¹ Na Pol, Tuwa Tutu ra buro mani, nupe Yesu Kristo ra aposol, na emo bauno gerao dubu nuna aungna tumodiyao dong doti nasani, nupe ago soremana geme ra susuwa zawa gairo, Tuwa Tutu ra nao ago yaese, aeno nu na iyengtina. ² Na ago soremana tumodiyao gabu ra dopero tau yero diya mitaya, Tuwa Tutu ago eno nao tauyao mitao gege mitao awiya pugari niya. Gitau gatau otu Tuwa Tutu nao masi mitao gege mitao awiya name eno pitari sena, awiya pugari niya, nu oko gehiwena. ³ Tuwa be zo mena giginu mitaungna aungna atu, emo uwenu bowi nuna sesero bautu newa, na deka bowi awiya sanese nune na yau sena. Arare na Tuwa ra be gege ago yero buro awiya yari nena. ⁴ Taitus na ni eno imagi ewiya nena, ni awiya mani nana nibaung, tumodiyao nina awiya deka nanage ine ara. Tuwa Tutu aungne Yesu Kristo ra mono, aungne eyare ge, ni aungne mitaise. ⁵ Na ni Krit gutu ra atu doro bumuwang aungna susuwa awiya era, buro ena oko kora yero zawa gairo besugao doro bumuwang, awiya kora yero zawagasa besugai, ge mena ni eno sewang awiya ago nasani, napo babuze apakana aungna mokora simai apakana buro gao pugai pae. ⁶ Simai ra meko zo dubu ra beraung ra oko mitaise, simai awiya nu bauno dekaka ra iu gege yero mitaise, Tuwa ra beraung ra atu nao nomi meko niye, simai ra awiso nao awiya oko yaese, nupe, simai ra awiso ziyo hititi nasani, aira maung ra ge oko daese. ⁷ Name ganame zawagari niya awiya, bowiyao garo Tuwa ra, aungna buro mani awiya, nu Tuwa Tutu ra buro apakana awiya diya noiya. Arare nu angyao nuna etetero naise, emo bauno pore nuna zo oko gae, buro yazo baina puro niya ayero sinasani emo bauno oko diya yaise. Simai nu dubo meko oko mena paise, nu ou tauya miniro dau oko yaise, nu emo re hinade tebe tabe oko yaise, nu emo wau re yari sero kotumao bainare oko pugaise. ⁸ Nu awiya otao gamao aratamao mani yaise, nupe nu awiya, nao ingwangwaing aratapu nasani, kotumao ingwaing gege ago nasani naise. Nu etetero nao gabu ra nasani Tuwa Tutu ra nao ago naise. Nupe nu nao nuka nuna dema kora yero diya naise. ⁹ Nu geme ra bowi gipewa pungna awiya hingiro tau yari niya amizo, nu gipao ingwaing aungna dopero otao mani ena kora yai geme tumodiyari neya, nupe, mani ena ge nuna oko nigiti nowa, awiya gaya zawa gariniya. ¹⁰ Soma aungna gedao emo dubu baina miteya ara, ago Yuda emo dubu baina atu mitowa awiya, emo ra taung tata kapao ra tau nasani mitowa ara. Ge agera apakana me aung, gehiwao gege sinasani mitowa. Ago emo bauno etegaiti nasani, nupe emo bauno unung nai mekora gaiti nowa. ¹¹ Ago emo dubu awiya, nao ena memeko, megao nao awiya gipi nowa emo bauno ago nasani tumodiyao besero mitao agera garo mokora awiya sisi gaiti nowa ara. Arare ni emo dubu awiya gaze, nao meko awiya nupe oko yae. ¹² Gitau otu Krit ra nigao emo zozo ge zo eyero senu mitoiya, "Krit dubu awiya be aung gehiwi nasani mitowa, ago emo dubu memeko nibaung wo eu ra inene, ago kimasi nasani, minao zo baina nowa." ¹³ Ge ewiya ge me ara, arare ago dubu aeno ge tauya nibaung se, nao meko awiya doro, ago Tuwa Tutu tumodiyae. ¹⁴ Ago, Yuda emo ra upipi nigari sero oko dago hawaese, nupe emo dubu geme bauta potero nowa, aungna sao tauyao beraung giti awiya deka oko nigaese. ¹⁵ Mani zo nu Tuwa ra beraung ra atu pewa yero mitari niya awiya, nona apakana nuna hina awiya pewayao ara. Arata mani zo nu moko nuna beingtire mitasani, nupe tumodiyao nuna Yesu ra hina oko mitiya awiya, nona apakana nuna hina awiya beingtire gege ara. No eno oko, moko nuna aungne kotumao nuna apakana awiya beingtiya mitiya. ¹⁶ Be agera zo ago Tuwa Tutu gosineya ayero sineya, arata nao agera zo gipiti niya awiya ago Tuwa Tutu mena bauta potero miteya. Ago dubu awiya gedao momoko, ago nao ingwaing zo oko yari neya. Tuwa ago zo oko aratapu noiya.