¹ Paulus tena Silas tenakeme tele Ampifolis pa Apolonia pa teteju Tesalonika. Kei teba Yahudi lupopo pauko. ² Anara tete-e Paulus keti lupopopai. Baheto Tatabake fipapapa Tata pifeke huhukelei-te. ³ Pi-kelei-te pa nokelui, kei Tata Okei japafefe lelepa pa kelefutoto teba-bi, pa kelo: "Kewe Tata Oke, kei Oke, ka-ni-nalue-e." ⁴ Teba nararau jateto keteji pa tetela Paulus tena Silas pa teba Yunani fapa Tata tefe-e, pa teume tefejara nawo. ⁵ Pa teba Yahudi te-hufe pa teba efe te-ejataje latepa, pitewako piputela pa nofei tetaki. Tekete Yason pake hupala tetei Paulus tena Silas teretutete tebapa-ho. ⁶ Pa pu tenake tefika, Yason teke letuke nararau teretute teba rube nofe, pa tehiwa, teni: "Teba fito takiewe terato kewea, ⁷ pa Yason te-kelokati pakeke. Piputela teba rube tete jataje pa teni, keba rube teteu, kei Tata Oke." ⁸ Pu tebapa pa teba rube tafa nofe jalelepai teri, tehufe. ⁹ Pa Yason pilei teri pa teba letu-hi, tera noteafa. ¹⁰ Kipa rapa baifa jopalala te-ei teniko Paulus tena Silas te Berea. Tejakotei tete lupopopa teba Yahudi. ¹¹ Teba Yahudi te-ei hupala tete heve pa tete-ete Tesalonika-i hupalafe, kei Tata Pifekei hupala hevepa terie pa fepato Pifei telafue pinaterirte, jakenalui-i bamua noiana. ¹² Teba fai nawo keteji; teume rube-rai pa tebale Yunani. ¹³ Pa pu teba Yahudi ja Tesalonika teri, kei Paulus Berea-ra Tatapifeke kenalu, keira tete teba tefaja pa teteko teba nawo hupala taku. ¹⁴ Kipa jopala niko Paulus kotilei bape, pa Silas tena Tomotius tete-e Berea. ¹⁵ Teba lake Paulus-i telakorate Atena, pa teputo kei pefe tewetuto SIlas tena Timotius, tenake kokofa toto-ke. ¹⁶ Te-ke-koi Atena, hupala keke-ve kei ja-kefu, kei nofei kafu tebate nawofata. ¹⁷ Peanya lupopo-pai teba Yahudi kopa temepa pi-tewae pa teba lake Tata, pa jatajei fepato teba tefie kei. ¹⁸ Pa teba pirepue ja tebafa Epikuros pa Stoa kopa tehalae pa tekau-ni: "Kebawe anara tebate hiu jate kenaluile." Pa ke Tata Oke pifeke kenalui pa Ke-lefuto-i pipe kelei." ¹⁹ Kaipa teketute Aeropagus tebapaho pa teni: "Nerurute pifenatine mapo napumepe-we.? ²⁰ Kei janolelepa menapumepe-ne. peanya nerurute, jai tipepe-ja." ²¹ Kei teba Atena pa tebapapa teetei baka-ko jatenini na teririte jalelepa lopa. ²² Paulus etiru Aeropagus pa pitikela: "He eba Atena, ni-kale, kei jalelepa e-lupopo jaele-teele teba-te. ²³ Pa pu nihapale-e nofe e-e pa jalelepa ke-ehie, kaku-u nifu putunaweako: Te Tata nefutaka. ja-efulakapa tabeja ele-ele, jaia ninaluele-e. ²⁴ Tata fitopa jalelepa kelela, Kei, Tata pete pa fito, kei tebate pate nebatei keleika, ²⁵ pa neba no-nenepara kejateteka, anara Ke jalelepa paka, nafe nene pa pu-nene pa jalelepai Kea loleile nebapa. ²⁶ Wa keba alipa tebapapa Ke-lela pa neba ko netenene fitowea pa Ke-ara babamolupate kelekoto-ne pa koho kalamo ko netenene, ²⁷ ura Ke-tejuju pa anaipa tejututete pa Ke-tefifi, Ke-ra lakole nebatuho wowo. ²⁸ Pa netenetewe Kea nave loleile, hehe netenete, nemote, anara teba jalate-e niko: Pa newe Tata pipafeke. ²⁹ Kipa newe na Tata baleke, ne-hieeka, kei paikekei anara jahelo-tete na jahelo hou na wu, tuta nebanepa nete.