¹ Ñaam gni' dah hni', ah gôn gw', hôôc no am ah hmeh ci mah. Phra' Yésu go' k-eey Savôk dé' Ge gaay hôôc lav yo' no, ² "Ô' trneem no bwng gi ñoon no yat broom Ô' bwan pè' mw lèèv hôôc no am ah hmeh ci mah. ³ Hak Ô' an no gaay dah gaang nam no am dah be' mah, no go' ci vid swndrud roh ngoor. Go' ah baang gôn gaay ngwan ja'." ⁴ Savôk go' yéh Ge sah, "Yat dah bri' nèèv ke' i' ci sook mah pook an no ge bo be' an gôn thrgi' mah bi' bwan nèèv gme'?" ⁵ Ge maañ no, "Bo ah mah pook 'naam me' rwm nôôm? No lav sah, "Tèèl rwm nôôm." ⁶ Ge 'mook an no dén dah kveey p'té'. Ge mod mah pook tèèl rwmnôôm, gaay khob khun, hôôc vèh ge. Phra' Ông mod an yo' Savôk, hôôc Savôk go' dwang yoh 'yaay an no p'twng lôôc be'. ⁷ No hnoong ah ka' ñè' baar pé' to, hôôc nam Ge mod gaay khop khun, Ge 'mook an Savôk 'yaay an no be' hmwan yo'. ⁸ No oor yo' be' coon bi', hôôc no go' rèh yo' ge s'lah mun gni', bwan tèèl 'mung hnam. ⁹ Dah hni' ah graav puul ban gôn. Hôôc Ge an no gaay. ¹⁰ C''man gni' Phra' Ông go' yo' ga c-loong broom Savôk, No oor yo' yoh gud dah ta'viing dèèvmanuta. ¹¹ Dwng ni' no Fèri'si gaay coro hôôc thiang Phra' Yésu. No sèèl cu' guuñ grwam paal hlian gaay dah Savan, Phwa thôd loong Ge. ¹² Phra' Ông go' tôh hrñwam jru' dah Phra' hwmmaal dé' Ge hôôc lav, "Tèèng meh gôn ñuk gi tang sook lwng grwam paal? Ô' lav srme' yo' bo sah, am ah grwam paal hmeh ci an gôn ñuk gi bwan guuñ." ¹³ Hôôc Ge go' hlian caak no, yoh ga c-loong twmbo', hôôc kham yoh blah naay. ¹⁴ Ñaam ni' Savôk hlông ar mwk mah pook yoh broom. No ah mah pook hrwn môôy rwmnôôm dah c-loong. ¹⁵ Phra' Ông 'mook no, lav sah, "An poh yèèng pa' la' vang jwa pa' dô' dé' Fèrisi pa' Hérôd." ¹⁶ Savôk no go' thiang yo' lav lowang am ah mah pook. ¹⁷ Nam Ge méc lwang gi, Ge maañ no, tèèng hmeh bo tang thiang yo' lwang am ah mah pook? Bo hnoong am dah guuñ am dah neeng? Hrñwam bo ni' go' graag srme' ha-w? ¹⁸ Bo ah mat; bo go' am guuñ ha-w? Bo ah r-meey; bo go' am méc ha-w? Bo am prcw oh? ¹⁹ Ñaam Ô' vèh mah pook pwang rmnôôm yat broom pwang ban gôn gni', mah pook salah bo rèh kiiñ 'naam me' 'muang?" No lav yo' Ge sah, "Galbaar 'muang." ²⁰ Nam Ô' vèh mah pook Tèèl rmnôôm dah gôn puul ban gôn, bo rèh mah pook salah bwan 'nam me' 'mung?" No lav yoh Ge sah, "Tèèl 'mung." ²¹ Ge lav, "Bo hnoong am dah neeng ri'?" ²² No gaay rod dah Batsaayda. Ah gôn dah hni' oor cmbro' mat lwk gaay coro khro an Phra' Yésu rmpod ge. ²³ Phra' Jésu go' cap ti' gôn mat lwk gni' hriin yoh dah nook kung. Nam Phra' Ông k-ju' séh dah mat ge gni' hôôc rmpod mat ge, Phra' Ông go' maañ ge, "Mé guuñ hmeh 'nè?" ²⁴ Ge s-ngeh khwan, hôôc lav, "Ô' yèèng guuñ tud s-oong phuam ñaang hmwan gôn." ²⁵ Hôôc Phra' Ông go' dé' ti' rmpod mat ge tmbo', ge go' laan, mat dé' ge go' le', yèèng guuñ ri'. ²⁶ Phra' Yésu an ge gaay dah gaang dé' ge, "Ha gud dah kung em." ²⁷ Phra' Yésu hlian yoh broom Savôk gud dah kung dah mwang Khétsaria Filippi. Roh ngoor ni' Ge maañ Savôk sah, "Briang lav sa Ô' meh me'?" ²⁸ No yèh Ge sah, "Meh Coon Baptis. Bang gôn lav sah, 'Ilaayja,' pa' gôn me' bang lav meh, 'Môôy gôn lav phwan krloh Phra' Cav."' ²⁹ Ge maañ no sah. "Be dé lav lav Ô' meh me'?" Phide lav yo' Ge, "Mé meh Phra' Khrit." ³⁰ Hôôc Phra' Yésu lav am an 'mook me' dé' dah lwang dé' Ge. ³¹ Phra' Yésu tang k-naal 'mook soon no sah Phra' Koon ci bwb bang twng raap maak nèèv, ci bwb hrlo' am ñoom rap caak thav kè, Pa'lôhit, pa Thamma' Caan, bang ci phaan, hôôc pè' mw ci vèr gaay caak haan. Phra' Ông srô' lwang gi ri' srme'. ³² Dwng ni' Phide oor Ge yoh dah yér hôôc go' khrwa Ge. ³³ Hôôc Phra' Yésu vér yèèng Savôk dé' Ge go' khrwa Phide lav sah, "Du' an ja' Ô', Sataan! mé am khwt 'mèèp Phra' Cav, 'nai khwt 'mèèp gôn." ³⁴ Dwng ni' Ge hèd no pa' Savôk dé' Ge gaay broom yo', hôôc lav sah, "An me' cu' yah rèc Ô' an gôn gni' hlông loh dé, pa' klam s-oong kwlnèng dé' dé, yoh hréc Ô'. ³⁵ Gôn gme' cu' rak sivit dé' dé go' ci laac sivit, gôn gne' s'la' sivit dé' dé ñoon guuñ Ô' pa' khaav le' go' ci bwan sivit. ³⁶ Ci ah kha hmeh an gôn gni' bwan lôôc p'twang lôôk hôôc laac sivit srme' dé' ge. ³⁷ Gôn i' ci dé' hmeh yoh lèèk sivit dé' dé? ³⁸ Meh me' pwng ga' ñoon Ô' pa' krloh dé' Ô' yat dah ñuk kiiñ lwng hooy ju pa' hrlo' 'maap, Phra' Koon go' ci pwng ga' gôn gni' nam Ge gaay dah hrlo' trbah dé' Phra' Yông broom pa' bwng Théva'da Borisut."