¹ Moo, aa'o nairi, Paidubui dibura mereeiri, ainooraroka nio iahooida iimauboi ioovahoroumoi everaiha ma odai. ² Ainooraroka gorohi'a e'idioi makaida ma e'idioi via uubi aamiiaito ma araahoi via complein tataha oromotii beha oroi'ioiha ma e'idiou moiri, aa'o ohuida nianaamuido gi'epu eremai iraromoi ma oo'ai nio tuiaida. ³ Ma emahibai orodabuairi nianaamuido ge'ebadii oroi'ioi ma oo'aairi uriioi goroida. ⁴ Duupii kaa'uubuoka via uriioi kaa'uubuoka, nuuri Iehovaro nio iraromoiri kaa'uubuoha piahootiai. ⁵ Ka Paidubui kaa'uubuoka, pupuo iraromoi kaa'uubuoka, tana uriioito obo ooru'oi kaa'uubuoka, ⁶ via Iehova kaa'uubuoka tuunioha uubii Abiaika, nuuro ia'aaka, via nuuro ivaabaika tuunioha naana geemaida. ⁷ Nimo uubi kaa'u kaa'uido mia pupuo iraromoi tauo pinimio Paidubuiro himia inimioi naa uumoi modobo modoboida. ⁸ Paimiairo iarooi everai; '' Nu ohuhi'a makaito ioroida, diburaida ie'idioumoi uubii aipivio nuuro, ka ova'ati kaa'u kaa'ui nuuado pimio uubiido.'' ⁹ Ihu vade diamoi na'ura ''nuu aipioroi,'' everaito ma eidai, nuu rautu tauo poo'uo hepu geemai ohuida goro hi'ai oroi'ioumo uubii makaito... ¹⁰ Goro hi'aito ioo'uoi mereei rautu via nuuro pioro Iehova pai eraarai oo'aa ne'ei ii'aa vati vatiiro emioraito, tuunioha naana geemai nuu eraarai goroida ma ii'aairi. ¹¹ Iesuro uubi aamiiai apostol piapuituti, aamiiai ivengelist, aamiiai pastoa via aamiiai tiisia. ¹² Aa'o uubii ova'ati vati vatii aipimapui tuti Iehova taana uubii pupuo ma ivai moiri uriio ova'atiiri, Paidubui painai ididiiri. ¹³ Ka pupuo iraromo kopiha maniohiiaimo Iehova mereei iraromo naanai uumoo manii'iumo, ka nimo naa uumoo manii'iumo Iesu aha iraromo evera hi'ai. ¹⁴ Iesuro nimo ainiiditika mabu nimo meree keeke evera auboiro ivio ivoo'uo imodobua everai tana nimodobuaka, via konoboiro ivodaudio evera tana nivodaudioka erematuhuti uubii erematomudio naanairo. ¹⁵ Ka nuuri gi'epu irromoida oroha hi'aiha manoora duutiumo, nimo Iesu rautu maniaupai moiri tuunioha gabo gaboida, mabu nuu epuu horoika. ¹⁶ Nuu uumito duupii himia himia ii'aaida ne'eida kaa'uubuoha idabuaika ma orovaabai moiri, ka nii orovaabai modoboida duupii aupaika mabu nu himia gi'epu eremai iraromoi oo'aairi. ¹⁷ Aa'o nairi Iesu painaida mooro nio uumo nivaika, Jentael uubii e'idio everai tana e'idio kaumo, tiinoida mia iraromo tataha. ¹⁸ Ni tuunioha hivioi du'omui naanaito iraromo kaumo, Iehova ne'ei oroi'ioito nii ooradue keeke bia ii'aaka mabu nii kaukaui ia'eraito kooko hi'aka. ¹⁹ Ni hiipo tatahaka via tauo porotutuaimo duupii ereemio beha oroi'ioi aimo uubii tuito, via tuunoiha hivioi ni memiho naanai erematomudio kaumo. ²⁰ Inai nio Paidubui Iesu rautu ma e'idiou moiri ieidaimoi oroi'ioi nuu biaka. ²¹ Mooro nio ainimoadueka ihu everai, nioro Iesuri tauo poroovidioumo via nio nuu obodoo uubiiri orohaa hi'ai uumo tauo pii'iumo. ²² Nio epuuha iaaimoi naana memihoi itaumai everai tauo pimatomudioumo, nio rautu epuito ie'idioi dubui ma otaumai. Aa'o memiho tauo porovai mabu nu himia idodiai naana memiho memihoiri. ²³ Nio kaukauire iraromoire uriio ori'ioito oio ma ivai, ²⁴ via Iehova ne'ei oio dubui ma aamairiai--- orohaa hi'a via taana hi'a e'idio oroi'ioida ma e'idiou moiri. ²⁵ Aa'o nairi erematuhutii ma emehai, ka nio himia kaa'u kaa'u oroha hi'aiha ma ooraduei himia taitaii e'idio mereeido, mabu nimo atuu uubiika. ²⁶ Uduoi ma aai via mamaa hi'aida edeea naa biaka. Uduoi aaida aha ovodau naa biaka hivioi ma oopiovai. ²⁷ Memiho uriioi ova'ati hia'e omoha naa biaka. ²⁸ Pio agiaidioi mereera doo'ou pio aiaute. Nuu himia pauo ma aai, himia tuuito naa ata ma ododiai, mabu nu himia hi'a naaida omohai ouka nuuro ovaabai iraromo mereei. ²⁹ Noo hunupoida mama vade ooradue naa biaka. Mia orovaabai vadeipiiha ma ooraduei aamiiai iiditiiri, nii himia iraromo everai, via aa'o vadeipii nio irorovidioumo uubiido orovabai diamoka. ³⁰ Iehova Tana Uriioi gi'epu gi'epu ododiai naa biaka, mabu nuu beharo pomoopai nio aa'o hivioito ma ivodairi. ³¹ Gigia oroi'ioi ma iahuurai, niehu komukomu, va'ii ivi ivi, hiavoito oromoovii, via mere atai painai ahoo beha mamaa everaito, aa'o naanai memiho uriioi ne'eida orooho kaumo. ³² Nianaamu ataido orovaabai iraromoi ma obodii, mia gi'epu eremahibidio kaukauito nianaamu atai mamaai ma emahuurai, Iehovaro Iesu goroida ie'idioida nio mamaai imahuurai everai.