¹ Aa'o nairi nio Iehova meree hi'airi nuu omo'uio uubi ma orododiai. ² Nianaamuido gi'epu eremai iraromoi rautu ma iimauboi, Iesu nimoido gi'epu iraromoida oroi'ioi ioroomohai everai, mia nibo ododiairo pioro Iehova gee'ii ovairi. ³ Nio Iehova uubi hi'ai kairi mia biaka maamiora buheebaira orovava'oia iraromo, oo mia iraromo nana aamiia tataha oo inahobe oroi'ioi oo'aai. Ire everai naanai Iehova taana uubiido mia naana baka. ⁴ Memiho evera vadeipii ooraduutii biaka, iraromo tataha naanai ooraduutii biaka, via mamaa evera vadedubuai aai biaka--- nii tuunioha memiho naanaaka. Nio tuunioha hivioi Iehovaido keito vadeha ma aai. ⁵ Nio uumoo ma oo'ai, aa'o everai mereei Iesuire via Iehovairei ne'eida orovaabai eveeai bia ouka. ⁶ Mere ata erematuhuti vade diamoi oroovidio naa biaka, ihu aa'o naanairi Iehova niehui ooi ouka nuuido oroovidio tataha uubiido. ⁷ Nuuri aa'o evera uubii rautu orodabuudio naa biaka. ⁸ Nio du'omuida pe'idioumo inai Paidubui uubi ii'iu moiri doo'ou nio eeheida e'idio kaumo. Ka tuunioha hivioi eeheida e'idio uubiito ma araahoi ⁹ [ eeheiro ivoi ouka hiiro huraire, mia hi'aire, naa hi'aire, orohaa hi'aire, ¹⁰ via Paidubui gee'i ovai naanaiha ma erematomudioi. ¹¹ Du'omui ne'ei hura tataha naanai aimo uubii rautu orodabuudio naa biaka, ni korii haito ma ivohuu'oi. ¹² Hiipo hi'aika nii goroida iaaimoi naanai koriida ivadueiri. ¹³ Eeheiro naa ata koriida agedeea, nuu idomai gaboida ereedeeaka. ¹⁴ Koriida na'uro vereedea kiauka nuu eehei naaka. Ka nuuri ihu everai ii'aaka, '' Maihihioi, nio uro irou uubio, via nituoida ma ireibuai, ka Paidubui eeheiro nio imeeviai ouka.'' ¹⁵ Nio himia e'idio oroi'ioi ma ororoibota tidioi--- iraromo tatahaida nai ova'ati beha uubi biaka inai iraromo rautuida nai ova'ati uubika. ¹⁶ Hia'ei oo'aida sans keekei iusha ma aai mabu doo'ou memiho uriioi hivio mabuika. ¹⁷ Aa'o nairi avaavoha orododiai naa biaka, inai uumo ma ii'i Paidubui iraromoi hi'ai na'ura. ¹⁸ Avaavo oboi idio naa biaka, nio tiinoi hiohio aai vouaida memiho naanaha aai ouka. Tana Uriioiha ma eidai noo goroito, ¹⁹ Nianaamu atai rautu uriio oroi'io gidoi ma erematomudioi, via mia emaraahue diamoi ma aai Paidubuido tuunioho kaukaui rautu, ²⁰ via Iesu painaida tuunioha naanairi keito vade ma aai Abiai Iehovaido. ²¹ Nianaamu atai rautu mia e'idio oroi'ioi ma obodii Iesu emaabeiri. ²² Maamio, dububai rautu ma orodabuudioi, Paidubuido orodabuudio everai. ²³ Dubuika femlii epuuhoroi, Iesuro tanamotoi epuuhoro aai everai, via nimo oroi'ioi imovou merei nuu behakaa. ²⁴ Ka nuuri tanamotoi Iesuido orodabuudio everai, maamioi dububaido everai ma orodabuudioi tuunioha naanaida. ²⁵ Dububaio, nio maamioi gi'epu ma imai, Iesuro tanamotoi gi'epu iemai everai, via oroi'ioi nuuri ioroomoha. ²⁶ Iesu oroi'ioi aiporoomoha mabu nuu nioka tanamotoi Iehovaido ma omohairi, nuu vadeito povoru'oo, ²⁷ ka nuuido toovio hi'a ma oo'aai, memiho keehi ata tataha. ²⁸ Ka nuuri atuu everai dububairo nii himia hi'a maamioi gi'epu ma imai mabu nii duupii hapuoika. ²⁹ Mereataro nuu himia hi'a duupii araibodioito modobo biaka, ii nuuro oovotoiha ouka via vemaabeea, Iesuro tanamotoi ovoto via emaabee everai, ³⁰ mabu nimo nuu duupii hapuo aamiiaka. ³¹ '' Aa'o nairi dubui abiara maamurai imehaika oboi rautu ma oradabuairi ka niiti dupi kaa'u i'iika.'' ³² Ihu oopiova tidio vade hi'ai geema hi'aka--- inai naanui mooro Iesuire via tanamotoi reiri nooradueka. ³³ Ka nioido atuu everaika, nohimia oboi gi'epu ma emai no himia atai kairi, via oboiro nu dubui ma emaabei.