¹ No go' khaam gaay rod môôy blah tha'lé, dah twviing cénrésiin. ² Nam Phra' Yésu phuam hlian dah C-loong, c''man gni' ah cwmbro' Hrôôysua gud dar hlian caak hntô' tham r'maan gaay coro Ge. ³ Cwmbro' gni' yat dah hntô' tham r'maan. Am ah me' ci klwthrang ge bwan, am lav ci dé' sô tuk. ⁴ Bang geey dé' cndrôh pa' dé' sô tuk ge maak dwa. ge go' yan sô pa' pak cndrôh yo' bang tuk ge ni' de' lôôc. am ah me' ah rèèng ci rôp ge bwan. ⁵ Taam hntu'tham r'maan dah môk ge hèd ñaam hôôc dé' glaang pwrnéék pad loh dé. ⁶ Nam ge guuñ Phra' Yésu dah ya' ge go' dar yoh coro hôôc dén kmnuun dah kal Ge. ⁷ Ge hèd ôôr sieng rèèng, " Ô' tèèng hmeh klwyh yo' Mé, Phra' Yésu eey, koon dé' Phra' Cav hnam srme'." Ô' khro yo' Mé Phra' Cav, Ha' twng rap Ô'." ⁸ Hôôc Phra' Ông bwan lav yo' ge sah, " Hrôôy ñôôñ hlian du' caak cwmbro' gÔn gi cem." ⁹ Hôôc Phra' Ông maañ ge, " mé swng meh hmeh?" ge yèh Phra' Ông sah, " swng meh ô' meh koong thap, ñoon i' ah gw'." ¹⁰ Ge khro hôôc khro ha' srôông no du' hlian caak dah t'viing gi. ¹¹ Dah hni' ah bwng swang bang phuam panmah yat dah tmphang, ¹² No khro yo' Ge, lav sah, " srôông i' yoh yo' swng, an i' gud yat yo' no." ¹³ Hôôc Ge go' anu'ñad an no, bwng no Hrôôy je' hlian yoh gud yat broom swng, swng bwng gni' go' baav tôôn juur dah tmphang khruk gud ôm tha'lé.swng bwng gni' ah k'baar ban tô hnlép ôm haan. ¹⁴ Gôn lieng swang go' oor yo' dar du' yoh 'mook lwang bwan ked khwan dah mwang pa' kung knvér mwang, hôôc gôn pa' lôôc go' oor yo' yoh yèèng lwang yo' ge ked khwan ni'. ¹⁵ No oor yo' dé gaay coro Phra' Yésu no go' guuñ cmbro' hrôôy pa' koong thap gud, phuam dén léd ; ge séh khrwang meh gôn ah s'ti' le' hôôc go' oor yo' dé ngo'.

¹⁶ No yo' ge guuñ gôn hrôôy gud ni' bwan 'mook lwang an no hmyèng pa' no 'mook lwang swang ni' hmwan yo'. ¹⁷ Hôôc no go' khro an Ge du' caak t'viing no yat gni'. ¹⁸ Nam phra' Ông phaum ga c-loong, gôn yo' hrôôy geey gud go' khro yoh broom Phhra' Yésu. ¹⁹ 'Nai Phra' Yésu am an ge yoh, hôôc lav yo' ge sah, "an gaay dah gaang pa' gôndé' mé hôôc 'mook no dé' nèèv Ông Phra' phu pén av tèèng hmeh yo' mé, pa' Phra' Ông bwan pnklé' hrlo' trnèèm yo' mé." ²⁰ Dwng ni' ge hlian yoh hôôc leem paav lav dah hrlo' hnam swng Phra' Yésu bwan tèèng yo' ge dah khééng Dékhèbpôlis pa'lôôc jwm gôn go' oor yo' dé viir. ²¹ Ñaam Phra' Yésu dén dah c-loong khaam yoh blah hô', nam Ge phuam yat bwb tha'lé, ah gôn gw' gaay knvér Ge. ²² Ah naay rôông sala môôy gôn swng meh Céras gaay coro, nam ge guuñ Phra' Ông ge go' kmnuun dah krvèh Phra' Ông. ²³ Ge khro, lav sah, " koon cmkwn dé' ô' pè' ci haan lèèv. Khro an gaay oon voon pwl ngôh ti' hôôc na go' ci le' ah jua yat." ²⁴ Dwng ni' Phra' Ông go' yoh broom ge, pa' ah gôn gw' p'è' yo' yoh rèh Ge. ²⁵ Dah hni' ah cmkwn môôy gôn maam koor bwan galbaar nwm. ²⁶ Na lwm 'maak loh maak srme' yoh coro mo maak gôn srnwm go' am le' pic ka'muul maak côn lôoc loh, 'Nai go' am le' hôôc loh na go' tep khwan. ²⁷ Nam na bwan méc lwang dé' Phra' Yésu, na swmkêc swmè' gôn gw' yoh ñak dwngdoong tèb khum Ge.

²⁸ Hôôc na lav " an ô' hak bwan ñak khrwang van dé' Ge, ô' go' ci le'." ²⁹ Nam na bwan ram pod Ge c' 'man gni' maam go' hngat na go' neeng dah loh sah na go' le' khwan caak pha'ñad dé' na. ³⁰ C' 'man gni' Phra' Yésu go' neeng sah pha'lang ni' hlian caak loh dé' Ge. Ge tang gaay yèèng dah gôn gw' gni' hôôc lav sah, 'Meh me' ñak khrwang van Ô'?"' ³¹ Savôk dé' Ge lav yo' Ge sah, "Mé guuñ ah gôn gw' knvér, hôôc Mé maañ, ' Meh me' ñak Ô'?'" ³² Phra' Yésu vér yèèng meh me' gôn yo' ge ñak. ³³ Na, go' neeng dah loh na sah ah hmeh ked khwan, na trywh ngo'. Na gaay dén knnuun juur tohna Ge hôôc 'mook Ge dé' lôôc jumnèèv. ³⁴ Ge lav yo' na sah, " Koon eey, hrlo' dwwm dé' bar tèèng an ba le'. Yoh cem an ba le' caak pha'ñad dé' ba." ³⁵ Nam Ge phuam srô, ah gôn yat dah rôông sala ge meh yông gaang gaay coro, lav sah, " Koon mé haan lèèv. Mé hnoong kuan Acaan tèèng hmeh? ³⁶ Nam Phra' Yésu bwan méc krloh lav gni', Ge lav yo' naay rôông sala sah, " Ha' ngo'. an dwwm naam ni'." ³⁷ Phra' Ông am an me' yoh broom Ge hrwnlwng Phide, Céém, pa' Coon hèèm dé' Céém. ³⁸ No oor yo' gaay dah gaang dé' naay rôông Sala hôôc Ge méc ah gôn twng wyh rèèng; No phuam yaam ôôr thuk hrñwam. ³⁹ Nam Phra' Yésu guud dah klwng gaang, Ge lav yo' no sah, "bo oor yo' yaam thuk hrñwam tèèng hmeh? Koon ñé' ni' am bwam dé haan na sih looc ploh." ⁴⁰ No oor yo' hvaay khray Ge. 'Nai Ge an gôn twng lôôc hlian dah nook Ge oor yông ma' dé' koon ñè' pa' gôn yo' no yoh broom Ge, hôôc Ge go' gud coro koon ñèni'.

⁴¹ Phra' Ông go' cap ti' koon ñè ni' hôôc lav sah, "Thalida, Khuum! " pè meh sah, " koon eey, Ô' lav yo' ba, reh khwan." ⁴² C' 'man gni' koon ñè go' reh khwan hôôc ñaang (siñè na bwan baarkal nwm). C' 'man gni' no go' oor yo' dé ngwt dé viir srme'. ⁴³ Phra' Ông am an no 'mook lwang gi yo' me'. Hôôc Ge lav an no dwang swng mah an na be'.