¹ Bwng Fèri'si pa' Thamma' caan yo' no gaay caak Jérusalém oor yo' dén kwn vér Ge. ² No go' guuñ ah Savôk dé' Ge ti' ye' hôôc be' mah, gni', meh no am bwan ra ti'. ³ (Samlap Fèri'si pa' Jiev twng lôôc no ci am be' mah kaal no ci rati' an le', ñoon no thw rid dé' thav kè ngwan nam ye'. ⁴ Nam Fèri'si gaay caak 'moon jôh, no ci am be' mah an no am muum ôm, no go hnoong thw rid maak nèèv yo' no ah, hmwan swng krlaang cook, trloh, tai, broom pa' phwan mah.) ⁵ Fèri'si pa' Thamma' Caan maañ Phra' Yésu sah, "Tèèng hmeh Savôk dé' Mé am tèèng taam rid dé' gôn thav gôn kè, swng no be' mah am rati'? ⁶ 'Nai Ge lav yo' no sah, "Aisèa phwwn lav ñak bo gôn rwmbôh thro' hrñwam kok. Hmwan swng bang kooc uun, 'Gôn thrni' 'yam Ô' lwng ta'noh, 'nai hrñwam no yat ja' Ô'.' ⁷ No Na'matsakaan Ô' pe' kha hmeh, krloh 'mook soon pa' kôt dé' no go' meh dé' gôn 'mook soon yo' gaay.' ⁸ Bo oor yo' dé' pic Phra' banñat dé' Phra' Cav hôôc thw rid dé' gôn." ⁹ Ge go' lav yo' no sah, "Thro' srme' bo am dé' Banñat Phra' Cav hôôc dé' rid dé' bo! ¹⁰ Môsé lav uun sah, 'an 'yam yông 'yam ma' dé' bo', pa' me' yo' ge srô' ñôôñ to yông ma' dé' dé go' ci bwp hrlo' haan.' ¹¹ Hôôc bo gai lav sah, 'Hak me' lav to yông ma' dé' dé, Meh hmeh yo' Ô' jooy bo an bwan rap gni' go' meh Cobén''' (gni' lav me', Grwam Tha'Vaay), ¹² Hôôc bo gai am an me' tèèng hmeh phwa yông ma' dé' no. ¹³ Bo phuam tèèng an Phra' banyat dé' Phra' Cav am ah kha hmeh ñoon rid pa' maak nèèv swng bo oor dé' tèèng ngwan nam ye' gaay. ¹⁴ Phra' Ông héd lav yo' no twmbo' sah, "Hmyèèng Ô' em bo pa'twng lôôc, an bo neeng ri'. ¹⁵ Am ah hmeh yo' ge yat dah nook nam gud dah khuang loh dé' gôn hôôc tèèng an meh gôn je' ñôôñ. 'Nai meh nèèv yo' ge yat dah kluang gôn hlian tèèng an meh gôn je' ñôôñ. ¹⁶ "Me' ah r'meey go' an méc." ¹⁷ Nam Phra' Jésu caak no yoh hôôc gud dah gaang, bwng Savôk go' maañ Ge dah hrlo' twngkal ni'. ¹⁸ Phra' Yésu lav sah, "Bo go' hnoong am dah neeng ri'? Bo go' am neeng sah meh hmeh yo' ge yat dah nook gud dah kluang loh am tèèng an meh gôn jé' ñôôñ bwan, ¹⁹ Ñoon ge am bwan gud dah hrñwam, 'nai ge dah luuñ hôôc go' taalmoong plian?" lav nèèv gi go' 'maam Phra' Yésu lav sah swng mah jwm nèèv be' bwan. ²⁰ Ge lav, "NèRv yo' ge hlian dah ta'doh dé' gôn ni' tèèng an ge meh gôn ñôôñ. ²¹ Nèèv ge hlian caak kluang gôn, dah hrñwam, go' tèèng an ge trget sua, cu' hôôy yu, cu' lec, cu' phaan gôn, ²² Cu' hooy yu glé' kwmbra' briang, siad briang, hrñwam kok, ñua briang, ngo' briang lwwn briang lwa, leng twr vaayh, pwnkhw, cndrwng. ²³ Pa' lôôc hrlo' ñôôñ thrgi hlian caak dah kluang ge go' tèèng an no meh gôn ñôôñ." ²⁴ Phra' Ông hlian caak 'moon hni' yoh dah taviing mwang Thaayri pa' Saaydon. Dah hni' Ge gud dah gaang, Ge go' am cu' dé' an me' neeng sah Ge yat dah me'. 'Nai Ge go' am soor loh dé' bwan. ²⁵ C''man gni' go' ah cmkwn môôy gôn yo' koon cmkwn na ah hrôôy sua gud méc lwang dé' Phra' Yésu go' gaay coro hôôc dén kmnuun dah to hna krvèh Phra' Ông. ²⁶ Na gni' meh gôn grik, jan jwa gôn Saayrôfônis. Na khro an Phra' Ông va' hrôôy hlian caak koon cmkwn dé' na. ²⁷ Ge lav yo' na sah, "An poon koon kaal. Ge am thro' ci mod swng mah koon dèc an so' be'." ²⁸ Hôôc na go' yèh yo' Ge sah, "Dôôy, Phra' Ông, Hmwan swng so' dah kwndruum tô go' hnoong bwan be' swng mah s'lah dé' koon ñè'." ²⁹ Ge lav yo' na, "Ñoon nèèv ba lav gni' go' an ba yoh swm 'maay. Hrôôy go' bwan hlian caak koon cmkwn dé' ba lèèv." ³⁰ Nam na vèr gaay dah gaany na go' go' guuñ koon phuam sih dah kveey jrap. Hôôc hrôôy go' hlian du'. ³¹ Hôôc Phra' Yésu go' hlian caak ta'viing mwang Thaayri, pha yoh mwang Saay don côn rod dah tha'lé Gèli'li khwan gud ta'viing mwang Dikhèpôlis. ³² No oor gôn sa'lud srô' am hlu' gaay coro Ge, hôôc no kro an Phra' Ông srnwm ge. ³³ Phra' Ông oor ge hlian caak gôn gw' yoh dah yér yat bud dé, Ge dé' crguul ti' kndôp h'meey ge, hôôc ge go' ka'juh séh dah ti' yoh cap hntaak ge. ³⁴ Hôôc Phra' Ông go' tôh hrñwam yèèng la'vaang ga' lav sah, "Iffatha," Ge meh, "Paang Cem!" ³⁵ C''man gni' h'meey dé' ge go' méc, hntaak kôl dé' ge go' le', hôôc ge go' srô bwan. ³⁶ Phra' Yésu go' sang no am an lav me' dé'. 'Nai Ge am an no lav maak 'naam me', no go' hèèng héd paav maak 'naam ni'. ³⁷ No go' oor yo' dé' ngwd srme', hôôc lav sah, "Jmnèèv yo' Ge tèèng meh meh nèèv le'. Ge tèèng an gôn sa'lud bwan méc gôn hntaak kôl srô bwan."