, Paulus teketupa jaei tejitari. ³³ Taba rubei tila Paulus-tu, ke-ke pa keloko a-nafe hitupa teru, pa kehowe kewe-ba pa jakele. ³⁴ Pa tebapai tekau hiwa nawea, tekau hiwa noia. Pa tewefeiko keloka jalewakoto. Peanya keloko Paulus teketute jetete-e. ³⁵ Teba nawo pakeko Paulus teketujakote uepa teakokeke ke-tekepe, ³⁶ teba nawofata lake-ke, pa tehiwae: "Ekati kewawa.!" ³⁷ Pu Paulus teketuke tetepaite, kelote taba rube: "Pika nilele me-le.?" Pa taba rube kehowe Yunani pilate mepuna.? ³⁸ Peanya mewe meba Mesir kana, banto kewefi-iwea pa teba fefe tapa nopapaheto kelokafuti tahou.?" ³⁹ Paulus pinakele: "Niwe niba Yahudi, niha Tarsus, niba nofe tefija Kilikia; ni-wa, kopinilele tebapale." ⁴⁰ Taba rube ke-keki, paketiru-ue pa no-kewe-eti tebapa; kaipa teme rurupame, kipa Ibrani pilatepa pikele, kelo: