¹ Arata, ni awiya emo bauno zawagasa ago nao nomi Tuwa Tutu ra beraung ra ingwaing niye awiya ago yaese. ² Emo babuze eno ge eyero se nigae, ago ou miniro dau oko yaese, ago nao ingwang waing gege naese, ago Tuwa Tutu ra geme awiya gaya zawagai, tumodiyao gabu ra dopero, otao mani aratapu nasani, tau yero dopero mou mawe dipunasani mitaese. ³ Deka ayero bauno babuze eno ge eyero se nigae. Ago Tuwa Tutu ra aratamao ago nasani nao ingwang waing gege nasani otao mani eno hungugu ge memeko oko sinaese. Ou meko zo nao agera oko diya yaise. Bauno babuze ami mani bauno seseka awiya kora yero himeti yaya, ⁴ ago awiso re ibono agera aungne, awiya aratapu nasani naese. ⁵ Bauno babuze ami bauno seseka kora yero gipaya, ago kotumao agera kora yero diya nasani Tuwa Tutu ra beraung ra pewa yero mitasani, garo moko agera kora yero diya nasani, ibono agera aungna ge dipu nasani naese. Ago nao eyero narineya amizo, mani ena Tuwa ra ge eno inzao ge oko sari neya. ⁶ Deka ayero, emo seseka tugata ye nigiro nao agera etetero diya nasani nae. ⁷ Nona apakana nari nesa, aungna mokora , nika ni awiya buro ra ititi ingwaing, ayero emo bauno eno gipiti nasa, ago nao nina gosi nasani ago yari neya. Nupe, ni emo bauno gipiti nari nesa be aungna atu ge tani ta, gehiwao ta, ziyo hitao nao, awiya oko ye, ni kotungno baingtiro nao me ra bowi ge awiya emo bauno eno tugata ye nigae. ⁸ Bowi tugata yari nasani giro, akaing ingwaing ra dopero sarinesa, ayero yari nesa amizo, emo ena name eno iwo neya, awiya akaing zo pungno name eno ge meko sao teng oko yari neya. ⁹ Ago sou mani deka se nigae. Ago diya agera aungna ge dipu nasani, agera hese mitaese. Ago nao ingwang waing gege naya, diya agera yawa yawa naese, ago diya ra ge bera pungno, diya agera aungne ge matu oko yaese. ¹⁰ Sou mani diya agera aungna nona hungai oko paese. Ago zoma, diya agera eno nao ingwang waing gege naya diya agera yawa yawa re mitaese, ayero nari neya amizo, nao agera ami emo ra moko uwai, Tuwa Tutu ra bowi ge tugata nename ewiya de ika yari neya. ¹¹ Tuwa Tutu ra mono awiya emo bauno apakana teng yena. ¹² Tuwa Tutu ra mono ami name nai gipiti noi, name tangi eungna nao memeko awiya daigaiti nasani noname. Mono ami be meko eungna atu name nai gipiti noi name kotumao ingwaing re Tuwa ra nao ingwaing ago nasani noname. ¹³ Anasani name diti gitau nasani Tuwa Tutu aungne Yesu Kristo sorao emo naname aungna bao be waegao zeyang zeyang re awiya diya yari nename. ¹⁴ Name sao tauyao daigairo, pasena beraung giti nauwa aeno, Yesu name eno taung nuna bayao yero, name pungno saenu name pewa yero, name gerao dubu nuna yewa. Name awiya gerao dubu nuna ware, name gehera yero buro ingwang waing naneme. ¹⁵ Be apakana ni emo bauno eno ge tugata nasani, ago dong doti nasa, ago ge tugata nesa awiya ago nari neya. Emo bauno sao tauyao daigaiti nasani nowa, aeno ge tauya nibaung sero nao memeko agera awiya himeti. Turena tarena nasa emo ena giro, mani ka maingko zowa sero, ge nina po augairo ni po hosa neya.