¹ Phra' Yésu lian dah hni' yo' dah khvèèg Cudia hôôc khaam yo' blah ôm Codèèn, ah gôn gw' gaay coro Ge twmbo'. Ge phuam soon no twmbo' hmwan swng Ge geey tèèng. ² Hôôc Fèrisi gaay hyua Ge lav sah, " Taam Phra' ban yat glé' ci peh kmbra' dé' ge bwan rwh? " ³ Phra' Ông yèh sah " Meh hmeh yo' Môsés 'mook uun yo' bo ? " ⁴ No lav sah, " Môsés kooc nang sw an cmbo' ah sit peh kmbra' hôôc srông na yoh." ⁵ Phra' Yésu lav yo' no sah, "ge kooc ban yat gi uuñ an bo dé' ñoon hrñwan bo grang." ⁶ "Dah sndraan kaan sang dé' Phra' Cav, ' Phra' Cav pan sa' na meh cmbro' cmkwn.' ⁷ 'Ñoon nèèv gi cmbro' tang hlian peh yông peh ma' yo' yat broom kmbra ge ⁸ Hôôc sa'na go' meh loh knmôôy'. sa'na bai meb baar to yoh. ⁹ Dwng ni' nèèv meh yo' Phra' Cav Pntak yo', am an gôn gme' caak plian an trtéh." ¹⁰ Nam no yat dé' kluang gaang, savôk go' maañ e dah lwang gi. ¹¹ Ge lav yo' no, " Gôn gme' peh kmbra' dé' hôôc yo' dé' cmkwn gôn me' bang go' meh gôn hooy ju séh na. ¹² An na peh klé' dé' na hôôc yoh dé' cmbro' gôn me' bang, na go' me' gôn hooy ju." ¹³ Hôôc no orr koon ñè' gaay coro Phra' Yése phwa an Ge uay Phoon no, 'nai savôk kraang no uun. ¹⁴ Hôôc nam Phra' Yésu guañ, Ge am bo hrñwam pa' lav yo' no sah, " An plooy koon né' gaay coro Ô', dah khraang no, ñoon p'té' savan dé' Phra' Cav go' meh dé' gôn hmwan koon ñé' thrgi, ¹⁵ Ô' Lav srme' yo' bo, gôn gme' am rap p'té' savan hmwan koon ñé' thrgi go' ci gad dah hni' am bwan." ¹⁶ Hôôc Ge go' hôm koon ñé' khwan broom pa' Athithaan uay Phoon no. ¹⁷ Nam Phra' Yésu hlian yoh ngoor, ah cmbro' môôy gôn daar coro kwmnuun to hna Ge hôôc maañ, " Phra' Acaan gôn le', ci tèèng nèèv me' ô' tang ci bwan sivit yat yoh dwng ni'?" ¹⁸ Phra' Yésu lav, " tèèng hmeh me' tang k-eey Ô' meh gôn le'? Am ah me' le' hrwn lwng Phra' Cav môôy Ông. ¹⁹ me' go' neeng Phra' ban yat lav sah: ' ha' phaan gôn, ha' hôôy ju', ha' leyc, ha' meh pha' ñaan laak, ha' ñua', an 'yam yông 'yam ma' dé' bo."' ²⁰ Cmbro' gôn gni' go' lav sah, " Acaan eey, pa' tang lôôc ni' ô' bwan tèèng ngwan ô' hnoong s'deen." ²¹ Phra' Yésu go' yèèng ge dah hrlo' rak. Hôôc lav yo' ge, " mé am ah môôy nèèv. An mé Gaay téc pa' twng lôôc yoh mé ah, yoh 'yaay gôn rôôk, hôôc mé tang ci ah muun mang dah savan. Hôôc gaay réhô'." ²² Ñoon hrlo' lav gni ge go' hmoong hôôc du' broom hrlo' thuuk hrñwam, ñoon ge meh gôn r'maang. ²³ Phra' Yésu twng gaay yèèy pa' lav yo' savôk, " Gôn r'maang ci gud dah p'té' savan dé' Phra' Cav go' yaak srme'!" ²⁴ Bwng savôk go' oor yo' ngwd dah krlo' srô' dé' Ge. Hôôc Phra' Yésu go' lav yo' no tmbo', " Koon eey, go' yaak srme' swng ci gud dah p'té' savan dé' Phra' Cav! ²⁵ To Uud ci gud hntu' s'kaam go' sm' maay lwwn gôn r'maang ci gud dah p'té' savan dé' Phra' Cav." ²⁶ No go' oor go' dé' viir srme' hôôc lav yo' yo' dé', " Meh me' ci bwan rap hrlo' lod?" ²⁷ Phra' Yésu yèèng no pa' lav, " sam lab gôn ge yaak, 'nai sam lab Phra' Cav ge tèèng bwan lôôc jwm néév." ²⁸ Phide go' lav yo' Ge: " yèèng ih, i' plah pic pa' twng lôôc hôôc yoh réc Mé." ²⁹ Phra' Yésu cav, " Ô' 'mook bo srme', am ah me' môôy gôn ci du' peh gaang rwtaay haam rw ma' rw yông rw koon rw p'té' phwa Ô' pa' Khaav Le'. ³⁰ Am ah meh yo' ge ci am bwan rap rooy thôp dah ñuk gi : gaang, taay hôôm, ma', koon, p'té' broom pa' hrlo' twng rad, hôôc ñuk hmmé' go' ci bwan sivit yat yoh dwngni'. ³¹ Dwng ni' maak gôn yo' ge meh tud ci me' tual pa' yo' ge meh tuad ci meh tud." ³² Nam no yat dah ngoor phuam khwan Jérusalém, hôôc Phra' Yésu go' yoh kaal no. savôk go' oor yo' ngwd, pa' no yo' ge réc kwnhni'' go' ngo'. Hôôc Phra' Yésu oor savôk gal baar gôn hlian dah yér ngoor dwngni' Ge leem 'mook no sah dah léh gi ci ah hmeh ked khwan yo' Ge. ³³ Yèèng ih, i' phuam khwan dah Jèrusalém, hôôc bang ci mop Phra' Koon an yo' bwng Pa'lohit pa' thamma' caan. No ci thu Ge an bwp hrlo' haan pa' mob Ge an yo' gôn taang sad. ³⁴ No ci ta' 'mop Ge, K'juh Séh rwmbôh Ge, hmbrwk Ge, pa' phuan Ge. Hôôc Pé' mu Ge ci reh caak haan." ³⁵ Céém pa' Coon, koon dé' zibid, gaay coro Phra' Yésu pa' lav sah " Acaan eey a' cu' dé' an Mé tèèng taam hrlo' khro dé' a'." ³⁶ Ge lav yo' s'na, "S'na cu' dé' an Ô' tèèng meh?" ³⁷ S'na lav sah, " kro an a' dén dah kndruum hrlo' trbah dé' Mé, môôy gôn yat dah blah ham môôy gôn yat dah blak vé' dé' Mé. ³⁸ Hôôc Phra' Yésu tob yo' S'na sah, "S'ba am neeng lav sah s'ba phuam khro hmeh. s'ba go' uak bwan cook yo' Ô' ci uak rw s'ba go' rap bwan rid jup ôm yo' Ô' ci rap?' ³⁹ S'na lav yo' Ge sah, " A' tèèng bwan. " Phra' Yésu lav yo' s'na, " cook yo' Ô' ci uak, S'ba ci uak bwan pa rap jup Ôm yo' Ô' ci rap, S'ba go' ci rap bwan hmwan yo'. ⁴⁰ 'Nai gôn yo' ci yat dah blak réh blak ham Ô' ni am meh Ô' ci me' gôn an meh dé' gôn yo' bang bwan haang uun." ⁴¹ Nam savôk gal gôn méc lwang gi no go' am bo hrñwam yo' céém pa' coon. ⁴² Phra' Yésu k-eey no gaay coro Ge pa lav sah. " Bo yo' neeng sah gôn yo' ge thw sa dé' meh gôn pôk khoong dé' gôn taang sad go' pôk khoong gôn dé' no, hôôc gôn ah tam nèèng yông go' ah am nad pwrveey no. ⁴³ 'Nai ci am meh néév ni' dah trdi' bo. Gôn gme' cu' meh gôn 'nam dah bwng bo go' an gôn gni meh gôn rap sai briang, ⁴⁴ Meh me' cu' meh tud dé' bwng bo go' an meh kooy briang. ⁴⁵ Dwngni Phra' Koon am bwan dé juur an briang rap sai 'nai juur phwa rap sai briang broom pa' an sivit dé' Ge phwa thai 'maap maak gôn." ⁴⁶ Nam no gaay rod dah mwang Cérikhô. Phra' Ông pa' savôk broom pa' gôn gw' phwam ci hlian caak mwang Cérikhô, ah gôn mat lwk dén khro thaan dah yér ngoor, swngmeh Bathimés meh koon dé' Thimés. ⁴⁷ Nam ge méc Phra' Yésu gôn Nasarét, ge go' héd hôôc lav sah, " Phra' Yésu, koon Dévit trné'em Ô' 'mé!" ⁴⁸ Maak gôn gôn go' khrwt ge, lav an ge léd. Hôôc ge hééng héd tmbo' "koon Dévit eey, trnéém ô' 'mè!" ⁴⁹ Phra' Yésu go' dwn hôôc 'mook an no k'eey ge gaay. No go' k'eey ge broom pa' lav sah, " ha' ngo'! reh khwan! Ge phuam k'eey mé! ⁵⁰ Ge déc téb khum dah yér, hôôc baav reh gaag coro Phra' Yésu ⁵¹ Phra' Yésu yéh ge lav sah, " Mé cu' dé' an Ô' tèèng hmeh yo' mé? " ge lav sah " Acaan eey ô' cu' guuñ bah." ⁵² Phra' Yésu lav yo' go, " Yok cem. Hrlo' dwwm dé' mé tèèng an mé le'." c''man gni' mat ge go' guuñ, hôôc ge go' yoh réc Phra' Yésu twam ngoor ni'.