¹ Kotumao agera uwi nasani ge nupe se nigae. Ago taung ra diya agera tangi eungna miteya aungna ge dipu nasani, agera hese mitasani buro ingwang waing yari sero kang gairo mitaese. ² Nupe sasa nigari neya awiya, ago mani zo eno ge meko oko saese, nupe ago bera hinase oko yaese. Ago be apakana eyare ge sinasani, otao mani eno, nao ingwang waing nasani mitaese. ³ Ni gasa zawa gari niya awiya, name gitau ge dedu nasani, kotumao ingwaing re oko mitauwa. Sanda ra putoung zo name watiungnu, name taung piti ra aratamao, aungne nao memeko, ami name bunenu, name demese mitauwa. Name otao mani eno dubo meko pupu nasani, nupe, otao mani eno ge memeko sinasani nauwa, name apakana otao mani re hina iwo nasani mitauwa. ⁴ Arata Tutu soremao emo naname, aungna dubo bayao aungne aratamao kasaye daung gaiti nenu, ⁵ Tuwa Tutu name meko ra atu pungnu kapete gairo bung ingwaing ra yewangme ara, naneme taung dero buro zo yero, ingwaing yari yewa agiro oko yena, aung ara, arata nu name eno hoamao nuna gipero, name meko ra atu pungna. Nu name soreungno saenu name mani wuima ine yewangme, Dang Oweno name eno nao seka pugaina. ⁶ Yesu Kristo, emo name meko ra atu sorero pungno pu ingwaing ra gaina, aungna taung dao eno gege, Tuwa Tutu Dang Oweno ra putoung baina nibaung name eno hasa gaina. ⁷ Kristo name ho aungno name saenu, name Tuwa Tutu ra beraung ra emo bauno pewayao yewangme, aeno gege Tuwa Tutu name gerao dubu nuna sero, name nao masi mitao gege mitao awiya panemese sena, arare name heme, nao masi aeno diti nasani, diya ma diya nename ara. ⁸ Ge ewiya geme nibaung ara, name ge ewiya tumodiyari nename ami ingwaing niya. Ni nona eungna ge tauya nibaung se, emo bauno Tuwa Tutu tumodidi nasani nowa awiya, tau yero dopero buro ingwang waing yae. Nao emi emo bauno sorepu noiyare, nao ewiya nona me nibaung ara. ⁹ Arata ni emo ge matu hinase nowa arita, emo ewowo ra yazo eno hinase nowa arita, emo sao tauyao ra susuwa eno hinase nowa, aungna ge eno oko dago hawe. ¹⁰ Mani zo ninage moko ra atu, dubu gausao ra nao puro kasa yai giro, mani awiya pungno be dekaka ta eto ayao, nu eno gazao ge sasa, ge nina oko niga yai giro yore batagai, ¹¹ mani ayao awiya, nu nai ingwaing mena doro, nu pasena nasani nuka nu nata gera niya. ¹² Na be noungne Atemas ta Tikikus iyengtana bo kasaye nina hina yai giro, ni mena bungno Nikopolis napo baina aungna atu na taung, no eno oko, naung bera awiya, na atu mitari sero kotupu nena. ¹³ Ni Zenas, sao tauyao ra nigao mani aungne, Apolos aungne awiya mena iyengti baeto, angyao agerato aungna asoko noiye, awiya apakana teng kora yero, agoto mena iyengti baeto. ¹⁴ Emo bauno dubu naname awiya, buro ingwaing yao ra nigao pungno, otao mani dora botiyo tapu neya awiya sorepu naese, ago nete, yazo ou suwao, awiya tebe puro nasani, ago Tuwa Tutu ra aratamao oko ago nasani mitaneya. ¹⁵ Emo bauno apakana etu na aungne dema mitowa, ami ni arugaiti neya. Nupe,emo bauno nami Yesu tumodiro nasani, nage aratapu nowa, ago dubu awiya arugaiti nenage, se nigae. Tutu ra eyare ge nige apakana aungne mitaise.