¹ Phra' Ông lav yo' no, " Ô' 'mook bo srme' yo' bo, ah bo yo' ge dwn khi ci am bwan jiim hrlo' haan kaal no ci bwan guuñ p'té' savan dé' Phra' Cav yo' ge gaay broom ah rit am nad." ² Glad yo' tool mw, Phra' Yésu oor phide, coon pa' céém gaal dah môôk jông, brom Ge bud dé. hôôc Ge go' pian loh Ge dah kaal mat dé' no. ³ Khrwng dé' Ge go' twrbah sndril, klook srme' klook lwn khrwng yo' gôn ñoom dah lôôk gi. ⁴ Hôôc Ilaayja pa' Môsès pnklê an no guuñ S'na phuam srô' yo' Phra' Yésu. ⁵ Phide yéh hôôc Lav yo' Phra' Yésu, " Acaan, ge le' yo' i' yat khi, hôôc an i' eh tub pé' hlang, môôy meh de' Mé môôy meh dé' Môsés pa' môôy meh dé' Ilaayja." ⁶ ( ge srô' néév ni' ñoon ge am neeng néév ci lav, pa' no ngo'. ⁷ Ah pud gaay pwang gub no. Hôôc ah siang hlian caak pud ni', " Gi meh Koon yo' ô' rak. Hmyéng Ge em." ⁸ Dah c''man gni', nam no yééng knvér, no go' am guuñ me' yat broom no, hrwn lwng Phra' Yésu ⁹ Nam no Phuan juur caak môk, Ge 'mook no am an 'mook me' dé' lwang yo' no guuñ, côn Phra' Koon ci vér gaay caak haan. ¹⁰ Dwng ni' no go' mod lwang gi uuñ am 'mook mek dé', 'nai no go' hnoong lôôr yo' dé sah, " kaan reh caak haan " meh néév me'. ¹¹ No maañ ge sah, " tèèng hmeh thaama caan lav sah, Ilaayja ci gaay kaal?" ¹² Ge lav yo' no, " Ilaayja gaay kaal tééng jwm nèèv an le' hmwan hmang. Bang kooc uun tèèng meh Phra' Koon bup bang twngraap thw'map maak nèèv? ¹³ Dwng ni' Ô' lav yo' ge bo Ilaayja ge gaay, no cu' tèèng nèèv me' yo' ge no go' tèèng, hmwan yo' bang kooc uun lwang ge." ¹⁴ Nam no gaay coro Sanôk, no go' guuñ gôn gw' yat knvér no, bwng thaamma' caan phuam thiang no. ¹⁵ Dah c''man nam no guuñ Phra Yésu, gôngw' no twng lôôc go' vér hôôc daar yo' coro smdod Ge ¹⁶ Ge maañ savôk sah, " Bo phuan thiang yo' lwang hmeh? " ¹⁷ Ah gôn dah bwng gôn gw' yéh Ge sah, " Acaan eey, Ô' orr koon cmbro' dé ô' gaay coro Mé, hrôôy gud ge tééng an ge srô' am bwan. ¹⁸ Hrôôy tééng an ge kwlvayh hôôc sndrud juur hlian tuyh t'noh, pôk hraang pa' loh grang. ô' khro an savôk dé' Mé va' hrôôy hlian caak ge, 'nai no go' tééng am bwan." ¹⁹ Ge yéh yo' no, "Ñuk gôn am ah hrlo' dwwm eey, Ô' ci yat broom bo hreng 'maam me'? Ci an Ô' hrwng yat broom bo hreng 'maam me'? An mod ge gaay coro Ô' khi." ²⁰ No dwang koon ñè' gaay coro Ge. Nam krôông ni' guuñ Phra' Yésu, C''man gni' hrôôy go' tèèng an koon ñè' ni' kwlvangh, S'drud juur klwak keey P'té' hlian tuyh t'noh. ²¹ Phra' Yésu go' 'man yông dé' koon ñè', " Koon mé yèr nèèv gi' hreng 'maam hmeh lèèv?" ge lav, " Ngwan hnong ñè'. ²² Maak dwa hrôôy go' tèèng an ge khruk dah phrwa, khrak dah ôm, Sèèl ci phaan ge. An Mé jooy bwan, Kro an Mé trwnèèm jooy i' 'nè." ²³ Phra' Yésu lav yo' ge sah, "' An Mé jooy bwan oh '? Jwm nèèv ked khwan bwan yo' gôn ah hrlo' dwwm." ²⁴ C''man gni yông dé' koon ñè' yaam héd lav, "ô' dwwn lèèv? Kro jooy an ô' ah hrlo' dwwm maak lwwn gi!" ²⁵ Nam Phra' Yésu guuñ gôn gw' phuam daar gaay coro no, Ge go' Va' hrôôy saa ni' lav sah, "mé hrôôy srô am hluh pa' s'lud, Ô' sang an mé hlian caak ge, dah bai gaay gud ge 'môôy dwa." ²⁶ ge hèd ôôr tèèng am koon ñè' kwlvayh côn lôôc hrèèng hôôc go' hlian du'. koon ñè' hmwan swng gôn haan, dwng ni' maak gôn lav, " ge haan lèèv." ²⁷ Hôôc Phra' Yésu go' capti' ge yat khwan, koon ñè' ni' go' dwan khwan. ²⁸ Nam Phra' Yésu gud kluang gaang, savôk go' 'maañ Ge yat buddé, "tèèng hmeh i' tang va' ge am hlian?" ²⁹ Ge lav yo' no, " 'mèb gi va' am hlian hrnlwng hrlo' Athithaan." ³⁰ Nohlian caak khi' hôôc yoh pha khvèèng Gèli'li. Phar' Yésu am ca' dé' an me' neeng sah no yat dah me', ³¹ Ge phuam soon savôk. Ge lav yo' no sah, " Phra' Koon ci bwan mob dah ti' dé' gôn, no ci phaan Ge. Nam Ge hôôc haan lêêv, pé' mw Ge ci reh gaay caak haan." ³² 'Nai no go' am neeng rih dah kwrloh srô' ni', no go' ngo' ci maañ Ge. ³³ Hôôc no gaay rod dah Mwang Khapheniam. Nam Phra' Yésu gad kluary gaang Ge go' maañ no sah, " Bo phuan lôôr yo' lwang me' nam yat dah ngoor? " ³⁴ 'Nai no léd. Ñoon yat dah ngoor no phuam thiang yo' lwang meh me' hnam lwwn briang. ³⁵ Ge dén juur, k-eey savôk gal baar gôn gaay broom yo' hôôe lav yo' no sah, " An gôn g'me' cu' me' sndraan, An gôn gni meh gnswt pa' an meh kooy briang." ³⁶ Phra' Ông dwang koon ñè' môôy gôn gaay dwn trdri' greeng no. Ge koon ñè' ni' pa' lav yo' no sah, ³⁷ " Gôn g'me' ñoom rap koon ñè' ni' dah swng me' dè' Ô', go' toon rap Ô'; Gôn gme' toon rap Ô', go' am hrnlwng toon rap Ô' naam ni' 'nai toon rap gôn yo' Ge Srông Ô' gaay hmwan yo'. " ³⁸ Coon lav go' Phra' Yésu sah, " Phra' ACaan eey, i' guuñ ah gôn va' hrôôy hlian dag swng meh dé' Mé hôôc i' go' 'mook an ge ken, ñoon ge am yo' réc i'." ³⁹ Hôôc Ôhra' Yésu lav sah " ha' an ge ken, ñoon am ah meh tèèng viak hnam dah swng meh dé' Ô' hôôc go' ci am vér gaay lav nèèv am le' yo' Ô'. ⁴⁰ Gôn gme' am to su' i' go' yat luang i'. ⁴¹ Gôn gme' an bo awak ôm môôy cook dah swng meh dé' Ô' ñoon bo me' luang Phra' Khrit, Ô' lav srme' yo' bo sah, gôn gni ci am laac bamnét dé' ge ⁴² Gôn gme' tèèng an koon ñè' môôy gôn dah bwng gi' yo' ge dwwm Ô an sndrud, go' an mod glaang hnam ploom kntuar ge déc dah ôm tha' lé jru' go' le' lwwn. ⁴³ An ti' dé' bo tèèng an bo sndrud, kôh ge pic, bo ah ti' môôy blah hôôc gud dah savan go' le' lwwn ah ti' baar blah hôôc gud narôk, prlung phrwa yo' ge am neeng bit. ⁴⁴ 'Moon ni' hmbraay go' am haan phrwa go' am bid. ⁴⁵ An krvéh dé' bo tèèng an bo sndrad dah 'mab, an kôh ge pic. bo ah ti' môôy blah hôôc gud dah savan go' le' lwwn ah krvéh baar blak hôôc déh narôk. ⁴⁶ 'Moon ni' hmbraay go' am haan phrwa go' am bid. ⁴⁷ An mat dé' bo tèèng an bo sndrud dah 'mab, an klvéh ge pic. bo ah mat môôy blah hôôc gud dad savan go' le' lwwn ah mat baar blah hôôc déh narôk, ⁴⁸ 'Moon ni' hmbraay go' am haan, phrwa go' am bid. ⁴⁹ Dwng ni bo jwm gôn meh hmaar pa' phrwa. ⁵⁰ Hmaar meh nèèv le', an ge bléh ge ci vér gaay gém bwan nèèv meh? An bo rak sa' hmaar dad loh bo uuñ, pa' an bo yat broom yo' dah hrlo' cép doom."